Sovrin
Sovrin
វណ្ណ សារ៉េត អ្នកខេត្តព្រៃវែងម្ចាស់ពានរង្វាន់តែងកំណាព្យ «សម្តេចព្រះសង្ឃរាជជួនណាត» ២០១៩
NEWS 5 years ago
ខេត្តព្រៃវែងជាទឹកដីកំណើតរបស់តួអង្គនេនទុំក្នុងវណ្ណកម្មអក្សរសិល្ប៍រឿងទុំទាវដ៏ល្បីល្បាញដែលនិពន្ធដោយព្រះបទុមត្ថេរ សោម ឬ ភិក្ខុសោម កាលពីជាង១០០ឆ្នាំមុន ដែលសិក្ខាកាមជនទាំងឡាយសុទ្ធ តែបានដឹងរួចមកហើយ។ ជាង១០០ឆ្នាំកន្លងផុតទៅ មកដល់សតវត្សរ៍ទី២១នេះ កូនកសិករអ្នកខេត្តព្រៃវែងម្នាក់បានបង្កើតវណ្ណកម្មអក្សរសិល្ប៍ថ្មីមួយជាប្រភេទកំណាព្យក្រោមចំណងជើងថា «គ្រូគ្រឹះអប់រំសង្គមឌីជីថល» តែងជាបទពាក្យប្រាំពីរ ចំនួន១០ល្បះ ដែលត្រូវបានប្រកាសជាកំណាព្យជ័យលាភីលេខ១ ពានរង្វាន់ «សម្តេចព្រះសង្ឃរាជ ជួន ណាត» ដោយក្រសួងអប់រំ យុវជន និងកីឡា ក្នុងឱកាសទិវាគ្រូបង្រៀន ០៥ តុលា ២០១៩ ថ្មីៗកន្លងទៅ។ តោះ! មកសិក្សាអំពីប្រវត្តិរូប និងចំណាប់អារម្មណ៍របស់បេក្ខជនជ័យលាភីឆ្នាំនេះ!
ក្នុងកិច្ចសម្ភាសន៍ជាមួយក្រុមការងារសូវរីន លោក វណ្ណ សារ៉េត ដែលមាននាមប៉ាកកាថា «ចៅស្មេរប្រលោម» បានរៀបរាប់អំពីដំណើរជីវិតពិតរបស់លោកថា លោកមានស្រុកកំណើតនៅភូមិត្បែង ឃុំត្រពាំងស្រែ ស្រុកមេសាង ខេត្តព្រៃវែង កើតក្នុងត្រកូលគ្រួសារកសិករ ហើយមានបងប្អូនបង្កើតចំនួន០៣នាក់ដែលក្នុងចំណោមនោះ រូបលោកជាកូនប្រុសច្បង។ ចំពោះប្រវត្តិសិក្សាលោកជាអតីតសិស្សពូកែផ្នែកអក្សរសាស្រ្តខ្មែរលេខ១ប្រចាំខេត្តព្រៃវែង ឆ្នាំ២០០២ និងជាសិស្សពូកែទូទាំងប្រទេសជំនាន់នោះមួយរូបផងដែរ។ ក្រោយមកក្នុងឆ្នាំ២០០៥ លោកបានចាប់ផ្តើមអាជីពជាសាស្រ្តាចារ្យបង្រៀនមុខវិជ្ជាអក្សរសាស្រ្តរហូតមកដល់សព្វថ្ងៃ។ សព្វថ្ងៃ លោកកំពុងបម្រើការជាគ្រូបង្រៀនកម្រិតឧត្តម នៅអនុវិទ្យាល័យត្រពាំងជ្រែ ស្រុកមេសាង ខេត្តព្រៃវែង និងកំពុងបន្តការសិក្សាថ្នាក់បរិញ្ញាបត្រជាន់ខ្ពស់ឯកទេសអក្សរសាស្រ្តខ្មែរនៅវិទ្យាស្ថានខេមរាសាស្រ្ត ទីរួមខេត្តព្រៃវែង។
