×

មុខម្ហូបប្រពៃណី៥មុខដែលគេ​ពេញ​និយម​ក្នុងរដូវភ្ជុំ

TRAVEL & LIVING 5 years ago
 
 

          សម្រាប់​ប្រជាជន​ដែល​មាន​វ័យ​ចំណាស់​ ​ឬ​ ​វ័យ​កណ្តាល​ ​ពួកគាត់​ពិតជា​មានបទពិសោធន៍​ទៅ​ហើយ​ក្នុង​ការរៀបចំ​ចម្អិនម្ហូប​អាហារ​ធ្វើជា​ចង្ហាន់​ទេយ្យទាន​ប្រគេន​ព្រះសង្ឃ​ដែល​គង់​ចាំ​ព្រះវស្សា​នៅ​តាម​ទីអារាម​នានា​ ​ប៉ុន្តែ​សម្រាប់​មិត្ត​យុវវ័យ​ជាពិសេស​សុភាពនារី​វ័យក្មេង​មួយចំនួន​ប្រហែល​អាច​មាន​បញ្ហា​ក្នុង​ការសម្រេច​ចិត្ត​ជ្រើសរើស​រៀបចំ​មុខម្ហូប​ណាមួយ​សម្រាប់​បុព្វហេតុ​ខាងលើ​។​ ​ដូចនេះ​ក្នុង​ឱកាស​ពិធីបុណ្យ​កាន់បិណ្ឌ​ ​និង​ ​ភ្ជុំបិណ្ឌ​ប្រពៃណី​ជាតិ​ ​ខែភទ្របទ​ ​ឆ្នាំកុរ​ ​ឯកស័ក​ ​ព.ស​.​ ​២៥៦៣​ ​ត្រូវ​នឹង​ខែកញ្ញា​ ​គ.ស​.​ ​២០១៩​ ​នេះ​ ​សូ​វរីន​សូម​ណែនាំ​មុខម្ហូប​ប្រពៃណី​ចំនួន០៥មុខ​ដែល​សុភាពនារី​អាច​ពិចារណា​ធ្វើជា​ចង្ហាន់​យក​ទៅ​វត្ត​តាម​លទ្ធ​ភា​ពរៀងៗ​ខ្លួន​។​ ​

១​.​ ​សម្លការី​

          ​ឈ្មោះ​គ្រឿងសម្ល​មួយ​យ៉ាង​មក​ពី​ ​ស្រុក​ក្លិង្គ​ ​ហើយ​សម្ល​ដែល​ស្ល​ដាក់គ្រឿង​នោះ​ក៏​ហៅ​សម្លការី​ដែរ​។​ ​សម្លការី​មាន​ប្រវត្តិ​ចូល​មក​ក្នុង​ប្រទេស​កម្ពុជា​យូរយារណាស់មកហើយ​ ​ហើយ​ត្រូវ​បាន​ប្រជាជន​ខ្មែរ​ទាំង​ក្រុង​ទាំង​ស្រែ​និយម​ឲ្យ​តម្លៃ​រាប់​ជា​ម្ហូប​មានតម្លៃ​ពិសេស​ ​ដែល​ច្រើន​ស្ល​តែ​ពេល​មាន​ពិធីបុណ្យ​ទាន​នានា​សម្រាប់​ធ្វើជា​ភោជ​ ​នា​ហារ​ទទួលភ្ញៀវ​ពន្លឺ​ ​ឬ​ ​ប្រគេន​ព្រះសង្ឃ​។​ ​គេ​អាច​ស្ល​សម្លការី​ជាមួយ​សាច់​ជាច្រើន​ប្រភេទ​តាម​ ​ចំណង់​ចំណូលចិត្ត​ ​រួមមាន​ ​សាច់​មាន់​ ​ឆ្អឹងជំនីរ​ជ្រូក​ ​ឬ​ ​សាច់គោ​។​ ​គេ​អាច​ចម្អិន​សម្លការី​សម្រាប់​ប្រគេន​លោក​ឆាន់​ជាមួយ​បាយ​ ​នំបញ្ចុក​ ​ឬ​ ​នំប៉័ង​ ​ក៏បាន​។​ ​

