Sovrin
Sovrin
បង្ហាញខ្លួនជានារីកំពូលសម្រស់នៅក្នុងសណ្ឋាគាររះថ្មីលំដាប់ពិភពលោកជាមួយកញ្ញា សាន្ត កុសុមៈ
NEWS 3 years ago
ធ្មេចបើកៗ ខែទុតិយាសាឍ ឬ ខែកក្កដា បានរំកិលខ្លួនចូលមកដល់ ជាសញ្ញាប្រាប់មហាជនថាយើងបានចំណាយពេលពាក់កណ្តាលដំបូងនៃឆ្នាំ ២០២១ រួចមកហើយ។ ពេលនេះជាឆមាសថ្មីដែលសូវរីនទើបតែបានផ្តិតយករូបថតម៉ូដែលយ៉ាងស្រស់ឆើតឆាយគ្រងឈុតអាវធំបែបបស្ចិមប្រទេសយីហោ ARMADA ច្នៃដោយអ្នករចនាម៉ូដ បរទេស រ៉េយ៍នីយ៉េរ អាប៊ែលឡូ (Reynier Abello) ឈរបង្អួតរាងនៅខាងមុខសណ្ឋាគារល្បីលំដាប់ពិភពលោក Hyatt Regencyដែលកំពុងបង្ហាញវត្តមានថ្មីសន្លាងកណ្តាលរាជធានីភ្នំពេញប្រកប ដោយភាពស៊ីវិល័យ ស័ក្តិសមឥតខ្ចោះជាហ្វេហ្សិនលក្ខណៈអភិជនប្រចាំឆ្នាំ២០២១នេះ។
នៅក្នុងលេខខែដំបូងនៃឆមាសទីពីរនេះ ប្រិយមិត្តទាំងឡាយនឹងបានឈ្វេងយល់អំពីផ្នត់គំនិតនៃការបង្កើតយីហោគ្រឿងអលង្ការទាន់សម័យ “ឡឺសេរី” របស់ស្ថាបនិកសម័យថ្មីប្រកបដោយភាពច្នៃប្រតិដ្ឋខ្ពស់។ ទន្ទឹមនឹងនេះ លោកអ្នកនឹងស្គាល់ស្នាដៃវិជ្ជាជីវៈដ៏លេចធ្លោគួរឲ្យស្ញើចសរសើររបស់កុលបុត្រខ្មែរពីររូបទៀត គឺ លោកវេជ្ជបណ្ឌិត សួង ម៉េងស្រ៊ាង ដែលត្រូវបានតែងតាំងជាវេជ្ជបណ្ឌិតផ្នែកអាកាសចរស៊ីវិលដំបូងបង្អស់ក្នុងប្រវត្តិសាស្រ្តនៃប្រទេសកម្ពុជា និង លោក កែវ សេងរដ្ឋា ម្ចាស់ជ័យលាភីស្នាដៃប្រលោមលោកខ្នាតខ្លីក្នុងកម្មវិធីប្រឡងអក្សរសិល្ប៍ពានរង្វាន់ព្រះនាងឥន្រ្ទទេវីប្រចាំឆ្នាំ២០២០ ដែលទើបទទួលបានពានជាផ្លូវការកាលពីដើមឆ្នាំនេះ។ លើសពីនេះទៅទៀត កញ្ញា រ៉េត សារីតា ដែលកំពុងមានការគាំទ្រខ្លាំងនៅលើបណ្តាញសង្គមនានាក្នុងពេលបច្ចុប្បន្ន ក៏បានឆ្លៀតឱកាសមកផ្តល់បទសម្ភាសន៍ពិសេសស្តីពីបេសកកម្មថ្មីបន្ទាប់ក្នុងនាមជាបវរកញ្ញាឯកចក្រវាលកម្ពុជាថែមទៀតផង។
ទោះបីជាយ៉ាងណាក៏ដោយ នៅក្នុងឥទ្ធិពលអាកាសធាតុមូសុងនេះ សូវរីនបានលើកយកនូវជម្រើសអាហារពិសេសដែលសម្រិតសម្រាំងដោយចុងភៅដៃឯកនៃកម្មវិធី Master Chef Khmer Season 2 ក៏ដូចជាអត្ថប្រយោជន៍ដ៏ប្រពៃនៃទំពាំងព្រេច គ្រឿងផ្សំអាហារខ្មែរតាំងពីបុរាណកាល ដែលសម្បូរលាស់ក្នុងរដូវភ្លៀងធ្លាក់នេះ ព្រមទាំងជម្រើសកន្លែងលម្ហែកម្សាន្តបែបមាត់ទឹកយ៉ាងត្រជាក់ត្រជំសុខដុមរមនាគួរឲ្យសាកល្បងទៅទស្សនាឲ្យបានយ៉ាងហោចណាស់ម្តងក្នុងមួយឆាកជីវិត៕
