Sovrin
Sovrin
បោះជំហានទៅកាន់កម្មវិធីជប់លៀងឱ្យមានភាពលេចធ្លោ និងឆើតឆាយជាមួយតិចនិកងាយៗ
FASHION & BEAUTY 11 months ago
នៅសល់តែប៉ុន្មានថ្ងៃទៀត រាត្រីឆ្លងឆ្នាំសកលនឹងរំកិលចូលមកដល់។ ការត្រៀមខ្លួនសម្រាប់ឱកាសពិសេសរមែងជារឿងសំខាន់មួយដែលសុភាពនារីទាំងឡាយមិនដែលរំលង រាប់តាំងពីការតុបតែងមុខ ធ្វើសក់ ក៏ដូចជាការស្លៀកពាក់សម្អាងកាយពីចុងសក់ដល់ចុងជើង។ កម្មវិធីជប់លៀងឆ្លងឆ្នាំជារាត្រីដ៏អស្ចារ្យហើយការបង្ហាញសម្រស់នៅក្នុងកម្មវិធីអបអរក៏មិនគួរណាមើលទៅសាមញ្ញពេក ហើយក៏ស្រគត់ស្រគំពេកដែរ។ ដូច្នេះហើយ ដើម្បីជាគំនិតដល់សុភាពនារីក្នុងការត្រៀមខ្លួន ឬចង់ផ្លាស់ប្តូរការតុបតែងខ្លួនឱ្យមើលទៅមានភាពលេចធ្លោទាក់ទាញ សូវរីន សូមបង្ហាញពីតិចនិកងាយៗដូចខាងក្រោមនេះ។
1. រៀបចំគម្រោងទុកជាមុន៖ ការរៀបចំគម្រោងមុនថ្ងៃជប់លៀងមកដល់ជារឿងមួយដែលសំខាន់ ដើម្បីឱ្យយើងប្រាកដថាបានរៀបចំទាន់ពេលវេលា និងបានត្រៀមខ្លួន ក៏ដូចជាសម្លៀកបំពាក់រួចរាល់ជាការស្រេច ជាពិសេសអាចមានពេលវេលាឱ្យយើងសម្រាប់គិត ថាគួររៀបចំខ្លួនបែបណា ឬនៅមានអ្វីខ្វះខាតខ្លះ។
2. ការរៀបចំខ្លួនឱ្យបានស្អាត៖ មុននឹងចាប់ផ្តើមចំណុចផ្សេងទៀត ចំណុចនេះជាអ្វីដែលសុភាពនារីគ្រប់រូបមិនគួររំលងឡើយ។ ការរៀបចំខ្លួនបន្ថែមនូវចំណុចបន្តិចបន្តួច ដូចជា ការជ្រើសរើសម៉ូតសក់ ឬពណ៌សក់ និងការសម្អាតក្រចកឱ្យបានស្អាតរៀបរយជាដើម។ ប៉ុន្តែ ប្រសិនបើអ្នកមានចំណូលចិត្តលាបពណ៌ក្រចកអាចជ្រើសរើសលាបពណ៌ដិតៗ ដើម្បីឱ្យមើលទៅមានភាពលេចធ្លោនៅពេលចាប់កាន់កែវស្រា ឬនៅពេលចាប់កាន់អ្វីមួយ ឧទាហរណ៍នៅពេលកាន់សម ស្លាបព្រាសម្រាប់ទទួលទានអាហារជាដើម។
3. ការផាត់មុខ៖ ក្នុងការចូលរួមកម្មវិធីជប់លៀងនារាត្រីដ៏ពិសេសនេះ មិត្តនារីមិនគួររំលងការផាត់មុខឡើយ។ ដើម្បីបន្ថែមសម្រស់ស្រស់ស្អាត យើងអាចបន្ថែមការផាត់មុខដូចជា ការលាបម្សៅទ្រនាប់ ផាត់ម្សៅហុយបន្ថែមពីលើដើម្បីឱ្យជាប់បានយូរ លាបម៉ាស្ការ៉ា ពណ៌ក្រែមដែលអ្នកចូលចិត្ត ជាពិសេសកុំភ្លេចជ្រើសរើសផាត់ពណ៌ភ្នែកដែលភ្លឺ ឬបន្ថែមភាពរលោងទៅលើផ្ទៃមុខ ដើម្បីមើលទៅឃើញភ្លឺចាំងកាន់តែលេចធ្លោ។
