បើនិយាយពីផលិតផលថែទាំសក់របស់ស្ត្រីគឺមានច្រើនប្រភេទរាប់សឹងមិនអស់ តាំងពីសាប៊ូកក់ ក្រែមបន្ទន់ ថ្នាំអប់ វីតាមីនជំនួយសក់ ស្ព្រែយ៍បាញ់ការពារ និងប្រេងជំនួយសក់ជាដើម។ នេះមិនរាប់បញ្ចូលផលិតផលតម្រូវទៅប្រភេទសក់ផងនោះ។ ក្រៅពីផលិតផលរៀបរាប់ខាងលើ មានផលិតផលទំនើបមួយទៀតដែលសុភាពនារីភាគច្រើនធ្លាប់បានឃើញ តែមិនធ្លាប់បានសាកល្បង នោះគឺ Dry Shampoo ឬសាប៊ូស្ងួត។
• តើអ្វីទៅជា Dry Shampoo?
Dry Shampoo ឬ សាប៊ូស្ងួត គឺជាផលិតផលសក់បែបស្ព្រៃយ៍បាញ់មួយប្រភេទដែលជួយកម្ចាត់ជាតិប្រេង សំណើម និងធូលីនៅលើសក់។ មិនដូចទៅនឹងសាប៊ូកក់សក់ប្រភេទទឹក និងក្រែមបន្ទន់ សាប៊ូស្ងួតធ្វើឡើងមកជាប្រភេទស្ព្រៃយ៍បាញ់ភ្លាមដែលនឹងធ្វើឲ្យសក់ប្រេងប្រែទៅជាស្ងួតត្រឹមតែមួយប៉ប្រិចភ្នែក។ ការបាញ់សាប៊ូស្ងួតមិនចាំបាច់លាងទឹកចេញឡើយ គ្រាន់តែធ្វើការបាញ់ទៅលើសក់កន្លែងឡើងប្រេងជាការស្រេច។ វាជាផលិតផលឃើញលទ្ធផលឆាប់រហ័សសម្រាប់អ្នកមានតម្រូវការដោះស្រាយក្នុងពេលប្រញាប់ ដូចជាពេលបែកញើសបន្ទាប់ពីហាត់ប្រាណរួច ឬសក់ឡើងប្រេងបន្ទាប់ពីធ្វើការផ្លុំ ព្រមទាំងអ្នកមិនសូវមានពេលកក់ផងដែរ។
• តើ Dry Shampoo ធ្វើការយ៉ាងដូចម្តេច?
ធម្មជាតិរបស់មនុស្សស្បែកក្បាលគឺពោរពេញទៅដោយឫសសក់។ ឫសសក់ទំាងនេះមិនត្រឹមតែឲ្យពន្លកសក់ដុះចេញមកទេ ថែមទាំងបង្កើតក្រពេញ Sebum ឬ ប្រេងធម្មជាតិមកជាមួយគ្នាដែលជួយធ្វើឲ្យសក់ទន់រលោង និងជួយការពារស្បែកក្បាល។ យ៉ាងណាមិញ នៅពេលយើងហាត់ប្រាណបែកញើស ឬចំណាយពេលច្រើនម៉ោងនៅក្រោមកម្តៅថ្ងៃ ឬចេញក្រៅត្រូវកម្តៅថ្ងៃញឹកញាប់ នោះប្រេង និងញើសពីស្បែកក្បាល នឹងប្រមូលផ្តុំទៅនឹងសក់ធ្វើឲ្យសក់មើលមកឡើងរលើបបាត់បង់សម្រស់។ ការទទួលយកសេវាកម្ម កក់សក់ ផ្លុំសក់ និងធ្វើម៉ូដសក់ ជាប្រចាំវាហាក់មិនសូវល្អចំពោះសុខភាពសក់ ម្យ៉ាងថែមទាំងខ្ជះខ្ជាយការចំណាយផងដែរ។ នេះគឺជាហេតុផលមួយដែលសុភាពនារីគួរតែពិចារណាក្នុងការប្រើផលិតផលសាប៊ូស្ងួតមកជំនួសផងដែរ។ Dry Shampoo ឬ សាប៊ូស្ងួតជាផលិតផលធ្វើឡើងជាមួយរូបមន្តមានសារធាតុផ្សំសកម្មអាចជាអាកុលឬសារធាតុម្សៅដែលអាចស្រូបយកប្រេង ឬញើសនៅលើសក់។ វាជួយជម្រះជាតិប្រេងពីសក់ធ្វើឲ្យសក់រលាស់រស់រវើកឡើងវិញ។ សាប៊ូស្ងួតភាគច្រើនក៏មកជាមួយរូបមន្តក្លិនដែលនឹងជួយឲ្យសក់មានក្លិនក្រអូប និងស្រស់ស្រាយ ដូចទើបបានកក់សក់រួចផងដែរ។
• រវាងសាប៊ូស្ងួតនិងសាប៊ូកក់ទឹក តើមួយណាជាជម្រើសល្អ?