ដោយឡែក ចំពោះប្រវត្តិនៃការតែងនិពន្ធរបស់លោកវិញ លោកបានមកទីក្រុងភ្នំពេញទទួលការបណ្តុះបណ្តាលជំនាញតែងនិពន្ធនៅសមាគមអ្នកនិពន្ធខ្មែរជាមួយសាស្រ្តាចារ្យកំណាព្យជើងចាស់ដូចជា ឯកឧត្តម ជ័យ ចាប រដ្ឋលេខាធិការក្រសួងអប់រំ យុវជន និងកីឡា និង លោកសាស្រ្តាចារ្យ វ៉ែន សុន ជាដើម ក្នុងជំនាន់ទី១៧ ក្នុងឆ្នាំ២០០៧ ប៉ុន្តែដោយសារមមាញឹកនឹងការងារពេក លោកបានបង្ខំចិត្តផ្អាកការសិក្សានៅទីនោះទាំងមិនទាន់ទទួលបានវិញ្ញាបនបត្រនៅឡើយ។ ក្រោយមកទៀត ដោយសារចិត្តនៅតែស្រឡាញ់ វិស័យតែងនិពន្ធនេះ លោកបានសម្រេចចិត្តចូលបន្តការសិក្សានៅសមាគមអ្នកនិពន្ធខ្មែរម្តងទៀតក្នុងជំនាន់ទី២៦ រហូតទទួលបានជោគជ័យជាស្ថាពរ។
នៅចន្លោះឆ្នាំ២០០៣ និង ឆ្នាំ២០០៩ ដែលលោកចាត់ទុកជាពេលដែលលោកធ្វើការយ៉ាងសកម្មបំផុតជាមួយការតែងនិពន្ធ លោកបានចំណាយពេលវេលានិពន្ធទំនុកច្រៀងប្រមាណជិត១០០បទ កំណាព្យបានប្រហែលមួយក្បាល និងសាច់រឿងខ្លីៗជាច្រើនផងដែរ។ លុះមកដល់ឆ្នាំ ២០១០ លោកបានរៀបអាពាហ៍ ពិពាហ៍ហើយចំណាយពេលច្រើនទៅលើជីវភាពគ្រួសារ មិនសូវបានតែងនិពន្ធច្រើនដូចកាលនៅលីវទេ។ មកដល់ឆ្នាំ២០១៧ ទើបលោកចាប់ផ្តើមលើកស្លាបប៉ាកកាបន្តការងារតែងនិពន្ធសាជាថ្មី។ ក្នុងចំណោមកំណាព្យខ្មែរទាំងអស់ លោកនិយមចូលចិត្តបង្កើតស្នាដៃជា បទកាកគតិ បទព្រហ្មគីតិ បទពាក្យ៧ និងបទពាក្យ៩ ជាងគេ។
ជុំវិញសិល្ប៍វិធីនៃការតែងនិពន្ធកំណាព្យខ្មែរ កន្លងមក មានទស្សនៈខ្លះលើកឡើងថា «ពិបាករកចំណាប់ជួន ពិបាករកអត្ថន័យក្នុងការសរសេរ» ជាដើម ប៉ុន្តែសម្រាប់លោកជាត្មែងកំណាព្យផ្ទាល់ លោកគិតថាមិនមានអ្វីពិបាកនោះទេ សំខាន់កំណាព្យត្រូវសរសេរឡើងតាមអារម្មណ៍រំភើបនិងមនោសញ្ចេតនាផ្ទាល់របស់ត្មែងទៅលើវត្ថុឬបញ្ហាអ្វីមួយ។ ទន្ទឹមនឹងនេះ ត្មែងកំណាព្យរមែងតែងតែអានសៀវភៅឯកសារច្រើនដែលជំរុញឲ្យមានចំណេះដឹងច្រើនក្នុងការតែងនិពន្ធ ពោលគឺមិនពិបាកក្នុងការរកពាក្យជួន ឬ គំនិតសរសេរនោះទេ។
