Sovrin
Sovrin
អ្នកសម្រកទម្ងន់ភាគច្រើនតែងតែមើលរំលងនូវសារៈសំខាន់របស់ការគេង ព្រោះមានមតិជាច្រើនបានលើកឡើងថា វិធីសម្រកទម្ងន់គឺមានតែការតមអាហារ និងការធ្វើលំហាត់ប្រាណតែប៉ុណ្ណោះ។ ជាការពិតណាស់ រាល់ការបរិភោគរបបអាហារបានត្រឹមត្រូវ និងហាត់ប្រាណបានទៀងទាត់វាពិតជាអាចជួយអ្នកឱ្យស្រកគីឡូ និងទទួលបានរាងកាយស្អាតក៏ពិតមែន ប៉ុន្តែប្រសិនបើអ្នកមិនបានគេងពី ៧ម៉ោង ទៅ៨ម៉ោងក្នុងមួយថ្ងៃទេ នោះអ័រម៉ូនរបស់អ្នកនឹងផ្លាស់ប្ដូរដែលបណ្ដាលឱ្យចំណង់អាហារកើនឡើង ដោយសារប្រព័ន្ធមេតាប៉ូលីស (Metabolism) ចុះខ្សោយ។ ខាងក្រោមនេះ គឺជាហេតុផលទាំង៥ ដែលការគេងមានសារៈសំខាន់សម្រាប់ការសម្រកទម្ងន់។
កាលវិភាគនៃការគេង
ការផ្លាស់ប្ដូរទម្លាប់នៃការចូលគេងយឺត មកគេងលឿនវិញវាពិតជាលំបាក ប៉ុន្តែបើអ្នកមិនផ្លាស់ប្តូរទម្លាប់នេះនោះទេ អ្នកនឹងឡើងទម្ងន់ដោយមិនដឹងខ្លួន។ ព្រោះការដែលចូលគេងយប់ជ្រៅវាអាចបណ្តាលឱ្យក្រពះរបស់អ្នកលំបាកក្នុងការរំលាយអាហារ និងប្រែប្រួលអាំងស៊ុយលីន ដែលធ្វើឱ្យជាតិស្ករក្នុងឈាមកើនឡើង។ ដូចនេះហើយ អ្នកគួរតែមានកាលវិភាពនៃការគេងឱ្យបានត្រឹមត្រូវ។ រយៈពេលដែលល្អបំផុតក្នុងការគេងសម្រាប់ក្មេងជំទង់ (១៤ឆ្នាំ ទៅ ១៧ឆ្នាំ) គឺចាប់ពី ៨ម៉ោង ទៅ១០ម៉ោងក្នុងមួយថ្ងៃ។ ចំពោះមនុស្សពេញវ័យ (១៨ឆ្នាំ ទៅ ៦៤ឆ្នាំ) គួរតែជាមធ្យម ៧ម៉ោង ទៅ ៩ម៉ោងក្នុងមួយថ្ងៃ។ ចំណែកឯមនុស្សចាស់វិញ ដែលមានអាយុ ៦៥ឆ្នាំឡើងទៅ គួរតែគេងចាប់ពី ៧ម៉ោង ទៅ ៨ម៉ោងក្នុងមួយថ្ងៃជាការល្អបំផុត។ ការដែលចូលគេងបានគ្រប់គ្រាន់តាមរយៈពេលវេលានៃកាលវិភាគទាំងអស់នេះ នោះអ្នកនឹងទទួលបានទម្ងន់ថេរដោយបញ្ចុះសារធាតុខ្លាញ់ដែលមានលើសនៅក្នុងរាងកាយ។
គេងឱ្យបានគ្រប់គ្រាន់
ការគេងគ្រប់គ្រាន់ជួយឱ្យសម្ពាធឈាមចុះទាប និងកាត់បន្ថយស្រ្តេស។ បង្កើតកាលវិភាគគេងឱ្យបានត្រឹមត្រូវ ព្រមទាំងថែទាំកន្លែងគេងឱ្យមានអនាម័យ និងផាសុកភាព ព្រោះវាអាចជួយឱ្យយើងគេងលក់បានស្កប់ស្កល់ និងមានសុខភាពល្អ។ អ្នកសិក្សាបានណែនាំថា យើងគួរតែគេងឱ្យបានទៀងទាត់ពេលវេលា ទើបជាការប្រសើរ។ ទន្ទឹមនឹងនេះ យើងក៏មិនគួរប្រើប្រាស់ឧបករណ៍អេឡិចត្រូនិករហូតដល់ពេលយប់ជ្រៅពេកដែរ ព្រោះពន្លឺនៃឧបករណ៍ទាំងនោះ អាចកាត់បន្ថយការបញ្ចេញអ័រម៉ូនគេង។ ជំនួសមកវិញ យើងគួរតែជ្រើសរើសយកការស្តាប់តន្ត្រីឬអានសៀវភៅវិញ ដើម្បីជួយឱ្យយើងមានអារម្មណ៍ស្ងប់ល្អ និងគេងលក់ស្រួល។
