Sovrin
Sovrin
អាថ៌កំបាំង៣យ៉ាងដែលអ្នកគួរតែដឹងអំពីអត្ថប្រយោជន៍ទឹកតែចំពោះសក់
FASHION & BEAUTY 2 years ago
ការលាងជម្រះសក់ដោយទឹកតែ គឺជាមធ្យោបាយដោះស្រាយបញ្ហាលើសក់និងស្បែកក្បាលដែលគេនិយមប្រើប្រាស់ច្រើនសតវត្សរ៍មកហើយ ហើយវាក៏ត្រូវបានគេយកទៅធ្វើគ្រឿងផ្សំសម្រាប់ផលិតផលថែរក្សាសក់ផងដែរ។ ជាក់ស្តែង សារធាតុចិញ្ចឹមពីធម្មជាតិដែលមាននៅក្នុងតែ អាចផ្តល់អត្ថប្រយោជន៍យ៉ាងច្រើនចំពោះសក់ដូចជា ជួយពន្លឿនការលូតលាស់សក់ កាត់បន្ថយសក់បែកចុង លើសពីនេះវាក៏ដើរតួជាភ្នាក់ងារជួយបន្ថែមភាពភ្លឺរលោងដល់សក់ពណ៌ទៀតផង។ តែ ប្រៀបបាននឹងឱសថធម្មជាតិ តែខ្លះមានផ្ទុកនូវសារធាតុប្រឆាំងបាក់តេរី រីឯតែខ្លះទៀតមានផ្ទុកនូវសារធាតុប្រឆាំងមេរោគ ដែលអាចជួយដោះស្រាយបញ្ហាស្បែកក្បាលរមាស់។ តទៅនេះយើងសូមណែនាំនូវតែដែលមានសមត្ថភាពខ្ពស់ក្នុងការជួយឲ្យសក់មានសុខភាពល្អ ភ្លឺរលោងស្អាត ពិសេសកាត់បន្ថយបញ្ហាសក់ជ្រុះ។
1. តែជួយដល់ការលូតលាស់សក់
ក្នុងចំណោមតែជាច្រើនមុខ យើងអាចជ្រើសរើសតែបៃតង ដោយសារតែវាមានផ្ទុកខ្ពស់នូវសារធាតុចិញ្ចឹម និងសារធាតុប្រឆាំងអុកស៊ីតកម្ម ដែលមានប្រសិទ្ធភាពជំរុញដល់ការលូតលាស់របស់សក់។ សារធាតុប្រឆាំងអុកស៊ីតកម្មនៃតែបៃតង នឹងជួយការពារការបំផ្លាញសក់ពីកម្តៅថ្ងៃ ព្រមទាំងការពារការលូតលាស់បាក់តេរី និងផ្សិតនៅលើស្បែកក្បាលផងដែរ។ លើសពីនេះជាតិកាហ្វេអ៊ីនដែលត្រូវបានរកឃើញនៅក្នុងតែបៃតងផងនោះ អាចជ្រាបចូលយ៉ាងជ្រៅទៅកាន់ឫសសក់ ធ្វើឲ្យសក់មានថាមពលលូតលាស់ឡើងវិញ។
2. តែជួយឲ្យសក់ពណ៌ភ្លឺរលោងឡើង
ខណៈការលាងសក់ជាមួយតែអាចធ្វើបានលើគ្រប់ប្រភេទសក់ ជាមួយគ្នានេះវាផ្តល់នូវប្រយោជន៍អស្ចារ្យមួយសម្រាប់អ្នកមានសក់ពណ៌ ទាំងសក់ពណ៌ពីកំណើត និងសក់ពណ៌ដោយសារលាបថ្នាំ។ តែផ្កាខាម៉ូម៉ាយ (Chamomile) គឺជាតែដែលអាចធ្វើឲ្យសក់ពណ៌ទង់ដែងភ្លឺរលោងឡើង ហើយបើយកវាទៅលាយជាមួយ ទឹកក្រូចឆ្មារមួយចំហៀងផ្លែ និងទឹកឃ្មុំតែបន្តិច នឹងធ្វើឲ្យសក់កាន់តែភ្លឺចាំងស្អាតពេលត្រូវពន្លឺថ្ងៃ។ សម្រាប់អ្នកមានសក់ពណ៌ត្នោត អាចជ្រើសរើសតែផ្ការំយោល និងតែរ៉ូអូប៊ូស (rooibos) ដែលតែទាំងពីរនេះអាចធ្វើឲ្យសរសៃសក់ឡើងពណ៌លេចស្អាត រួមជាមួយក្លិនដ៏ឈ្ងុយប្រហើរផងដែរ។ ដោយឡែកសម្រាប់អ្នកមានសក់ពណ៌ខ្មៅវិញ យើងសូមណែនាំឲ្យប្រើតែខ្មៅ ឬតែដែលមានពណ៌ខ្មៅដិត ព្រោះវានឹងជួយឲ្យសក់កាន់តែខ្មៅរលោង ជាពិសេសអ្នកមានសក់ពណ៌បែកប្រផេះ។
