Sovrin
Sovrin
ការស្រមើស្រមៃរបស់វិចិត្រករស្រី «សៀង សុគន្ធកណ្ណិកា» ក្លាយជាផ្ទាំងគំនូរអប្សរាយន្តដ៏មានប្រជាប្រិយ
NEWS 6 years ago
ផ្ទាំងគំនូរជាច្រើនផ្ទាំងដែលត្រូវបានគូរឡើងដោយមានការយកចិត្តទុកដាក់ខ្ពស់បំផុតពីវិចិត្រករគ្រប់មជ្ឈដ្ឋានទាំងអស់បានធ្វើឲ្យសិល្បៈនៃការគូរគំនូរកាន់តែមានភាពរីកចម្រើន និងកាន់តែមានប្រជាប្រិយភាពពីសំណាក់យុវជននាពេលបច្ចុប្បន្ននេះ។ គំនូរមិនត្រឹមតែជាផ្នែកមួយ ដែលអាចជាកម្សាន្តអារម្មណ៍ដល់អ្នកទស្សនាប៉ុណ្ណោះទេ ប៉ុន្តែវាបានបង្កប់នូវអត្ថន័យនិងអត្ថរសយ៉ាងជ្រាលជ្រៅ ព្រមទាំងបានបញ្ចូលនូវមនោសញ្ចេតនារបស់វិចិត្រករម្នាក់ៗដែលបង្ហាញពីសេចក្តីស្រឡាញ់ និងការស្រមើស្រមៃ ទៅតាមផ្ទាំងគំនូរដែលគេបានគូរឡើង។ ម៉្យាងវិញទៀត ស្របពេលដែលការគូរគំនូរកំពុងតែមានការពេញនិយមបែបនេះ កញ្ញា សៀង សុគន្ធកណ្ណិកា ក៏បានបង្ហាញនូវទេពកុសល្យរបស់ខ្លួនទៅលើគំនូរជាច្រើនផ្ទាំងដែលមានរចនាប័ទ្មខុសប្លែកពីវិចិត្រករដទៃៗ។
ស្ថិតនៅក្នុងវ័យ ២៩ ឆ្នាំ បានបញ្ចប់ការសិក្សាលើមុខជំនាញសេដ្ឋកិច្ច និងពាណិជ្ជកម្ម ដែលមានស្រុកកំណើតក្នុងរាជធានីភ្នំពេញ ជាវិចិត្រករកំពុងតែមានប្រជាប្រិយភាពបំផុតលើគំនូរអប្សរាយន្តអាក្រាត និងផ្ទាំងគំនូរដទៃជាច្រើនទៀតដែលទាក់ទងនឹងតួអង្គក្នុងរឿងព្រេងនិទាន។ ជាវិចិត្រករដែលមិនធ្លាប់ឆ្លងកាត់ការសិក្សាលើមុខជំនាញគូរគំនូរក៏ពិតមែន ប៉ុន្តែកញ្ញា សុគន្ធកណ្ណិកា ព្យាយាមសិក្សា ស្វែងរកវិធីសាស្ត្រក្នុងការគូរគំនូរដោយខ្លួនឯងដូចជា៖ ការគូរគំនូរទឹក ការគូរលើជញ្ជាំង ការគូរគំនូរឌីជីថល និងការគូរគំនូរជីវចលជាដើម។ មិនត្រឹមតែប៉ុណ្ណោះ កញ្ញាក៏បានលើកឡើងផងដែរថា ថ្វីដ្បិតតែកញ្ញាមិនបានឆ្លងការសិក្សាលើផ្នែកគូរគំនូរមែនពិត ក៏ប៉ុន្តែគំនូរដែលកញ្ញាបានគូរឡើងទាំងអស់ សុទ្ធសឹងតែជាការស្រមើស្រមៃរបស់ កញ្ញាដូចវិចិត្រករដទៃផងដែរ។ កញ្ញាបានបន្ថែម «នៅពេលដែលខ្ញុំរៀនគូរគំនូរលើកដំបូង ពិតជាមានការលំបាកខ្លាំងបំផុត ព្រោះខ្ញុំមិនបានដឹងថា គួរចាប់ផ្តើមពីចំណុចណាទៅចំណុចណាមុន ហើយចំពោះការគូរគំនូរឌីជីថលវិញកាន់តែលំបាកទៅទៀត គ្រាន់តែកាន់ប៊ិចគូរក៏ខុសដែរ ប៉ុន្តែខ្ញុំនៅតែមិនបោះបង់ចោលក្តីស្រឡាញ់របស់ខ្ញុំចំពោះវានោះទេ។»
ដូចដែលប្រិយមិត្តបានឃើញហើយថា គំនូរនីមួយៗរបស់កញ្ញាភាគច្រើនគឺជារូបអប្សរាអាក្រាតកាយជាច្រើនផ្ទាំងក៏ពិតមែន ប៉ុន្តែប្រសិនបើនិយាយពីខ្លឹមសារនៃផ្ទាំងគំនូរទាំងនេះ គឺផ្តោតសំខាន់ទៅលើអប្សរាដែលបុព្វបុរសខ្មែរបានឆ្លាក់លើប្រាង្គប្រាសាទបុរាណនីមួយៗជាច្រើន។ លើសពីនេះទៅទៀត ជាមួយនឹងផ្ទាំងគំនូរនេះដដែល វាមិនត្រឹមតែបានបង្ហាញពីចម្លាក់ក្បាច់លើប្រាង្គប្រាសាទនោះទេ ប៉ុន្តែវាក៏បានឆ្លុះបញ្ចាំងអំពីទិដ្ឋភាពជាក់ស្តែងមួយដែលមនុស្សក្នុងសម័យបុរាណគ្មានសម្លៀកបំពាក់សម្រាប់បិតបាំងរាងកាយផងដែរ។ ម៉្យាងវិញទៀត បើយើងគយគន់គំនូរដទៃផ្សេងទៀតនោះ យើងនឹងមានអារម្មណ៍ថាធូរស្បើយពីភាពតានតឹងមួយចំនួន ក៏ព្រោះតែពណ៌ដែលកញ្ញាប្រើប្រាស់លើគំនូរនីមួយៗមានលក្ខណៈស្រាលស្រទន់ ត្រជាក់ភ្នែក ហើយពណ៌ទាំងអស់នោះបានប្រលោមចិត្តយើងឲ្យដក់ជាប់ទៅនឹងផ្ទាំងគំនូរនោះរហូតតែម្តង។
ទន្ទឹមនឹងនេះផងដែរ កញ្ញា សុគន្ធកណ្ណិកា បានបង្ហាញចំណាប់អារម្មណ៍ ក៏ដូចជាសារចែករំលែកនូវបទពិសោធន៍មួយចំនួនទៅកាន់យុវជនជំនាន់ក្រោយឲ្យមានការខិតខំប្រឹងប្រែង និងអនុវត្តន៍លើទេពកុសល្យដែលមានស្រាប់ឲ្យកាន់តែប្រសើរជាងមុនទ្វេដង ដើម្បីសម្រេចនូវគោលដៅមួយដែលយើងបានគ្រោងទុក ទោះបីជាមានឧបសគ្គលំបាកយ៉ាងណាក៏ដោយ៕
Article by PAN SIVLY
កញ្ញា សៀង សុគន្ធកណ្ណិកា
