Sovrin
Sovrin
«សំណេរអង្គរ» ជាកម្មវិធីសរសេរតាមអានថ្នាក់ជាតិលើកទី១ ដែលបានរៀបចំឡើងស្ថិតលើទឹកដីអច្ឆរិយខេត្តសៀមរាប នៅបរិវេណស្ពានហាលប្រាសាទអង្គរវត្ត កាលពីថ្ងៃទី២១ ខែមករា ឆ្នាំ២០២៤។ ព្រឹត្តិការណ៍នេះ មានបេក្ខភាពចូលរួមប្រកួតយ៉ាងច្រើនកុះករប្រមាណជិត៨០០នាក់ ដែលមកពីគ្រប់បណ្តាខេត្តក្រុងនានា។ ជាមួយគ្នានេះ កម្មវិធីបានរៀបចំអត្ថបទមួយរួចជាស្រេច ជាវិញ្ញាសាសម្រាប់បេក្ខជនគ្រប់រូប ហើយសម្រាប់កម្មវិធីលើកដំបូងនេះផងដែរ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានផ្ដល់ជាកិត្តិយសអាននូវអត្ថបទនោះដើម្បីឱ្យបេក្ខជនទាំងអស់សរសេរតាម។ ការសរសេរតាមអាននេះបានប្រព្រឹត្តទៅរយៈពេលប្រហែលមួយម៉ោង និងបញ្ចប់ទៅដោយរលូន ហើយក៏បានរកឃើញម្ចាស់ជ័យលាភីលេខ១គឺលោក ចេង រតនា។
លោក ចេង រតនា បានបង្ហើបពីអារម្មណ៍រំភើបមិនទាន់បាត់នៅឡើយថា “ខ្ញុំរំភើបជាខ្លាំង ដល់ថ្នាក់ញ័រដៃញ័រជើង ព្រោះខ្ញុំមិនបានរំពឹងទុកជាមុននោះទេ ដោយសារបេក្ខជនដែលបានចូលរួមថ្ងៃនោះមានចំនួនច្រើន ហើយមកពីគ្រប់ទិសទីក្នុងព្រះរាជាណាចក្រកម្ពុជា។ ណាមួយ នរណាក៏អាចមានសិទ្ធិចូលរួមប្រកួតបានដែរ មិនថាវ័យប៉ុនណា ឬក៏កម្រិតវប្បធម៌យ៉ាងណានោះទេ ដូច្នេះអ្នកពូកែៗគឺមានច្រើន។ ម្យ៉ាងវិញទៀត ខ្ញុំក៏នៅសរសេរខុសត្រង់ពាក្យមួយចំនួនទៀតផង ហេតុនេះហើយ ទើបធ្វើឱ្យខ្ញុំមិនបានរំពឹងខ្ពស់។” ម្ចាស់ជ័យលាភីរូបនេះក៏បានប្រាប់បន្តថា “កត្តាដែលជំរុញឱ្យខ្ញុំចូលរួមប្រកួតក្នុងកម្មវិធី «សំណេរអង្គរ» មាន៣គឺ ទី១ខ្ញុំចង់វាស់ស្ទង់សមត្ថភាពរបស់ខ្លួនឯង ទី២ខ្ញុំចង់ទទួលបានបទពិសោធនៃការសរសេរតាមអានថ្នាក់ជាតិលើកដំបូងជាមួយនឹងបេក្ខជន បេក្ខនារីមកពីគ្រប់ទិសទីនៃព្រះរាជាណាចក្រកម្ពុជា ហើយដោយកម្មវិធីនេះធ្វើឡើងនៅឯខេត្តសៀមរាបផង ខ្ញុំក៏ចង់ឆ្លៀតឱកាសនេះដើម្បីដើរលេងកម្សាន្តផងដែរ។ ចំណុចទី៣នោះគឺ ខ្ញុំចង់ចូលរួមជាផ្នែកមួយនៃការលើកស្ទួយអក្សរសាស្ត្រជាតិយើង។”
លោកក៏បានបង្ហាញពីចំណាប់អារម្មណ៍ក្នុងការចូលរួមកម្មវិធីនេះដែរថា លោកពិតជារីករាយណាស់ដែលបានចូលរួមកម្មវិធីនេះ បើទោះជាបាន ឬក៏មិនបានជ័យលាភីក៏ដោយ ព្រោះវេទិកានេះបាននាំមកនូវការជួបជុំយ៉ាងច្រើននៃអ្នកដែលស្រលាញ់អក្សរសាស្ត្រខ្មែរទូទាំងប្រទេស ជាពិសេសលោកបានចូលរួមជាផ្នែកមួយក្នុងកម្មវិធីជាប្រវត្តិសាស្ត្រនេះ។ មិនតែប៉ុណ្ណោះ កម្មវិធីនេះបានឆ្លុះបញ្ចាំងឱ្យឃើញពីសារៈសំខាន់នៃអក្សរសាស្ត្រខ្មែរ និងបានដាស់ស្មារតីប្រជាជនខ្មែរជាច្រើនរូបឱ្យងាកមកយកចិត្តទុកដាក់នឹងអក្សរសាស្ត្ររបស់ជាតិខ្លួនឡើងវិញ ជាពិសេសគឺយកចិត្តទុកដាក់សរសេរពាក្យខ្មែរឱ្យបានត្រឹមត្រូវ។ ចំណុចមួយទៀតនោះ ព្រឹត្តិការណ៍នេះបាននាំមកនូវចំណាប់អារម្មណ៍ដ៏ច្រើនលើសលប់ពីសំណាក់ភ្ញៀវទេសចរជាតិ និងអន្តរជាតិ ព្រោះវាបានប្រារព្ធឡើងនៅតំបន់រមណីយដ្ឋានទេសចរណ៍ដ៏ល្បីល្បាញគឺនៅមុខប្រាសាទអង្គរវត្ត។
តាមការបង្ហើបប្រាប់ពីម្ចាស់ជ័យលាភីរូបនេះ ការប្រកួតលើកនេះមិនមែនជាលើកទី១សម្រាប់លោកឡើយ។ ពោល កាលពីរៀនថ្នាក់ទី១២ លោកធ្លាប់បានចូលរួមប្រឡងសិស្សពូកែផ្នែកអក្សរសាស្ត្រខ្មែរដែលទទួលបានចំណាត់ថ្នាក់លេខ៣ ប្រចាំខេត្តបាត់ដំបង (ឆ្នាំសិក្សា ២០១១-២០១២)។ ក្រោយមក នៅពេលបន្តការសិក្សានៅភ្នំពេញ លោកក៏បានចូលរួមប្រកួតប្រជែងតែងនិពន្ធអត្ថបទអក្សរសិល្ប៍ ទទួលបានចំណាត់ថ្នាក់លេខ៣ ផ្នែកនិពន្ធរឿងខ្លី ពីកម្មវិធីប្រកួតប្រជែងអក្សរសិល្ប៍របស់សមាគម «ប៊ិចកម្ពុជា» ដែលរឿងខ្លីនោះមានចំណងជើងថា «ប៊ិកសុវណ្ណ»។
តាមរយៈ សូវរីន ក្នុងនាមជាម្ចាស់ជ័យលាភីមួយរូបលោកក៏មានជាសារផ្តាំផ្ញើថា “ខ្ញុំចង់លើកទឹកចិត្តដល់ប្រជាជនខ្មែរគ្រប់រូប ឱ្យមានចិត្តក្លាហានចូលរួមប្រកួត ព្រោះកម្មវិធីនេះពិតជាមានតម្លៃណាស់សម្រាប់សង្គមជាតិយើង ហើយកុំខ្លាចបរាជ័យ ព្រោះបើយើងមិនសាកប្រាកដជាមិនដឹងទេ។ បើយើងបរាជ័យ យ៉ាងហោចក៏យើងទទួលបានបទពិសោធថ្មី ស្គាល់ពីសមត្ថភាពខ្លួនឯង និងពង្រឹងការសរសេររបស់ខ្លួនឱ្យកាន់តែល្អទៅថ្ងៃក្រោយ។” ចំពោះទៅថ្ងៃអនាគត ម្ចាស់ជ័យលាភីសំណេរអង្គរលើកទី១រូបនេះ ចង់បង្កើតស្នាដៃថ្មីៗបន្ថែមទៀត ជាពិសេសគឺស្នាដៃអក្សរសិល្ប៍ រួមមានរឿងខ្លី ប្រលោមលោក កំណាព្យ ជាដើម ដើម្បីបង្កើនចំណេះដឹងថ្មីៗដល់ប្រជាជនខ្មែរ ក៏ដូចជាធ្វើឱ្យអក្សរសិល្ប៍ខ្មែរកាន់តែរស់រវើក។ ទន្ទឹមនឹងនេះ លោកក៏សង្ឃឹមថា ប្រជាជនខ្មែរនឹងបង្កើនការយកចិត្តទុកដាក់ក្នុងការសរសេរពាក្យខ្មែរឱ្យបានត្រឹមត្រូវ ព្រោះវាជាដួងព្រលឹង និងជាសម្បត្តិរបស់ជាតិយើង ហេតុនេះយើងត្រូវតែរួមគ្នាថែរក្សាវាឱ្យបានល្អ ចៀសវាងធ្វើឱ្យបាត់បង់ដែលនាំឱ្យយើងស្ដាយក្រោយ”៕
Article by SOUNG SOKSAN