​២​.​ ​សម្ល​សា​រ៉ា​ម៉ាន់​ ​

​          សម្ល​សា​រ៉ា​ម៉ាន់​មាន​លក្ខណៈ​ស្រដៀងនឹង​សម្លការី​ដែរ​ ​ដោយសារ​សម្ល​នេះ​ត្រូវ​ប្រើ​គ្រឿងការី​ជាគោល​ ​ហើយ​មាន​ប្រើ​កាពិ​ ​ខ្ទិះដូង​ ​ផ្កាចន្ទន៍​ ​សណ្តែក​ដី​លីង​ ​និង​ ​ម្ទេស​ក្រៀម​ ​ដើម្បី​បង្កើន​ក្លិន​និង​រសជាតិ​ដូចគ្នា​ដែរ​។​ ​ប៉ុន្តែ​វា​មាន​លក្ខណៈ​ខុសប្លែក​ត្រង់ថា​ ​ចំពោះ​សម្លការី​ ​គេ​និយម​ស្ល​ជាមួយ​សាច់​មាន់​ ​រី​ឯ​សម្ល​សា​រ៉ា​ម៉ាន់​គេ​និយម​ស្ល​ជាមួយ​សាច់គោ​ ​មាន​លក្ខណៈ​ខាប់​ជាង​សម្លការី​ ​ហើយ​សម្ល​នេះ​ជា​សម្ល​ដែលគេ​ស្ល​សម្រាប់​ប្រើ​ក្នុង​ឱកាស​ជួបជុំ​ពិសេស​ ​ជាពិសេស​សម្រាប់​សហគមន៍​ជនជាតិ​ឥស្លាម​តែម្តង​។​ ​សម្ល​សា​រ៉ា​ម៉ាន់​សម្បូរ​ជាតិ​ខ្លាញ់​ ​គេ​ច្រើន​ប្រគេន​លោក​រួម​ជាមួយ​នំប៉័ង​ ​(​តែ​ក៏អាច​ជាមួយ​បាយ​បាន​ដែរ​)​។​ ​

​៣​.​ ​សម្លចាប់ឆាយ​ ​

​          សម្លចាប់ឆាយ​ជា​សម្ល​ប្រពៃណី​របស់​ខ្មែរ​សែស្រឡាយ​កាត់​ចិន​។​ ​គេ​ច្រើន​ប្រើ​សម្ល​នេះ​ក្នុង​ពិធី​សែនដូនតា​តាម​ប្រពៃណី​ជនជាតិ​ចិន​តាំងពី​បរម​បុរាណ​មក​ ​ដូចជា​ ​ពិធី​សែន​ឆេង​ម៉េ​ង​ ​ពិធី​សែន​ក្បាលទឹក​ ​ពិធី​សែនចូល​ឆ្នាំ​ចិន​ ​ជាដើម​ ​ប៉ុន្តែ​នៅក្នុង​ប្រទេស​កម្ពុជា​យើង​ ​ប្រជាជន​ខ្មែរ​ក៏​និយម​ស្ល​សម្ល​មួយ​មុខ​នេះ​ធ្វើជា​ចង្ហាន់​ប្រគេន​ព្រះសង្ឃ​នៅ​តាម​វត្តអារាម​ក្នុង​ពិធី​បុ​ណ្យ​ធំៗ​ ​តួយ៉ាង​ ​បុណ្យភ្ជុំបិណ្ឌ​ ​នេះ​ដែរ​ ​ដោយសារតែ​សម្ល​នេះ​អាច​រក្សាទុក​បាន​យូរ​មិន​ងាយ​ជូរ​ផ្អូម​ ​ដោយ​គ្រាន់​តែ​ក្លា​ស្សេ​ទុក​ក្នុង​ទូរ​ទឹកកក​ ​ហើយ​នៅ​អាចយ​កម​ក​កម្តៅ​ឲ្យ​ក្តៅ​ឡើងវិញ​បាន​។​ ​ប្រសិនបើ​កម្តៅ​យូរ​ទៅ​គោក​ទឹក​ពេក​ ​គេ​អាច​បន្ថែម​ទឹក​ចូល​បន្តិច​ល្មម​ព្រះសង្ឃ​អាច​ឆាន់​ពេលក្រោយ​ភ្ជុំ​បាន​ទៀត​ ​ជាពិសេស​សម្រាប់​វត្ត​ដែល​អត្តខាត់​ ​មិនសូវ​សម្បូរ​ញាតិញោម​យក​ចង្ហាន់​មក​ប្រគេន​។​ ​

