Sovrin
Sovrin
វិធីសាស្រ្តក្នុងការថែរក្សាស្បែកឱ្យនូវតែមានសុខភាពល្អ ដែលអ្នកមិនគួរមើលរំលង
TRAVEL & LIVING 11 months ago
បន្ទាប់ពីរាត្រីឆ្លងឆ្នាំបានកន្លងផុតទៅប្រាកដណាស់ដែលប្រិយមិត្តមួយចំនួនបានចូលរួមកម្មវិធីជប់លៀងតូចធំទៅតាមអ្វីដែលបានគ្រោងទុក។ បើនិយាយដល់ការជួបជុំ ឬមានកម្មវិធីជប់លៀងម្តងៗ ពិតណាស់រមែងមានការទទួលទានភេសជ្ជៈមានជាតិអាល់កុល និងការទទួលទានអាហារមួយមិនមានតុល្យភាព។ ការចំណាយពេលវេលាដ៏មានតម្លៃនេះ តែងធ្វើឱ្យអ្នកមិនមានពេលគ្រប់គ្រាន់ក្នុងការគេង និងបណ្តោយឱ្យគ្រឿងសម្អាងនៅជាប់ស្បែកមុខយូរម៉ោង ជាពិសេសក្នុងរាត្រីរង់ចាំការឆ្លងឆ្នាំតែម្តង។ ជាការពិត ការទទួលទានភេសជ្ជៈមានជាតិអាល់កុល ការមិនបានគេងគ្រប់គ្រាន់ ទទួលទានអាហារមិនមានតុល្យភាព គួបផ្សំនឹងផ្ទៃមុខមានគ្រឿងសម្អាងជាប់យូរម៉ោង ជាហេតុដែលបង្កឱ្យមានបញ្ហាស្បែកមួយចំនួនបានកើតឡើងដូចជា ធ្វើឱ្យស្បែកខ្សោះជាតិទឹក ស្បែកឡើងប្រេងខុសធម្មតា ស្បែកស្ងួតឡើងក្រហម ឬរលាក ធ្វើឱ្យខូឡាជែន ប្រូតេអ៊ីន និងអ៊ីឡាស្តីនក្នុងស្បែកចុះខ្សោយជាដើម។ ខាងក្រោមនេះជាដំណោះស្រាយដែលអាចជួយឱ្យស្បែកមានសភាពល្អប្រសើរឡើងវិញ។
1.ទម្លាប់សម្អាតមុខ២តង់៖ ការសម្អាតជាមួយហ្វូមលាងមុខតែមួយមុខវាមិនអាចជួយជម្រះជាតិកខ្វក់នៅលើស្បែកមុខបានស្អាតល្អនោះទេ ជាពិសេសនៅពេលអ្នកផាត់មុខយូរម៉ោងតែម្តង។ នៅពេលផ្ទៃមុខសម្អាតមិនបានស្អាត វាបង្កឱ្យគ្រឿងសម្អាងស្ទះនៅរន្ធញើស បណ្តាលឱ្យកើតមុន រោល និងរលាកជាដើម។ ដូច្នេះ គប្បីសម្អាតមុខឱ្យបាន២ដង ដោយអាចជ្រើសរើសជាប្រភេទប្រេង(Cleansing Oil) ឬក្រមួនលាងសម្អាត(Cleansing Balm) ទើបលាងសម្អាតជាមួយហ្វូមតាមក្រោយ។ បន្ទាប់ពីបានលាងសម្អាតបានស្អាតហើយ ទើបនៅពេលអ្នកលាបគ្រឿងថែរក្សាសម្រស់តាមក្រោយអាចជ្រាបចូលស្បែកបានល្អ។
2.ផ្តល់សំណើមដល់ស្បែក៖ ក្រោយទទួលទានភេសជ្ជៈមានជាតិអាល់កុលច្រើន ឬគេងមិនបានគ្រប់គ្រាន់ នឹងបណ្តាលឱ្យស្បែកខ្វះសំណើម ខ្សោះជាតិទឹក សុខភាពស្បែកចុះខ្សោយ។ ផ្តល់សំណើមដល់ស្បែកពីខាងក្នុងដោយការផឹកទឹកឱ្យបានគ្រប់គ្រាន់ ទទួលទានរបបអាហារដែលមានតុល្យភាព និងលាបគ្រីម ឬឡេផ្តល់សំណើមដល់ស្បែក។
3.គេងឱ្យបានគ្រប់គ្រាន់៖ យើងដឹងហើយថាការគេងមិនបានគ្រប់គ្រាន់ បានជះឥទ្ធិលអាក្រក់ជាច្រើនទាំងសុខភាពរាងកាយ និងសម្រស់ ដែលអ្នកមិនគួរមិនអើពើនោះឡើយ។ ការគេងឱ្យបានគ្រប់គ្រាន់វាជួយបង្កើនលំហូរឈាមទៅកាន់ស្បែក និងរួមចំណែកដល់ការបង្កើតឡើងវិញនូវ ខូឡាជែន អ៊ីឡាស្តីន និងប្រូតេអ៊ីនដែលបានខូចខាត។ ការគេងជាឱសថដ៏ល្អបំផុតបែបធម្មជាតិផ្តល់នូវការព្យាបាលយ៉ាងមានប្រសិទ្ធភាពដល់ស្បែកដែលកំពុងខូចខាត។ ដូច្នេះ គប្បីគេងឱ្យបាន៨ម៉ោងក្នុងមួយថ្ងៃ និងឱ្យបានទៀងទាត់ តែប្រសិនបើអ្នកគេងមិនបានគ្រប់គ្រាន់នៅថ្ងៃនេះ ដើម្បីឱ្យរាងកាយបានសម្រាក គួរស្តារឡើងវិញនៅថ្ងៃបន្ទាប់។
4.ទម្លាប់ប្រចាំថ្ងៃ៖ ក្រឡេកមកមើលពីទម្លាប់ប្រចាំថ្ងៃរបស់អ្នក ប្រសិនបើអ្នកកំពុងទម្លាប់ទទួលទានអាហារមិនមានតុល្យភាព ការគេងមិនគ្រប់គ្រាន់មិនបានទៀងទាត់ ការប្រើប្រាស់ផលិតផលដែលមានជាតិកាត់ ឬទម្លាប់មិនល្អផ្សេងទៀតជាប្រចាំថ្ងៃ គួរគប្បីផ្លាស់ប្តូរទម្លាប់ទាំងនោះ។ បន្ថែមសារធាតុដែលប្រឆាំងអុកស៊ីតកម្មដូចជាវីតាមីន C និង E តាមរយៈរបបអាហារ ឬផលិតផលសម្រស់ទៅក្នុងទម្លាប់ប្រចាំថ្ងៃរបស់អ្នក៕
Article by SOUNG SOKSAN