គេងនៅបន្ទប់ដែលងងឹត
ការគេងបិទភ្លើង ឬគេងនៅកន្លែងមានពន្លឺតិចបំផុតអាចជួយដល់ការបញ្ចុះទម្ងន់ ព្រោះកន្លែងដែលកាន់តែងងឹត អ័រម៉ូនមេឡាតូនីន (Melatonin) កើនឡើងដែលធ្វើឱ្យដំណេកលង់លក់ស្រួល និងមានសុខភាពល្អ។ ជាការពិតតាមការសិក្សាថ្មីៗនេះ ស្ត្រីដែលគេងនៅកន្លែងងងឹតមានឱកាសតិចបំផុតនៃការប្រឈមឡើងទម្ងន់ជាជាងស្ត្រីគេងបើកភ្លើង។
កាត់បន្ថយស្ត្រេស
សុខភាពផ្នែកខួរក្បាល និងសេចក្តីសុខផ្លូវចិត្តក៏ជាផ្នែកមួយទាក់ទងទៅនឹងការបញ្ចុះទម្ងន់ផងដែរ។ ព្រោះកម្រិតស្ត្រេសខ្ពស់អាចបង្អាក់ដំណេកដោយការគិតច្រើន ដែលពន្យាររយៈពេលនៃការងងុយគេង។ ជាការពិតណាស់ ប្រសិនបើអារម្មណ៍តប់ប្រមល់កើតឡើង នោះប្រព័ន្ធមេតាប៉ូលីស (Metabolism) ថយចុះ ដែលជំរុញដល់ចំណង់ឃ្លានដោយធ្វើឱ្យយើងបរិភោគអាហារផ្តេសផ្តាសពិសេសអាហារផ្ទុកជាតិខ្លាញ់ និងជាតិកាឡូរីតែម្ដង។ មួយវិញទៀត នៅពេលយើងស្រ្តេសរាងកាយនឹងឆ្លើយតបដោយបញ្ចេញអ័រម៉ូនស្រ្តេស (adrenaline and cortisol) ទៅក្នុងសរសៃឈាមដែលធ្វើឱ្យបេះដូងលោតលឿន និងធ្វើឱ្យសរសៃឈាមរួមតូច។ ដូច្នេះប្រសិនជាអ្នកកំពុងប្រឈមមុខនឹងបញ្ហា សូមផ្តោតលើបញ្ហាដែលអ្នកអាចគ្រប់គ្រង និងរៀបចំផែនការដើម្បីដោះស្រាយពួកគេតាមសម្រួល។
បរិភោគអាហារមុនគេង
ការបរិភោគអាហារបានទៀងពេល គឺធ្វើឱ្យដំណើរការនៃរំលាយអាហារប្រព្រឹត្តទៅបានយ៉ាងល្អ និងរក្សាបាននូវស្ថិរភាពនៃកម្រិតជាតិស្ករក្នុងឈាមផងដែរ។ ផ្ទុយទៅវិញ ការបរិភោគអាហារក្រោយម៉ោង៧យប់នឹងធ្វើឱ្យអ្នកឡើងទម្ងន់ដោយមិនដឹងខ្លួន។ ជាក់ស្តែង ប្រសិនបើឃ្លាននៅពេលយប់អ្នកអាចបរិភោគអាហារសម្រន់ដូចជា ចេក ផ្លែឈើរី គ្រាប់អាល់ម៉ុន ឬយ៉ាអួរជាដើម។ មួយវិញទៀត ចំពោះអ្នកចូលចិត្តទម្រេតខ្លួន ឬចូលគេងទាំងទើបញុំាអាហាររួច ដោយសារតែរាងកាយមិនអាចរំលាយអាហារបានត្រឹមត្រូវ វានឹងធ្វើឱ្យប្រព័ន្ធមេតាប៉ូលីសត្រូវបានបំផ្លាញយ៉ាងខ្លាំងក្លា៕
Article by NI CHANNIKA
