លោក រៀន ហ្វើណេនដេហ្ស (Rian Fernandez) គឺជាអ្នកច្នៃម៉ូដហ្វេហ្សិនដ៏ល្បីឈ្មោះ ជាអ្នកច្នៃឈុតកូនក្រមុំ និងជាអ្នកច្នៃរ៉ូបសម្រាប់បេក្ខភាពកម្មវិធីប្រកួតសម្រស់លំដាប់អន្តរជាតិ។ លោកថែមទាំងជាសមាជិកក្រុមប្រឹក្សាអ្នករចនាម៉ូដអាស៊ាន (Council of ASEAN Fashion Designer) ផងដែរ។ ជាមនុស្សដែលតែងតែមានបេះដូងសិល្បៈ ជារឿយៗបុគ្គលិកលក្ខណៈផ្ទាល់ខ្លួនរបស់លោករមែងបង្ហាញឲ្យឃើញជាក់ស្តែងតាមរយៈគម្រោងការងារធំៗ។ ជាមួយសមិទ្ធផលច្រើនរាប់មិនអស់ លោកត្រូវបានប្រៀបប្រដូចទៅនឹងសារមន្ទីរមួយដែលប្រមូលផ្តុំទៅដោយស្នាដៃល្អឯកជាច្រើនពាន់ ប្រជុំពណ៌ទៅដោយភាពរីករាយលាយឡំនឹងភាពឈឺចាប់។ យ៉ាងណាមិញ ស្នាដៃដ៏ល្អវិចិត្រទាំងនេះហើយដែលបាននាំលោកទៅកាន់កន្លែងនានា។
ចាប់កំណើតលើទឹកដីហ្វីលីពីន លោក រៀន ហ្វើណេនដេហ្ស បានបញ្ចប់ការសិក្សាផ្នែកហ្វេហ្សិននៅមហាវិទ្យាល័យ LaSalle College of Arts ប្រទេសសិង្ហបុរី។ ជាមួយចំណេះជំនាញផ្នែកច្នៃម៉ូដពីប្រទេសជឿនលឿន លោកមានឱកាសការងារសុទ្ធសឹងនៅប៉ែកអឺរ៉ុប ជាអាទិ៍ លោកបានបង្ហាញស្នាដៃនៅលើទស្សនាវដ្តី Vogue អីុតាលី, ក្រណាត់របស់លោកត្រូវបានយកទៅដាក់បង្ហាញក្នុងពិព័រណ៍ Music Through Your Veins ក្នុងទីក្រុងឡុងដ៍ប្រទេសអង់គ្លេស។ បន្តបន្ទាប់មកស្នាដៃសិល្បៈរបស់លោកចេះតែវិវឌ្ឍសាយសព្វពីកន្លែងមួយទៅកន្លែងមួយឥតឈប់ឈរ។
លោក រៀន ហ្វើណេនដេហ្ស (Rian Fernandez)
បើនិយាយពីកម្មវិធីប្រកួតសម្រស់ រយៈពេល៦ឆ្នាំហើយដែលលោកបានប្រឡូកការច្នៃម៉ូដសម្រាប់បេក្ខភាពប្រកួតកម្មវិធីធំៗ ក្នុងនោះរួមមាន៖ កម្មវិធី Miss Universe, កម្មវិធី Miss International, កម្មវិធី Miss World, កម្មវិធី Miss Grand International, កម្មវិធី Miss Earth និង កម្មវិធី Miss Global។ ចំពោះបវរកញ្ញាចក្រវាលកាណាដា លោកបានធ្វើរ៉ូបឲ្យម្ចាស់មកុដឆ្នាំ ២០១៦ Siera Bearchell ម្ចាស់មកុដឆ្នាំ ២០១៧ Lauren