Sovrin
Sovrin
លីវ ជីលី ប្រហែលជាប្រិយមិត្តបានជ្រាបរួចមកហើយនូវកេរ្តិ៍ឈ្មោះរបស់កញ្ញា ដែលជាបវរកញ្ញា Miss Grand Cambodia 2020។ ក្រោយតំណាងឱ្យកម្ពុជាទៅប្រកួតលើឆាកអន្តរជាតិក្នុងកម្មវិធី Miss Grand International 2020រួចមក កញ្ញាក៏បានបោះជំហានជាលើកទី២ ដើម្បីតំណាងឱ្យកម្ពុជាទៅប្រកួតក្នុងកម្មវិធី Miss Supranational 2023 ដែលនឹងប្រារព្ធឡើងនៅលើទឹកដីប្រទេសប៉ូឡូញ និងមានបេក្ខភាពចូលរួមប្រកួតដែលមកពីបណ្តាប្រទេសផ្សេងៗលើពិភពលោកចំនួនរាប់រយប្រទេស។
កញ្ញា លីវ ជីលី បានបង្ហើបថា ខ្លួនមានក្តីស្រមៃចូលរួមប្រកួតក្នុងវិស័យបវកញ្ញា និងតំណាងឱ្យកម្ពុជាទៅបង្ហាញខ្លួនលើឆាកអន្តរជាតិ ហើយកញ្ញាក៏សម្រេចបានដូចបំណង។ អមជាមួយក្តីស្រលាញ់ និងធ្លាប់មានបទពិសោធន៍ក្នុងវិស័យនេះ កញ្ញាក៏មានចិត្តចង់ចូលប្រឡូកម្តងទៀត។ “កត្តាដែលជំរុញឱ្យខ្ញុំចូលប្រកួតម្តងទៀត ព្រោះចិត្តខ្ញុំនៅតែស្រលាញ់ក្នុងវិស័យនេះខ្លាំង ហើយក៏គិតថា ចង់តំណាងឱ្យកម្ពុជាម្តងទៀតទៅប្រកួតក្រៅប្រទេស មុនពេលអាយុខ្ញុំកាន់តែច្រើនចូលប្រកួតលែងបាន ទើបចង់សម្រេចក្តីសម្រៃខ្លួនឯងម្តងទៀតជាលើកចុងក្រោយ។” ម្ចាស់មកុដរូបនេះបានលើកឡើង និងបន្តទៀតថា ដ្បិតកញ្ញាធ្លាប់បានចូលរួមប្រកួត Miss Grand International ម្តងរួចមកហើយ តែការចូលរួមប្រកួត Miss Supranational 2023 នេះ គឺមានភាពខុសប្លែកពីកម្មវិធីលើកមុន ដោយលើកនេះក្រុមហ៊ុនមានលក្ខន្តិកជាច្រើន តួយ៉ាង ទាំងការថតរូប ការធ្វើវីដេអូ និងការរៀបចំឈុតសម្រាប់ចូលរួមប្រកួតជាដើម។
ងាកមកជជីកសួរអំពីការត្រៀមខ្លួនសម្រាប់ការចូលរួមប្រកួត បវរកញ្ញាដែលមានកម្ពស់ ១,៧៥ ម៉ែត្រ រូបនេះបានបង្ហើបថា កញ្ញាត្រូវត្រៀមខ្លួនទាំងឈុតដែលកម្មវិធីតម្រូវរហូតទៅដល់៤០ឈុត ការហាត់សមលើការដើរ ទាំងការដើរបែប Top Model ការដើរឈុត Evening Gown ការដើរឈុត Swim suit ជាពិសេសគឺវគ្គ Talent Show តែម្តងក៏កញ្ញាព្យាយាមហាត់ឲ្យបានច្រើនដែរ។ កញ្ញាក៏បានបន្ថែមទៀតថា មិនត្រឹមតែត្រៀមខ្លួនហាត់សមត្រឹមអ្វីដែលបានរៀបរាប់ខាងលើនេះទេ កញ្ញាក៏ត្រូវថែរក្សាទាំងសុខភាព គឺត្រូវហាត់ប្រាណឲ្យបានទៀងទាត់ និងថែរក្សាសម្រស់។ ជាការពិត សម្រាប់កម្មវិធីប្រកួតសម្រស់នីមួយៗដែលមានវត្តមាននៅប្រទេសកម្ពុជា ក៏ដូចជានៅអន្តរជាតិ តែងតែរៀបចំឡើងមានគោលបំណងផ្សេងៗពីគ្នាទៅតាមកម្មវិធី