Sovrin
Sovrin
កាន់តែទំនើប Amazon Go ហាងលក់ទំនិញដែលគ្មានអ្នកគិតលុយនិងគ្មានការទូទាត់ជាសាច់ប្រាក់
TRAVEL & LIVING 6 years ago
ថ្មីៗនេះ ហាងលក់ទំនិញឈ្មោះ Amazon Go ដែលជាហាងលក់រាយរបស់ក្រុមហ៊ុន Amazon បានត្រៀមនឹងបើកសាខាទីពីររបស់ខ្លួននៅក្នុងអគារ Madison Centre office tower នៃទីក្រុង Seattle សហរដ្ឋអាមេរិក នេះបើតាមប្រភពព័តមាន Geekwire។ ការបើកហាងលក់ទំនិញថ្មីរបស់ Amazon នេះបានធ្វើឲ្យគេចាប់អារម្មណ៍ត្រង់ថា ហាងនេះមិនមានអ្នកគិតលុយ មិនចាំបាច់តម្រង់ជួរគិតលុយនិងមិនមានបុគ្គលិកសម្រាប់ឆែកមើលឥវ៉ាន់របស់អ្នកឡើយនៅពេលដែលអ្នកចូលទៅទិញទំនិញនៅទីនោះ។ បើមិនមានអ្នកចាំឈរគិតលុយ មិនចាំបាច់តម្រង់ជួរគិតលុយ និងមិនប្រើជាសាច់ប្រាក់ដើម្បីទិញទំនិញ អ៊ីចឹងតើវាដំណើរការយ៉ាងដូចម្តេច!
លក្ខខណ្ឌដើម្បីទិញទំនិញនៅ Amazon Go បានអតិថិជនទាំងអស់ត្រូវតែមានកម្មវិធីទូរសព្ទ «Amazon Go app» ដើម្បីទូទាត់ទឹកប្រាក់តាមរយៈអនឡាញ។ មុននឹងពួកគេឈានចូលហាងលក់ទំនិញ Amazon go ពួកគេត្រូវស្កេនទូរសព្ទរបស់ខ្លួនជាមួយនឹងម៉ាស៊ីនសេ្កនដែលបញ្ឈរនៅពីមុខហាង។ នៅក្នុងហាងបានបំពាក់នូវកាមេរ៉ាគ្រប់ទីកន្លែងជាមួយនឹងបច្ចេកវិទ្យាទំនើបដែល Amazon ហៅថា « Just Walk Out Technology»។ បច្ចេកវិទ្យានេះ នឹងដឹងថាអតិថិជនមួយណាបានយកទំនិញអ្វី នៅកន្លែងណានិងមានតម្លៃប៉ុន្មាន ហើយវានឹងទូទាត់ប្រាក់នៅក្នុងគណនីរបស់អតិថិជនដោយស្វ័យប្រវត្តិតែម្តង។ ដូច្នេះអតិថិជនដែលបានមកទិញទំនិញនៅហាងលក់ទំនិញ Amazon go គ្រាន់តែដើរចូល រួចយកទំនិញដែលខ្លួនចង់បាន បន្ទាប់មកដើរចេញមកវិញជាការស្រេច។
គួរបញ្ជាក់ផងដែរថា ហាងលក់ទំនិញ Amazon go សាខាទីមួយបានបើកសម្ពោធនៅឆ្នាំ ២០១៦ ជាមួយនឹងពាក្យស្លោក « No line No Checkout» ដែលមានន័យថាមិនចាំបាច់តម្រង់ជួរ និងមិនចាំបាច់គិតលុយចេញ។ Amazon go សាខាទីមួយនេះមានទីតាំងស្ថិតនៅក្នុងទីក្រុង seatle រដ្ឋវ៉ាស៊ីនតោន សហរដ្ឋអាមេរិក បានបើកទទួលស្វាគមន៍អតិថិជនទាំងឡាយជារៀងរាល់ថ្ងៃពីម៉ោង ៧ព្រឹក រហូតដល់ម៉ោង ៩យប់ជាមួយនឹងទំនិញជាច្រើនមុខ។ នេះជាការវិវឌ្ឍន៍នៃហាងលក់ទំនិញមួយទៀតដែលគេបានរំពឹងទុកស្របពេលដែលបច្ចេកវិទ្យាកំពុងតែមានការរីកចម្រើន៕
Article by KEO SONG
