គួរថែរក្សាទម្ងន់របស់អ្នកបែបណានាពេលដែលអ្នកស្ថិតក្នុងវ័យ៣០ប្លាយ?
TRAVEL & LIVING 4 years agoស្រ្តីគ្រប់ៗរូបរមែងចាប់អារម្មណ៍សម្រស់ជាខ្លាំង ពិសេស ការបញ្ហាទម្ងន់នេះតែម្ដង។ ជាក់ស្តែង សម្រាប់ស្ត្រីដែលមានវ័យ៣០ឆ្នាំឡើងទៅ ប្រាកដជាដឹងច្បាស់ថា «គ្រាន់តែញ៉ាំដូចសព្វដងសោះ ឬញ៉ាំមិនច្រើនទេ ប៉ុន្តែហេតុអីបានដូចជាងាយឡើងគីឡូជាងមុនចឹង? មិនដូចកាលពីក្មេង ចង់ញ៉ាំអ្វីក៏មិនសូវបារម្ភរឿងធាត់អីសោះ»។ ខ្លាញ់ត្រង់ចង្កេះចេះតែកើនឡើងជាលំដាប់ បើមិនមានវិធានការហាត់ប្រាណណាមួយ ហើយអ្នកខ្លះទៀតក៏មិនមានប្រសិទ្ធភាពសោះឡើយ។ ដោយឡែក នាពេលដែលចូលវ័យក្បាលសាមភ្លាម រូបរាងកាយហាក់ប្រែប្រួលខ្លាំងគួរឲ្យកត់សម្គាល់ តើគួរធ្វើយ៉ាងណាទៅ?
ប្រព័ន្ធរំលាយអាហាររបស់មនុស្សយើងទូទៅ នឹងចាប់ផ្ដើមអន់ថយក្នុងវ័យ ៣០ ឆ្នាំ ដែលនាំឲ្យសារពាង្គកាយរបស់យើងបំបែកនូវជាតិកាលឡូរីបានយឺត មិនដូចមុនឡើយ។ ដូច្នេះកាលបើកាលឡូរីដែលយើងទទួលបានពីអាហារមួយពេលមុននោះ មិនទាន់បំបែកអស់ទេ រួចយើងបន្តញ៉ាំអាហារមួយពេលបន្ថែមទៀត នោះកាលឡូរីដែលលើសនឹងបំប្លែងទៅជាខ្លាញ់ បណ្ដាលឲ្យយើងងាយនឹងធាត់លឿនជាងមុន។ ស្របពេលនឹងមនុស្សវ័យសាមសិបឆ្នាំឡើងទៅនេះ គឺជាវ័យកំពុងសម្រុកធ្វើការឬប្រកបមុខរបរ អង្គុយនៅតែមួយកន្លែង (ការិយាល័យធ្វើការ ឬហាងលក់ដូរ) មិនសូវមានពេលហាត់ប្រាណបានគ្រប់គ្រាន់ ហើយមានសម្ពាធគ្រួសារ សម្ពាធសេដ្ឋកិច្ចនានា ទាំងនេះហើយគឺជាមូលហេតុចម្បងក្នុងការឡើងគីឡូខ្លាំង និងមិនងាយស្រកនោះឡើយ។ ជាយថាហេតុ ស្ត្រីក្នុងវ័យនេះគួរអនុវត្តវិធីសម្រកទៅតាមវ័យ និងស្ថានភាពសុខភាពផ្ទាល់ខ្លួន។ ខាងក្រោមនេះគឺជាវិធីសម្រកងាយៗ ដោយមិនចាំបាច់បង្អត់អាហារ និងមិនពាក់ព័ន្ធដល់សុខភាព។
១. បន្ថែមសារជាតិកាកសរសៃអាហារ (Soluble fiber) ក្នុងរបបអាហារ
កាកសរសៃអាហារ (Soluble fiber) មានប្រសិទ្ធភាពក្នុងការកាត់បន្ថយចំណង់ទទួលទានអាហារ ដែលជួយឲ្យយើងកាត់បន្ថយការស្រូបយកជាតិកាលឡូរីលើសកំណត់។ ដូច្នេះ បើយើងបានទទួលទានហើយ យើងនឹងមិនសូវមានអារម្មណ៍ថាឃ្លានចង់ញ៉ាំចំណីកំដរមាត់ផ្សេងៗទៀតឡើយ។ អាហារដែលមានសារជាតិកាកសរសៃប្រភេទនេះរួមមានក្នុងក្ដឹបស្ពៃក្ដោប ដំឡូង ពពួកសណ្ដែក គ្រាប់ធញ្ញជាតិ និងផ្លែឈើ (ផ្លែអែបព្រីខត ផ្លែក្រូច)។ល។
២. ស្រូបយកសារជាតិប្រូតេអ៊ីនឲ្យបានគ្រប់គ្រាន់
