Sovrin
Sovrin
មកស្គាល់រុក្ខជាតិជួយបន្សុទ្ធខ្យល់ល្អបំផុតសម្រាប់ដាក់ក្នុងបន្ទប់គេងឬក្នុងផ្ទះ
TRAVEL & LIVING 5 years ago
រុក្ខជាតិមិនគ្រាន់តែជាគ្រឿងលម្អមួយសម្រាប់បង្កើនសោភ័ណភាពនៅក្នុងបរិវេណផ្ទះតែប៉ុណ្ណោះទេ តែរុក្ខជាតិក៏បានផ្ដល់ ប្រយោជន៍ជាច្រើនសម្រាប់ សមាជិកគ្រួសារគ្រប់រូបទាំងគុណសម្បត្តិផ្លូវកាយ ផ្តល់នូវអារម្មណ៍ស្រស់ស្រាយ និងជួយដល់បរិស្ថានទៀតផង។ លើសពីនេះទៅទៀតមានរុក្ខជាតិខ្លះអាចជួយបំបាត់នូវបរិយាកាសមិនល្អហើយនិង ល្អដល់សុខភាពមនុស្សទៀតផង។ ថ្ងៃនេះសូវរីនសូមណែនាំនូវរុក្ខជាតិប្រាំប្រភេទដែលអាចជួយបន្សុទ្ធខ្យល់មិនល្អ និងអាចដាំក្នុងបន្ទប់គេងបានផងដែរ៖
ប្រទាលលំពែងព្រះរាម៖ ដើមនេះត្រូវបានគេហៅឈ្មោះច្រើន ខ្លះហៅដើមម្ចុលពេជ្យ ខ្លះហៅដើមស្រោមដាវ ឬប្រទាលព្រះខ័ណ្ឌរាជ ឬលំពែងព្រះរាមជាដើម។ ថ្វីដ្បិតតែវាមានឈ្មោះមិនសូវល្អ និងមិនមានស្លឹក ឬផ្កាស្រស់ស្អាតយ៉ាងណាក្តី តែរុក្ខជាតិប្រភេទនេះបញ្ចេញអុកស៊ីហ្សេននៅពេលយប់ ល្អបំផុតសម្រាប់ដាក់ក្នុងបន្ទប់គេង។ 
ប្រទាលម្លូលឿង៖ រុក្ខជាតិនេះ ជាប្រភេទដើមដែលងាយស្រួលដាំបំផុត ព្រោះវាត្រូវការពន្លឺ និងទឹកតិចបំផុត។ រុក្ខជាតិវល្លិនេះក៏អាចបន្សុទ្ធខ្យល់បានផងដែរ។
ដូងរាសី៖ រុក្ខជាតិប្រភេទនេះជួយបំបាត់ជាតិពុលដែលបង្កើតដោយអតិសុខុមប្រាណ បានមួយភាគធំល្អបំផុតសម្រាប់ដាំនៅក្នុងផ្ទះក្នុងការិយាល័យឬបន្ទប់គេងជាដើម។ ដើមដូងតូចនេះមិនទាមទារនូវពន្លឺថ្ងៃប៉ុន្មានឡើយ ដូច្នេះយើងអាចដាំវាបាននៅក្នុងម្លប់ឬកន្លែងដែលមានពន្លឺតិច បានផងដែរ។ 
ប្រទាលកន្ទុយក្រពើ៖ ប្រទាលកន្ទុយក្រពើផ្តល់នូវគុណប្រយោជន៍ជាច្រើនមិនថាជួយថែទាំសម្ជស្សឬសុខភាពមនុស្សឡើយ ក៏ប៉ុន្តែប្រសិនបើមានដើមប្រទាលកន្ទុយក្រពើខ្លះនៅក្នុងផ្ទះក៏ល្អម្យ៉ាង ព្រោះវាក៏អាចជួយបន្សុទ្ធខ្យល់មិនល្អបានផងដែរ។
ស្តេចនាគស៖ ប្រសិនបើអ្នកជាអ្នកស្រលាញ់ផ្កា ដើមនាគសនេះប្រហែលជារុក្ខជាតិម្យ៉ាងដែលអ្នកអាចដាក់ក្នុងបន្ទប់គេង ឬកន្លែងពិសេសណាមួយ ព្រោះវាជាផ្កាមួយប្រភេទដែលអាចកំចាត់ជាតិពុល និងបន្សុទ្ធខ្យល់បានផងដែរ៕
Article by KEO SONG