Howe និងម្ចាស់មកុដឆ្នាំ ២០១៨ Marta Stepien ជាពិសេសសម្រាប់បវរកញ្ញាចក្រវាលកម្ពុជាយើង លោកក៏បានធ្វើរ៉ូបឲ្យម្ចាស់មកុដតំណាងប្រទេសផងដែរដូចជា៖ ម្ចាស់មកុដឆ្នាំ ២០១៨ កញ្ញា រឿនណាត, ម្ចាស់មកុដឆ្នាំ ២០១៩ កញ្ញា សំណាង អេលីណា, ម្ចាស់មកុដឆ្នាំ ២០២០ កញ្ញា រ៉េត សារីតា និងឆ្នាំចុងក្រោយនេះធ្វើសម្រាប់ កញ្ញា ហង្ស ម៉ានីតា ដែលជាបវរកញ្ញាចក្រវាលកម្ពុជាឆ្នាំ២០២២ ឡើងប្រកួតលើឆាកអន្តរជាតិ។ លោកធ្លាប់បានធ្វើឲ្យផ្ទុះការចាប់អារម្មណ៍ខ្លាំងជាមួយរ៉ូបរាត្រីសមោសរដែលធ្វើសម្រាប់បវរកញ្ញាថៃ Chalita Suansane នៅពេលឡើងប្រកួតលើឆាកអន្តរជាតិ Miss Universe 2016 ធ្វើឡើងនៅប្រទេសហ្វីលីពីន។ លោកធ្លាប់បានឈ្នះពានរង្វាន់ជាអ្នកច្នៃម៉ូដល្អបំផុតនៃហ្វីលីពីនខាងជើង និងជាអ្នកច្នៃម៉ូដដ៏ឆ្នើមនៅក្នុងព្រឹត្តិការណ៍បង្ហាញម៉ូដរបស់ហ្វីលីពីន Pilipinas Fashion And Style Week 2018។
កញ្ញា រ៉េត សារីតា បវរកញ្ញាចក្រវាលឆ្នាំ២០២០
តាំងពីឆ្នាំ ២០១៨ដល់ឆ្នាំ ២០២០ លោកបានបញ្ចេញខូឡិកហ្សិនរបស់លោកនៅក្នុងកម្មវិធីបង្ហាញម៉ូដអន្តរជាតិ New York Fashion Week។ លោកបានសម្ពោធខូឡិកហ្សិនសម្លៀកបំពាក់របស់លោក Personal Protective Clothing នៅ Time Square ទីក្រុងញ៉ូវយកសហរដ្ឋអាមេរិក។ លោកធ្លាប់បានធ្វើសម្លៀកបំពាក់ឲ្យតារាចម្រៀងស្បែកខ្មៅសញ្ជាតិអាមេរិក Kriss Mincey សម្រាប់ចូលរួមក្នុងកម្មវិធីប្រគល់ពានរង្វាន់តន្ត្រី Grammy Award 2017 ដែលធ្វើឡើងនៅទីក្រុងឡូសអាន់ជ័រឡេសរដ្ឋកាលីហ្វ័រញ៉ា។ ជាអ្នកជំនាញច្នៃម៉ូដមួយរូបនៃក្រុមហ៊ុនហ្វេហ្សិនដ៏ធំ HitechMODA នៅទីក្រុងញ៉ូវយក លោកធ្លាប់ទទួលបានពានរង្វាន់ជាអ្នកច្នៃម៉ូដប្រចាំឆ្នាំនៅក្នុងព្រឹត្តិការណ៍ប្រគល់ពានរង្វាន់ Indrajark International Award 2019 ធ្វើឡើងនៅទីក្រុងបាងកកប្រទេសថៃ។
