Sovrin
Sovrin
បទពិសោធន៍ថ្មីនៃការទទួលទានអាហារបែបខ្មែរនៅលើផ្ទះបុរាណ Mahope-Luxury Home Dining
TRAVEL & LIVING 7 years ago
Mahope មិនមែនជាភោជនីយដ្ឋានធម្មតាដែលគ្រាន់តែបង្កើតឡើងដើម្បីបម្រើសេវាកម្មម្ហូបអាហារបែបខ្មែរដូចកន្លែងដទៃទៀតដែលលោកអ្នកធ្លាប់សាកល្បងនៅពេលកន្លងមកនោះទេ។ វាជាទីតាំងដ៏ពិសិដ្ឋមួយសម្រាប់ភ្ញៀវជាតិនិងអន្តរជាតិទាំងឡាយណាដែលមានបំណងភ្លក់រសជាតិម្ហូបអាហាររូបមន្តដើមរបស់ខ្មែរនៅលើផ្ទះឈើដែលមានរចនាបថបែបបុរាណធ្វើឲ្យភ្ញៀវមានអារម្មណ៍កក់ក្តៅដូចបានទទួលទានអាហារជួបជុំក្រុមគ្រួសារនៅក្នុងផ្ទះរបស់ខ្លួនយ៉ាងដូច្នោះដែរ។ ផ្ទះឈើដ៏ល្អវិចិត្រនេះជាកម្មសិទ្ធិរបស់អ្នកនាង រស់ រតនៈ ហៅ Chef Nak (ចុងភៅឈ្មោះ ណាក់) ជាស្ថាបនិកសេវាកម្មនេះផង និង ជាមេចុងភៅចម្អិនអាហារជូនភ្ញៀវផង។ ដូចនេះហើយទើបនាងបានប្រសិទ្ធនាម ទីតាំងនេះជាផ្លូវការផ្សារភ្ជាប់ជាមួយនឹងឈ្មោះខ្លួនឯងថា “MAHOPE- by Rotanak”។ វាមានទីតាំងស្ថិតនៅតាមផ្លូវ មាត់ទន្លេមេគង្គ ម្តុំវត្តវារិន្ទ ព្រែកលៀប ខណ្ឌជ្រោយចង្វា ដែលមានចម្ងាយប្រមាណ៨គីឡូម៉ែត្រពីរាជធានីភ្នំពេញ។
គេហដ្ឋានម្ហូបដែលចម្អិនដោយចុងភៅរតនៈនេះមានបម្រើមុខម្ហូបសរុបប្រមាណ១០០មុខ ដែលមុខម្ហូប នីមួយៗត្រូវបានសម្រិតសម្រាំងទាំងគ្រឿងផ្សំ ទាំងរសជាតិ ទាំងវិធីចម្អិន។ ជាពិសេស មុខម្ហូបទាំងនោះប្រែប្រួល ទៅតាមរដូវកាលអាស្រ័យទៅតាមរដូវនៃបន្លែ ផ្លែឈើ និង ត្រីសាច់ដែលមាននៅក្នុងតំបន់នោះ ដូចជា ផ្កាស្នោ កន្ធំថេត (ក្ទម្ពទេស) និង កំពឹស ជាដើម។ អ្នកនាងរតនៈ ម្ចាស់ទីតាំងបានអះអាងថា ប្រសិនបើទិញមិនចំរដូវនោះទេ គ្រឿងផ្សំសំខាន់ៗនៃម្ហូបក៏ប្រាកដជាមិនស្រស់ល្អដែរ ដែលអាចប៉ះពាល់ដល់គុណភាពរសជាតិនៃម្ហូបអាហារ។ ហេតុនេះហើយទើបនាងសម្រេចចិត្តមិនបង្កើតបញ្ជីរាយនាមមុខម្ហូបជាអចិន្រ្តៃយ៍សម្រាប់ភ្ញៀវនោះទេ។
មេចុងភៅរតនៈបានលើកពីគោលបំណងនៃការបង្កើតសេវាកម្មទទួលទានអាហារនៅលើគេហដ្ឋានផ្ទាល់ដ៏
