Sovrin
Sovrin
បន្លែបង្ការក្នុងរដូវវស្សាហាក់មិនសូវសម្បូរផលជាងរដូវប្រាំងឡើយ! តើហេតុអ្វី?
TRAVEL & LIVING 6 years ago
រដូវវស្សាបង្កជាភ្លៀងធ្លាក់ជោកជាំពេញផ្ទៃប្រទេស ហើយក៏បង្អួតនូវសោភ័ណភាពស្រស់បំព្រង។ បន្លែជាប្រភេទអាហារដែលមិនអាចខ្វះបានក្នុងការរស់នៅប្រចាំថ្ងៃ។ បន្លែមានច្រើនប្រភេទស្ទើររាប់ឈ្មោះមិនអស់ ក្នុងនោះមានទាំងប្រភេទបន្លែដែលមានរូបសណ្ឋានប្រភេទជាស្លឹក ប្រភេទមើម ប្រភេទផ្លែ ប្រភេទដើម និងប្រភេទផ្កា។ យ៉ាងណាមិញ នៅក្នុងរដូវស្សានេះ បន្លែបង្ការបែរជាមិនសូវសម្បូរបែបដូចរដូវប្រាំងទៅវិញ ពោលគឺមានតែប្រភេទបន្លែមួយចំនួនតែប៉ុណ្ណោះដែលកសិករអាចប្រមូលផលនិងដាក់លក់ក្នុងទីផ្សារបាន។ ចង់ដឹងទេថាក្នុងវស្សានរដូវនេះបន្លែប្រភេទណាខ្លះដែលសម្បូរភោគផល ហើយបន្លែប្រភេទណាខ្លះដែលមិនសូវផ្ដល់ផលក្នុងរដូវកាលនេះ! ជំនួបសម្ភាសន៍ដោយផ្ទាល់រវាង សូវរីន ជាមួយ អ្នកនាង សយ សុម៉ាលី ដែលជាស្ថាបនិកផ្សារសហគមន៍ខ្មែរបានផ្ដល់ចម្លើយជុំវិញប្រធានបទខាងលើដែលមានអត្ថន័យនឹងខ្លឹមសារដូចខាងក្រោមនេះ។
ទិដ្ឋភាពចម្ការបន្លែនៅតំបន់ត្រីកោណ ខ្មែរ ឡាវ ថៃ ស្ថិតក្នុងខេត្តស្ទឹងត្រែង
បើតាមប្រសាសន៍ស្ថាបនិកផ្សារសហគមន៍ខ្មែរបានឱ្យដឹងថា «សម្រាប់បន្លែនៅក្នុងរដូវវស្សានេះមិនសូវជាសម្បូរនោះទេស្ទើរតែគ្រប់ប្រភេទបន្លែទាំងអស់គឺវាប្រឈមទៅនឹងបញ្ហាគ្រោះធម្មជាតិធ្ងន់ធ្ងរ មិនថាបន្លែដាំដុះក្នុងស្រុកឬនាំចូលគឺមិនសូវជាផ្ដល់ទិន្នផលឡើយ។ ក្នុងនោះផងដែរពពួកប្រភេទបន្លែស្លឹកគឺស្ទើរតែមិនមានតែម្ដងដោយសារតែវាប្រឈមទៅនឹងការរលួយ ឧទាហរណ៍បន្លែខ្លះយើងដកវាចេញមកទុកតែមួយថ្ងៃវាអាចរលួយអស់តែម្ដង ដោយសារតែទឹកភ្លៀងវាធ្លាក់ជោគជាំខ្លាំង ហើយវាស្ទើរតែ៦០ទៅ៧០ភាគរយគឺមិនទទួលបានទិន្នផលនោះឡើយ។» សម្រាប់បន្លែប្រភេទដើមឬវល្លិ៍ដូចជា ស្លឹកបាស ស្លឹកងប់ ម្អម ក្រសាំងទាប ត្រកួន ត្រឡាច ល្ពៅ ម្រះ ត្រសក់ ត្រប់ វាជាប្រភេទបន្លែធនជាមួយនឹងទឹកភ្លៀងហើយមិនសូវប្រឈមជាមួយបញ្ហាអាកាសធាតុនោះទេ។ និយាយជារួមមកពពួកបន្លែប្រភេទមើមឬផ្កាគឺមិនសូវទទួលបានទិន្នផលខ្ពស់នោះទេក្នុងរដូវវស្សានេះ ហេតុដូច្នេះហើយប្រភេទបន្លែដែលទទួលបានទិន្នផលល្អក្នុងរដូវវស្សានេះគឺមានតែពពួកបន្លែប្រភេទផ្លែមួយចំនួនតែប៉ុណ្ណោះដូចដែល សូវរីន បានរៀបរាប់បង្ហាញជូនពីខាងលើដែលផ្ដល់ទិន្នផលល្អក្នុងរដូវវស្សានេះ។ សូមបញ្ជាក់ផងដែរថា ថ្វីត្បិតតែភោគផលបន្លែមិនជាសម្បូរបែបក្នុងរដូវនេះក៏ពិតមែនប៉ុន្តែកសិករខ្មែរយើងនៅតែអាចដាំដុះបន្លែស្ទើរតែគ្រប់ប្រភេទបានទៅតាមតម្រូវការរបស់អ្នកបរិភោគគ្រាន់តែវាតិចឬច្រើនទៅតាមស្ថានភាពជាក់ស្ដែងនៃអំណោយផលអាកាសធាតុតាមរដូវកាល។
បន្លែធម្មជាតិស្រុកស្រែក្នុងប្រទេសកម្ពុជាយើង ភាគច្រើនសុទ្ធតែជាបន្លែគ្មានជាតិគីមី ដែលវាមិនធ្វើឱ្យប៉ះពាល់ដល់សុខភាពអ្នកបរិភោគ ដូចបន្លែមួយចំនួនដែលនាំចូលពីប្រទេសជិតខាងឡើយ តួយ៉ាងដូចជានៅផ្សារសហគមន៍ខ្មែរ ដែលលក់សុទ្ធតែបន្លែទៅតាមរដូវកាលដែលដាំដុះដោយកសិករខ្មែរដោយប្រើប្រាស់ជីធម្មជាតិ។ ទោះបីជាយ៉ាងណាក៏ដោយ ទាំងអស់នេះគ្រាន់តែជាការលើកមកបង្ហាញត្រួសៗពីប្រភេទបន្លែស្រុកស្រែខ្លះនៅរដូវវស្សាដែលយើងនិយមបរិភោគប្រចាំថ្ងៃមកបង្ហាញជូនតែប៉ុណ្ណោះ នៅមានប្រភេទបន្លែធម្មជាតិដែលដុះនៅតាមតំបន់ស្រុកស្រែជាច្រើនទៀតដែល សូវរីន មិនអាចរៀបរាប់ឈ្មោះអស់៕
Article by HENG CHANMAKARA
