Sovrin
Sovrin
ព្រោះតែចង់លើកកម្ពស់អក្សរខ្មែរ សហគ្រិនពីរក្រុមបានរួមគ្នាបង្កើតជាពុម្ពអក្សរខ្មែរដាក់ឲ្យប្រើប្រាស់ដោយសេរី
NEWS 7 years ago
សហគ្រិនវ័យក្មេងពីរក្រុម ដែលសុទ្ធសឹងតែជាក្រុមមានកេរ្តិ៍ឈ្មោះក្នុងការរចនាម៉ាកសញ្ញា និងការរចនាពុម្ពអក្សរខ្មែរ បានចាប់ដៃគ្នាក្នុងគម្រោងរយៈពេល១ឆ្នាំ ដើម្បីផលិតពុម្ពអក្សរខ្មែរថ្មីសម្រាប់ឲ្យប្រើប្រាស់ដោយឥតគិតថ្លៃ នៅលើប្រព័ន្ធប្រតិបត្តិការកុំព្យូទ័រ Window និង macOS។ ពុម្ពអក្សរ ដែលមានឈ្មោះថា "អាក្បាលធំ គោព្រៃ ផល្គុន" (AkbalThom KOUPREY Phaguan) និង "អាក្បាលធំគោព្រៃចេត្រ" (AkbalThom KOUPREY Chaet) ត្រូវបានដាក់ឲ្យទាញយកជាផ្លូវការហើយកាលពីពេលថ្មីៗនេះ ក្រោមការផលិតរួមគ្នារវាងក្រុមហ៊ុនជំនាញរចនាម៉ាកសញ្ញា "គោព្រៃ" និងអ្នកផលិតពុម្ពអក្សរខ្មែរ "អាក្បាលធំ" ។ គោលបំណងនៃការផលិតពុម្ពអក្សរទាំងនេះឡើង គឺជាចលនាមួយក្នុងការលើកកម្ពស់ការផលិតពុម្ពអក្សរខ្មែរឲ្យកាន់តែមានភាពរស់រវើកនិងសំបូរបែបជាងមុន ហើយដើម្បីជាគំរូដល់យុវជនជំនាន់ក្រោយឲ្យងាកមករចនាពុម្ពអក្សរខ្មែរថ្មីផងដែរ។
ប្រធានផ្នែកគំនិតច្នៃប្រឌិតនៃគម្រោងរចនាពុម្ពអក្សរ លោក នូ វិចិត្រ (និក) បានលើកឡើងថាការផលិតពុម្ពរួមគ្នានេះគឺបន្ទាប់ពីលោកនិងក្រុមការងារយល់ឃើញថា ចំនួនពុម្ពអក្សរខ្មែរនៅមានកម្រិតនៅឡើយ ដែលទាមទារឲ្យមានការផលិតបន្ថែមទៀតដើម្បីផ្តល់ជាជម្រើសដល់អ្នកប្រើប្រាស់ទូទៅ។ លោកនិយាយថា ការផលិតពុម្ពនេះក៏ជាស្មារតីគាំទ្រសមត្ថភាពអ្នករចនាពុម្ពអក្សររបស់ខ្មែរ ក៏ដូចជាការក្រើនរំឭកអំពីកម្មសិទ្ធបញ្ញា ខណៈដែលស្ថាប័នមួយចំនួនតែងរំលោភយកស្នាដៃពុម្ពអក្សរខ្មែរដែលច្នៃសម្រាប់ធ្វើអាជីវកម្មទៅប្រើប្រាស់ក្នុងគោលដៅពាណិជ្ជកម្មដោយមិនផ្តល់ដំណឹងជូនដល់ម្ចាស់ស្នាដៃ។ បន្ថែមពីនេះលោកនិយាយថា៖ "ពួកខ្ញុំគិតថាចង់បង្កើតពុម្ពនេះ ដើម្បីបំផុសគំនិតឲ្យអ្នកប្រើប្រាស់ផ្តល់តម្លៃលើពុម្ពអក្សរខ្មែរជាងមុននិងបំផុសគំនិតដល់អ្នករចនាដទៃទៀត ដើម្បីឲ្យងាកមកច្នៃពុម្ពអក្សរដោយខ្លួនឯងដោយសារពុម្ពអក្សរខ្មែរបច្ចុប្បន្នមានជម្រើសតិចក្នុងការជ្រើសរើសបើធៀបនឹងពុម្ពអក្សរអង់គ្លេស"។