ប្លែកមួយនេះថា “យើងចង់បង្ហាញជូនភ្ញៀវដែលអញ្ជើញមកទីនេះនូវលក្ខណៈនៃការធ្វើម្ហូបទទួលទាននៅក្នុងផ្ទះ (Home Dinning)។ គ្រប់មុខម្ហូបដែលយើងធ្វើជូនភ្ញៀវពិសាគឺមានប្រវត្តិរបស់វា។ វាអាចទាក់ទងនឹងរឿងរ៉ាវផ្ទាល់ខ្លួន ដែលយើងធ្លាប់ញ៉ាំពីតូចមក ឬ រឿងរ៉ាវផ្សេងៗទៀត។ ឧទាហរណ៍ កំពឹសចៀនជាអាហារដែលប្រជាជនខ្មែរយើង និយមញ៉ាំ ហើយមានគេលក់ស្ទើរគ្រប់ទីកន្លែង […] ”។
ផ្អែកលើបទពិសោធន៍ និង ចំណេះដឹងទាក់ទងនឹងវិជ្ជាធ្វើម្ហូប ជាពិសេស ម្ហូបខ្មែរតែម្តង មេចុងភៅដដែលបាន បង្ហាញយោបល់ថា “ខ្ញុំចង់បង្ហាញថា ខ្មែរយើងនិយមការប្រើបន្លែអន្លក់ ហើយម្យ៉ាង ខ្ញុំក៏ចង់បង្ហាញថា គ្រឿងផ្សំម្ហូបខ្មែរ គឺដូចតែគ្នាទេ វាអាចប្រែប្រួលទៅតាមតំបន់បន្តិចបន្តួច ប៉ុន្តែសំខាន់ត្រង់ថា យើងចេះកែច្នៃវាឲ្យមានរសជាតិឆ្ងាញ់ និងធ្វើឲ្យវាមានសោភ័ណ ព្រោះមនុស្សយើងសំខាន់ជាងគេ គឺការមើលឃើញសិន”។
ក្នុងជំនួបជាមួយគេហទំព័រ សូវរីន អ្នកនាងបានបង្ហាញមុខម្ហូបពិសេសៗប្រចាំរដូវកាលនេះចំនួនបីមុខ ដែលសុទ្ធសឹងតែជាថ្វីដៃសិល្បៈធ្វើម្ហូបយ៉ាងយកចិត្តទុកដាក់ អមជាមួយសារខ្លីៗពាក់ព័ន្ធនឹងម្ហូបទាំង៣មុខនោះផង។ ទីមួយគឺ ការីត្រី ដែលមិនមែនជាសម្លការីសម្រាប់ញ៉ាំជាមួយនឹងនំបញ្ចុកនោះទេ គឺជាសាច់ត្រីស្រស់ចៀនស្រួយខាង ក្រៅតែមានទឹកដមធម្មជាតិពីខាងក្នុង ផ្ទាប់ជាមួយបន្លែបីមុខសំខាន់ៗ គឺ ផ្កាស្នោ ផ្កាកំប្លោក និង ត្រយ៉ូងចេក គួបផ្សំ នឹងទឹកការីដែលជាអាហារខ្មែរមានឥទ្ធិពលពីប្រទេសឥណ្ឌាជាយូរមកហើយ។ ទីពីរ គឺ ភ្លាសាច់គោកន្ធំថេត ដែលជា មុខម្ហូបមានតែនៅទីនេះតែមួយគត់ហើយដែលត្រូវបានបង្កើតឡើងសម្រាប់លើកស្ទួយតម្លៃបន្លែកន្ធំថេតខ្មែរដែលពីមុនមកខ្មែរប្រើសម្រាប់តែជារបោយ។ ទីបីគឺ កំពឹសចៀន ស្រួយខ្ញោកដែលជាអាហារសម្រន់រំលឹកអនុស្សាវរីយ៍វ័យកុមាររបស់ចុងភៅផ្ទាល់ក៏ដូចជាប្រជាពលរដ្ឋខ្មែរដទៃទៀត។
ការមកទទួលទានអាហារនៅគេហដ្ឋានម្ហូបខ្មែរខាងលើមិនត្រឹមតែបានស្វែងយល់រសជាតិអាហារខ្មែរក្នុងបរិយាកាសធម្មជាតិដ៏ស្រស់ត្រកាលនោះទេ ប៉ុន្តែលោកអ្នកថែមទាំងបានស្តាប់នូវតូរ្យតន្រ្តីប្រពៃណីខ្មែរយ៉ាងពីរោះរណ្តំកំដរ ការទទួលទានរបស់លោកអ្នកឲ្យកាន់តែសប្បាយរីករាយ និង បានបញ្ជ្រាបខ្លួនក្នុងផ្នែកមួយនៃប្បធម៌យ៉ាងសម្បូរ បែបរបស់ខ្មែរ។ ភ្ញៀវក៏អាចមានឱកាសរៀនចម្អិនម្ហូបទាំងនោះដោយខ្លួនឯងជាមួយនឹងចុងភៅជំនាញថែមទៀតផង៕
Article by SRIN SOKMEAN