4. ជ្រើសរើសសម្លៀកបំពាក់៖ ការរៀបចំខ្លួនបានស្អាត មិនមែនទាល់តែជ្រើសរើសសម្លៀកបំពាក់ដែលមានតម្លៃថ្លៃនោះទេ អ្វីដែលសំខាន់គួរជ្រើសរើសសម្លៀកបំពាក់ដែលសមស្របនឹងបរិយាកាស និងងាយស្រួលសម្រាប់ខ្លួនអ្នក។ អាចជាសម្លៀកបំពាក់មិនសាមញ្ញពេក មិនឆើតឆាយខ្លាំងពេក ប៉ុន្តែជ្រើសរើសបែបទន់ភ្លន់ ស័ក្តិសមនឹងរូបរាង ក៏ដូចជាពណ៌ស្បែករបស់អ្នក។
5. ជ្រើសរើសស្បែកជើង៖ ស្បែកជើងកែងគឺស័ក្តិសមបំផុតក្នុងពេលវេលាដ៏រ៉ូមែនទិចនេះសម្រាប់មិត្តនារីគ្រប់រូប ដើម្បីបញ្ជាក់ជានារីភាព និងបង្ហាញសម្រស់ស្រស់ស្អាតថែមមួយកម្រិត។ អាចជ្រើសរើសស្បែកជើងកែងដែលមិនធ្វើឱ្យអ្នកឈឺជើង ហើយប្រសិនបើអ្នកពិបាកក្នុងការពាក់ស្បែកជើងកែងចោត អាចជ្រើសរើសកែងទាបសមល្មម ដើម្បីផ្តល់ភាពងាយស្រួលសម្រាប់អ្នក។
6. គ្រឿងលម្អកាយបន្ថែម៖ ជំហានចុងក្រោយសម្រាប់គ្រឿងលម្អកាយ យើងមិនចាំបាច់បំពាក់អ្វីច្រើនស្អេកស្កះពេកនោះទេ គ្រាន់តែបន្ថែមក្រវិលដាំត្បូង ឬមានរំយោល និងខ្សែកតូចឆ្មារតែបន្តិចនឹងបង្កើនភាពថ្លៃថ្នូរមើលទៅសមសួន។ អ្វីដែលសំខាន់មិនអាចរំលងបានមួយទៀតនោះគឺ កុំភ្លេចបាញ់ទឹកអប់ដែលមានក្លិនស្រាលស្រទន់ តែមិនត្រូវបាញ់ច្រើនធ្វើឱ្យក្លិនឆួលខ្លាំងពេកនោះទេ វាអាចផ្តល់ជាការរំខានដល់អ្នកនៅជុំវិញខ្លួនអ្នកទៅវិញ។
7. ការមានទំនុកចិត្ត៖ បន្ទាប់ពីបានតាក់តែងកាយពីចុងសក់ដល់ចុងជើងរួចហើយ អ្នកនឹងក្លាយជានារីដែលមានសម្រស់ស្រស់ស្អាត សមសួន និងទាក់ទាញ។ ជាមួយគ្នានេះ អ្នកក៏ត្រូវមានទំនុកចិត្តពីខាងក្នុងដោយភាពជឿជាក់ និងមានស្នាមញញឹម ដើម្បីញ៉ាំងឱ្យកម្មវិធីជប់លៀងកាន់តែមានភាពសប្បាយរីករាយ និងបង្កើតជាអនុស្សាវរីយ៍ដែលមិនអាចបំភ្លេចបាន៕
Article by SOUNG SOKSAN
