Sovrin
Sovrin
រៀនពីវិធីធ្វើប្រហុកខ្មែរងាយៗស្របពេលដើមឆ្នាំរដូវធ្វើប្រហុកបានមកដល់
TRAVEL & LIVING 5 years ago
រាល់ពេលចម្អិនមុខម្ហូបប្រពៃណីខ្មែរ គ្រឿងផ្សំមួយដែលស្ត្រីមេផ្ទះគ្រប់រូបតែងមិនរំលងក្នុងការបង្កើនឱជារសឈ្ងុយឆ្ងាញ់ នោះគឺប្រហុក។ ប្រហុកគឺជាគ្រឿងផ្សំអាហារមួយប្រភេទរបស់ជនជាតិខ្មែរដែលបន្សល់តាំងពីដូនតាហើយក៏ក្លាយជាអាហារនៃអត្តសញ្ញាណជាតិរបស់យើងផងដែរ។ មកដល់សម័យនេះបើនិយាយពីចំណេះធ្វើប្រហុកជឿជាក់ថាភាគច្រើនមានតែមនុស្សវ័យចំណាស់ទេដែលចេះធ្វើ លើកលែងតែក្មេងៗសម័យថ្មីដែលមិនសូវចេះធ្វើដោយពឹងផ្អែកទៅលើការទិញនៅតាមទីផ្សារ ហើយការទិញនៅតាមទីផ្សារនេះប្រសិនបើប៉ះចំប្រហុកអនាម័យថ្វីដៃល្អគឺមិនថ្វីនោះទេ តែបើប៉ះចំប្រហុកដែលដាក់ថ្នាំរក្សាបានយូរថ្នាំមិនឲ្យរុយរោមឬដាក់ម្សៅឲ្យឃើញសាច់សល្អនោះ ប្រាកដជាប្រឈមហានិភ័យចំពោះសុខភាពលើសពីរសជាតិឆ្ងាញ់ទៀតផង។ ដូច្នេះស្របពេលដើមឆ្នាំដែលជាពេលវេលាប្រជាពលរដ្ឋខ្មែរតែងប្រមូលផលត្រីធ្វើប្រហុក សូវរីន សូមណែនាំនូវវិធីធ្វើប្រហុកខ្មែរបែបងាយៗដែលនឹងប្រាកដចិត្តថាប្រកបដោយអនាម័យ និងមានឱជារសឆ្ងាញ់។
ប្រហុកខ្មែរពីដូនតាគ្មានអ្វីដែលពិបាកធ្វើឡើយ សម្រាប់គ្រឿងផ្សំយើងគ្រាន់តែមានជម្រើសប្រើត្រីស្រែតូចធំដូចជា ត្រីអាចម៍កុក ត្រីលេញ ត្រីរៀល ត្រីផ្ទក់ ត្រីកំភ្លាញ ត្រីក្រាញ់ ឬត្រីអណ្តែងជាដើមចំនួន៣គីឡូក្រាម និងអំបិល១គីឡូក្រាម។ ដោយឡែកសម្រាប់ត្រីអណ្តែងបើធ្វើត្រូវប្រញាប់ហូបមុនគេ ព្រោះបើទុកយូរអាចខារដោយសារតែវាសម្បូរខ្លាញ់ជាងត្រីផ្សេងៗ។ ឈានមកដល់វិធីធ្វើជាដំបូងយើងត្រូវយកត្រីមកកាត់ក្បាលវះពោះយកគ្រឿងក្នុងចេញសកស្រកាឲ្យស្អាត និងលាងទឹកជម្រះឈាមខ្លាញ់ឲ្យស្អាតរួចដាក់ត្រាំទឹកមួយយប់ឲ្យហើមសាច់។ ក្រោយត្រាំទឹកបានមួយយប់ដល់ពេលត្រូវយកមកលាងសម្អាតទឹកជាថ្មីម្តងទៀតដើម្បីប្រាកដថាជ្រះខ្លាញ់ជ្រះឈាមបានល្អ ព្រោះបើនៅឈាមនៅខ្លាញ់ពេលផ្អាប់ទុកធ្វើឲ្យប្រហុកសាច់មិនល្អ ពិសេសក្លិនមិនឈ្ងុយឡើយ។ កាលណាលាងសម្អាតរួចរាល់យើងយកត្រីមកហាលឲ្យស្រស់ទឹករាងស្ងួតទើបប្រឡាក់អំបិលដាក់ចូលក្រឡ។ ការហាលត្រីសម្ងួតនេះដែរយើងគប្បីដាក់ហាលសម្ងួតចាប់ពីម៉ោង៧ព្រឹកដល់ម៉ោង២រសៀលព្រោះកំឡុងពេលពីម៉ោង២ដល់ម៉ោង៣រសៀលគឺជាពេលដែលរុយទម្លាក់ពង ប៉ុន្តែយល់ល្អដើម្បីអនាម័យយើងគួរដាក់ហាលមានមុងគ្របការពារទើបប្រសើរ។ ខណៈហាលរាងស្ងួតល្អហើយនោះយើងចាប់ផ្តើមយកត្រីមកប្រឡាក់អំបិលដោយអំបិលត្រូវតែជាអំបិលស្ងួត(បើជាអំបិលម៉ដ្ឋត្រូវលីងឲ្យស្ងួតរួចយកមកប្រឡាក់ ឬបើប្រើអំបិលក្រួសត្រូវយកអំបិលទៅបុកឲ្យម៉ដ្ឋហើយលីងឲ្យស្ងួតទើបប្រើការ) រីឯការប្រឡាក់នេះមិនមែនប្រើដៃនោះទេត្រូវយកអង្រែមកបុកប៉ែនថ្នមៗឲ្យរាងទន់សាច់ទើបដាក់ចូលក្នុងក្រឡហើយគ្របឲ្យជិត។ ទុកចោល៤ទៅ៥ថ្ងៃយើងយកត្រីផ្អាប់នោះមកសម្រិតទឹកព្រៃ(ទឹកចេញពីសាច់ត្រី)ចេញបន្ទាប់មកធ្វើការប្រឡាក់អំបិល(អំបិល១គីឡូក្រាម)ជាថ្មីម្តងទៀតដោយប្រើដៃរួចដាក់ត្រីចូលក្នុងក្រឡវិញ។ ជំហានចុងក្រោយនៅពេលទុកចោលបានប្រហែលកន្លះខែយើងចាប់ផ្តើមយកមកសម្រិតទឹកព្រៃចេញម្តងទៀត និងប្រឡាក់អំបិល(១គីឡូក្រាម) ដើម្បីឲ្យត្រីស្ងួតល្អជៀសវាងក្លិនខ្មេះ ហើយដាក់ក្នុងក្រឡថ្មីឬក្រឡដែលលាងស្ងួតស្អាតញាត់ឲ្យណែនជាការស្រេច។ ចំពោះរូបមន្តប្រើអំបិលយើងអាចអនុវត្តតាមការរៀបរាប់ខាងលើគឺត្រី៣គីឡូអំបិល១គីឡូឬត្រី៣ចានអំបិល១ចាន ហើយការដាក់អំបិលច្រើនកាលណាគឺល្អកាលនោះ។ ជាទូទៅការផ្អាប់ទុកត្រីចោលក្លាយជាប្រហុកអាចហូបបានគឺចាប់ពី១ខែដល់១ខែកន្លះឬបើទុកកាន់តែយូរកាន់តែឈ្ងុយកាន់តែឆ្ងាញ់ពិសា។
ឃើញទេមានគ្រឿងផ្សំតែពីរមុខនិងវិធីធ្វើបែបងាយៗអាចឲ្យអ្នកទទួលបានប្រហុកឈ្ងុយឆ្ងាញ់ជាស្នាដៃផ្ទាល់ខ្លួនព្រមទាំងច្បាស់លាស់អនាម័យទៀតផង។ ប្រហុកជាអាហារប្រចាំត្រកូលរបស់ខ្មែរ ហេតុដូច្នេះកូនខ្មែរគ្រប់រូបជាពិសេសស្ត្រីមេផ្ទះជាន់ថ្មីគួរតែយល់ដឹងក៏ដូចជារៀនធ្វើនិងបង្រៀនតកូនតចៅគ្រប់ៗគ្នាកុំបីខាន៕
Article by HEM SOKKHIM
