SOVRIN Magazine

ឈ្វេងយល់ពីសារធាតុ Retinolដ៏ពេញនិយមនៅក្នុងផលិតផលថែសម្រស់

FASHION & BEAUTY 2 years ago

អ្នកនិយមប្រើផលិតផលសម្រស់ ប្រហែលជាធ្លាប់បានដឹង និងបានឮរួចមកហើយនូវសារធាតុផ្សំជួរមុខនៅក្នុងផលិតផលនោះគឺ រ៉េទីណុល ឬ retinol ។ ការពិតណាស់ retinol ត្រូវបានគេស្គាល់ថាជា វីតាមីន A1 ស្ថិតក្នុងចង្កោមគ្រួសារវីតាមីន A ដែលជាសារធាតុសកម្មមានសមត្ថភាពអាចកែប្រែស្បែកទៅតាមវិធីខុសៗគ្នា អាស្រ័យទៅតាមរូបមន្តផ្សំនៃផលិតផល។ សារធាតុ retinol ត្រូវបានគេយកមកផ្សំនៅក្នុងផលិតផលសម្រស់ច្រើនប្រភេទរាប់តាំងពី គ្រាប់លេប ឡេ គ្រីម ជែល និងសេរ៉ូមជាដើម។

1. តើអ្វីទៅជា retinol?

ដូចបានជ្រាបនៅខាងដើម retinol គឺជាឈ្មោះហៅមួយទៀតរបស់វីតាមីន A1 ស្ថិតក្នុងចំណោមគ្រួសារវីតាមីន A ។ វីតាមីន A ប្រភេទផ្សេងទៀតដែលគេប្រើជាធាតុផ្សំក្នុងផលិតផលសម្រស់រួមមាន retinyl palmitate, retinoic acid និង tretinoin។ វីតាមីន A ទាំងអស់នេះត្រូវបានគេឲ្យឈ្មោះរួមតែមួយថា រ៉េទីណូអ៊ីត ឬ retinoids។ វាត្រូវបានគេប្រើប្រាស់យ៉ាងទូលំទូលាយនៅក្នុងផលិតផលថែរក្សាសម្រស់ និងការព្យាបាលស្បែក ដោយសារតែវាមានសមត្ថភាពជួយបណ្តុះ និងពង្រឹងកោសិកាស្បែកថ្មី។ បើនិយាយអំពីដំណើរដើមទង វីតាមីន A គឺជាសារធាតុផ្សំដែលត្រូវបានរកឃើញដំបូងបំផុតនៅក្នុងឆ្នាំ ១៩១៣ ប៉ុន្តែអ្នកវិទ្យាសាស្ត្រទើបតែរៀនពីការបែងចែកវានៅក្នុងឆ្នាំ ១៩៤៧។ វីតាមីន A បានក្លាយជាសារធាតុផ្សំដ៏មានប្រជាប្រិយភាព និងបានដាក់ជាគ្រឿងផ្សំទៅក្នុងផលិតផលសម្រស់ដំបូងបង្អស់ដោយ វេជ្ជបណ្ឌិតអាមេរិក លោក Albert Kligman។ វេជ្ជណ្ឌិតរូបនេះ បានរួមដៃគ្នាជាមួយវេជ្ជបណ្ឌិត២នាក់ផ្សេងទៀត មានលោក James Fulton និងលោក Gerd Plewig ដោយធ្វើប្រតិបត្តិការតេស្តយ៉ាងហ្មត់ចត់រហូតរកឃើញថា សារធាតុ tretinoin នៃវីតាមីន A អាចមានប្រសិទ្ធភាពក្នុងការប្រឆាំងមុន និងជាសារធាតុផ្សំប្រឆាំងនឹងភាពចាស់។

2. តើ retinol មានតួនាទីយ៉ាងដូចម្តេចនៅលើស្បែក?

ជាការពិត retinol មានតួនាទីជម្រុះកោសិកាស្បែក ដោយបង្កើនកោសិកាថ្មីឲ្យត្រឡប់មកវិញ និងជំរុញដល់ការផលិតខូឡាជិន។ វាត្រូវបានចាត់ទុកជាសារធាតុផ្សំស្តង់ដារខ្ពស់សម្រាប់ប្រឆាំងភាពចាស់ និងសម្អាតស្បែក។ ផលិតផល retinol មានមកជា ប្រេង គ្រីម និងសេរ៉ូមជាដើម។ នៅពេលលាប វានឹងជ្រាបចូលទៅក្នុងស្បែកយ៉ាងឆាប់រហ័ស ដោយម៉ូលេគុលល្អិតនៃ retinol នឹងជ្រាបចូលយ៉ាងជ្រៅទៅស្រទាប់ស្បែកខាងក្រោម ឬស្រទាប់ស្បែកទី២ហៅថា dermis។ វាចូលទៅបន្សាបរ៉ាឌីកាល់សេរី និងជំរុញឲ្យកោសិកាស្បែកស្រទាប់ខាងលើដុះឡើងមកវិញ។ ជាលទ្ធផលវាកាត់បន្ថយការធ្លាក់ចុះនៃខូឡាជិន និងបង្កើនឲ្យស្រទាប់ស្បែកខាងក្រោមក្រាស់ជាងមុន។ វាក៏ជួយរំញោចដល់ការផលិតសរសៃឈាមថ្មីនៅលើស្បែក ដែលកាត់បន្ថយបញ្ហាស្បែកពណ៌មិនស្មើគ្នាផងដែរ។

3. តើ retinol មានអត្ថប្រយោជន៍អ្វីខ្លះ?

