Sovrin
Sovrin
កូនខ្មែរទទួលការបណ្តុះបណ្តាលពីប៉ារីសមកអភិវឌ្ឍគ្រឿងអលង្ការប្រាក់នៅខេត្តសៀមរាប
NEWS 4 years ago
“ទំនើបតែយូរអង្វែង សកលតែចាក់ប្ញសជ្រៅទៅក្នុងបេតិកភណ្ឌ” ជាគោលការណ៍រចនាម៉ូដរបស់ហាងគ្រឿងអលង្ការមួយឈ្មោះ “Garden of Desire” ដែលបានប្រសូតចេញពីគំនិតផ្តួចផ្តើមរបស់ស្ថាបនិក និង អ្នករចនាម៉ូដជនជាតិខ្មែរម្នាក់ឈ្មោះ លី ពិសិដ្ឋ ដែលបានទទួលការបណ្តុះបណ្តាញជំនាញនេះមកពីទីក្រុងប៉ារីស ប្រទេសបារាំង ហើយបានត្រឡប់មកប្រទេសកម្ពុជាវិញក្នុងឆ្នាំ២០០៧ ក្រោយពេលលោកបានភៀសខ្លួនទៅរស់នៅទីនោះអស់រយៈពេលជិត៤០ឆ្នាំមកដោយសាររបបខ្មែរក្រហម។ កាលពីរស់នៅក្នុងប្រទេសបារាំង បុរសខ្មែរសញ្ជាតិបារាំងរូបនេះចាប់ចិត្តដិតអារម្មណ៍នឹងសិល្បៈនៃការរចនាតាំងពីវ័យជាង២០ឆ្នាំមកម្ល៉េះ ហើយជាច្រើនឆ្នាំក្រោយមក លោកបានចាប់យកអាជីពជាអ្នកឌីហ្សាញម៉ូដផលិតផលឲ្យក្រុមហ៊ុនម៉ាកយីហោសម្លៀកបំពាក់ Alan Mikli និង ម៉ាក Starck ព្រមទាំងបណ្តាក្រុមហ៊ុនម៉ាកយីហោរចនាម៉ូដសម្លៀកបំពាក់ប្រណិតៗលំដាប់អន្តរជាតិនានានៅក្នុងទីក្រុងប៉ារីសនោះ។ តាមរយៈភាពជោគជ័យក្នុងវិស័យការងារខាងលើជាបន្តបន្ទាប់នៅប្រទេសបារាំង លោកត្រូវទៅបន្តបេសកកម្មការងារនៅប្រទេសសិង្ហបុរីដែលជាទីកន្លែងអតិថិជនទទួលស្គាល់ស្នាដៃរចនាម៉ូដរបស់លោកយ៉ាងសម្បើមគួរឲ្យស្ញប់ស្ញែង។ ទីបំផុត លោក លី ពិសិដ្ឋ បានចាប់ដៃគូបង្កើតហាងកែច្នៃគ្រឿងអលង្ការនៅខេត្តសៀមរាបជាមួយអ្នកនាង អេហ្គណេស លីម (Agnes Lim) ដែលជាគទានុរក្សសិល្បៈមានបទពិសោធន៍ផ្នែកគ្រប់គ្រងនិងអភិវឌ្ឍន៍គម្រោងសិល្បៈនិងពិព័រណ៍ជាមួយសិល្បករនៅប្រទេសសិង្ហបុរី និង ប្រទេសនានានៅទ្វីបអាស៊ី។
លោក លី ពិសិដ្ធ