តែផ្កាខាម៉ូម៉ាយ (Chamomile)
តែរ៉ូអូប៊ូស (rooibos)
3. តែជួយបញ្ហាសក់ជ្រុះ
តែខ្មៅគឺជាជម្រើសល្អបំផុតសម្រាប់អ្នកកំពុងមានបញ្ហាសក់ជ្រុះ ដោយសារតែសារធាតុពីធម្មជាតិទាំងប៉ុន្មានមានផ្ទុកនៅក្នុងតែខ្មៅអាចជួយទប់ស្កាត់អ័រម៉ូន អែនដ្រូជែន (Androgen) ដែលជាភ្នាក់ងារបង្កឲ្យឫសសក់ទន់ខ្សោយហើយចាប់ផ្តើមជ្រុះ។ តែខ្មៅនឹងជួយពង្រឹងឫសសក់ឲ្យរឹងមាំឡើងវិញ ព្រមទាំងជួយចិញ្ចឹម និងធ្វើឲ្យសរសៃសក់រឹងមាំមិនងាយដាច់។
បន្ទាប់ពីអ្នកបានដឹងរួចមកនូវប្រភេទតែដែលអាចជួយដល់សក់ ឥឡូវនេះយើងមកដឹងអំពីវិធីងាយៗក្នុងការយកតែមកអនុវត្តនៅលើកសក់វិញម្តង៖
ដើម្បីបានប្រសិទ្ធភាពខ្ពស់ យើងត្រូវឆុងតែឲ្យរាងចាស់ ដោយយកតែណាមួយដែលបានរៀបរាប់នៅខាងដើម ពី៣ទៅ៥កញ្ចប់ ឆុងជាមួយទឹកក្តៅ២ពែងឬស្មើនឹង៤៧០ ម.ល ទុកឲ្យត្រជាក់ ហើយចាក់ចូលក្នុងដបស្ព្រៃបាញ់។ ស្ព្រៃទឹកតែនេះយើងប្រើនៅពេលកក់សក់រួច ដោយពេលកំពុងជូតសក់នៅសើមល្មម យើងចាប់ផ្តើមយកស្ព្រៃទឹកតែមកបាញ់ឲ្យសព្វទាំងសក់ និងលើស្បែកក្បាល។ បន្ទាប់ពីបាញ់សព្វជ្រុងអស់ហើយ យើងចាប់ផ្តើមយកដៃធ្វើការម៉ាស្សាសក់ និងស្បែកក្បាលរយៈពេល២ទៅ៣នាទី រួចចាំប្រើមួកប្លាស្ទិកគ្របក្បាលឲ្យជិត ទុកចោលរយៈពេលប្រមាណ៣០នាទី សឹមលាងជម្រះចេញដោយទឹកត្រជាក់។
គួរចងចាំថា៖ ក្រោយពេលផ្អាប់សក់ទុកចោលជាមួយទឹកតែហើយ យើងមិនចាំបាច់លាងជម្រះជាមួយសាប៊ូទៀតទេ អាចត្រឹមតែលាងទឹកត្រជាក់គឺគ្រប់គ្រាន់។ យ៉ាងណាមិញ កញ្ចប់តែដែលឆុងរួចយើងក៏អាចយកមកប្រើជាប្រយោជន៍ផ្សេងទៀត ដូចជា ដាក់ស្អំនៅលើភ្នែកដើម្បីសម្រួលភ្នែកហើម និងកាត់បន្ថយថ្នក់ភ្នែកខ្មៅ ឬរង្វង់ភ្នែកខ្មៅ។ ឬមួយវិញទៀត យើងអាចកាត់កញ្ចប់តែយកកាកតែមកធ្វើជាស្ក្រាប់ស្បែកដុះជម្រុះកោសិកាចាស់ៗផងដែរ៕
Article by SOUNG SOKSAN
