Sovrin
Sovrin
ក្រោយការប្រកួតជាច្រើនសប្តាហ៍ ទីបំផុតកម្មវិធី MasterChef Cambodia រដូវកាលទី៣ បានរកឃើញម្ចាស់ពាន ដោយបានទៅលើបេក្ខជន វ័យក្មេងមកពីខេត្តបន្ទាយមានជ័យ និងត្រូវបានគេស្គាល់ជាគ្រូបង្រៀនភាសាអង់គ្លេស ថ្នាក់មត្តេយ្យនៅរាជធានីភ្នំពេញ នោះគឺ ឃួន សំអន។ ជាការពិតណាស់ ម្ចាស់ជ័យលាភីឯកកំពូលចុងភៅ កម្មវិធីលំដាប់ថ្នាក់ពិភពលោករូបនេះ ជាបេក្ខជនលេចធ្លោមួយរូប ដែលមានសមត្ថភាពខ្ពស់លើការចម្អិន ពូកែទាំងរសជាតិ សោភ័ណភាពតុបតែង ជាពិសេស មានភាពរហ័សរហួន គួបផ្សំគំនិតច្នៃប្រតិដ្ឋ។
កំពុងកាន់ពានក្នុងដៃថ្មីថ្មោង ម្ចាស់ជ័យលាភីឯកវ័យ ២៣ឆ្នាំ ឃួន សំអន បានបង្ហើបពីអារម្មណ៍រំភើបមិនទាន់បាត់នៅឡើយថា៖ «ខ្ញុំមានអារម្មណ៍សប្បាយចិត្តខ្លាំងមែនទែន ព្រោះនេះជាក្តីស្រមៃ ដែលខ្ញុំស្រមៃទុកតាំងពីកម្មវិធី MasterChef Cambodia ចាប់ផ្តើមចាក់ផ្សាយរដូវកាលទី ១ ម្ល៉េះ»។ លោកបន្តទៀតថា៖ «កាលរដូវកាលដំបូង ខ្ញុំបានត្រឹមតែមើល និងមានក្តីស្រមៃប៉ុណ្ណោះ ដល់រដូវកាលទី២ ខ្ញុំចាប់ផ្តើមពុះកញ្ជ្រោល ហើយគ្រាន់តែឈានដល់រដូវកាលទី៣ ភ្លាម ដោយឃើញថាពេលវេលា និងឱកាសមកដល់ ខ្ញុំមិនបង្អង់ក៏ដាក់ពាក្យប្រកួត ហើយបានឈ្នះជ័យលាភីទៀត និយាយទៅខ្ញុំពិតជាសប្បាយចិត្តជាខ្លាំង»។
ប្រកួតដល់វគ្គបេក្ខជន Top 5 ជម្រុះដល់ Top 3 និងរហូតដល់ពីរនាក់ចុងក្រោយ ឃើញថា បេក្ខជន ឃួន សំអន មានភាពស្វិតស្វាញ និងដាក់ចិត្តដាក់កាយយ៉ាងខ្លាំង។ ទាក់ទិននឹងភាពជឿជាក់លើខ្លួនឯង លោកបាននិយាយថា៖ «យើងត្រូវស្គាល់ខ្លួនឯងឱ្យច្បាស់ថាយើងខ្លាំងអ្វី ខ្សោយអ្វី សម្រាប់ខ្ញុំផ្ទាល់ អ្វីដែលខ្ញុំគិតថា ខ្ញុំអាចយកឈ្នះបេក្ខជនដទៃបាន ទី១ ល្បឿន ទី២ ការតុបតែងច្នៃប្រតិដ្ឋ និងទី៣ រសជាតិ។ ចំពោះរសជាតិ ដូចបងប្អូនបានដឹងស្រាប់ ពេលខ្លះខ្ញុំធ្វើឡើង ពេលខ្លះចុះ ប៉ុន្តែនៅវគ្គចុងក្រោយ គឺខ្ញុំសង្កត់ធ្ងន់ទៅលើរសជាតិ ដាច់ខាតមិនត្រូវធ្លាក់»។
