×

ទំពាំង​ព្រេច​ ​បន្លែ​ដ៏​មានប្រយោជន៍​ក្នុង​សង្គម​ខ្មែរ​

TRAVEL & LIVING 4 months ago
 
 

           ទំពាំង​ជា​បន្លែ​ធម្មជាតិ​ដ៏​ពេញ​និយម​ក្នុង​សង្គម​ខ្មែរយើង​ ​មិនថា​សម្រាប់​ជន​ជាតិខ្មែរ​ ​ខ្មែរ​កាត់​សែស្រឡាយ​ចិន​ ​ឬ​ជនជាតិ​វៀតណាម​នោះ​ទេ​។​ ​មនុស្ស​ក្នុង​សង្គម​ខ្មែរ​ជាច្រើន​សុទ្ធតែ​ធ្លាប់​បរិភោគអាហារ​ដែល​ផ្សំ​ពី​ទំពាំង​។​ ​ប៉ុន្តែ​បន្លែ​មួយ​ប្រភេទ​នេះ​មាន​រដូវ​កាលដែល​សម្បូរ​គឺ​រដូវវស្សា​ដែល​ចាប់ផ្តើម​មាន​ភ្លៀង​ធ្លាក់​។​ ​យោង​តាម​វចនានុក្រម​ខ្មែរ​ ​បោះពុម្ពផ្សាយ​ដោយ​វិទ្យាស្ថាន​ពុទ្ធសាសនបណ្ឌិត្យ​ ​គ​.​ស​. ​១​៩​៦​៧​ ​ពាក្យ​ថា​ “​ទំពាំង​” ( ​ន​. ) ​ពន្លក​ឫស្សី​ ​ឬ​ ​បបុស​ ​ជាដើម​ : ​ចិត​ទំពាំង​, ​ស្ល​ទំពាំង​ ​។​ ​ដោយឡែក​ ​ទំពាំង​មាន​ច្រើន​ប្រភេទ​អាស្រ័យ​លើ​ប្រភេទ​ប្ញស្សី ​តួយ៉ាង​ ប្ញស្សី​ស្រុក​ ប្ញស្សី​ផ្អែម​ (​ពូជ​នាំចូល​ពី​បរទេស​) ប្ញស្សី​ចិន​ ប្ញស្សី​ឃ្លៃ​ ប្ញស្សី​ពីងពង់​ ប្ញស្សី​ត្រាច់​ ​ជាដើម​។​ ​ពេលនេះ​ ​សូវ​រី​ន​សូម​បង្ហាញ​ទំពាំង​ព្រេច​ ​ដែល​បាន​មកពី​ប្ញស្សី​ព្រេច​ ​ដែល​ជា​ពូជ​ប្ញស្សី​ដុះ​ក្នុង​ព្រៃ​ធម្មជាតិ​ ​ដែល​មានឱជារស​ឈ្ងុយឆ្ងាញ់​ជាងគេ​ហើយក៏​មាន​តម្លៃ​គួរសម​លើ​ទី​ផ្សារ​ក្នុង​ស្រុក​នា​ពេល​បច្ចុប្បន្ន​ផង​ដែរ​។​