“ខ្ញុំចង់ប្រាប់ពីរឿងរ៉ាវអំពីប្រទេសនេះនិងប្រវត្តិសាស្រ្តរបស់វា ព្រមទាំងបរិស្ថាននិងមនុស្ស តាមរយៈគ្រឿងប្រាក់ដើម្បីជួយគាស់កកាយសិល្បៈគ្រឿងចម្លាក់ប្រាក់របស់ខ្មែរយើងឲ្យរស់ឡើងវិញ ប៉ុន្តែជាមួយការបង្ហាញតាមបែបសហសម័យ” លោក លី ពិសិដ្ឋ ស្ថាបនិក និង រចនាករគ្រឿងអលង្ការបានបង្ហាញចំណាប់អារម្មណ៍។ ក្រោមឥទ្ធិពលនៃគំនិតច្នៃប្រតិដ្ឋនៅក្នុងបង្កើតឈុតម៉ូដនីមួយៗ រចនាកររូបនេះតែងតែបញ្ចេញស្នាដៃដែលមានទំនាក់ទំនងផ្សារភ្ជាប់ទៅនឹងប្រទេសកម្ពុជាដែលជាប្រទេសកំណើតរបស់លោកជាអាទិ៍រួមមាន ឈុតគ្រឿងអលង្ការដែលច្នៃចេញពីគំនិតទាក់ទងបណ្តាប្រាង្គប្រាសាទបុរាណនៃតំបន់អង្គរ ទម្រង់សរីរាង្គធម្មជាតិ និងស្នាដៃបង្កើតដោយមនុស្ស គំនិតដ៏ស្ងប់ស្ងាត់ល្អិតល្អន់ឆ្លុះបញ្ចាំងលើអ្វីមួយ និង ពិភពធម្មជាតិដ៏ស្រស់ត្រកាល ដែលសុទ្ធសឹងជាទឹកដីដ៏ប៉ិនប្រសប់របស់លោករួមជាមួយក្រុមសិប្បករក្នុងស្រុកដ៏ចំណាន។
ក្នុងរយៈពេលជាង១០ឆ្នាំមកនេះ អាជីវកម្មមួយនេះមានរីកចម្រើនរហូតមានវិចិត្រសាលចំនួនពីរទីតាំងនៅខេត្តសៀមរាប គឺវិចិត្រសាល The Passage (ម្តុំ Pub Street) (២០០៨) និង វិចិត្រសាល Kandal Village (ផ្ទះលេខ ១០ ផ្លូវហាប់ហ្គាង) (២០១៨) និង មួយទីតាំងនៅរាជធានីភ្នំពេញ (២០១១)។ គិតមកដល់សព្វថ្ងៃនេះ “Garden of Desire” ធ្លាប់បានច្នៃម៉ូដគ្រឿងអលង្ការធ្វើអំពីប្រាក់សុទ្ធចំនួន ៩៥៥ ម៉ូដ និង ប្រាក់លាយទង់ដែងចំនួន ៩២៥ ម៉ូដ ព្រមទាំងគ្រឿងអលង្ការធ្វើពីមាសចំនួនជិតពីរពាន់ម៉ូដ និងពីត្បូងធម្មជាតិ(ប្រភេទត្បូងពាក់កណ្តាលមានតម្លៃ Semi-precious stones)ផ្សេងៗទៀតដែលពោរពេញដោយភាពល្បីល្បាញដោយសារតែការរចនាម៉ូដបែបសហសម័យដ៏ល្អឯកគ្មានពីររបស់ហាងនេះ និង ទឹកដៃផ្នែកជំនាងយ៉ាងរស់រវើកល្អវិចិត្រ។ ឈុតគ្រឿងអលង្ការសំខាន់ៗតំណាងហាងនេះរួមមាន ឈុតខ្មែរ (Khmer Collection) ឈុតធម្មជាតិ (Nature Collection) ឈុតទម្រង់ (Form Collection) និង ឈុតសុបិន (Dream Collection) ។ តើលោកអ្នកទស្សនាហើយពេញចិត្តឈុតមួយណាជាងគេ? ចូលរួមគាំទ្រស្នាដៃច្នៃប្រតិដ្ឋរបស់សិប្បករខ្មែរទាំងអស់គ្នាដើម្បីនិរន្តរភាពនៃគ្រឿងចម្លាក់ប្រាក់ខ្មែរបែបទំនើប!
Article by SRIN SOKMEAN
