Sovrin
Sovrin
«កណ្យាណ» គឺជាឈ្មោះរបស់កូនខ្មែរមួយរូបដែលចាប់កំណើតនៅលើទឹកដីប្រទេសបារាំង ហើយឈ្មោះនេះត្រូវបានសរសេរជាអក្សរឡាតាំង «KALIANE» ដើម្បីប្រសិទ្ធនាមជាស្លាកយីហោគ្រឿងអលង្ការផ្លូវការកាលពីខែកុម្ភៈ ឆ្នាំ២០២០ ដែលមានស្ថាបនិកខាងលើជាអ្នកផ្តួចផ្តើមមានឈ្មោះពេញថា ទា កណ្យាណ ។ ស្ថាបនិករូបនេះមានវ័យ២៧ឆ្នាំ បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់នៅប្រទេសបារាំង ផ្នែកជំនួញអន្តរជាតិ(International business) លើឯកទេសទំនាក់ទំនងទីផ្សារ(Marketing communication)។ នៅអំឡុងឆ្នាំ២០២០ ខណៈត្រឡប់មកកម្ពុជា កញ្ញាបានធ្វើការស្រាវជ្រាវទៅលើម៉ាកយីហោគ្រឿងអលង្ការជាច្រើនដែលមានដាក់លក់នៅក្នុងស្រុកខ្មែរ និងបានដើរមើលផងដែរតាមផ្សារនានាស្ទើរតែពេញទីក្រុងភ្នំពេញ។ អ្វីៗគ្រប់យ៉ាងក៏បានចាប់ផ្តើមឡើង ដំបូងកញ្ញាបានបញ្ចេញខូឡិកហ្សិនទីមួយរបស់ខ្លួនដាក់លក់នៅលើទីផ្សារ ដែលជាប្រភេទគ្រឿងអលង្ការនាំចូលពីបរទេស។ កញ្ញាបានធ្វើការថតផលិតផលដោយខ្លួនឯង និងមានការជួយពីមិត្តភក្តិដើម្បីបង្ហោះផ្សព្វផ្សាយនៅលើបណ្តាញសង្គម។ ថ្វីបើទទួលបានការគាំទ្រពីសំណាក់អតិថិជនជាច្រើនក្តី តែការបោះជំហាននេះនៅមិនទាន់គ្រប់គ្រាន់ដូចអ្វីដែលចង់បានសម្រាប់ម៉ាកយីហោខ្លួនឡើយ។ មកដល់ថ្ងៃមួយកញ្ញាបានធ្វើដំណើរកម្សាន្តទៅតាមបណ្តាខេត្តដូចជា ខេត្តមណ្ឌលគិរី ខេត្តកំពត និងខេត្តជាច្រើនទៀតសុទ្ធសឹងតំបន់ព្រៃភ្នំ។ កញ្ញាចាប់អារម្មណ៍ឃើញថាធម្មជាតិនៅកម្ពុជាពិតជាស្រស់ស្អាតខ្លាំងណាស់ ពិសេសសម្គាល់ឃើញថាប្រជាជនខ្មែរភាគច្រើនដាំផ្កាអ័រគីដេ និងប្រទាលផ្កា៨ទិសសឹងតែគ្រប់ផ្ទះ។ ដោយមានចិត្តចង់បង្ហាញពីគុណតម្លៃនូវអ្វីដែលជារបស់ខ្មែរ ម្យ៉ាងចង់ផ្សារភ្ជាប់ធម្មជាតិស្រស់ស្អាតទាំងប៉ុន្មានលើទឹកដីកម្ពុជាទៅនឹងគ្រឿងអលង្ការរបស់ខ្លួន កញ្ញាបានសម្រេចចិត្តផ្លាស់ប្តូរពីការនាំចូលគ្រឿងអលង្ការពីក្រៅប្រទេសមកបង្កើតសង្វាក់ផលិតកម្មទាំងស្រុងនៅក្នុងស្រុកវិញ។
