Sovrin
Sovrin
សិប្បកម្មឥដ្ឋការ៉ូខ្មែរដែលបង្កប់ទៅដោយរសនិយមដ៏ស៊ីវិល័យកំពុងលេចមុខមាត់ឡើងវិញ
TRAVEL & LIVING 7 years ago
មិត្តអ្នកអានធ្លាប់ចូលទស្សនាប្រាសាទទេវាវិនិច្ឆ័យក្នុងបរិវេណព្រះបរមរាជវាំងចតុម្មុខមង្គលដែរឬទេ? បើធ្លាប់ តើអ្នកដឹងទេថា ឥដ្ឋការ៉ូដែលមានក្បាច់រចនាដ៏ស្រស់សោភាទាំងនោះគឺជាឥដ្ឋការ៉ូខ្មែរ?
ខណៈនៅកណ្តាលរាជធានីភ្នំពេញ អគារធំៗ ខ្ពស់ៗ ជាច្រើនកំពុងប្រជែងសម្រស់គ្នាយ៉ាងដេរដាស នៅក្នុងរោងសិប្បកម្មធំល្មម ដែលពេញប្រៀបទៅដោយឥដ្ឋការ៉ូម៉ូតប្លែកៗជាច្រើនគំនរ បុរស៣នាក់ពាក់អាវយឺតដៃខ្លី ស្លៀកខោជើងខ្លី និងបិទម៉ាស់កំពុងធ្វើចលនាដៃយ៉ាងរហ័សរហួន ដើម្បីផលិតឥដ្ឋការ៉ូខ្មែរ។ ដំបូងពួកគាត់លាបប្រេងលើទ្រនាប់ការ៉េប្រវែង២០សង់ទីម៉ែត្រ រួចយកពុម្ពម៉ូតមកចាក់ពណ៌ ហើយរោយស៊ីម៉ង់ត៍ស្ងួតសុទ្ធពីលើបន្តិចដើម្បីឱ្យជក់ពណ៌។ បន្ទាប់មកទៀតយកស៊ីម៉ង់ត៍ដែលលាយជាមួយខ្សាច់បន្តិចមកដាក់ឱ្យពេញ រួចយកទៅសង្កត់ក្រោមដុំដែកទម្ងន់ជិត១៥០គីឡូក្រាម រួចបកឥដ្ឋការ៉ូចេញពីពុម្ព យកទុកចោលមួយថ្ងៃ ហើយចុងក្រោយត្រាំទឹកប្រហែល៥ម៉ោងទៀត នោះឥដ្ឋការ៉ូទាំងនោះនឹងអាចប្រើប្រាស់តាមតម្រូវការបានហើយ។ លំនាំរបៀបនេះអាចឱ្យពួកគាត់ផលិតឥដ្ឋការ៉ូបានពី ១៥០ ទៅ ៣០០ ឥដ្ឋក្នុងមួយថ្ងៃ អាស្រ័យទៅលើក្បាច់ និងពណ៌របស់ម៉ូតឥដ្ឋនីមួយៗ។ សូមបញ្ជាក់ថា ប្រតិបត្តិការណ៍ខាងលើនេះ គឺការផលិតឥដ្ឋការ៉ូខ្មែររបស់សិប្បកម្ម តាំង ហេងស្រេង។
សិប្បកម្មនេះត្រូវបានបង្កើតឡើងវិញនៅចុងទសវត្សរ៍ឆ្នាំ៨០ ដោយលោក សៀង ហួរ។ លោក ហួរ រំលឹកថា គាត់ចេះរបៀបផលិតឥដ្ឋការ៉ូនេះពីឪពុករបស់គាត់។ ហើយលោកមិនចង់ឱ្យអាជីវកម្មដែលឪពុកលោកបានបង្កើតឡើងតាំងពីសម័យសង្គមរាស្រ្តនិយមនេះបាត់បង់នោះទេ ទើបលោក និងម្តាយសម្រេចចិត្តដំណើរការណ៍វាឡើងវិញតែម្តងទៅ។ លោកបានបន្តទៀតថា តាំងពីដំណើរការណ៍រហូតដល់សព្វថ្ងៃ ការផលិតឥដ្ឋការ៉ូខ្មែរបានជួបប្រទះបញ្ហាជាច្រើនដូចជា ការប្រកួតប្រជែងទីផ្សារជាមួយឥដ្ឋការ៉ូបរទេស កង្វះធនធានមនុស្ស (កម្មករផលិត) និងការធ្លាក់ចុះនូវរសនិយមប្រើប្រាស់ឥដ្ឋការ៉ូខ្មែររបស់ប្រជាជនខ្មែរផ្ទាល់តែម្តង។ លោកហួរ ពោលដោយញញឹមបន្តិចថា ទើបតែប្រហែល ៤ទៅ៥ឆ្នាំ នេះប៉ុណ្ណោះ ដែលនិន្នាការប្រើប្រាស់ឥដ្ឋការ៉ូខ្មែរមានការកើនឡើងបន្តិចវិញ ហើយបើទោះជាយ៉ាងនេះក៏ដោយក៏អតិថិជនភាគច្រើនគឺជាជនបរទេស និងប្រជាជនខ្មែរដែលត្រូវការប្រើប្រាស់ឥដ្ឋការ៉ូខ្មែរ ដើម្បីតែសាងសង់វត្តអារាម និងបើកអាជីវកម្មផ្សេងៗដូចជា សណ្ឋាគារ ឬហាងលក់ទំនិញផ្សេងៗប៉ុណ្ណោះ តែការប្រើប្រាស់ឥដ្ឋការ៉ូខ្មែរសាងសង់លំនៅឋាន នៅតែមានចំនួនតិចតួចនៅឡើយ បើប្រៀបធៀបទៅនឹងសម័យសង្គមរាស្ត្រនិយមដែលមានការពេញនិយមជាទីបំផុត។ លោកបានឧទានដោយក្តីភ្ញាក់ផ្អើល អតិថិជនខ្មែរម្នាក់បានពោលនៅមុខលោកថា តើសម័យនេះហើយនៅផលិតឥដ្ឋការ៉ូខ្មែរទៀត? តើផ្ទះប្រជាជនខ្មែរណាខ្លះដែលនៅក្រាលឥដ្ឋការ៉ូខ្មែរទាំងនេះ?