នៅពេលប្រើ retinol ជាមួយផលិតផលថែរក្សាសម្រស់ប្រឆាំងភាពចាស់ វាអាចកាត់បន្ថយស្បែកសភាពមិនស្មើគ្នា និងធ្វើឲ្យស្បែកមើលទៅតឹងណែនជាងមុន។ retinol អាចប្រើបានទាំងផ្ទៃមុខនិងដងខ្លួន។ វាមានអត្ថប្រយោជន៍ ជួយកាត់បន្ថយបញ្ហាស្បែកសំខាន់ៗរួមមាន ឡើងស្នាមបន្ទាត់ ភាពជ្រីវជ្រួញ ស្បែកបាត់បង់ភាពភ្លឺថ្លា ស្បែកគ្រើម ស្បែកសភាពមិនស្មើ រន្ធរោមធំ ស្បែកយារធ្លាក់ ជាំ និងអាចម៍រុយ។ ពេលខ្លះ retinol ក៏ប្រើសម្រាប់ព្យាបាលមុន និងស្នាមដោយសារមុនផងដែរ ដែលជាធម្មតាតម្រូវធ្វើការព្យាបាលដោយការប្រើផលិតផល retinol ផ្គួបនឹងការប្រើថ្នាំលេបដើម្បីសម្រួលការហើមរលាក និងសម្លាប់បាក់តេរី។

4. តើ retinol មានផលរំខានឬទេ?

បើទោះ retinol ត្រូវបានអនុម័តដោយរដ្ឋបាលចំណីអាហារ និងឱសថអាមេរិក(FDA) តែវាក៏មិនមែនមានន័យថាគ្មានផលរំខាននោះដែរ។ អ្នកប្រើប្រាស់ retinol អាចជួបបទពិសោធន៍ដូចជា ស្បែកស្ងួត និងរោល ឯផលរំខានផ្សេងទៀតអាចមានដូចជា ឡើងក្រហម រមាស់ និងរបកស្បែកជាដើម។ ដើម្បីកាត់បន្ថយផលរំខាន អាចធ្វើការប្រើមួយថ្ងៃរំលងមួយថ្ងៃ ឬ៣ថ្ងៃម្តង។ នៅពេលស្បែកទម្លាប់ជាមួយផលិតផលហើយ សឹមចាប់ផ្តើមប្រើជាប្រចាំវិញ។ ករណីផលរំខានមិនបាត់ អ្នកចាំបាច់ទៅពិភាក្សាជាមួយវេជ្ជបណ្ឌិត ឬមួយគួរតែពិភ្សាជាមួយវេជ្ជបណ្ឌិតមុនពេលប្រើប្រាស់ថាតើស័ក្តិសមនឹងស្បែកឬអត់ទើបជាការប្រសើរ។ ដោយឡែក តាមរយៈការស្រាវជ្រាវរបស់ មហាវិទ្យាល័យសើស្បែកអាមេរិក The American Osteopathic College អ្នកប្រើប្រាស់តិចជាង១០ភាគរយបានជួបផលប៉ះពាល់រួមមាន ឡើងមុន ឡើងតាអក ស្បែកប្រែពណ៌មិនស្មើគ្នា ឡើងក្រហមពេលត្រូវពន្លឺថ្ងៃ ឡើងពង ផ្សា និងហើម។ ការលាប retinol ក្រោយពេលលាងមុខ៣០នាទីក៏ជួយកាត់បន្ថយការរមាស់ផងដែរ។ retinol អាចធ្វើឲ្យស្បែកឆាប់ប្រតិកម្មជាមួយពន្លឺ ដូច្នេះគួរលាបនៅពេលយប់ជាជម្រើសដ៏ល្អបំផុត។ សម្រាប់ពេលថ្ងៃ បើអាចគួរប្រើឡេការពារស្បែកដែលមានសារធាតុ SPF ពី៣០ឡើងទៅ។ ចុះសួរថាតើអាចលាបផលិតផលផ្តល់សំណើមជាមួយ retinol បានឬទេ? ចម្លើយគឺពិតជាបាន ប៉ុន្តែត្រូវអនុវត្តតាមជំហានរបស់វាដោយ ដំបូងលាងសម្អាតមុខ បន្ទាប់មកជូតមុខឲ្យស្ងួត បន្ទាប់មកទៀតលាប retinol និងចុងក្រោយចាំរយៈពេល៤-៥នាទី សឹមលាបផលិតផលផ្តល់សំណើម។

ជារួមមក ថ្វីបើការប្រើ retinol ត្រូវការចំណាយពេលច្រើនខែ និងជួនមានផលរំខានតិចតួច តែវាក៏នឹងទទួលបានលទ្ធផលមកវិញជាមួយស្បែកតឹងណែន និងស្រស់ថ្លា។ សារធាតុ retinol ពិតជាមានផលវិជ្ជមានចំពោះស្បែក ទាំងសម្រាប់ប្រឆាំងភាពចាស់ និងដោះស្រាយបញ្ហាមុន។ វាជាជម្រើសល្អបំផុតសម្រាប់អ្នកស្រឡាញ់សម្រស់ស្បែកគ្រប់រូប។ ជាវិធីល្អ មុនពេលជ្រើសរើសផលិតផល retinol ណាមួយមកប្រើ គួរគប្បីធ្វើការពិភាក្សាជាមួយអ្នកជំនាញ ឬវេជ្ជបណ្ឌិតសើស្បែក ដើម្បីដឹងច្បាស់ថាតើផលិតផលណាមួយគុណភាពល្អ សំខាន់ត្រូវនឹងប្រភេទស្បែករបស់អ្នក៕

Article by HEM SOKKHIM

SUGGESTIONS