ការពិតណាស់ ថ្មីៗនេះលោកទើបតែបើហាងផ្ទាល់ខ្លួនមួយនៅទីក្រុងបាងកក ហើយក៏បានធ្វើឈុតឲ្យបវរកញ្ញាចក្រវាលអាមេរិកឆ្នាំ២០២២ R’bonney Gabriel សម្រាប់ឡើងប្រកួតលើឆាកអន្តរជាតិផងដែរ។ លោកបានបញ្ចេញសម្លៀកបំពាក់សម្រាប់រដូវត្រជាក់ Fall/Winter 22-23 នៅក្នុងព្រឹត្តិការណ៍បង្ហាញម៉ូដ Arab Fashion Week ដែលធ្វើឡើងនៅអារ៉ាប់រួម។
មកជជីកសួរអំពីឈុតសម្រាប់បវរកញ្ញាចក្រវាលកម្ពុជាឆ្នាំ២០២២ លោក រៀន ហ្វើណេនដេហ្ស បានបរិយាយថា រ៉ូបដែលលោកធ្វើសម្រាប់ កញ្ញា ហង្ស ម៉ានីតា គឺជាអ្វីដែលផ្សារភ្ជាប់ទៅនឹងបេះដូងប្រជាជនកម្ពុជា ហើយនេះក៏ជាអ្វីដែលប្រជាជនកម្ពុជាចង់ឃើញបំផុត។ “វាជាបន្សំរវាងអាវធំដេរតម្រូវរាងដោយដៃផ្ទាល់ និងភាពរលាស់រលើបនៃសំពត់ស្បៃឌិនអង្កាំដ៏ទាក់ទាញ។ ពណ៌ស្វាយនិងខៀវ តំណាងរាជានិយម និងសន្តិនិយម។ រីឯការឌិនអង្កាំនៅលើផ្ទៃក្រណាត់យកលំនាំតាមមែកសាខាដ៏ត្រសាយនៃដើមពោធិ៍ដែលមានតំណាលប្រវត្តិយូរអង្វែង បែរទៅរកទិសដៅខុសៗគ្នាប្រៀបបីដូចជាការព្យាយាមស្វែងរកចម្លើយគ្រប់វិធីដើម្បីឆ្លើយតបនឹងបំណងច្រាថ្នាឆ្ពោះទៅគ្រងមកុដជ័យលាភីដែលធ្លាប់បានរង់ចាំជាយូរមកហើយ។”
សម្រាប់កម្មវិធី Miss Universe ឬ បវរកញ្ញាចក្រវាល អ្នកច្នៃម៉ូដលំដាប់អន្តរជាតិរូបនេះលើកឡើងយ៉ាងដូច្នេះថា Miss Universe គឺជាកម្មវិធីនៃសម្រស់ វប្បធម៌ ភាពចម្រុះ ភាពជាស្ត្រី ដែលមានគោលដៅតែមួយក្នុងការលើកកម្ពស់ទៅលើការតស៊ូមតិ(Advocacy)រៀងរាល់ឆ្នាំ។ តាមរយៈសូវរីន ជាចុងក្រោយ លោក រៀន ហ្វើណេនដេហ្ស មានមតិផ្តាំផ្ញើមកកាន់ប្រជាជនកម្ពុជាយើងដែរថា “រៀងរាល់ឆ្នាំតែងតែធ្វើឲ្យខ្ញុំរំភើបនៅពេលធ្វើរ៉ូបសម្រាប់បវរកញ្ញាចក្រវាលកម្ពុជា ការធ្វើនេះក៏ជាចំណែកមួយសម្រាប់ជាការអរគុណទៅកាន់ប្រជាជនកម្ពុជាដែលផ្តល់ការស្វាគមន៍យ៉ាងកក់ក្តៅក្នុងនាមជាអ្នកច្នៃម៉ូដមួយរូប ហើយក៏បង្ហាញពីអំណរគុណដែលខ្ញុំត្រូវបានជ្រើសរើសជាអ្នកច្នៃម៉ូដសម្រាប់បវរកញ្ញាតំណាងឲ្យប្រទេសកម្ពុជារៀងរាល់ឆ្នាំ”៕
Article by HEM SOKKHIM