អ្វីដែលធ្វើឲ្យលោកមានមោទនភាពក្នុងវិស័យនេះគឺលោកជាគ្រូបង្រៀនម្នាក់ដែលមានឱកាសបញ្ចេញសមត្ថភាព និង ចែករំលែកចំណេះដឹងតាមរយៈស្នាដៃកំណាព្យរបស់លោក។ ជ័យលាភីកំណាព្យដែលលោកទទួលបានក្នុងឆ្នាំនេះបានជួយបង្កើនគុណតម្លៃជីវិតរបស់លោករហូតមានអ្នកស្គាល់និងគាំទ្រ ច្រើនជាងមុន។ ជាពិសេស វាបានផ្តល់មុខមាត់កិត្តិយសយ៉ាងត្រចះត្រចង់ដល់ខេត្តព្រៃវែងរបស់លោកថែមទៀតផង។ វាមិនមែនជារឿងធម្មតានោះទេ ព្រោះការប្រឡងប្រជែងត្រូវឆ្លងកាត់ថ្នាក់ស្រុកថ្នាក់ខេត្តទម្រាំបានឈានមកវគ្គផ្តាច់ព្រ័ត្រទូទាំងប្រទេសនៅរាជធានីភ្នំពេញ «ក្រសួងអប់រំឆ្នាំនេះបានជូនដំណឹងដល់បេក្ខជនក្នុងរយៈពេលខ្លីមែនទែន! ខ្ញុំនិងបេក្ខជនទាំងអស់ត្រូវផ្លាស់ប្តូរកំណាព្យរបស់ខ្លួនពីបទកាកគតិមកជាបទពាក្យ៧ក្រោមប្រធានបទដដែលឲ្យបាន១០ល្បះក្នុងរយៈពេល២ម៉ោង ប៉ុន្តែខ្ញុំខំប្រមូលអារម្មណ៍ឲ្យបានល្អបំផុតដោយប្រើពេលត្រឹមតែ១ម៉ោងក្នុងការសរសេរ។»
គួរបញ្ជាក់ផងដែរថា ក្នុងឆ្នាំ២០១៩នេះ លោកសាស្រ្តាចារ្យ វណ្ណ សារ៉េត បានជាប់ជ័យលាភីអក្សរសិល្ប៍ចំនួនរហូតបីដងជាប់ៗគ្នា គឺ កាលពីទិវាវប្បធម៌ជាតិ ថ្ងៃទី០៣ ខែមីនា លោកទទួលបានជ័យលាភីថ្នាក់កិត្តិយសនិពន្ធទំនុកច្រៀង គឺបទ «ស្នេហ៍ព្រៃវែង» (ចង្វាក់បូហ្សាណូវ៉ា) និងបទ «ស្រីម៉ៅកូនម៉ែ» (ចង្វាក់កន្រ្ទឹម)។ ដោយឡែក ក្នុងខែតុលានេះ លោកទទួលបានជ័យលាភីកំណាព្យចំនួនពីរដំណាលគ្នា គឺ ជ័យលាភីចំណាត់ថ្នាក់១ ក្នុងឱកាសទិវាគ្រូបង្រៀន និង ជ័យលាភីចំណាត់ថ្នាក់លេខ២ ក្នុងឱកាសមហោស្រពអក្សរសិល្ប៍ខ្មែរលើកទី៣។ ក្នុងនាមជាបេក្ខជនជ័យលាភី លោកបានសង្កត់ធ្ងន់លើគុណតម្លៃនៃសិល្បៈកំណាព្យថា វាមានមុខងារទាំងផ្នែកពុទ្ធិ ទាំងផ្នែកកម្សាន្ត មានន័យថា កំណាព្យផ្តល់ចំណេះដឹងទូទៅច្រើនដល់អ្នកអាន ហើយថែមទាំងរំលេចនូវភាសារូបារម្មណ៍ ពាក្យចុងចួនពីរោះរណ្តំណែងណង ធ្វើឲ្យអ្នកសិក្សាឆាប់ចងចាំជាងអត្ថបទពាក្យរាយ។ លើសពីនេះ កំណាព្យបានបង្កប់តម្លៃអប់រំដល់មហាជន តួយ៉ាង ច្បាប់ល្បើកថ្មី របស់កវីក្រមង៉ុយ ច្បាប់ប្រុស ច្បាប់ស្រី របស់ កវី ម៉ឺនម៉ៃ ជាដើម។