           ​បើ​យោង​តាម​និយមន័យ​ក្នុង​វចនានុក្រម​ខាងលើ​ដដែល​ “​ព្រេច​” ​សំដៅ​លើ​ ​ឈ្មោះ​ឫស្សី​ពួក​មួយ​ដើម​តូច​ៗ​ស្លឹក​ល្អិត​ៗ​ច្រើន​ដុះ​តាម​ដងព្រៃ​ : ​គុម្ពព្រេច​, ​របះ​ព្រេច​; ​កាត់​ព្រេច​ធ្វើ​អំបោស​ ​។​ ប្ញស្សី​ព្រេច​សម្បូរ​ដុះ​នៅ​តាម​វាល​ព្រៃរបោះ​នៅ​តំបន់​ព្រៃ​ភ្នំ​។​ ​នៅ​អំឡុង​រដូវវស្សា​ ​ពេល​ភ្លៀង​ចាប់​ធ្លាក់​ ​ក្នុង​អំ​ឡុងចុង​ខែ​មេសា​និង​ដើមខែ​ឧសភា​ ​ផុត​រដូវប្រាំង​ ប្ញស្សី​ចាស់​ចាប់​ផ្ដើម​​ដុះ​ទំពាំង​ចេញ​ជា​គល់​ឫស្សី​ថ្មី​ប៉ុន​ម្រាមដៃ​មនុស្ស​ធំ​។​ ​ក្នុង​អំឡុង​ពេលនេះ​ឯង​ដែល​អ្នកស្រុក​អ្នកភូមិ​នាំគ្នា​ម្នីម្នា​រូតរះ​ដើរចូល​ព្រៃរបោះ​ស្វែងរក​ប្រមូល​ផល​ជីក​ទំពាំង​ឫស្សីព្រេច​ច្រក​ទាំង​កា​រ៉ុ​ង​ៗ​យកមក​ផ្ទះ​ដើម្បី​ប្រើការ​។​ ដើម្បី​យកមក​ច​ម្អិ​ន​ជា​ម្ហូបអាហារ​ទទួលទាន​ ​ឬ​ ​យកមក​លក់​បន្ត​ឲ្យ​អតិថិជន​ ​គេ​ត្រូវ​បក​ស្រទាប់​ខាងក្រៅ​ចេញ​ ​យក​តែ​សាច់​ទំពាំង​សម​ក​ត្រាំ​ទឹក​​ឲ្យ​ស្អាត​បន្ថែម​ទៀត​។​ ​អ្នកស្រុក​ខ្លះទៀត​កែច្នៃ​ទៅជា​មុខម្ហូប​ដ៏​ឆ្ងាញ់​ពិសា​ដែល​ពួកគាត់​និយម​ចូលចិត្ត​បានជា​ច្រើន​មុខ​តាម​ចំណង់ចំណូលចិត្ត​។​គេ​អាច​​​យក​ទំពាំង​ឫស្សីព្រេច​ ​នេះ​ធ្វើជា​បន្លែ​ដ៏​ពិសេស​សម្រាប់​ស្ល​សម្ល​ម្សៅ​ ​ឬ​ ​ស្ងោរ​ជា​អន្លក់​អម​ជា​មួយទឹក​ប្រហុក​ ​ឬ​ ​ទឹកគ្រឿង​ ​ក៏បាន​ ​អាស្រ័យ​លើ​ការ​និយម​តាម​គ្រួសារ​រៀងៗខ្លួន​។​ ​ក្រៅពី​នេះ​ ​គេ​អាច​​​យក​ទំពាំង​ព្រេច​ទៅ​ធ្វើ​ជ្រក់​ក្នុងរយៈពេល​ពីរ​ទៅ​បី​ថ្ងៃ​ទុកឲ្យ​ជូរ​ ​រួច​យកមក​ផ្ទាប់​ជាមួយនឹង​ត្រី​អាំង​ ​កាន់តែ​មាន​រសជាតិ​ឈ្ងុយឆ្ងាញ់​ចាប់មាត់​ទ្វេ​ដង​។​ជ្រក់​ទំពាំង​ព្រេច​ក៏មាន​ដាក់​លក់​តាម​អន​ឡា​ញ​ដែរ​សព្វថ្ងៃនេះ​ ​ក្នុង​តម្លៃ​មួយ​គីឡូ​ ​ចន្លោះ​២​៥​០​០​០​-​៣០០០​០​ ​រៀល​។​

           ​គេ​ក៏​អាច​​​យក​ទំពាំង​ព្រេច​ធ្វើម្ហូប​ប្រពៃណី​ដ៏​ល្បី​របស់​ជនជាតិ​ភាគតិច​នៅ​ខេត្ត​រតនគិរី​ ​ដែល​មានឈ្មោះ​ថា​ ​សម្ល​ចា​ណា​ង​ ​។​ ​ចំពោះ​វិធី​ធ្វើ​ ​ដំបូង​ត្រូវ​លាង​ស្លឹក​ចា​ណា​ង​ឲ្យ​ស្អាត​ហើយ​ហាលថ្ងៃ​។​ ​បន្ទាប់មក​ ​ត្រូវ​យក​ស្លឹក​នោះ​មក​បុក​ពី​ល្ងាច​ហើយ​ត្រាំទឹក​មួយ​យប់​ឲ្យ​ឡើងជា​តិ​ល្អ​ ​ទើប​យក​ទឹក​ស្លឹក​នោះ​មក​ចាក់​ក្នុង​ឆ្នាំង​ស្ងោរ​រម្ងាស់​ជាមួយ​ទំពាំង​ព្រេច​ ​និង​បន្លែ​ផ្សេងៗ​ទៀត​ ​ដូចជា​ ​ក្តាត​ ​ត្រប់​ ​ស្នៀតពោត​ ​ឃ្លោក​ខ្ចី​ ​ជាដើម​ ​ឲ្យ​យូរ​ដូច​ស៊ុប​។​ ​ចំពោះ​សាច់​ ​គេ​អាច​ប្រើ​សាច់គោ​ (​ឆ្អឹងជំនីរ​ ​ឬ​ ​ឆ្អឹង​ស្មងជើង​) ​ក៏បាន​ ​សាច់ជ្រូក​ក៏បាន​ ​តែ​ភាគច្រើន​ ​ជនជាតិ​ដើម​គេ​និយម​ប្រើ​ឆ្អឹងជំនីរ​ជ្រូក​ជាង​។​ ​គេ​អាច​ទទួលទាន​សម្ល​នេះ​ជាមួយ​បាយ​អង្ករខ្សាយ​ចំហុយ​ ​ឬ​ ​បាយដំណើប​ចំហុយ​ក៏បាន​ទៅតាម​ចំណង់ចំណូលចិត្ត​ ​ផ្ទាប់​ជាមួយ​បុក​ប្រគ្រីវ​ (​ជ្រក់​ម្យ៉ាង​របស់​ជនជាតិ​ភាគតិច​មាន​រសជាតិ​ប្រៃ​ហិ​រ​)​។​ ​សព្វថ្ងៃ​ ​គេ​និយម​ច្នៃ​វា​ជា​ស៊ុប​បរិភោគ​ជាមួយ​មី​ដូច​មី​ខ​គោ​របស់​អ្នក​ស្រុកខ្មែរ​កណ្តាល​យើង​ ​ដែរ​។​

