Sovrin
Sovrin
ផ្គរលាន់គ្រឹមៗ ព្រះពិរុណហាក់បង្អុរយ៉ាងជោកជាំស្ទើរតែរាល់ថ្ងៃនាវស្សានរដូវនេះ។ អាកាសធាតុប្រែប្រួលនៅរដូវនេះ ងាយនឹងធ្វើឱ្យយើងប្រឈមជំងឺផ្សេងៗ ជាពិសេសជំងឺផ្តាសាយតែម្តង។ ការទទួលទានអាហារក្តៅៗដូចជាស៊ុបត្រឹមតែមួយកូនចាន ពិតជាជំនួយសុខភាពយើងឱ្យប្រសើរឡើង វាជួយពង្រឹងកំហាប់អង្គធាតុរាវក្នុងរាងកាយ កាត់បន្ថយការតឹងច្រមុះ តាមរយៈការបង្កើនកម្តៅចូលទៅក្នុងប្រព័ន្ធដង្ហើម និងពង្រឹងប្រព័ន្ធការពាររាងកាយប្រឆាំងនឹងបាក់តេរី។ ពិតប្រាកដណាស់ ដើម្បីពង្រឹងសុខភាពរឹងមាំនៅអំឡុងរដូវភ្លៀងនេះ សូវរីន សូមលើកយកវិធីធ្វើស៊ុបពិសេសៗចំនួន៤មុខ សុទ្ធសឹងជាស៊ុបកម្តៅរាងកាយមានអត្ថប្រយោជន៍យ៉ាងច្រើនចំពោះសុខភាព។
ស៊ុបស្ពៃក្តោបស្វាយ
គ្រឿងផ្សំ៖ ខ្ទឹមបារាំង មួយចំហៀង, ខ្ទឹមស ២កំពឹស, ខ្ទឹមក្រហម ១មើម, ម្ទេសប្លោក ១០០ក្រាម, គ្រាប់វុលណាត់ (Walnut) បន្តិច, ប្រេងអូលីវ ១ស្លាបព្រាបាយ, អំបិល និងម្រេច បន្តិច, ជីរវ៉ាន់ស៊ុយ (Parsley) បន្តិច, ទឹកខ្មេះផ្លែប៉ោម ១ស្លាបព្រាកាហ្វេ, ទឹកស៊ុបមាន់ ៥០០មីលីលីត្រ។
របៀបធ្វើ៖ ដំបូងត្រូវដាក់ដាំខ្ទះឱ្យក្តៅបន្តិច ចាក់ប្រេងអូលីវចូល ខ្ទឹមបារាំង ខ្ទឹមស ខ្ទឹមក្រហម និងម្ទេសប្លោកឆាបញ្ចូលគ្នារហូតមានក្លិនឈ្ងុយ។ បន្ទាប់មកដាក់ស្ពៃក្តោប អំបិល ម្រេច និងទឹកខ្មេះចូល ចម្អិនរហូតដល់ស្ពៃក្តោបទន់ល្អ សឹមចាក់ស៊ុបមាន់ និងទឹកដោះគោស្រស់ចូលទុករហូតដល់ពុះ ភ្លក់មើលរសជាតិល្មម រួចដាក់ចុះ។ ចុងក្រោយត្រូវយកស៊ុបនោះទៅចាក់ក្នុងម៉ាស៊ីនក្រឡុក ហើយត្រូវក្រឡុកឱ្យម៉ដ្តល្អទៅជាល្បាយតែមួយ បន្ថែមគ្រាប់វុលណាត់តាមចំណូលចិត្ត និងរោយជីរវ៉ាន់ស៊ុយពីលើជាការស្រេច។
ស៊ុបនុយឆ្អឹងជំនីរ
គ្រឿងផ្សំ៖ ឆ្អឹងជំនីរជ្រូក ៣៥០ក្រាម, នុយ ១៥០ក្រាម, ខ្ទឹមស ៣កំពឹស, ការ៉ុត ១មើម, ខ្ទឹមបារាំង ១ផ្លែ (ហាន់ល្អិតៗ), ម្ទេសប្លោក ១ផ្លែ (ហាន់ល្អិតៗ), ប៉េងបោះ ២ផ្លែ (ហាន់ល្អិតៗ), សណ្តែកបៃតង ៥០ក្រាម, ស្លឹកបេ (Bay leaf) ២សន្លឹក, ម្រេច បន្តិច, ដុំស៊ុបមាន់ ១ដុំ, អំបិល ១ស្លាបព្រាកាហ្វេ, ម្សៅស៊ុប ២ស្លាបព្រាកាហ្វេ, ស្ករស កន្លះស្លាបព្រាបាយ, ស្លឹកខ្ទឹម តាមចំណូលចិត្ត។
