Sovrin
Sovrin
ក្នុងកាលៈទេសៈនៃការរាតត្បាតពីជំងឺកូវីដ-១៩ ស្ទើរតែមនុស្សគ្រប់វ័យទៅហើយដែលតែងពាក់ម៉ាស និងអនុវត្តនូវវិធានការដ៏សំខាន់មួយចំនួនតាមការណែនាំរបស់ក្រសួងសុខាភិបាល ដើម្បីការពារសុខភាពបានល្អ ជាពិសេស គ្រប់ពេលដែលពួកគេមានភារកិច្ចចេញទៅខាងក្រៅ ឬទៅកន្លែងធ្វើការមួយចំនួន គេតែងមានការប្រុងប្រយ័ត្នខ្ពស់បំផុត។ យ៉ាងណាមិញ ការពាក់ម៉ាសមុខសម្រាប់ការពារធូលី ឬបាក់តេរីផ្សេងៗ គឺជាវិធីសាស្ត្រដ៏ល្អ និងជាចំណែកមួយនៃការទប់ស្កាត់ការចម្លងជំងឺកូវីដ-១៩នេះក៏ពិតមែន ប៉ុន្តែការពាក់ម៉ាសរយៈពេលយូរ អាចបណ្ដាលឲ្យផ្ទៃមុខមានបញ្ហារោល ឬបញ្ហារមាស់ផ្សេងៗ។
ហេតុដូច្នេះហើយ តើយើងគួរមានវិធីសាស្ត្រអ្វីខ្លះ ដើម្បីកាត់បន្ថយបញ្ហា ហើយគួរថែទាំស្បែកមុខបែបណាខ្លះទើបប្រសើរ?
១. ប្រើផលិតផលផ្ដល់សំណើមដល់ស្បែកជានិច្ច
ជាទូទៅ នារីៗគ្រប់រូបតែងមានផលិតផលថែសម្រស់ជាច្រើនសម្រាប់ស្បែកមុខរបស់ខ្លួន តែខណៈពេលនេះ គួរណាកាត់បន្ថយផលិតផលទាំងអស់នោះឲ្យបានជាអប្បបរិមា ហើយសង្កត់ធ្ងន់តែលើការរក្សាសំណើមដល់ស្បែកបានហើយ ព្រោះសារជាតិសំណើមជាកត្តាថែរក្សាសុខភាពស្បែកដែលអត់មិនបាន។ ស្បែកដែលមានសំណើមល្អ មើលទៅតឹងណែន ស្រស់ស្រាយ ហើយកាត់បន្ថយការកើនឡើងនៃស្នាមជ្រីវជ្រួញបានយ៉ាងមានប្រសិទ្ធភាព។
២. ជ្រើសរើសប្រភេទផលិតផលថែស្បែកដែលត្រឹមត្រូវ
ជ្រើសរើសផលិតផលថែស្បែកដែលជាប្រភេទអេស្សិន (Essence) សេរ៉ូម(Serum) និងឡូសិន(Lotion) ឬប្រភេទមួយចំនួនទៀតដែលមានសាច់ស្ដើង ងាយជ្រៀបចូលស្បែកមុខ។ ម្សៅ ឬគ្រីមនានាដែលមានសាច់ក្រាស់ នឹងបន្សល់ជាកំណកល្អិតៗនៅលើផ្ទៃមុខ អាចធ្វើឲ្យបាក់តេរីមានឱកាសកកើតឡើងងាយ រាល់ពេលដែលអ្នកពាក់ម៉ាសការពារ។
៣. រក្សាស្បែកមុខឲ្យស្ងួតល្អ (គ្មានជាតិប្រេង)
គ្រឿងសម្អាងនានារមែងមានលាយសារជាតិប្រេង ដែលអាចបណ្ដាលឲ្យមុខរោល នៅពេលពាក់ម៉ាស។ បើចៀសវាងបាន គួរកុំផាត់មុខឲ្យសោះ។ សម្រាប់អ្នកដែលងាយចេញជាតិប្រេងលើផ្ទៃមុខ ត្រូវឧស្សាហ៍ប្រើក្រដាសបឺតប្រេង(Oil Control Tissue) ផ្ដិតចេញពីផ្ទៃមុខឲ្យបានស្អាតល្អ។
៤. កុំប្រើម្សៅទ្រនាប់ប្រភេទស្អិត
សម្រាប់អ្នកមានតម្រូវការផាត់មុខ គួរផាត់មុខបែបស្រាលបំផុត ហើយកុំប្រើម្សៅទ្រនាប់ប្រភេទស្អិត។ ភាគច្រើនម្សៅទ្រនាប់ប្រភេទនេះមានសារជាតិប្រេងច្រើន ដែលអាចកកើតជាបាក់តេរី បណ្ដាលឲ្យឡើងមុនឬកន្ទួលរមាស់ជាដើម កាលណាដែលពាក់ម៉ាសជិតឈឹង ព្រោះដោយសារថប់ខ្យល់។ ដូច្នេះ គួរចៀសវាងជានិច្ច បើចាំបាច់នោះ អាចប្រើម្សៅទ្រនាប់ប្រភេទហុយជំនួសវិញប្រសើរជាង ហើយរមែងលាបទឹកថូន័រ (Toner) ការពារស្បែកមុខ មុននឹងឡើងម្សៅទ្រនាប់។