ត្រូវទទួលទានសារជាតិប្រូតេអ៊ីនឲ្យបានគ្រប់គ្រាន់ ដើម្បីពង្រឹងសាច់ដុំឲ្យបានមាំមួន ព្រោះសាច់ដុំយើងនឹងស្រកខ្លាំងចាប់ពីវ័យ៣០ឡើងទៅ ផ្គួបផ្សំនឹងការហាត់ប្រាណ វានឹងជួយបង្កើនសមត្ថភាពក្នុងការដុតកាលឡូរីជាប្រចាំថ្ងៃឲ្យបានប្រសើរ។ ដូច្នេះ ការបង្អត់អាហារមិនមែនវិធានការត្រឹមត្រូវនោះទេ ត្រូវទទួលទានអាហារឲ្យបានគ្រប់គ្រាន់ ដោយមិនលើសកំណត់។
៣. ចៀសវាងអាហាររសជាតិដិតខ្លាំងពេក
ប្រាកដណាស់ យើងត្រូវទទួលទានអាហារឲ្យបានគ្រប់គ្រាន់សម្រាប់បំពេញតម្រូវការរបស់រាងកាយយើង ប៉ុន្តែត្រូវទទួលទានអាហារដែលជំនួយសុខភាព។ ក្នុងវ័យនេះគួរចាប់ផ្ដើមអនុវត្តរបបអាហារដែលមិនសូវមានរសជាតិដិតខ្លាំងពេក តួយ៉ាងគួរបន្ថយជាតិប្រៃ ជាតិខ្លាញ់ និងជាតិស្ករ ព្រោះទាំងនេះគឺជាកត្តានាំឲ្យឡើងគីឡូលឿន ហើយងាយបណ្ដាលឲ្យប៉ះពាល់ដល់សុខភាពនានា។
៤. កាត់បន្ថយនូវភេសជ្ជៈសម្បូរជាតិស្ករ
សារធាតុស្ករគីមីដែលប្រើក្នុងភេសជ្ជៈកំប៉ុងនានា នឹងមិនងាយត្រូវបានបំបែកឡើយ សម្រាប់មនុស្សវ័យសាមសិបឆ្នាំឡើងទៅ ដែលវាជាប្រភពសារជាតិកាលឡូរីដ៏ខ្ពស់ ងាយធ្វើឲ្យយើងឡើងគីឡូឆាប់រហ័សបំផុត។ គួរកាត់បន្ថយ ឬចៀសវាងឲ្យដាច់ពីប្រភេទភេសជ្ជៈទាំងអស់នោះ ហើយបកមកទទួលទានទឹកផ្លែឈើស្រស់ឲ្យបានច្រើនវិញទើបប្រសើរ ព្រោះវាសម្បូរទៅដោយសារធាតុស្ករធម្មជាតិ និងវីតាមីនសំខាន់ៗដែលសារពាង្គកាយយើងត្រូវការជាប្រចាំ។
៥. លំហាត់ប្រាណបែបអ៊ែរ៉ូប៊ិក
ដូចបានបង្ហាញខាងលើ លំហាត់ប្រាណមានសារៈសំខាន់ក្នុងការជួយពង្រឹងសាច់ដុំ និងបង្កើនប្រព័ន្ធភាពស៊ាំរបស់យើង ប៉ុន្តែចៀសវាងការហ្វឹងហាត់សាច់ដុំតែមួយផ្នែក ដូច្នេះ លំហាត់ប្រាណបែបអ៊ែរ៉ូប៊ិក(Aerobic Exercise) នឹងជាជម្រើសល្អក្នុងការជួយពង្រឹងសាច់ដុំបានច្រើនផ្នែកក្នុងពេលតែមួយ។ លំហាត់ប្រាណជំនួយចង្វាក់បេះដូង (Cardio) ធាក់កង់ និងរត់ត្រឹកៗ ក៏ជាជម្រើសដ៏ប្រពៃសម្រាប់អ្នកផងដែរ។
៦. ទទួលទានដំណេកដែលមានគុណភាព
ការទទួលទានដំណេកឲ្យបានគ្រប់គ្រាន់ ក៏ជាកត្តាក្នុងការសម្រកខ្លាញ់ដ៏មានប្រសិទ្ធភាព ក្រោយពីការកែប្រែរបបអាហារ និងធ្វើលំហាត់ប្រាណ ព្រោះកំឡុងពេលគេងលក់ស្កប់ស្កល់ រាងកាយនឹងធ្វើការដុតជាតិកាលឡូរីបានខ្លាំង។ ហេតុនេះ យើងមិនត្រឹមតែត្រូវគេងឲ្យគ្រប់គ្រាន់នោះទេ ហើយត្រូវមានគុណភាពទៀតផង ដោយសម្អាតគ្រែខ្នើយឲ្យមានអនាម័យជានិច្ច និងរៀបចំបន្ទប់គេងឲ្យមានសណ្ដាប់ធ្នាប់។ គេងបិទភ្លើង ឬបើកតែភ្លើងរាត្រី ភ្លឺប្រឺមៗ ហើយពន្លឺអេក្រង់ទូរសព្ទ ឬឧបករណ៍អេឡិចត្រូនិចនានាក៏គួរចៀសវាង ដើម្បីទទួលបានដំណេកស្កប់ស្កល់៕
Article by LENG CHANREASEY