Sovrin
Sovrin
ក្នុងចំណោមផ្នែកសហគ្រិនវ័យក្មេងឆ្នើមនៃកម្ពុជាទាំងអស់ លោកស្រី នុន ចាន់នី ជាបេក្ខនារីជ័យលាភីពានរង្វាន់«សហគ្រិនស្រ្តីឆ្នើមវ័យក្មេង» ហើយក៏ជាស្រ្តីតែមួយរូបគត់ដែលទទួលបានពានរង្វាន់ផ្នែកនេះកម្មវិធី « ពានរង្វាន់សហគ្រិនវ័យក្មេងកម្ពុជា ២០២១ » ហៅកាត់ថា CYEA 2021 សហការរៀបចំដោយសហគ្រិនវ័យក្មេងកម្ពុជា (YEAC) និងអង្គការបណ្តាញសហគ្រិនភាពសកលកម្ពុជា (GEN CAMBODIA) ក្រោមការឧបត្ថម្ភធំដោយសហគ្រិនខ្មែរ (Khmer Enterprise) ខណៈដែលពានរង្វាន់៤ផ្សេងទៀតបានទៅបេក្ខបុរសទាំងអស់។
លោកស្រី នុន ចាន់នី
ជ័យលាភីពានរង្វាន់ខាងលើនេះជាស្ថាបនិកសិប្បកម្ម «រាជិនីបាណាណាសំឡូត» ឯកទេសផលិតអាហារសម្រន់ធ្វើពីចេកក្នុងស្រុកបានឲ្យដឹងថាសិប្បកម្មរបស់លោកស្រីមានទីតាំងផលិតស្ថិតនៅភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង។ ក្នុងអំឡុងឆ្នាំ២០១៨ដោយសារតែកសិករនៅតំបន់នោះប្រឈមមុខនឹងកង្វះទីផ្សារកសិផលចេកទើបលោកស្រីផុសឡើងនូវគំនិតយកចេកដែលសេសសល់នោះមកច្នៃជាចេកឆាបបែបប្រពៃណីទុកទទួលទានហើយចែករំលែកខ្លះដល់អ្នកជិតខាងរហូតចេះតែល្បីតៗគ្នាដល់មានគេកុម្ម៉ង់ដាក់ជាបង្អែមក្នុងកម្មវិធីបុណ្យទានក្នុងតំបន់។ បន្ទាប់មក ក្នុងឆ្នាំ២០១៩ លោកស្រីបានចូលរួមទទួលការបណ្តុះបណ្តាលជំនាញអាជីវកម្មជាមួយស្ថាប័នជំនាញមួយចំនួន ជាអាទិ៍រួមមាន SHE Investments, Impact Hub និង Khmer Enterprise (KE) រហូតដល់បានយកផលិតផលនោះទៅចុះបញ្ជីពាណិជ្ជកម្មក្លាយជាសិប្បកម្មពេញសិទ្ធិត្រឹមត្រូវ ។ បច្ចុប្បន្ន អាជីវកម្មចេកឆាបជំនាន់ថ្មីនេះកាន់តែរីកចម្រើនទទួលបាននូវចំណាប់អារម្មណ៍ពីបណ្តាអតិថិជន បណ្តាញសហគ្រិននានា និងស្ថាប័នសារព័ត៌មានផ្សេងៗ។ ដោយសារតែបែបនេះហើយ ទើបសព្វថ្ងៃសង្វាក់ផលិតកម្មមានកំណើនដែលតម្រូវឲ្យលោកស្រីត្រូវបន្ថែមបុគ្គលិកអចិន្រ្តៃយ៍ដែលសុទ្ធសឹងជាប្រជាសហគមន៍ក្នុងស្រុកសំឡូតរហូតដល់១២នាក់ខុសពីគ្រាដំបូងដែលលោកស្រីផ្តួចផ្តើមធ្វើការនេះតែម្នាក់ឯងប៉ុណ្ណោះ។