វិធីធ្វើ៖ ជំហានដំបូងត្រូវដាក់ដាំទឹកក្នុងឆ្នាំងធំមួយរហូតដល់ទឹកពុះ សឹមដាក់ឆ្អឹងជំនីរជ្រូក ខ្ទឹមស ខ្ទឹបារាំង ការ៉ុត អំបិល ម្សៅស៊ុប ស្ករស ដុំស៊ុបមាន់ និងម្រេចចូល ទុកឱ្យពុះម្តងទៀត។ ជំហានបន្ទាប់ត្រូវដាក់ប៉េងបោះ ម្ទេសប្លោក សណ្តែកបៃតង និងស្លឹកបេចូល ចម្អិនទុកប្រហែល១០នាទីទៅ១៥នាទី។ ក្រោយមកទៀត ត្រូវដាក់នុយចូលចម្អិនរហូតដល់នុយឆ្អិនឡើងទន់ល្អ។ ចុងក្រោយភ្លក់រសជាតិតាមចំណូលចិត្ត និងរោយស្លឹកខ្ទឹមពីលើជាការស្រេច។
ស៊ុបពោតកិន
គ្រឿងផ្សំ៖ ពោតក្រហម ២ផ្លែ (ប្រឡេះយកតែគ្រាប់), ប្រេងអូលីវ ២ស្លាបព្រាបាយ, ខ្ទឹមស ២កំពឹស, ខ្ទឹមបារាំង ១មើម, ដំឡូងបារាំង ១មើម, ជីរវ៉ាន់ស៊ុយ បន្តិច, ទឹកស៊ុបមាន់ ១លីត្រ, ម្សៅស៊ុប ១ស្លាបព្រាកាហ្វេ, ស្ករស ១ស្លាបកាហ្វេ, ដុំស៊ុបមាន់ ១ដុំ, គ្រីម ៤ស្លាបព្រាបាយ។
វិធីធ្វើ៖ ចាប់ផ្តើមដោយដាក់ដាំខ្ទះដាក់ប្រេងអូលីវចូល រួចដាក់ខ្ទឹមស លីងរហូតដល់ឈ្ងុយ។ បន្ទាប់មកទៀតចាក់ទឹកស៊ុបមាន់ចូល ដំឡូងបារាំងពោតក្រហម ម្សៅស៊ុប ស្ករស និងដុំស៊ុបមាន់ចូល ទុករហូតដល់ពុះ។ នៅពេលបន្លែឆ្អិន និងទន់ល្អហើយ ត្រូវចាក់គ្រីមចូល ភ្លក់មើលរសជាតិតាមចំណូលចិត្ត រួចដាក់ចុះ។ ជាចុងក្រោយយកស៊ុបនោះទៅក្រឡុកនឹងម៉ាស៊ីនក្រឡុកឱ្យម៉ដ្តល្អទៅជាល្បាយតែមួយ រួចដួសដាក់ចានរោយជីរវ៉ាន់ស៊ុយពីលើជាការស្រេច។
ស៊ុបគ្រីមសាច់មាន់
គ្រឿងផ្សំ៖ ទ្រូងមាន់ ៣០០ក្រាម, ប្រេងអូលីវ ២ស្លាបព្រាបាយ, ខ្ទឹមបារាំង មួយចំហៀង (ហាន់ល្អិតៗ), ដើមឃិនឆាយ ១ដើម (ហាន់ល្អិតៗ), ការ៉ុត ១មើម (ហាន់ល្អិតៗ), ម្ទេសហាវ៉ៃ មួយចំហៀង (ហាន់ល្អិតៗ), ពោតលឿង ៥ស្លាបព្រាបាយ, ដំឡូងបារាំង ២៥០ក្រាម (ស្ងោរហើយយកទៅកិនឱ្យម៉ដ្ត), សណ្តែកបៃតង ៥ស្លាបព្រាបាយ, ម្សៅស៊ុប ១ស្លាបព្រាកាហ្វេ, ដុំស៊ុបមាន់ ១ដុំ, ស្ករស ១ស្លាបព្រាកាហ្វេ, គ្រីមទឹកដោះគោ ១៥០មីលីលីត្រ, ទឹកស៊ុបមាន់ ៥០០មីលីលីត្រ។
វិធីធ្វើ៖ ដំបូងត្រូវដាក់ដាំឆ្នាំងឱ្យក្តៅបន្តិច រួចចាក់ប្រេងចូល សឹមដាក់សាច់មាន់ ខ្ទឹមបារាំង ការ៉ុត ពោត ម្ទេសហាវ៉ៃ និងសណ្តែកខៀវ ម្សៅស៊ុប ដុំស៊ុបមាន់ ស្ករស ឆាបញ្ចូលគ្នារហូតដល់ឆ្អិនល្អ។ បន្ទាប់មកត្រូវចាក់ទឹកស៊ុបមាន់ ដំឡូងកិន និងគ្រីមចូលរម្ងាស់ប្រហែល៥នាទី រួចភ្លក់រសជាតិតាមចំណូលចិត្ត៕
Article by SOUNG SOKSAN