ឥដ្ឋការ៉ូខ្មែរមានទំហំត្រឹមតែ២តឹកប៉ុណ្ណោះ។ ជាមធ្យមសិប្បកម្ម តាំង ហេងស្រេង ផលិតបាន១០០ម៉ែត្រការ៉េក្នុងមួយខែ។ ចំណែកតម្លៃវាគឺនៅចន្លោះពី១២ ទៅ១៧ដុល្លា អាស្រ័យលើម៉ូតរបស់ឥដ្ឋទាំងនោះ។ ម៉ូតដែលពេញនិយមបំផុតមានដូចជា ផ្កាចន្ទន៍ ផ្កាមួយទង និងច័ក្កច័នបញ្ឆិត ជាដើម ហើយម៉ូតខ្លះមានអាយុកាលរហូតដល់១៥០ឆ្នាំក៏មានដែរ។ ក្រៅពីម៉ូតក្បាច់ផ្កា និងក្រឡាឆ្នូតផ្សេងៗ ឥដ្ឋការ៉ូខ្មែរក៏នៅមានម៉ូតលាតសុទ្ធជាពណ៌ក្រហម លឿង ខ្មៅ និងស អាស្រ័យទៅតាមតម្រូវការប្រើប្រាស់ក្នុងគេហដ្ឋាននីមួយៗ។ ឥដ្ឋខ្មែរអាចមានអាយុកាលរហូតដល់ជាង១០០ឆ្នាំអាស្រ័យទៅលើទឹកថ្នាំ និងរូបមន្តលាយស៊ីម៉ង់ត៍-ខ្សាច់របស់សិប្បកម្មនីមួយៗ។ ឥដ្ឋការ៉ូខ្មែរមើលហ្នឹងភ្នែកភ្លាមមិនរលោងស្អាតទេ តែពេលប្រើប្រាស់យូរទៅ ភាពរលោងរបស់វានឹងអណ្តែតឡើង។ សម្រស់របស់វាមិនខុសពីសុភាសិតខ្មែរដែលតែងពោលថា ល្អគន់ នោះដែរ។ ហើយរឿងដែលអ្នកត្រូវដឹងពីឥដ្ឋការ៉ូខ្មែរទៀតនោះគឺ វាមានប្រតិកម្មជាមួយជាតិអាស៊ីត ហើយគួរទុកវាចោល១៥ថ្ងៃបន្ទាប់ពីផលិត មុននឹងលោកអ្នកយកទៅប្រើប្រាស់។
ជាចុងក្រោយ លោក សៀង ហួរ ជឿជាក់ថា ប្រជាជនកម្ពុជានឹងចាប់ផ្តើមមើលឃើញសម្រស់របស់ឥដ្ឋការ៉ូខ្មែរឡើងវិញ ហើយងាកមកប្រើប្រាស់ផលិតផលនេះឱ្យបានទូលំទូលាយជាងមុន។ លោកតែងបារម្ភថា ថ្ងៃណាមួយឥដ្ឋការ៉ូខ្មែរនឹងបាត់មុខពីទីផ្សារគ្រឿងសំណង់កម្ពុជា ហើយច្បាស់ណាស់អគារដែលសាងសង់នៅស្រុកខ្មែរនឹងលែងមានក្រាលឥដ្ឋការ៉ូខ្មែរជាក់ជាមិនខាន។ លោកសៀងហួរ ថា ថ្វីត្បិតវាជាឥដ្ឋការ៉ូ តែតម្លៃរបស់វាមិនមែនគ្រាន់តែដើម្បីក្រាលឱ្យមនុស្សដើរទេ តែវាបានបង្ហាញពីសិល្បៈនៃការរស់នៅដ៏ស៊ីវិល័យរបស់ម្ចាស់គេហដ្ឋាននីមួយៗ។ ហើយលោកក៏សូមអរគុណដល់អតិថិជនទាំងអស់ដែលបានប្រើប្រាស់ឥដ្ឋការ៉ូខ្មែរ ជាពិសេសឥដ្ឋការ៉ូពីសិប្បកម្ម តាំង ហេងស្រេង របស់លោក។
សិប្បកម្មឥដ្ឋការ៉ូខ្មែរ តាំង ហេងស្រេង មានទីតាំងនៅផ្ទះលេខ១៦៩៣ ផ្លូវជាតិលេខ២ ភូមិព្រែកតាឡុង ឃុំចាក់អង្រែក្រោម រាជធានីភ្នំពេញ។
Article by Svay Leemeng
