SOVRIN Magazine

« កោះសង្សារ » បង្ហាញស្នាដៃច្នៃម៉ូតពីសំណល់សំរាមសមុទ្រដ៏ល្អវិចិត្រ

FASHION & BEAUTY 4 months ago

នាថ្ងៃទី០៩ ខែធ្នូ ឆ្នាំ២០២៣ កន្លងទៅនេះ «កោះសង្សារ» ដែលជារមណីយដ្ឋានបែបរីស្សតឯកជនលំដាប់ផ្កាយ៥ នៅលើដែនសមុទ្រនៃប្រជុំកោះរុង ឯខេត្តព្រះសីហនុ បានប្រព្រឹត្តកម្មវិធីប្រកួតប្រជែងការច្នៃម៉ូតហ្វេហ្សិនពីសំណល់សំរាមសមុទ្រ ដើម្បីចូលរួមចំណែកអភិរក្សបរិស្ថានដែនសមុទ្រកម្ពុជា ដោយបេក្ខភាពចូលរួមគឺជាបុគ្គលិកគ្រប់ផ្នែករបស់ «កោះសង្សារ» ផ្ទាល់តែម្ដង។ ក្នុងគោលបំណងរក្សាបរិស្ថាន គ្រប់គ្រងសំណល់នៅលើកោះ និងអភិរក្សជីវចម្រុះក្នុងតំបន់ប្រជុំកោះរុង «កោះសង្សារ» បានផ្តួចផ្ដើមគំនិតនេះឡើង ដើម្បីលើកទឹកចិត្តបុគ្គលិកឱ្យចូលរួមដោយផ្ទាល់ក្នុងយុទ្ធនាការណ៍គាំពារដែនសមុទ្រកម្ពុជា ព្រមទាំងបង្ហាញភ្ញៀវទេសចរទាំងឡាយអំពីការប្តេជ្ញាយ៉ាងមោះមុតចំពោះសកម្មភាពទាំងនេះដែលប្រកបដោយចីរភាព ដោយការបង្ហាញម៉ូតនេះជាផ្នែកមួយក្នុងចំណោមសកម្មភាពគាំពារនានា។

ក្រោមសក្ខីភាពរបស់ក្រុមការងារសូវវីន និងការដាក់ពិន្ទុពីគណៈកម្មការផ្នែកហ្វេហ្សិនទាំង២ រូប គឺលោក ERIC RAISINA និងលោកស្រី ROMYDA KETH ដែលសុទ្ធតែជាអ្នកច្នៃម៉ូតមានកិត្តិនាមក្នុងវិស័យហ្វេហ្សិននៅកម្ពុជាអស់រយៈពេលជាច្រើនឆ្នាំ យើងក៏បានរកឃើញជ័យលាភីប្រចាំឆ្នាំ២០២៣ ៖
- ជ័យលាភីឯក បានទៅក្រុម F&B ខាងផ្នែកម្ហូបអាហារនិងភេសជ្ជៈ
- លំដាប់រងទី១ បានទៅក្រុម Engineering ខាងផ្នែកវិស្វកម្ម
- លំដាប់រងទី២ បានទៅក្រុម Housekeeping ខាងផ្នែករៀបចំវីឡា
- លំដាប់រងទី៣ បានទៅក្រុម Kitchen ខាងផ្នែកចុងភៅ

គួរបញ្ជាក់ផងដែរថា ឈុតដែលបេក្ខភាពគ្រប់ផ្នែកបានតំឡើងគឺច្នៃពីសំណល់នានាសុទ្ធសាធ រួមមានជាអាទិ៍៖ សំណល់ក្រដាសកាសែត សម្បកកេស សម្បកកំប៉ុង ក្រវិលកំប៉ុង បំពង់បឺត ថង់ប្លាស្ទិក សម្បកដបប្លាស្ទិកនានា កម្ទេចក្រណាត់ ក្រណាត់អាវភ្លៀងចាស់ៗ បំណែកអាវពោង សំណាញ់រហែក ខ្សែពួរ សំណល់គ្រឿងអគ្គិសនីនានា។ល។ ដែលបេក្ខភាពចំណាយពេលរាប់ខែរាប់ថ្ងៃ ក្នុងការសន្សំនិងប្រមែប្រមូលទុកយកមកច្នៃជាឈុតសិល្បៈទាំងនេះឡើង។