អ្នកជំនាញច្នៃពុម្ពអក្សរ "អាក្បាលធំ" លោក នៅ សំណាង យល់ឃើញថា និស្សិតជំនាន់ក្រោយជាច្រើនដែលសិក្សាផ្នែករចនាម៉ូដក្តី និងផ្នែក Graphic Design ក្តី ភាគច្រើនសុទ្ធតែមានចំណេះដឹងក្នុងការរចនាពុម្ពអក្សរ។ លោកនិយាយថា៖ "ខ្ញុំបានដឹងថាមាននិស្សិតដែលគាត់រៀន ឌីហ្សាញ មានរៀនថ្នាក់មួយដែលតម្រូវឲ្យនិស្សិតរៀនរចនាពុម្ពអក្សរដោយខ្លួនឯង"។ ទោះជាយ៉ាងនេះក្តី លោកបង្ហាញភាពសោកស្តាយជាខ្លាំងដែលការរចនាពុម្ពអក្សរខ្មែរ មិនសូវទាក់ទាញសិស្សនិស្សិតភាគច្រើនឲ្យរើសយកជាអាជីព ឬយកគំនិតដែលខ្លួនមានមកច្នៃឲ្យក្លាយជាពុម្ពអក្សរដែលអាចប្រើប្រាស់ជាផ្លូវការឡើយដែលនេះជាចន្លោះប្រហោងទាំងការអភិវឌ្ឍអាជីព និងការអភិវឌ្ឍសង្គម។ ស្របនឹងមតិយោបល់របស់លោកសំណាង លោក សុត សេរី ជាអ្នកសម្របសម្រួលការរចនាពុម្ពអក្សរ នៅក្នុងគម្រោងនេះ បានបន្ថែមថាការរចនាពុម្ពអក្សរហាក់មិនមានភាពលំបាកឡើយ ដែលសិស្សនិស្សិតអាចងាកមកច្នៃអក្សរដោយខ្លួនឯងដោយចំណាយពេលខ្លី។ លោកនិយាយថាដោយសារយុគសម័យបច្ចេកវិទ្យាបានផ្តល់មកនូវភាពងាយស្រួលជាងមុន ការស្រាវជ្រាវរកគំនិតថ្មីដើម្បីច្នៃពុម្ពអក្សរមួយមិនមែនជាការលំបាកនោះឡើយ។ លោកសេរី ត្រូវចំណាយពេលប្រមាណ១សប្តាហ៍ សម្រាប់ការស្រាវជ្រាវ ស្វែងរកគំនិតដើម្បីផលិតពុម្ពអក្សរថ្មី និងការគូរពុម្ពអក្សរ។ បន្ទាប់ពីនោះ ក្រុមការងាររបស់ អាក្បាលធំនឹងចំណាយពេលប្រមាណ ២សប្តាហ៍ទៀត ដើម្បីតម្លើងពុម្ពអក្សរសម្រាប់ដាក់ឲ្យប្រើប្រាស់។ គម្រោងរយៈពេលមួយឆ្នាំនេះ គ្រោងនឹងផលិតពុម្ពអក្សរចំនួន១២ ដោយតោងយកឈ្មោះតាមខែចន្ទគតិទាំង១២របស់ខ្មែរ និងដាក់ឲ្យប្រើប្រាស់តាមខែនីមួយៗ។
បច្ចុប្បន្ននេះ ពុម្ពអក្សរទាំងពីរដែលបានចេញផ្សាយរួចកំពុងមានការគាំទ្រពីអ្នកប្រើប្រាស់ជាបន្តបន្ទាប់។ អ្នកគ្រប់គ្រងគម្រោង កញ្ញា ថុក ថាម្នីសង្ឃឹមថា ក្រៅពីការគាំទ្រគម្រោងពុម្ពអក្សរខ្មែរទាំង១២ ក៏នឹងបានទទួលមតិត្រលប់ពីសំណាក់អ្នកប្រើប្រាស់ ដើម្បីច្នៃពុម្ពអក្សរទាំង១០ទៀត ដែលគ្រោងនឹងចេញផ្សាយនាខែបន្តបន្ទាប់ឲ្យកាន់តែមានភាពទាក់ទាញនិងងាយស្រួលប្រើប្រាស់ជាងមុន។ លោក អ៊ួង វិសាលម៉ានិត និង លោក ហ៊ិន គឹមយាន ជាជំនួយការស្រាវជ្រាវ និងផ្សព្វផ្សាយឌីជីថល និងជំនួយការរចនាក្រាហ្វិក ក៏អំពាវនាវឲ្យអ្នកប្រើប្រាស់ឲ្យចូលរួមទាំងអស់គ្នាដើម្បីលើកកម្ពស់ស្មារតីរចនាអក្សរខ្មែរ ក៏ដូចជាចូលរួមគោរពសិទ្ធអ្នកផលិតឲ្យបានខ្ជាប់ខ្ជួន ដើម្បីលើកទឹកចិត្តអ្នកផលិតឲ្យបន្តការរចនារបស់ខ្លួនបន្តទៀត។ គួរបញ្ជាក់ថា ពុម្ពអក្សរថ្មីរបស់គោព្រៃសហការជាមួយអាក្បាលធំអាចទាញយកដោយឥតគិតថ្លៃនិងអាចប្រើប្រាស់បានដោយសេរីទាំងការប្រើប្រាស់ឯកជន និងការប្រើប្រាស់ក្នុងការធ្វើពាណិជ្ជកម្ម។ ដើម្បីទាញយកពុម្ពអក្សរទាំងពីរសូមចូលទៅកាន់តំណភ្ជាប់ដូចខាងក្រោម៖
Article by VA SONYKA
