Sovrin
Sovrin
ស្បែកស្អាត មិនមែនស្ថិតលើពណ៌នៃស្បែកនោះទេ គឺសំដៅដល់ស្បែកដែលមានសុខភាពល្អ មានជាតិទឹកគ្រប់គ្រាន់ មានសំណើម និងមិនមែនជាស្បែកដែលប្រេះស្ងួត ឬខ្សោះជាតិទឹក ។ ស្បែកមានច្រើនប្រភេទ តួយ៉ាង ស្បែកធម្មតា ស្បែកខ្លាញ់ ស្បែកស្ងួត និងស្បែកចម្រុះ។ ដោយឡែក ស្បែកស្ងួតគឺងាយនឹងទទួលរងការខូតខាតជាងគេ ហើយក៏បង្កជាបញ្ហាដល់ស្បែកជាច្រើនដូចជា ធ្វើឲ្យប្រេះស្បែក របកស្បែក ឆាប់ជ្រីវជ្រួញ ឡើងក្រហម និងរលាកជាដើម។ ស្បែកស្ងួតបណ្តាលមកពី វិវត្តន៍នៃវ័យ អាកាសធាតុ ការខ្វះជាតិទឹក និងទម្លាប់រស់នៅប្រចាំថ្ងៃមួយចំនួនដែលយើងតែងមើលរំលង សូម្បីតែការលេបថ្នាំច្រើនក៏ធ្វើឱ្យស្បែកស្ងួតផងដែរ។ ខណៈនៅលើទីផ្សារមានលក់ផលិតផលផ្តល់សំណើមដល់ស្បែកជាច្រើនប្រភេទ ដែលតម្រូវសម្រាប់ស្បែកស្ងួត។
ចុះតើការប្រើប្រាស់ផលិតផល ឬឡេផ្តល់សំណើមតែមួយមុខគ្រប់គ្រាន់ឬទេសម្រាប់តម្រូវការស្បែកដែលស្ងួត? ជាការពិតវាមិនគ្រប់គ្រាន់នៅឡើយទេ វាមានកត្តារួមផ្សំ និងវិធីសាស្រ្តមួយចំនួនដើម្បីបង្ការ ក៏ដូចជាជួសជុលស្បែកដែលស្ងួតឱ្យត្រឡប់មកមានសំណើម។ ចង់ដឹងថាមានអ្វីខ្លះ តោះ! ទៅអានទាំងអស់គ្នា។
១. ផឹកទឹកឱ្យបានគ្រប់គ្រាន់៖ ចំណុចសំខាន់ចម្បងដែលគួរអនុវត្តនោះគឺការផឹកទឹកឱ្យបានគ្រប់គ្រាន់ដែលវាជួយជំរុញពីខាងក្នុង ព្រោះការថែទាំពីខាងក្រៅនៅមិនទាន់គ្រប់គ្រាន់នៅឡើយទេ។ វាមិនត្រឹមតែជួយផ្តល់សំណើមដល់ស្បែក ល្អសម្រាប់សុខភាពសម្រស់ប៉ុណ្ណោះទេ តែក៏ល្អសម្រាប់សុខភាពរាងកាយផងដែរ។ ដូចនេះគប្បីផឹកទឹកឱ្យបាន៩ទៅ១២កែវក្នុងមួយថ្ងៃ ឬអាច២ទៅ៣លីត្រ។
២. ការប្រើប្រាស់ផលិតផល៖ ការប្រើផលិតផលដែលមានជាតិកាត់ដូចជាថ្នាំខាត់ស្បែក ការប្រើសាប៊ូដែលមានជាតិកាត់ ការស្រ្កាប់ស្បែកជាមួយនឹងសាធាតុគីមីមួយចំនួន ការប្រើប្រភេទឡេលាបស្បែកដែលធ្វើឱ្យឆាប់ស វានឹងធ្វើឱ្យស្បែកមានសភាពស្ងួត។ ជំនួសឱ្យការប្រើផលិតផលទាំងនេះ សុភាពនារីទាំងឡាយគប្បីជ្រើសរើសឡេលាបស្បែកណាដែលមិនមានជាតិកាត់ ជាឡេដែលផ្តល់សំណើមដល់ស្បែក និងឡេដែលផ្សំឡើងពីវីតាមីន E,C និង D ដែលជាវីតាមីនស្បែកត្រូវការបំផុត។
