Sovrin
Sovrin
ត្រៀមខ្លួនជាមួយស្ទីលតុបតែងមុខយ៉ាងស្រស់បំព្រងសម្រាប់ការចូលរួមកម្មវិធីជប់លៀងពីសូវរីន
FASHION & BEAUTY one year ago
ជាធម្មតា ការតុបតែងសម្រស់របស់នារីទាំងឡាយ រមែងតែងផ្លាស់ប្តូរទៅតាមរដូវកាលជាក់ស្តែង រាប់តាំងពីរដូវរងា រដូវក្តៅ និងតាមទំនោរនិយមថ្មីជាដើម។ ស្របនឹងខែនេះ រដូវភ្លៀងធ្លាក់ក៏បានចូលមកដល់ ការលេងស្ទាយ៍តុបតែងមុខជាមួយនឹងពណ៌ខៀវ ដែលជាទំនោរនិយមមួយកំពុងទទួលបានប្រជាប្រិយភាពជាងគេ។ ដើម្បីជាការនាំយកនូវអ្វីដែលថ្មី អ្វីដែលប្លែកសម្រាប់មិត្តៗនារីយើង សូវរីន សូមលើកយកការផ្លាស់ប្តូរសម្រស់ដែលជាការតុបតែងមុខជាមួយពណ៌ខៀវ បន្ថែមដោយភាពភ្លឺរលោងដូចទៅនឹងដំណក់ទឹកភ្លៀង ច្បិចបញ្ចូលជាមួយស្ទីលហ្វេហ្សិន និងភាពស៊ីវិល័យ ដើម្បីបង្កើតជាស្ទីលថ្មីមួយទៀតសម្រាប់ការត្រៀមខ្លួនចូលរួមក្នុងកម្មវិធីជប់លៀងឲ្យមានភាពលេចធ្លោ។
ផ្តើមពីនារីដែលសាមញ្ញម្នាក់ យើងក៏អាចផ្លាស់ប្តូរសម្រស់របស់យើងឱ្យក្លាយជានារីដែលមានភាពទាក់ទាញ ទាន់សម័យ និងពោរពេញទៅដោយមន្តស្នេហ៍។ ចាប់ផ្តើមដោយការតុបតែងមុខ យើងនឹងផ្តោតជ្រើសរើសពណ៌ខៀវ បែបភ្លឺរលោងជាចម្បង រួមទាំងការប្រើពណ៌ប្រាក់ដើម្បីឱ្យមើលទៅមានភាពស៊ីវិល័យ។ តួយ៉ាងត្រង់ភ្នែកយើងប្រើពណ៌សាច់ផាត់ទ្រាប់សាយពេញត្របកភ្នែកជាមុនសិន បន្ទាប់មកយកហាយឡាយពណ៌ប្រាក់ភ្លឺផ្លេកមកផាត់បន្ថែមពន្លឺពីលើត្រឹមគន្លាក់ត្របកភ្នែក រួមបន្ថែមផាត់គល់រឹមភ្នែកខាងក្រោមផងដែរ។ បន្ទាប់មក ប្រើពណ៌ខៀវមកផាត់បន្ថែមជាឆ្នូតនៅលើកគន្លាក់ត្របកភ្នែក និងរឹមខាងក្រោមភ្នែក។ នៅផ្នែកកន្ទុយភ្នែក ដើម្បីឱ្យមើលទៅមានភាពច្នៃប្រតិដ្ឋ និងហ្វេហ្សិន ដោយប្រើពណ៌ខៀវជំនួសដោយការប្រើ Eyeliner តែម្តង ដែលមើលទៅកន្ទុយភ្នែកកាន់តែឃើញច្បាស់ និងលេចធ្លោ។
ដោយសារការផាត់មុខនេះ យើងចង់ឱ្យឃើញពណ៌ត្របកភ្នែកច្បាស់ ដូច្នេះមិនចាំបាច់ពាក់រោមភ្នែកបន្ថែមក៏បាន គ្រាន់តែលាបម៉ាស្ការ៉ាបន្តិចជាការស្រេច។ ចំណែកចិញ្ចើមវិញក៏ដូចគ្នា យើងប្រើពណ៌ត្នោតគូរបន្ថែមរាងបន្តិចគឺរួចរាល់។ សម្រាប់ពណ៌ក្រែមវិញ អាចជ្រើសរើសជាប្រភេទពណ៌សូកូឡាមកគូសរឹមជុំវិញបបូរមាត់ដើម្បីរំលេចទម្រង់កាន់តែស្អាត និងប្រើពណ៌ឈូកបែកក្បឿងមកលាបពេញបបូរមាត់ ក៏មិនភ្លេចបន្ថែមជាមួយក្រែមរលោងពីខាងលើ កាន់តែមានមន្តស្នេហ៍។ ថ្ពាល់ យើងផាត់យកពណ៌ឈូកស្រាលបំផុតដែលមើលទៅជួយលើកសម្រស់មាត់ និងភ្នែកឃើញលេចស្រស់ស្អាត។ ចំណុចចុងក្រោយគឺ យកហាយឡាយពណ៌ប្រាក់លាយនឹងពណ៌សភ្លឺ មកបន្ថែមលើថ្ពាល់ខាងលើចុងច្រមុះបន្តិច ដើម្បីលើកសម្រស់ផាត់មុខកាន់តែស្រស់ស្អាត។
ចំពោះម៉ូដសក់វិញ យើងច្នៃប្រតិដ្ឋម៉ូដសក់ដែលសាមញ្ញពីខាងក្រោយ ដោយចងកួចទម្លាក់ទៅខាងក្រោយ ឯខាងមុខអាចច្បិចយកម៉ូដហ្វេហ្សិនទាន់សម័យ កាច់ជាទម្រង់ទឹករលកបន្តិចដើម្បីឱ្យស័ក្តិសមជាមួយនឹងការតុបតែងមុខ។ ម៉ូដសក់នេះក៏ជួយលើកឱ្យទម្រង់មុខមើលទៅស្លីមទាក់ទាញផងដែរ។
ចំណែកឯការស្លៀកពាក់ មិត្តនារីអាចជ្រើសរើសម៉ូដអាវឬសំពត់ដែលមានពណ៌ស្រដៀងទៅនឹងពណ៌ផាត់ភ្នែកដើម្បីឱ្យមើលទៅមានភាពស៊ីមេទ្រីគ្នា។ អាចជាអាវពណ៌សមានម៉ូដខើច និងសំពត់ក្រឡាសំណាញ់ ដើម្បីកុំឱ្យមើលទៅសាមញ្ញពេក និងបន្ថែមជាមួយស្បែកជើងកែងជាការស្រេច៕
Article by SOUNG SOKSAN
