Sovrin
Sovrin
ស្របពេលដែលពិភពលោកកំពុងតែជ្រួលច្របល់ ពីរូបិយវត្ថុអេឡិចត្រូនិក Bitcoin ក្រុមអ្នកបច្ចេកវិទ្យាបែរនាំគ្នាងាកមកចាប់អារម្មណ៍មកលើបច្ចេកវិទ្យា Blockchain ដែលជាប្រព័ន្ធគ្រប់គ្រងនៃដំណើរការដោះដូររូបិយវត្ថុអេឡិចត្រូនិក Bitcoin នេះហើយវាក៏បានក្លាយជាប្រធានបទមួយក៏ក្តៅគគុកក្នុងវិស័យអេឡិចត្រូនិច ដែលត្រូវបានគេចោទសួរគ្រប់គ្នា។ សព្វថ្ងៃនេះ Blockchain ត្រូវបានកែច្នៃនិងប្រើប្រាស់ដើម្បីជាប្រយោជន៍ក្នុងការគ្រប់គ្រងទិន្នន័យតាមបែបបច្ចេកវិទ្យា និងត្រូវបានគេកំពុងតែសិក្សាដើម្បីផ្លាស់ប្តូរប្រព័ន្ធ blockchain នេះឲ្យក្លាយជាប្រព័ន្ធមេធំដែលគេខានមិនបានទៀតផង។ តើហេតុអ្វីបានជាគេចាប់អារម្មណ៍លើប្រព័ន្ធនេះខ្លាំងម្ល៉េះ? តើ Blockchain មានប្រយោជន៍អ្វីខ្លះដល់សង្គមជាតិនោះ? ដើម្បីឲ្យងាយស្រួលយល់ពីប្រព័ន្ធបច្ចេកវិទ្យាដែលកំពុងតែល្បីល្បាញមួយនេះ យើងគួរតែសិក្សាពីប្រវត្តិនៃការបង្កើតប្រព័ន្ធនេះជាមុនសិន។
Blockchain មិនមែនជាកម្មវិធីទូរសព្ទដៃស្មាតហ្វូន ហើយក៏មិនមែនជាកម្មវិធីកុំព្យូទ័រនោះដែរ ប៉ុន្តែវាគឺជាប្រព័ន្ធ (system) គ្រប់គ្រងទិន្នន័យមួយដែលប្រើប្រាស់ភាសាកូដកុំព្យូទ័រដ៏ស្មុគស្មាញ បង្កើតឡើងដោយជនជាតិជប៉ុនមួយរូបដែលមានឈ្មោះថា Satoshi Nakamoto នៅឆ្នាំ ២០០៨មកម្ល៉េះ។ កាលនោះ Blockchain ត្រូវបានគេប្រើប្រាស់ដើម្បីតភ្ជាប់ពីប្រព័ន្ធមួយទៅប្រព័ន្ធមួយទៀត សម្រាប់ផ្ទេរនិងដោះដូររូបិយវត្ថុអេឡិចត្រូនិច Bitcoin ពីគណនីមួយទៅកាន់គណនីមួយទៀត។ Bitcoin គឺជារូបិយវត្ថុអេឡិចត្រូនិចមួយដែលគេប្រើប្រាស់នៅក្នុងប្រព័ន្ធកុំព្យូទ័រ ហើយត្រូវបានចាយវាយតាមរយៈប្រព័ន្ធអ៊ីនធើណែតដោយអ្នកប្រើប្រាស់ Bitcoin នេះមិនចាំបាច់ប្រើប្រាស់ជាក្រដាសប្រាក់សុទ្ធនោះឡើយគឺគ្រាន់តែចូលទៅកាន់គណនីBitcoin របស់ខ្លួនហើយធ្វើការទូទាត់ទឹកលុយតាមប្រព័ន្ធកុំព្យូទ័រនេះតែម្តង។ រាល់ការទូទាត់ ការផ្ទេរប្រាក់ឲ្យគ្នាទៅវិញទៅមកនេះគឺអាចធ្វើទៅបានដោយប្រព័ន្ធគ្រប់គ្រងមួយដែលគេឲ្យឈ្មោះថា blockchain នេះឯង។ Blockchain បានកំណត់យ៉ាងច្បាស់និងបង្ហាញអ្នកយ៉ាងពិតប្រាកដថាទឹកប្រាក់របស់អ្នកដែលបានទទួលតាមរយៈ Bitcoin នេះមានប្រភពមកពីណា