ជាលទ្ធផល KALIANE បានបោះជំហានមួយកម្រិតទៀត បង្កើតផលិតផលដោយខ្លួនឯងដោយបញ្ចេញខូឡិកហ្សិនទីពីរឈ្មោះថា «Bloom»។ ខូឡិកហ្សិននេះបានសម្រង់ម៉ូដពីធម្មជាតិដាក់ទៅលើ ខ្សែក ចិញ្ចៀន ក្រវិល ព្រមទាំងដាក់ឈ្មោះដោយ ឡែកពីគ្នាដូចជា «MOROKOT» ដកស្រង់ពីប្រទាលផ្កា៨ទិស, «DAVIKA» ដកស្រង់ពីផ្កាអ័រគីដេ, «THORANY» ដកស្រង់ពីស្លឹកជើងគោ, «MAREK» ដកស្រង់ពីគ្រាប់ម្រេចខ្មែរ, «SEDA» ដកស្រង់ពីផ្កាចំប៉ី, «KALYANI» ដកស្រង់ពីកួរស្រូវជាដើម។ អលង្ការល្អប្រណីតលម្អិតក្បាច់ធម្មជាតិរស់រវើកនៃខូឡិកហ្សិនទី២នេះ ម្ចាស់ម៉ាកយីហោចង់បង្ហាញទៅកាន់អ្នកប្រើ ប្រាស់ថា គ្រប់គ្រឿងអលង្ការទាំងអស់សុទ្ធតែមានដំណើររឿង និងការដកស្រង់ចេញពីប្រភពនីមួយៗច្បាស់លាស់។ ជាក់ស្តែងដូចជាខូឡិកហ្សិន «SEDA» ដកស្រង់ពីផ្កាចំប៉ីជាផ្កាដែលត្រូវបានគេយកទៅតុបតែងលម្អលើសក់អ្នករបាំអប្សរាតាំងពីបុរាណមកម៉្លេះ។ ពីមួយម៉ូដទៅមួយម៉ូដសុទ្ធសឹងតែឆ្លុះបញ្ចាំងពីការរចនាពោរពេញទៅដោយគំនិតច្នៃប្រតិដ្ឋ ជាការពិតម៉ូដទាំងប៉ុន្មានត្រូវបានចេញដោយស្ថាបនិក ទា កណ្យាណ ផ្ទាល់តែម្តង ។
ស្ថាបនិកថាក្នុងសង្វាក់ផលិត គ្រប់ជំហានទាំងអស់ត្រូវប្រាកដថាសម្រិតសម្រាំងឲ្យបានដូចការរំពឹងទុកនិងមើលទៅរស់រវើកដូចធម្មជាតិ។ វាផ្តើមចេញពីការគូរព្រាងម៉ូដដោយស្ថាបនិកផ្ទាល់ បន្ទាប់មកយកទៅឲ្យជាងទងឆ្លាក់ជាជ័រ កាលណាម៉ូដដូចអ្វីដែលចង់បានហើយ ទើបជាងទងបន្តចាក់ជាប្រាក់ និងសង្កត់ពុម្ព រួចធ្វើការក្រូម៉េ។ ពេលចេញជាគំរូពិតស្ថាបនិកនឹងធ្វើការពាក់សាកល្បង ព្រមទាំងឲ្យអ្នកដទៃពាក់សាកល្បងដូចជាមិត្តភក្តិ និងគ្រួសារផងដែរ។ ប្រសិនបើពាក់ទៅមានផាសុកភាព និងពេញចិត្ត ទើបធ្វើជាស្តុកសម្រាប់ដាក់លក់។
បច្ចុប្បន្នគ្រឿងអលង្ការ KALIANE មានដាក់លក់នៅលើបណ្តាញសង្គមតាមរយៈទំព័រផ្ទាល់ខ្លួន និងរមែងដាក់បង្ហាញរៀងរាល់ពីរសប្តាហ៍ម្តងនៅតាមហាងកាហ្វេ និងវិចិត្រសាលនានា។ ចំពោះតម្លៃចាប់ពី ២៥ដុល្លារ រហូតដល់ ១០០ដុល្លារ អាស្រ័យទៅតាមម៉ូដ។ ទៅថ្ងៃមុខ KALIANE មានបំណងចង់សហការជាមួយនឹងសិល្បករក្នុងស្រុក ដើម្បីរចនាម៉ូដរួមគ្នាជួយលើកកម្ពស់ស្នាដៃរបស់ខ្មែរ៕
Article by Soung Soksan