៥. ប្រើទឹកថូន័រដែលមានសារជាតិអាកុល
សារជាតិអាកុលបង្កជាភាពស្ងួត និងសម្លាប់មេរោគបានល្អ។ ដូច្នេះ ការប្រើទឹកថូន័រដែលមានជាតិអាកុល នឹងរក្សាអនាម័យស្បែកមុខបានយ៉ាងល្អមុននឹងអ្នកធ្វើការផាត់មុខ។ ហើយសម្រាប់ទឹកលុបគ្រឿងសម្អាង (Makeup Remover) ក៏គួរជ្រើសរើសយកមួយណាដែលមានសារជាតិអាកុលផងដែរ ដើម្បីសម្អាតគ្រឿងសម្អាងឲ្យបានស្អាត និងសម្លាប់មេរោគបាន១០០%។
៦. បាញ់ស្ព្រៃជាតិទឹកផ្ដល់សំណើម (Hydrating Mist Spray)
ពាក់ម៉ាសពេញមួយថ្ងៃច្បាស់ជាថប់ដង្ហើមណាស់ ស្បែករបស់យើងក៏ដូចគ្នា។ ជារៀងរាល់ ២ ទៅ ៣ ម៉ោងម្ដង គួរណាដោះម៉ាសចេញ ហើយបាញ់ស្ព្រៃផ្ដល់សំណើម ដើម្បីឲ្យស្បែកមុខបានស្រលះ និងបន្ថែមជាតិទឹកដល់ស្បែក ជាពិសេសសម្រាប់អ្នកដែលមានឡើងម្សៅផាត់មុខ។
៧. ទទួលទានទឹកឲ្យបានគ្រប់គ្រាន់
កុំភ្លេចទទួលទានទឹកឲ្យបានប្រមាណ ២ លីត្រក្នុងមួយថ្ងៃ ព្រោះវាជាឱសថសម្រស់ដែលល្អបំផុត។ រក្សាជាតិទឹកឲ្យបានគ្រប់គ្រាន់ នោះស្បែកនឹងមានសំណើម ហើយមើលទៅស្បែកមុខស្រស់ថ្លាជានិច្ច។ គួរណាទទួលទានទឹកម្ដងបន្តិចៗ តែឲ្យបានញឹកញាប់ កាលដែលបានអនុវត្តបែបនេះជាប្រចាំ អ្នកនឹងឃើញលទ្ធផលដ៏ល្អប្រពៃ។
៨. កុំភ្លេចការពារស្បែកពីពន្លឺថ្ងៃ
ការស្រូបយកពន្លឺថ្ងៃដែលសម្បូរទៅដោយវីតាមីន D ជារឿងល្អ ប៉ុន្តែសម្រាប់តែពន្លឺថ្ងៃមុនម៉ោង ៩ ព្រឹកប៉ុណ្ណោះ។ ក្រោយពីពេលនោះ អ្នកត្រូវការការពារពីកាំរស្មីអូត្រាវីយូឡែតជាដាច់ខាត ព្រោះវាជាឃាតករសម្លាប់ស្បែក និងធ្វើឲ្យស្បែកឆាប់ចាស់។ ម៉ាសបានដើរតួជាវត្ថុការពារពន្លឺថ្ងៃបានយ៉ាងល្អ ប៉ុន្តែផ្នែកមួយចំនួននៃមុខមិនបានគ្របជិតទាំងអស់ឡើយ ដូច្នេះ កុំភ្លេចលាបឡេការពារពន្លឺថ្ងៃឲ្យសោះ ដោយលាបតែកន្លែងដែលត្រូវរងពន្លឺថ្ងៃបានហើយ។ ជ្រើសរើសប្រភេទឡេដែលមានសាច់ស្ដើង ហើយយ៉ាងហោចណាស់មានកម្រិត SPF25+ សម្រាប់អ្នកមិនសូវនៅក្រោមពន្លឺថ្ងៃជាប្រចាំ និងកម្រិត SPF50+ សម្រាប់អ្នកត្រូវហាលថ្ងៃរយៈពេលយូរ។ ប្រសិទ្ធភាពរបស់ឡេជាមធ្យម ការពារបានត្រឹម ២ទៅ៣ ម៉ោងប៉ុណ្ណោះ ត្រូវលាបឡេការពារពន្លឺថ្ងៃឡើងវិញ ខណៈពេលដែលត្រូវហាលក្រោមថ្ងៃបន្តទៀត៕
Article by LENG CHANREASEY