​៤​.​ ​សម្ល​ខ​ជើង​ជ្រូក​

​          សម្ល​ខ​ជើង​ជ្រូក​ជាមុ​ខ​ម្ហូប​សាមញ្ញ​មួយ​មុខ​ដែល​ប្រជាជន​យើង​និយម​ស្ល​ប្រគេន​ព្រះសង្ឃ​ក្នុង​ពិធីបុណ្យ​កាន់បិណ្ឌ​និង​ភ្ជុំបិណ្ឌ​ទៀងទាត់​ជា​រៀងរាល់​ឆ្នាំ​ ​មិន​ខុសពី​សម្លការី​និង​សម្លចាប់ឆាយ​នោះ​ទេ​ ​ដោយសារ​សម្ល​នេះ​ងាយស្រួល​ធ្វើ​ ​ហើយ​អាច​រក្សាទុក​បាន​យូរ​ដូច​ពពួក​សម្ល​ខាងលើ​នេះ​ដែរ​ ​ពោល​គឺ​ ​ជា​ប្រភេទ​សម្ល​ដែល​អាច​ ​កម្តៅ​ឡើងវិញ​បាន​។​ ​ជួនកាល​ ​គេ​និយម​ខ​ជើង​ជ្រូក​ជាមួយ​ពង​ទា​ ​ឬ​ ​ជួនកាល​គេ​អាច​ប្រើ​សាច់​ជ្រូក​បី​ជាន់​ក៏បាន​ទៅតាម​ការ​និយម​ចូល​ចិ​ត្ត​រៀង​ៗ​ខ្លួន​។​ ​អ្នកខ្លះ​ ​គេ​យក​ទំពាំង​មក​ខ​ជើង​ជ្រូក​ ​ឬ​ ​ស្ពៃ​ជូរ​មក​ខ​លាយ​ក៏​មាន​ធ្វើឲ្យ​មាន​រសជាតិ​ឈ្ងុយឆ្ងាញ់​ប្លែក​ម្យ៉ាងដែរ​។​ ​

​៥​.​ ​ទឹកគ្រឿង​អន្លក់​ខ្ចី​ ​

​          ជាទូទៅ​ ​នៅពេល​រៀបចំ​ចង្ហាន់​យក​ទៅ​វត្ត​ ​ប្រជាជន​ខ្មែរយើង​ភាគច្រើន​មិនមែន​ធ្វើម្ហូប​តែមួយមុខ​នោះ​ទេ​ ​យ៉ាងហោចណាស់​ក៏​មាន​ពីរ​ឬ​បី​មុខ​ដែរ​ ​ដូចនេះ​ក្រៅពី​ប្រភេទ​សម្ល​ទឹក​ ​ខ្មែរ​និយម​ធ្វើ​សម្ល​ឆា​ ​និង​ ​ប្រភេទ​អាហារ​អន្លក់​ ​ជាពិសេស​គឺ​ ​ទឹកគ្រឿង​ ​នេះឯង​។​ ​មូលហេតុ​ដែល​ប្រជាជន​ខ្មែរ​និយម​ធ្វើ​ទឹកគ្រឿង​ដោយសារ​សម្ល​ដែល​បាន​រៀបរាប់​ខាងលើ​ភាគច្រើន​ជា​សម្ល​ខ្លាញ់​ច្រើន​ងាយ​នឹង​ទ្រលាន់​ ​ហើយ​ព្រះសង្ឃ​អង្គ​ខ្លះ​អាច​នឹង​ ​មិនសូវ​ចូលចិត្ត​បរិភោគ​សាច់​ ​ដូចនេះ​ទឹកគ្រឿង​ជា​ជម្រើស​ល្អ​មួយ​ ​ព្រោះ​គ្រឿងផ្សំ​ចំបង​ ​គឺជា​សាច់​ត្រី​ ​មិន​មាន​ជាតិ​ខ្លាញ់​ ​ត្រូវ​នឹង​រសជាតិ​បន្លែ​អន្លក់​ស្រស់​ៗ​ថ្មី​ៗ​ចម្រុះ​មុខ​ ​តួយ៉ាង​ ​ត្រសក់​ ​ព្រលិត​ ​ត្រប់ស្រួយ​ ​ផ្កា​ស្នោ​រ​ ​ផ្កាត្រកៀត​ ​ត្រួយ​រាំង​ ​ត្រួយ​ស្តៅ​ ​ដែល​ងាយស្រួល​រក​នៅ​តាម​ភូមិ​ដ្ឋាន​ក្បែរ​ៗ​ខ្លួន​ក្នុង​រដូវវស្សា​។​ ​ចំពោះ​ការ​ធ្វើ​ទឹកគ្រឿង​ ​គេ​អាច​ប្រើ​សាច់​ត្រី​ស្ងោរ​ធម្មតា​ក៏បាន​ ​ប្រើ​ត្រីអាំង​ឬ​ត្រីឆ្អើរ​ក៏​រឹតតែ​ពិសេស​៕​ ​

Article​ ​by​ ​SRIN​ ​SOKMEAN


SUGGESTIONS