           ​ចំពោះ​គុណ​តម្លៃ​ផ្នែក​សុខភាព​ ​ទំពាំង​ព្រេច​ជា​ប្រភព​នៃ​សារធាតុ​ប្រូតេអ៊ីន​ ​កា​បូ​ន​អ៊ី​ដ្រា​ត​ ​ជាតិ​សរសៃ​ ​និង​ ​សារធាតុ​រ៉ែ​ ​ហើយ​វា​មាន​ជាតិ​ខ្លាញ់​ ​និង​ ​ជាតិ​ស្ករ​ក​ម្រិ​ត​ទាប​បំផុត​ ​ដែល​ស័ក្តិសម​សម្រាប់​ធ្វើជា​អាហារ​សម្រាប់​អ្នក​កើតជំងឺ​ទឹកនោម​ផ្អែម​។​ ​មិន​ត្រឹម​តែប៉ុណ្ណោះ​ ​វា​ផ្តល់​សារធាតុ​អង់​ទី​អុក​ស៊ី​ត​កម្ម​ប្រឆាំង​ជំងឺ​មហារីក​ ​អង់​ទី​ប៊ី​យូ​ទិ​ក​ ​និង​ ​សារធាតុ​ប្រឆាំង​ជំងឺឆ្លង​ផ្សេងៗ​។​ ​ដោយសារ​វា​ផ្ទុក​ជាតិ​កាឡូ​រី​ទាប​ ​វាក​៏​មានប្រយោជន៍​ចំពោះ​ការ​សម្រក​ទម្ងន់​ផង​ដែរ​។​ ​ជាមួយគ្នា​នេះ​ដែរ​ ​វា​ជួយការ​ពារ​បេះដូង​ពី​ការ​ស្ទះ​សរសៃឈាម​ ​និង​ ​លើស​ជាតិ​ខ្លាញ់​ក្នុង​បេះដូង​ ​ព្រមទាំង​ជួយ​ពង្រឹង​ប្រព័ន្ធ​ភាព​ស៊ាំ​រាងកាយ​ជាពិសេស​ក្នុង​រដូវវស្សា​តែម្តង​ដែល​សម្បូរ​បាក់តេរី​ចម្លង​រោគ​។​ ​នៅ​ប្រទេស​ឥណ្ឌា​ ​គេ​ប្រើ​ទឹក​ទំពាំង​ព្រេច​ដើម្បី​បន្សាបពិស​ពស់​ ​ខ្យាដំរី​ ​និង​ ​សត្វ​អ​សិ ​រ​ពិស​ផ្សេងៗ​ព្រោះ​គេ​ជឿ​ថា​វា​មានមុខ​ងារ​បឺត​ពិស​។​ ​នៅ​ប្រទេស​ចិន​ ​ក្បួន​វេជ្ជ​សា​ស្រ្ត​បុរាណ​ណែ​នាំឲ្យ​ស្រ្តី​មានផ្ទៃពោះ​ទទួលទាន​វា​ខ្លះ​ៗ​ដើម្បី​ជួយ​ពង្រឹង​សាច់ដុំ​ស្បូន​ជួយ​សម្រួល​ដល់​ការ​ឆ្លងទន្លេ​ថែមទៀត​ផង​៕​

Article by SRIN SOKMEAN


SUGGESTIONS