Sovrin
Sovrin
ដូចដែលប្រិយមិត្តបានជ្រាបរួចមកហើយថា អំឡុងពេលថ្មីៗនេះកម្ពុជាបានបញ្ចូនបេក្ខភាពទៅប្រកួតក្នុងកម្មវិធី Kids & Teens Pageant Global 2023 នៅឆាកអន្តរជាតិដែលបានធ្វើឡើងក្នុងប្រទេសម៉ាឡេស៊ី។ ជាក់ស្តែង កម្មវិធីនេះបានរកឃើញម្ចាស់តំណែង Little Miss Global 2023 ដែលមានទាំងរូបសម្រស់ សមត្ថភាព រួមទាំងភាពក្លាហាននោះគឺ កញ្ញា ឆដា មុនីនាថ។ ជាការអបអរចំពោះការនាំយកជ័យលាភីមកឲ្យកម្ពុជា សូវរីន បានធ្វើជំនួបសម្ភាសន៍អំពីចំណាប់អារម្មណ៍ និងកត្តាដែលនាំឲ្យម្ចាស់មកុដរូបនេះទទួលបានជ័យជម្នះ។
សម្តីរួសរាយលាយឡំស្នាមញញឹមពោរពេញដោយមន្តស្នេហ៍ កញ្ញា ឆដា មុនីនាថ បានបង្ហើបពីអារម្មណ៍រំភើបមិនទាន់បាត់នៅឡើយថា “ខ្ញុំពិតជារំភើប និងសប្បាយចិត្តមែនទែនរហូតដល់ហូរទឹកភ្នែក ពេលដែលបានឮពិធីករប្រកាសថា កម្ពុជាក្លាយជាម្ចាស់មកុដ Little Miss Global 2023 ព្រោះនេះជាលើកទីមួយសម្រាប់រូបនាងខ្ញុំដែលបានចូលរួមក្នុងកម្មវិធីប្រកួតសម្រស់លើឆាកអន្តរជាតិ។ ពិសេសទៀតនោះកម្មវិធីនេះជាលើកដំបូងសម្រាប់កម្ពុជាដែលបានចូលរួមប្រកួត ហើយក៏ជាកិត្តិយសផងដែរដែលនាងខ្ញុំបានយកជ័យលាភីនេះជូនកម្ពុជា។”
ទន្ទឹមនឹងទទួលបានការគ្រងមកុដ មែនទែនទៅនៅពីក្រោយជ័យជម្នះមួយនេះ កញ្ញាក៏បានបង្ហើបប្រាប់មកកាន់ សូវរីន ដែរថា កញ្ញាបានត្រៀមខ្លួនគ្រប់យ៉ាងសម្រាប់ការប្រកួតនេះ ទាំងការត្រៀមឆ្លើយសំណួរ ការដើរ ការបង្ហាញសមត្ថភាពលើឆាក ជាពិសេសការហាត់សមគ្រងឈុតតំណាងជាតិ និងរ៉ូបរាត្រីសមោសរផងដែរ។ តាមរយៈការប្រឡូកក្នុងកម្មវិធី បវរកញ្ញាវ័យ១២ឆ្នាំ ឆដា មុនីនាថ ទទួលបានបទពិសោធន៍ដូចជា យល់កាន់តែច្បាស់ថាអ្វីជាការឈោងចាប់យកក្តីស្រមៃរបស់ខ្លួនឯង ហើយគ្រប់ការប្រកួតយើងត្រូវមានទំនុកចិត្ត និងធ្វើឲ្យកញ្ញាកាន់តែមានភាពក្លាហានថែមទៀត។
មានឈាមជ័រជាអ្នកសិល្បៈពីកំណើត យុវតីដែលអំណោយផលរាងរៅកម្ពស់ ១,៥៩ ម៉ែត្ររូបនេះបានលើកឡើងបន្តថា “កត្តាដែលជំរុញឲ្យនាងខ្ញុំឈានមកដល់ចំណុចនេះ ហើយប្រឡូកក្នុងវិស័យនេះ ព្រោះម៉ាក់គាត់ធ្លាប់ធ្វើជាតារាចម្រៀង និងជាម៉ូដែលមួយរូបផងដែរ ទើបធ្វើឲ្យខ្ញុំស្រលាញ់ និងមានក្តីស្រមៃចង់ក្លាយជាម៉ូដែលដូចម៉ាក់ដែរ។ មួយវិញទៀតដោយសារមានការលើកទឹកចិត្តពីគ្រួសារផង ទើបខ្ញុំសម្រេចចិត្តចូលរួមប្រកួតតែម្តង។” បើនិយាយពីគោលបំណងទៅថ្ងៃមុខ កញ្ញាចង់ក្លាយជាម៉ូដែល ហើយក៏មានបំណងចូលរួមប្រកួតកម្មវិធី Miss Universe ផងដែរ។
ងាកមកជ្រាបពីជីវប្រវត្តិរបស់ម្ចាស់តំណែង Little Miss Global 2023 នេះវិញ កញ្ញា ឆដា មុនីនាថ មកពីទីក្រុងភ្នំពេញ កើតក្នុងគ្រួសារដែលមានលោកឳពុកជានាយកប្រតិបត្តិការ និងម្តាយជាអ្នកជំនួញ។ មានបងប្អូនពីរនាក់ដែលកញ្ញាជាកូនពៅ នៃបងប្រុសច្បង។ សព្វថ្ងៃយុវតីដែលអាចប្រើប្រាស់ភាសាអង់គ្លេសបានយ៉ាងស្ទាត់ជំនាញរូបនេះកំពុងសិក្សាថ្នាក់ទី៧នៃអនុវិទ្យាល័យសន្ធរម៉ុក។ តាមរយៈ សូវរីន ជាចុងក្រោយកញ្ញាក៏មានពាក្យពេចន៍ផ្តាំផ្ញើទៅកាន់បេក្ខនារីដែលមានបំណងចង់ប្រឡូកក្នុងកម្មវិធីនេះដែរថា ប្រសិនបើចង់ប្រកួតគួរតែសាកល្បង វាមិនទាន់យឺតពេលនៅឡើយទេ។ បន្ថែមលើសពីនេះជាបវរកញ្ញាត្រូវតែថែទាំសម្រស់ ហ្វឹកហាត់ទាំងសមត្ថភាព ទាំងចំណេះដឹងទូទៅ និងភាសាផងដែរ៕
Article by SOUNG SOKSAN
Image Courtesy by Kids & Teens Pageant Global 2023