៣. ការប្រើឡេការពារកម្តៅថ្ងៃ៖ មិនថាស្បែកមុខឬស្បែកដងខ្លួននោះទេ ឡេការពារកម្តៅថ្ងៃជារនាំងការពារដ៏សំខាន់សម្រាប់ស្បែកពីពន្លឺព្រះអាទិត្យ ឬកាំរស្មីដែលនឹងបង្កផលប៉ះពាល់ដល់ស្បែកដូចជាកាំរស្មី UVA និង UVB ហើយកាន់តែសំខាន់ទៅទៀតគឺជួយបង្ការស្បែកមិនឱ្យស្ងួត។ ដូចនេះគប្បីប្រើឡេការពារកម្តៅថ្ងៃដែលមាន SPF 50 ឬ SPF 30 មិនថាពេលចេញទៅក្រៅ ឬនៅក្នុងម្លប់នោះទេ។
៤. សម្អាតស្បែកដោយប្រើទឹកក្តៅ៖ ការលាងសម្អាត ឬ ងូតទឹកក្តៅរយៈពេលយូរអាចបណ្តាលឲ្យស្បែកស្ងួត និងខ្សោះជាតិទឹក។ គួរចៀសវាងការលាងសម្អាតស្បែកជាមួយទឹកក្តៅជាប្រចាំ ឬប្រើទឹកដែលក្តៅខ្លាំងពេក តែបើខានពុំបាន អ្នកក៏អាចប្រើទឹកក្តៅឧណ្ហៗបានផងដែរ។ យ៉ាងណាមិញ ទឹកធម្មតានៅតែជាជម្រើសល្អបំផុតសម្រាប់ស្បែក។
៥. ប្រើសម្ភារសម្អាតស្បែក៖ វាអាចជាចំណុចតូចមួយដែលអ្នកអាចមើលរំលងដូចជាការប្រើប្រាស់ស្បៃរឹងសម្រាប់ដុសសម្អាតខ្លួន ការប្រើកន្សែងគគ្រាតខ្លាំងមកជូតលើស្បែកជាដើម។ ថ្វីបើវាជួយជម្រះ និងសម្អាតស្បែកបានល្អ តែវាបណ្តាលឲ្យស្បែកស្ងួតដូចគ្នាប្រសិនបើអនុវត្តបែបនេះជាប្រចាំ។ យើងអាចជំនួសដោយប្រើប៉ុងដែលមានសភាពទន់ ឬដុសសាប៊ូជាមួយដៃក៏បាន ហើយប្រើកន្សែងទន់ជំនួសកន្សែងគគ្រាតខ្លាំង។
ឃើញទេ អនុវត្តត្រឹមតែវិធីងាយៗ អ្នកនឹងទទួលបានស្បែកដែលមានសំណើម មិនស្ងួត មិនខះជាតិទឹក ការដែលសំខាន់សុភាពនារីទាំងឡាយអាចអនុវត្តបានដោយខ្លួនឯងនៅផ្ទះផងដែរ។ ដើម្បីសម្រស់កាន់តែស្រស់ស្អាតមួយកម្រិត ជាងនេះទៅទៀតរបបអាហារប្រចាំថ្ងៃក៏ដើរតួយ៉ាងសំខាន់ផងដែរ។ ទទួលទានបន្លែផ្លែឈើ ត្រីសាច់ជាប្រចាំ ធ្វើលំហាត់ប្រាណឱ្យបានទៀងទាត់ ព្រោះការទទួលទានរបបអាហារប្រចាំថ្ងៃពិតជាជះឥទ្ធិពលដល់សុខភាពរាងកាយ និងសម្រស់ផងដែរ៕
Article by SOUNG SOKSAN
