Sovrin
Sovrin
“អាកោ” សំដៅលើឈ្មោះនំចំហុយមួយប្រភេទធ្វើដោយម្សៅខ្សាយលាយស្ករដាក់ក្នុងពែងចំហុយមាន មេដាក់លាយផងដើម្បីឲ្យឡើងសាច់ធូរៗ : នំអាកោ, ចំហុយអាកោ, ពែងអាកោ ។ ដោយឡែក “អាកោត្នោត” ជាអាកោដែលធ្វើដោយលាយសាច់ត្នោតទុំជាមួយនឹងម្សៅខ្សាយនិងស្ករ។ស្របជាមួយគ្នានេះដែរយោងតាម “បណ្តាញព័ត៌មានវប្បធម៌ខ្មែរ” របស់គេហទំព័រឈ្មោះ “យសោធរ” នំអាកោត្នោតជាប្រភេទមួយក្នុងចំណោមប្រភេទទាំងពីរនៃនំត្នោតនៅក្នុងប្រទេសកម្ពុជាយើង។ នំត្នោតទាំងពីរប្រភេទខុសគ្នាត្រង់ “នំត្នោតអង្ករ” គេយកអង្ករដំណើបទៅវេចនឹងស្លឹកត្នោត(វេបសាយសូវរីនធ្លាប់ផ្សាយរួចហើយ)ឲ្យទៅជានំមានរាងដូចអន្សមរួចយកទៅស្ងោរ។ រីឯ “នំត្នោតម្សៅ” គឺគេយកម្សៅអង្ករខ្សាយចាក់ក្នុងកន្ទោងស្លឹកចារឬស្លឹកចេក រួចចំហុយដែលអ្នកខ្លះហៅថា «អាកោត្នោត» នេះឯង។
គ្រឿងផ្សំសំខាន់ៗរួមមាន ដូងទុំមួយផ្លែ ត្នោតទុំ ១ផ្លែ ស្ករត្នោត ២០០ក្រាម អង្ករខ្សាយ ៥០០ក្រាម និងស្លឹកចេក។ ចំពោះវិធីធ្វើ ដំបូង ត្រូវត្រាំអង្ករពីល្ងាចទុកប្រមាណ៥ម៉ោង-៧ម៉ោង។ នៅថ្ងៃបន្ទាប់ អ្នកត្រូវលាងអង្ករដែលត្រាំនោះឲ្យស្អាត។ ប្រើកូនកាំបិតមកឆ្កឹះសំបកត្នោតចេញឲ្យអស់ហែកត្នោតជាពីរ រួចយកទៅច្របាច់ក្នុងទឹកធម្មតាដើម្បីឲ្យចេញពណ៌ ក្លិន ព្រមទាំងរសជាតិត្នោត។ បន្ទាប់មក ចាក់ទៅក្នុងកន្ត្រងមួយច្រោះឲ្យស្អាត មិនត្រូវឲ្យមានដោយសរសៃត្នោតធ្លាក់ចូលឡើយ។ បន្ទាប់មកទៀត ចាក់ទឹកដែលបានត្រងនោះចូលទៅក្នុងអង្ករដែលបានត្រាំនិងលាងសម្អាត។ បន្ទាប់ពីចាក់ទឹកត្នោតនោះចូលទៅក្នុងអង្កររួចមក ត្រូវយកអង្ករនោះមកកិនឲ្យម៉ដ្ឋ ហើយបន្ថែមស្ករត្នោតចូលនិងយកទៅហាលថ្ងៃមួយថ្ងៃ (ប្រសិនបើអ្នកប្រញាប់ អ្នកអាចដាក់ម្សៅមេនំបុ័ងចូលកូរឲ្យសព្វ ចាក់បានភ្លាមៗ)។ រៀបចំធ្វើកន្ទោងដែលធ្វើអំពីស្លឹកចេក។ បើគ្មានស្លឹកចេកសម្រាប់ធ្វើកន្ទោង អាចប្រើពែងចំហុយដូចចំហុយនំអាកោធម្មតាក៏បាន។ បន្ទាប់ពីរង់ចាំអស់រយៈពេលមួយថ្ងៃមក អ្នកគួរតែធ្វើការចាក់ម្សៅចូលទៅក្នុងកន្ទោងដែលបានរៀបទុកនោះរហូតដល់អស់ម្សៅរួចយកទៅដាក់ចំហុយប្រហែល៤០នាទី។ ចុងក្រោយ រង់ចាំដល់នំឆ្អិន សឹមកោសដូងរោយពីលើជាការស្រេច៕
Article by SRIN SOKMEAN