អាចនិយាយបានថា ទោះយ៉ាងណាសាប៊ូស្ងួតនៅតែមិនអាចជំនួសសាប៊ូទឹកបានឡើយ។ សាប៊ូស្ងួតអាចបានត្រឹមតែជួយសម្ងួតប្រេង កម្ចាត់ធូលី និងកម្ចាត់ក្លិនប៉ុណ្ណោះ ឯសាប៊ូកក់សក់វិញទើបអាចសម្អាតស្បែកក្បាលបានយ៉ាងពិតប្រាកដ។ សាប៊ូទឹកអាចជម្រះ ភាពកខ្វក់ បាក់តេរី និងផ្សិត ដែលកកើតឡើងនៅលើស្បែកក្បាល រួមទាំងសំណល់ពីផលិតផលធ្វើម៉ូដសក់ផ្សេងៗ។ តាមរយៈអ្នកស្រី Bergfeld វេជ្ជបណ្ឌិតវេជ្ជសាស្ត្ររាងកាយបានលើកឡើងថា សក់ និងស្បែកក្បាល តម្រូវលាងសម្អាតជាប្រចាំដើម្បីរក្សាអនាម័យ។ ចំណែកឯការប្រើសាប៊ូស្ងួតគឺវាមានពេលរបស់វា ដូចជាប្រើនៅពេលដែលពិបាករកកន្លែងងូតទឹកនៅអំឡុងពេលធ្វើដំណើរកម្សាន្តបោះតង់តាមព្រៃភ្នំ ឬនៅពេលឈឺឬមានរបួសមិនអាចងូតទឹកបានជាដើម។ សាប៊ូស្ងួតគួរប្រើយូរៗម្តង និងជៀសវាងប្រើច្រើនថ្ងៃជាប់ៗគ្នា។
• ប្រសិនបើចង់សាកល្បង តើត្រូវប្រើបែបណា?
ងាយៗ យើងគ្រាន់តែធ្វើការបាញ់ទៅលើតែកន្លែងណាដែលឡើងប្រេងប៉ុណ្ណោះ។ ពេលបាញ់ត្រូវរក្សាគម្លាតពីក្បាលយ៉ាងហោចណាស់ ១៥ ស.ម។ បន្ទាប់ពីបាញ់ ចូរយកដៃម៉ាស្សាជជុះដើម្បីឲ្យសារធាតុនៃផលិតផលជ្រាបដល់គល់សក់។ ចំពោះកន្លែងណាបាញ់ជ្រុលដៃច្រើនពេក គួរធ្វើការសិតថ្នមៗយ៉ាងប្រុងប្រយ័ត្ន។ មួយវិញទៀត ដើម្បីជៀសវាងធ្វើឲ្យសក់ស្ងួតខ្លាំង គួរកុំបាញ់ទៅលើចុងសក់ ហើយប្រសិនបើចុងសក់ស្ងួតខ្លាំង អ្នកអាចបន្ថែមលាបប្រេងដូង ឬ ប្រេងបន្ទន់សក់បន្តិចបន្តួចជាការស្រេច។
• ផលប្រឈមនៃការប្រើ Dry Shampoo
នៅពេលប្រើ Dry Shampoo ភ្លាមអ្នកអាចនឹងរំភើបចិត្តភ្លែតជាមួយនឹងលទ្ធផលរបស់វា។ អ្នកអាចចង់ប្រើហើយប្រើទៀតរហូតភ្លេចគិតថា កាលណាប្រើញឹកញាប់អាចនឹងប្រឈមបញ្ហាផ្សេងៗដែលនឹកស្មានមិនដល់។ តួយ៉ាង វេជ្ជបណ្ឌិត Bergfeld បានលើកឡើងពីបញ្ហារមែងប្រឈមចំនួន៣ករណីរួមមានដូចជា៖ ទី១ អាចបង្ករមាស់ស្បែកក្បាល៖ រយៈពេលខ្លីសាប៊ូស្ងួតនឹងដើរតួជាម៉ាសសំណល់នៅលើសក់ ដល់ចុងក្រោយទាំង ធូលីដី បាក់តេរី ផ្សិត និងសារធាតុនៃផលិតផលនឹងប្រមូលផ្តុំគ្នាបង្កឲ្យកកស្ទះរន្ធរោម ឡើងមុន ឬក៏ឆ្លងមេរោគ រហូតប្រឈមឡើងកមរមាស់។ ទី២ បង្កឲ្យសក់បែកចុង៖ ជាតិអាកុលនៃធាតុផ្សំរបស់ផលិតផលអាចធ្វើឲ្យចុងសក់ស្ងួតដែលបង្កទៅជាបែកចុង។ សក់ស្ងួតបែកចុងនេះក៏នឹងងាយធ្វើឲ្យសក់ជំពាក់ ផុយ និងដាច់ផងដែរ។ ទី៣ អាចប៉ះពាល់ដល់ការលូតលាស់របស់សក់៖ បញ្ហាដែលធ្វើឲ្យរោលរលាកអាចបង្កទៅជាបញ្ហាអូសបន្លាយរយៈពេលយូរ។ តាមរយៈការសិក្សាស្រាវជ្រាវមួយបានបង្ហាញថា សុខភាពស្បែកក្បាលដែលប្រឈមការហើមរលាកអាចកាត់បន្ថយការលូតលាស់របស់សក់។ វេជ្ជបណ្ឌិតខាងលើក៏បានលើកឡើងបន្ថែមដែរថា ការមិនកក់សក់រយៈពេលយូរអាចជាលទ្ធផលនៃការឡើងអង្គែ និងប្រឈមបញ្ហារោលស្បែកក្បាលផ្សេងៗ។ ដូច្នេះ អ្នកត្រូវកក់សក់សម្អាតស្បែកក្បាលជាចាំបាច់ដើម្បីឲ្យសក់ និងស្បែកក្បាលមានសុខភាពល្អ៕
Article by HEM SOKKHIM