ចំណោមវិញ្ញាសាជាច្រើន តាំងពីដើមវគ្គរហូតដល់វគ្គបញ្ចប់ សំអន ថាវិញ្ញាសាដែលពិបាកជាងគេ គឺនៅវគ្គជម្រុះពីបេក្ខជន Top 5 ទៅ Top 3 ដែលគ្រានោះ គឺជាការចម្អិនសាច់ស្តេកយកកម្រិត Medium។ ចំណែកវិញ្ញាសាដែលស្រួលជាងគេ គឺការចម្អិន Scallop ដែលពេលនោះលោកធ្វើបានល្អ ការតុបតែងចានស្អាត និងទទួលបានការកោតសរសើរពីគណៈកម្មការ។
ឆ្លងកាត់ការប្រកួតនេះ សំអន លើកឡើងទាំងមោទកភាពថា៖ «ខ្ញុំទទួលបានបទពិសោធច្រើនមែនទែនពីកម្មវិធីនេះ តាំងពីដំបូងមិនទាន់រកឃើញខ្លួនឯង រហូតដល់ដឹងថាខ្លួនឯងពិតជាស្រលាញ់ខ្លាំងខាងវិស័យម្ហូបអាហារ។ ខ្ញុំថែមទាំងរកឃើញចំណុចលេចធ្លោរបស់ខ្លួនផងដែរ គឺការតុបតែងចាន និងការចម្អិនម្ហូបខ្មែរបានល្អ»។
បន្ទាប់ពីក្លាយជាម្ចាស់ជ័យលាភី ជំហានបន្ទាប់របស់ សំអន គឺនឹងក្លាយជាចុងភៅមួយរូបនៅសណ្ឋាគារលំដាប់ខ្ពស់មួយនៅទីក្រុងភ្នំពេញ។ ដូចបានដឹងខាងដើម មុនពេលប្រកួត លោកក៏មានអាជីពជាគ្រូបង្រៀនភាសាអង់គ្លេសផងដែរ។ លោកលើកឡើងថា៖ «រវាងអាជីពជាគ្រូបង្រៀន និងចុងភៅ ល្អទាំងពីរសម្រាប់ខ្ញុំ តែដោយសារឥលូវស្រលាញ់ខាងម្ហូបអាហារ ខ្ញុំចាប់ផ្តើមបោះជំហានជាមួយវាសិន។ ចំណែកការបង្រៀន បើមានឱកាសខ្ញុំនឹងនៅតែបន្ត ព្រោះវាជាឆន្ទៈមួយរបស់ខ្ញុំក្នុងការចែករំលែក។ សូម្បីខ្ញុំមកខាងផ្នែកម្ហូបអាហារ ក៏ខ្ញុំនៅតែរក្សាផ្នត់គំនិតចែករំលែកផងដែរ»។
ជាចុងក្រោយ ក្នុងនាមជាម្ចាស់ជ័យលាភីកំពូលចុងភៅឯក កម្មវិធីលំដាប់ថ្នាក់ពិភពលោក MasterChef Cambodia រដូវកាលទី៣ លោក ឃួន សំអន ក៏មានសារផ្តាំផ្ញើដល់អ្នកស្រលាញ់ខាងវិស័យម្ហូបអាហារដែរថា៖ «បើបងប្អូនស្រលាញ់ខាងវិស័យម្ហូបអាហារ ខ្ញុំលើកទឹកចិត្តឱ្យអ្នកទាំងអស់គ្នាសាកល្បងជាមួយខ្លួនឯង ចេញមកធ្វើ ចេញមកបង្ហាញ ឬចូលប្រកួតក្នុងកម្មវិធី MasterChef Cambodia អាចថាវាជាកន្លែងមួយ ដែលធ្វើឱ្យអ្នកទាំងអស់គ្នារកឃើញខ្លួនឯង។ មានតែការសាកល្បងទេ ទើបដឹងថាយើងជានរណាឱ្យពិតប្រាកដ»៕
Article by HEM SOKKHIM
Image Courtesy : MasterChef Cambodia