សម្រាប់គោលបំណងទៅថ្ងៃអនាគត លោកចង់បោះពុម្ពស្នាដៃកំណាព្យដែលលោកធ្លាប់បានតែងកន្លងមក។ ដូចនេះ លោកពិតជាត្រូវការជំនួយឧបត្ថម្ភពីក្រសួងពាក់ព័ន្ធ និង សប្បុរសជនជិតឆ្ងាយដែលមានទឹកចិត្តចង់លើកស្ទួយវិស័យកំណាព្យខ្មែរឲ្យរីកចម្រើន។ ជាចុងក្រោយលោកសូមលើកទឹកចិត្តដល់កវីក្នុងស្រុកទាំងអស់ឲ្យចេះប្រើបណ្តាញសង្គមក្នុងការចែករំលែកស្នាដៃ ព្រមទាំងស្នើឲ្យពួកគាត់មេត្តាប្រើឈ្មោះនិងរូបថតពិតដើម្បីងាយស្រួលក្នុងការប្រាស្រ័យទាក់ទងទៅវិញទៅមក។ គប្បីចៀសវាងការបង្ហោះអ្វីដែលឥតប្រយោជន៍ច្រើន នាំឲ្យប៉ះពាល់ដល់កិត្តិនាមក្នុងអាជីពតែងនិពន្ធ។ ចំពោះសិក្ខាកាមជនដែលចាប់អារម្មណ៍ចំពោះជំនាញនេះវិញត្រូវតែមានចំណង់ចំណូលចិត្តនិងទេពកោសល្យលើផ្នែកនេះពិតប្រាកដ ព្យាយាមអានស្នាដៃកំណាព្យរបស់កវីរៀមច្បង និងឯកសារចំណេះដឹងទូទៅគ្រប់ប្រភេទឲ្យបានច្រើន៕
Article by SRIN SOKMEAN
ជ័យលាភីលេខ១ «តែងនិពន្ធ»
លោក វណ្ណ សារ៉េត
ជាគ្រូបង្រៀននៅអនុវិទ្យាល័យត្រពាំងជ្រៃ ខេត្តព្រៃវែង
ចំណងជើង «គ្រូគ្រឹះអប់រំសង្គមឌីជីថល»
«បទពាក្យប្រាំពីរ»
១. គ្រូគឺជាគ្រឹះការអប់រំ ធនធានសង្គមស្ដម្ភអស្ចារ្យ
ជាទុនចំណេះជំនាញថ្លា ដូចសុរិយាថ្លារស្មី។
២. នាយុគសម័យល្បីរញ្ជួយ លូតលាស់បោះពួយពិតអ្វីៗ
បច្ចេកវិទ្យាទំនើបថ្មី ពិភពលោកិយស្វែងសិក្សា។
៣. លូតលាស់ចម្រើនកើនរហ័ស ល្បឿនវិទ្យាសាស្រ្តតម្រូវការ
គុណភាពគ្រូគ្រឹះស្ដង់ដា តម្រង់វាសនាជាតិសុខសាន្ត។
៤. ដ្បិតសតវត្សម្ភៃមួយ គ្រូស្ទុះស្ទាស្ទួយជួយឲ្យបាន
ទាំងគុណវុឌ្ឍិមុតចំណាន ចំណេះថ្កើងថ្កានជំនាញពិត។
៥. ទាំងឯកទេសមិនធ្វេសទ្វេ ស្រាវជ្រាវរិះរេរកគំនិត
គរុកោសល្យច្នៃប្រឌិត ពេញមួយជីវិតគិតសិក្សា។
៦. ប្រើវិធីសាស្ត្រច្បាស់លាស់ល្អ ចែកចាយបន្តពូជបញ្ញា
គ្រឿងឧបទេសកិច្ចតែងការ ព្រឹកល្ងាចសាលាមិននឿយណាយ។
៧. ដីសជាមិត្តស្និទ្ធក្តារខៀន សព្វសិល្ប៍របៀនគ្រូត្រួសត្រាយ
បើសិស្សពូកែគ្រូសប្បាយ សិស្សខ្សោយខ្វល់ខ្វាយស្រាយយោងយឹត។
៨. ឧបករណ៍ចល័តចាត់ប្រើស្ទាត់ នវានុវត្តទំនើបពិត
ពិសេសពិសោធន៍ចោទរិះគិត គំនរគំនិតពិតមាំមួន។
៩. ពាក្យពេចន៍ពោរពេញមធុរស ពុំមានទ្រគោះហួសសមសួន
មនសិការក្លាហំហួន វិន័យច្បាប់ក្បួនមិនឆ្មើងឆ្មៃ។
១០. បណ្ដុះបំណិនមិនប្រហែស អង់គ្លេសគ្រូចេះក្រែលក្រាស់ក្រៃ
យុគអ៊ិនធើណែតភ្លែតសម័យ ចលករកែច្នៃក្រៃរុងរឿង៕