ដ្បិតកម្មវិធីប្រកួតសម្រស់មិនមែនផ្តោតលើរូបសម្រស់តែម្យ៉ាងនោះទេ។ ដោយឡែក សម្រាប់កម្មវិធី Miss Supranational ត្រូវបានបង្កើតឡើងក្នុងគោលបំណង ចង់បំផុសដល់ស្រ្តីដែលតស៊ូ មានភាពក្លាហាន មោះមុត មានសមត្ថភាព មានទេពកោសល្យ មិនមែនផ្តោតតែលើរូបសម្រស់ឬការប្រើប្រាស់ភាសាអង់គ្លេសឲ្យបានស្ទាត់ជំនាញតែម្យ៉ាងនោះទេ។ ចំពោះកម្មវិធីនេះទៀតសោត គឺជាលើកទី២ហើយដែលប្រទេសកម្ពុជាយើងបានចូលរួមកម្មវិធីលំដាប់អន្តរជាតិមួយនេះ។
ធ្លាប់ចូលរួមប្រកួតកម្មវិធីសម្រស់ចំនួន២លើករួចមកហើយ តើសម្រាប់កញ្ញាផ្ទាល់ គិតថាវាមានផលលំបាកអ្វីខ្លះ? ឆ្លើយតបទាំងមិនលាក់លៀម កញ្ញាបានលើកឡើងថា “ពេលខ្លះបងប្អូនឃើញបវរកញ្ញាឬបេក្ខភាពចូលរួមប្រកួត តែងខ្លួនស្អាតៗបង្ហាញខ្លួននៅខាងលើឆាក មែនទែនទៅនៅពីក្រោយគឺមានរឿងជាច្រើនដែលលំបាក ការតស៊ូ ការព្យាយាមជាច្រើនដែលបានបង្កប់នៅពីក្រោយភាពស្រស់ស្អាតទាំងនោះ។ ខ្ញុំត្រូវរៀនសូត្រជាច្រើន ហើយការហាត់សមមានច្រើនយ៉ាង ទាំងការដើរ ការរៀបចំខ្លួន និងធ្វើអ្វីទៅតាមលក្ខន្តិកដែលកម្មវិធីតម្រូវឱ្យធ្វើ។ ពេលខ្លះរវល់ហាត់ខ្លាំងពេករហូតមិនបានញ៉ាំ មិនបានគេងសម្រាកគ្រប់គ្រាន់ក៏មាន និយាយរួមត្រូវលះបង់ទាំងកម្លាំងកាយ កម្លាំងចិត្ត។”
ក្រៅពីនេះ ទាក់ទងទៅនឹងវិស័យសិល្បៈ កញ្ញាមានសមត្ថភាពអាចសម្តែង ច្រៀង បញ្ចូលសម្លេង ជាពិធីករ និងដើរម៉ូដជាដើម។ មកជ្រាបអំពីគោលបំណងទៅថ្ងៃមុខវិញ បវរកញ្ញា លីវ ជីលី នៅមានគោលដៅធំ២ទៀតគឺ ចង់ក្លាយជាអ្នកចម្រៀង និងជាអ្នកជំនួញមួយរូប តែយ៉ាងណាក៏នៅតែប្រឡូកក្នុងវិស័យសិល្បៈដដែល។ ហើយសម្រាប់ឱកាសដែលកញ្ញានឹងទៅប្រកួតបវរកញ្ញានៅប្រទេសប៉ូឡូញខាងមុខនេះ កញ្ញានឹងព្យាយាមសិក្សាស្វែងយល់ពីអ្វីដែលថ្មីៗ ក៏ដូចជាគំនិតបង្កើតអាជីវកម្មនៅទីនោះ ដើម្បីអភិវឌ្ឍន៍ខ្លួនផងដែរ។
តាមរយៈ សូវរីន កញ្ញាក៏មានពាក្យពេចន៍ផ្តាំផ្ញើដែរថា “ខ្ញុំសូមសំណូមពរដល់ប្រជាជនខ្មែរជួយគាំទ្រវិស័យបវរកញ្ញាឲ្យកាន់តែខ្លាំង និងសង្ឃឹមថារាជរដ្ឋាភិបាលនឹងជួយឈឺឆ្អាលចំពោះវិស័យបវរកញ្ញា។ ចំពោះមិត្តៗនារីដែលចង់ប្រឡូកវិស័យបវរកញ្ញា សូមពង្រឹងទៅលើការដើរ ចំណេះដឹងភាសា ពិសេសកុំភ្លេចភាពរឹងមាំ និងរុញច្រានអារម្មណ៍ដែលភ័យខ្លាចចោល។ សម្រាប់ភាសាបរទេសបើយើងមិនសូវចេះក៏អាចប្រឡងបានដែរ តែបើចេះក៏កាន់តែល្អ ព្រោះងាយស្រួលក្នុងការទំនាក់ទំនង៕
Article by SOUNG SOKSAN
