Sovrin
Sovrin
ផ្លាស់ប្តូរ បរិយាកាសមកទទួលទានម្ហូបអ៊ីតាលីរសជាតិដើមរបស់ភោជនីយដ្ឋានមួយ
TRAVEL & LIVING 5 years ago
ស្ទើរតែគ្រប់ច្រកល្ហកទៅហើយក្នុងរាជធានីភ្នំពេញដែលយើងអាចសង្កេតឃើញថាមានភោជនីយដ្ឋានជាច្រើនកន្លែងបានបើកដំណើរការជារៀងរាល់ថ្ងៃ។ ភោជនីយដ្ឋានមួយចំនួនមានការរៀបចំតាមបែបអឺរ៉ុប ខ្លះទៀតមានការរៀបចំជាលក្ខណៈបុរាណ ឬសហសម័យដែលប្រកបទៅដោយប្រណីតភាព និងស៊ីវិល័យ។ តាមរយៈការរៀបចំទាំងអស់នេះក៏អាចបង្ហាញឲ្យមនុស្សគ្រប់គ្នាដឹងអំពីអត្តសញ្ញាណ ក៏ដូចជាផ្នត់គំនិតរបស់ស្ថាបនិក ឬស្ថាបនិកានៃភោជនីយដ្ឋាននីមួយៗបានយ៉ាងលម្អិតផងដែរ។ ជាក់ស្តែង ក្រៅពីភោជនីយដ្ឋានប្រកបដោយសោភ័ណភាពមិនទាន់គ្រប់គ្រាន់នៅឡើយទេ ស្ថាបនិក ឬស្ថាបនិកាតែងរិះគិតអំពីរសជាតិនៃប្រភេទអាហារប្រចាំតំបន់របស់ខ្លួន ដើម្បីបម្រើអតិថិជនឲ្យបានល្អឥតខ្ចោះ។
ស្ថិតក្នុងប្លុកបឹងកេងកងទី១ អ្នកនឹងបានឃើញនូវភោជនីយដ្ឋានមួយមានឈ្មោះថា «ហ្គ្រីនភេបភើ ឬ Green Pepper» ដែលមានបម្រើជូននូវប្រភេទអាហារអ៊ីតាលីជាមួយនឹងរសជាតិដើមពិតៗពីប្រទេសអ៊ីតាលី។ ក្រោមការគ្រប់គ្រង និងជាស្ថាបនិកនៃ «ហ្គ្រីនភេបភើ ឬ Green Pepper» លោក ម៉ាកសេឡូ បៀនខាឌីណូ ( Marcello Biancardino ) ជនជាតិអ៊ីតាលី បានឲ្យដឹងផងដែរថា «រាល់អាហារទាំងអស់ដែលមាននៅទីនេះ គឺពួកយើងចម្អិនឡើងដោយមានការប្រុងប្រយ័ត្នជាទីបំផុត ជាពិសេសនោះ គឺរសជាតិនៃអាហារនីមួយៗ ប្រសិនបើយើងមានការធ្វេសប្រហែសតែបន្តិចនោះ យើងនឹងបាត់បង់នូវរសជាតិដើមនៃអាហារនោះតែម្តង។» លោកក៏បានបន្តលើកឡើងដូច្នេះថា «សម្រាប់អាហារដែលមាននៅទីនេះ សុទ្ធតែជាប្រភេទអាហារដែលជនជាតិអ៊ីតាលីតែងនិយមទទួលទានបំផុត។»
ភោជនីយដ្ឋានដែលមានបរិវេណធំល្មម អមដោយការតុបតែងបែបក្លាស៊ីកនៃការតាំងរូបថតជាច្រើនសន្លឹកលើជញ្ជាំងបានបង្ហាញឲ្យឃើញពីសកម្មភាពប្លែកៗ ជាច្រើននៃការរស់នៅរបស់ប្រជាជនអ៊ីតាលី ហើយរូបថតទាំងនេះតែងទទួលបានការចាប់អារម្មណ៍យ៉ាងខ្លាំងពីសំណាក់អតិថិជនដែលបានអញ្ជើញមកទីនេះ។ ក្លិនអាហារដ៏ឈ្ងុយចេញពីផ្ទះបាយដែលចម្អិនដោយចុងភៅជនជាតិអ៊ីតាលី៤នាក់ និងជំនួយការចុងភៅម្នាក់ជាជនជាតិខ្មែរ តែងទទួលបាននូវការសរសើរពីអតិថិជនគ្រប់ៗរូប។ CAPRICCIOSA គឺជាភីហ្សាដែលភ្ញៀវ និយមទទួលទានច្រើនជាងគេក្នុងចំណោមភីហ្សាទាំងអស់ដែលមានក្នុងម៉ឺនុយ (MENU) ហើយសុទ្ធសឹងចម្អិនជាមួយនឹងបន្លែគ្រប់ប្រភេទផងដែរ។ លោក ម៉ាកសេឡូ បានបញ្ជាក់ផងដែរថា «ពីមួយថ្ងៃ ទៅមួយថ្ងៃពួកយើងទាំងអស់គ្នាតែងពិភាក្សាគ្នា ថាតើពួកយើងគួរមានអាហារថ្មី ឬរសជាតិថ្មីៗអ្វីខ្លះសម្រាប់ភ្ញៀវរបស់យើងនៅថ្ងៃស្អែក។» លោកក៏បានបន្ថែមផងដែរថា «បន្ទាប់ពីយើងពិភាក្សាចំពោះអាហារទាំងនោះហើយ យើងក៏សាកល្បងចម្អិនវា ហើយយើងក៏ចាប់ផ្តើមពិភាក្សាគ្នាម្តងទៀតចំពោះរសជាតិដែលយើងបានបង្កើតឡើង។ ម៉្យាងវិញទៀត កត្តាដែលសំខាន់បំផុតដែលពួកយើងតែងយកចិត្តទុកដាក់បំផុតនោះគឺ អនាម័យ គុណភាព សេវាកម្ម និងបរិយាកាសជាចម្បង។»
គួរជម្រាបផងដែរថា «ហ្គ្រីនភេបភើ ឬ Green Pepper» ចាប់ផ្តើមបើកទទួលអតិថិជននៅម៉ោង១២ថ្ងៃត្រង់រហូតដល់ម៉ោង ២:៣០ នាទីរសៀល និងម៉ោង ៦ ល្ងាច រហូតដល់ម៉ោង១០យប់ផងដែរ៕
Article by PAN SIVLY