ងាកមកកម្មវិធីពានរង្វាន់ខាងលើនេះវិញ ពេលនោះលោកស្រីបានប្រឹងព្យាយាមយ៉ាងស្វិតស្វាញទម្រាំទទួលបានជ័យលាភីនៅវគ្គផ្តាច់ព្រ័ត្រ។ លោកស្រីយល់ថាកត្តាដែលធ្វើឲ្យលោកស្រីស័ក្តិសមនឹងទទួលបានពានមួយនេះគឺដោយសារលោកស្រីជាស្ថាបនិកសំខាន់ដែលជួយរកទីផ្សារឲ្យកសិផលចេកក្នុងតំបន់ផ្តល់អាទិភាពដល់សហគមន៍ហើយក៏ជាស្រ្តីដែលដើរតួនាទីតែម្នាក់ឯងក្នុងការគ្រប់គ្រងដឹកនាំអាជីវកម្មនេះតាំងពីបាតដៃទទេផលិតបានតែ៥គីឡូក្រាមក្នុងមួយថ្ងៃតស៊ូអាចផលិតលក់បានដល់២០០គីឡូក្រាមក្នុងមួយថ្ងៃ។ “ខ្ញុំមិនគិតថាដើម្បីប្រកួតប្រជែងបានពានទេ តែយើងសង្ឃឹមថា នៅពេលយើងចូលរួមកម្មវិធីមួយ វាជាmarketingមួយសម្រាប់អាជីវកម្មយើង។ ទោះបីយើងមិនជាប់ក៏ដោយ មានន័យថាយើងធ្វើខ្លួនឲ្យគេស្គាល់។ ហ្នឹងជាការប្រូម៉ូតដែលយើងអត់ត្រូវការផ្សាយពាណិជ្ជកម្មឲ្យអស់លុយទេ ” លោកស្រីបានថ្លែង។
តាំងពីជាប់ជ័យលាភីនេះមក អាជីវកម្មនេះកាន់តែត្រូវបានគេទទួលស្គាល់ទូលំទូលាយជាងមុន។ ជាក់ស្តែងផលិតផលរបស់លោកស្រីត្រូវបានគេទទួលតាំងលក់នៅតាមហាងកាហ្វេ៤០កន្លែងនៅភ្នំពេញ បាត់ដំបង ព្រះសីហនុ និងព្រៃវែង។ សព្វថ្ងៃផលិតផលត្រូវបានបែងចែកជាបួនរសជាតិ រសជាតិដើម ផ្អែម ជូរហិរ និងប្រៃស្លឹកក្រូច រួមមានចំណុះ ២៥ក្រាម (សំបកប្លាស្ទិកខ្ចប់ដោយម៉ាស៊ីន) ១២០ ក្រាម (កញ្ចប់ក្រដាស) និង ៣០០ក្រាម (កញ្ចប់ប្លាស្ទិកអ៊ុតដោយដៃ)។ ប្រភេទទីមួយ មានតម្លៃ ៥០០រៀល។ ប្រភេទទីពីរ មានតម្លៃ ៥០០០រៀល និងប្រភេទទីបី មានតម្លៃ ៧០០០-៨០០០រៀល។ លក្ខណៈពិសេសរបស់វាគឺ ញ៉ាំច្រើនមិនក្តៅក មិនមានសារធាតុរក្សាទុក និងសាច់ចេកស្ងួតមិនឡើងប្រេង ខុសពីចេកឆាបដែលនាំចូល ឬចេកឆាបធម្មតាដែលលក់តាមទីផ្សារ។
ទៅថ្ងៃអនាគត លោកស្រី នុន ចាន់នី មានគោលដៅសម្រាប់អាជីវកម្មនេះគឺបង្កើនផលិតកម្មឲ្យបាន ៥តោន ក្នុងរយៈពេល៥ឆ្នាំទៅមុខ បន្ថែមម៉ាស៊ីនក្នុងសង្វាក់ផលិតកម្ម និងកែច្នៃផលិតផលផ្សេងៗទៀត ប៉ុន្តែអ្វីដែលសំខាន់ត្រូវផ្តោតជានិច្ចនោះគឺរក្សាគុណភាពនិងអនាម័យផលិតផលទើបអាចរក្សាកេរ្តិ៍ឈ្មោះអាជីវកម្មបានគង់វង្សយូរអង្វែង ។ ជាចុងក្រោយ លោកស្រីបានផ្តល់ដំបូន្មានឲ្យស្រ្តីគ្រប់រូបដែលមានបំណងចង់ក្លាយជាសហគ្រិនជោគជ័យថាត្រូវមានគោលដៅនិងជំហរដោយខ្លួនឯង និងសូមឲ្យមហាជនងាកមកគាំទ្រផលិត ផលក្នុងស្រុកដែលជាស្នាដៃស្រ្តីខ្មែរដើម្បីជាកម្លាំងចិត្តដល់ពួកគេ៕
Atricle by SRINSOKMEAN