និងមានដំណើរប្រតិបត្តិការយ៉ាងដូចម្តេចខ្លះ ដូច្នេះហើយវាហាក់ដូចជាបញ្ជីមួយសម្រាប់ឲ្យអ្នកប្រើប្រាស់ Bitcoin ទាំងអស់អាចដឹងនិងកំណត់ចំនួនទឹកលុយរបស់ខ្លួនក្នុងការគ្រប់គ្រងទៀតផង។ បច្ចុប្បន្ន Blockchain មិនត្រឹមតែប្រើប្រាស់តែនៅក្នុងចរន្តហិរញ្ញវត្ថុ Bitcoin តែប៉ុណ្ណោះទេ តែវាក៏ត្រូវបានគេប្រើប្រាស់នៅក្នុងវិស័យផ្សេងទៀតផងដែរ។ ពីទីក្រុង Moscow នៃប្រទេសរុស្ស៊ី តាមរយៈសារព័ត៍មានក្នុងស្រុកមួយដែលអាចទុកចិត្ត បានឲ្យដឹងថា រដ្ឋាភិបាលក្រុង មូស្កូគ្រោងនឹងបញ្ជូលបច្ចេកវិទ្យា Blockchain នេះទៅក្នុងប្រព័ន្ធបោះឆ្នោតជ្រើសតាំងតំណាងរាស្រ្តដើម្បីលុបបំបាត់ការបន្លំសន្លឹកឆ្នោត។ ដូច្នេះ Blockchain មិនត្រឹមតែឲ្យដឹងពីព័ត៌មានអ្នកបោះឆ្នោតប៉ុណ្ណោះទេ តែវាក៏អាចឲ្យរដ្ឋាភិបាលដឹងពីទីតាំងនិងពេលវេលារបស់អ្នកបោះឆ្នោតនោះផងដែរ។ នៅវៀតណាម គេបានប្រើប្រាស់ប្រព័ន្ធនេះនៅក្នុងវិស័យជលផលត្រីដែលគេឲ្យឈ្មោះថា Blocfish។ ដូចនេះគេអាចដឹងថា ត្រីដែលបានដាក់លក់នៅក្នុងទីផ្សារមានប្រភពមកពីណា និងបានឆ្លងកាត់ស្ថាប័នណាខ្លះទៀតផង។
នៅកម្ពុជា ឯណេះវិញ អង្គការ Oxfam និងក្រុមហ៊ុន AmruRice ក៏ទើបតែបង្កើតប្រព័ន្ធបច្ចេកវិទ្យាកសិកម្មលក្ខណៈប្រមូលផ្ដុំសម្រាប់វិស័យស្រូវអង្ករ ឬហៅថា BlocRice កាលពីថ្ងៃទី ៣១ ខែ សីហា ឆ្នាំ ២០១៨ ថ្មីៗនេះផងដែរ។ តាមរយៈ Blocrice នេះនឹងផ្តល់នូវអត្ថប្រយោជន៍ជាច្រើន ដោយគេអាចតាមដានដឹងបាន អំពីព័ត៌មាននានាតាំងពីសង្វាក់ដំបូងនៃផលិតកម្មស្រូវអង្កររហូតដល់ការនាំចេញលក់នៅលើទីផ្សារតាមរយៈការស្កេន QR Code ដែលគេបានដាក់នៅលើអង្ករ។ ម្យ៉ាងវិញទៀតគេក៏អាចអភិវឌ្ឍគុណភាពស្រូវអង្ករ ព្រោះខាងក្រុមហ៊ុន AmruRice បានធ្វើកិច្ចសន្យាកសិកម្ម (Contract Farming) ជាមួយកសិករ រួមជាមួយនឹងការបញ្ចូលបច្ចេកវិទ្យាក្នុងការធ្វើកសិកម្មតាមបែបទំនើប និងមានការទទួលខុសត្រូវជាងមុន។ ជាងនេះទៅទៀតគេ ក៏អាចដឹងពីពេលវេលាជាក់លាក់ ក្នុងការដាំដុះស្រូវនិងកាត់បន្ថយការប្រើប្រាស់ក្រដាសប្រាក់ដើម្បីទិញលក់ស្រូវអង្ករ ដោយកសិករនឹងមានគណនីធនាគារផ្ទាល់ខ្លួន ហើយពេលក្រុមហ៊ុនបញ្ជាទិញ នឹងធ្វើប្រតិបត្តិការផ្ទេរប្រាក់តាមប្រព័ន្ធបច្ចេកវិទ្យាតែម្ដង៕
Article by KEO SONG
