Sovrin
Sovrin
មនុស្សជាច្រើនធ្លាប់បានដឹងរួចមកហើយថា ការទទួលទានកាហ្វេក្នុងកម្រិតសមស្របជួយដាស់ ថាមពលរាងកាយនិងខួរក្បាលរបស់យើងឲ្យកាន់តែស្វាហាប់រវៀសរវៃ ព្រមទាំងជួយផ្តល់អត្ថប្រយោជន៍ ជាច្រើនទៀតសម្រាប់សុខភាពប្រចាំថ្ងៃរបស់យើង។ សព្វថ្ងៃនេះ នៅក្នុងប្រទេសកម្ពុជា ជាពិសេសនៅ ក្នុងរាជធានីភ្នំពេញតែម្តង ហាងកាហ្វេតូចធំរីកដុះដាលដូចផ្សិតស្ទើរគ្រប់សង្កាត់ខណ្ឌមិនចេះខ្វះ។ ប៉ុន្តែ ក្នុងចំណោមនោះ ក្នុងអំឡុងពេលប៉ុន្មានខែចុងក្រោយនេះ យើងចាប់អារម្មណ៍ចំពោះវត្តមានហាងកាហ្វេ ទំនើបតូចមួយនៅម្តុំក្រោយព្រះបរមរាជវាំងដែលទើបតែបង្កើតឡើងថ្មីសន្លាងកាលចុងឆ្នាំ២០២០កន្លងទៅនេះទេ ដែលមានបង្កប់នូវលក្ខណៈពិសេសប្លែកខុសពីបណ្តាហាងកាហ្វេដែលធ្លាប់មានពីពេលមុនៗ។
ហាងកាហ្វេដែលបានរៀបរាប់ខាងលើនេះមានឈ្មោះជាផ្លូវការថា ស្វាងកាហ្វេ ឬ កាហ្វេស្វាង និងហាងសៀវភៅ (Swarng Café and Bookstore)។ ហាងកាហ្វេថ្មីនេះមានទីតាំងអាសយដ្ឋានស្ថិតនៅ អគារលេខ E0Z-13 វិថីព្រះយុគន្ធរ (ផ្លូវលេខ១៩) សង្កាត់ជ័យជំនះ ខណ្ឌដូនពេញ រាជធានីភ្នំពេញ។ ទាក់ ទងនឹងការដាក់ឈ្មោះនេះ “ស្វាងកាហ្វេ” មានន័យចំនួនពីរ គឺទីមួយ ស្វាងផ្លូវកាយនិងផ្លូវអារម្មណ៍នៅ ពេលលោកអ្នកទទួលទានកាហ្វេដ៏មានឱជារសឈ្ងុយឆ្ងាញ់ពីទីនេះ និង ទីពីរគឺស្វាងប្រាជ្ញាស្មារតី ទទួល បាននូវចំណេះដឹងពិតៗពីសៀវភៅល្អៗពីអ្នកនិពន្ធក្នុងស្រុកដែលលោកអ្នកអាចអានបាននៅទីនេះនៅ ពេលលោកអ្នកកំពុងទទួលទានកាហ្វេ មិនខុសពីពាក្យស្លោករបស់ហាងដែលបានលើកឡើងថា “កាហ្វេ ស្វាងនិងហាងសៀវភៅ នាំយើងមកកាន់ស្មារតី!” ។
គោលបំណងនៃការបង្កើតអាជីវកម្មនេះឡើងគឺមិនត្រឹមតែផ្តល់ជូនអតិថិជនទាំងឡាយនូវសេវា កម្មកាហ្វេនិងភេសជ្ជៈផ្សេងៗដូចបណ្តាហាងកាហ្វេដទៃទៀតនោះទេ តែវាក៏ត្រូវបានបង្កើតឡើងក្នុង គោលបំណងដើម្បីផ្តល់នូវទីតាំងដ៏ប្រសើរសម្រាប់មិត្តអ្នកអានទាំងអស់ដែលចូលចិត្តអានសៀវភៅនិង គាំទ្រស្នាដៃនិពន្ធរបស់អ្នកនិពន្ធក្នុងស្រុកជំនាន់ក្រោយរបស់យើង។ “សេចក្តីសុខរបស់អ្នកចូលចិត្តអាន នៅពេលដែលពួកគេបានចូលមកដល់ស្វាង ទឹកមុខដ៏រំភើបបែបនេះ ក៏គឺជាសេចក្តីសុខរបស់យើងដូច គ្នា។ ការអានគឺជាវប្បធម៌ដ៏ថ្លៃថ្នូរ ឯសៀវភៅគឺជាឧបករណ៍ដែលខ្វះមិនបាន ព្រោះបើទោះបីជាពិភព លោកដើរដល់សម័យណាក៏អារម្មណ៍នៃការកាន់សៀវភៅអានផ្ទាល់នៅតែជាសុភមង្គលរបស់ពួកយើង ដដែល” ស្ថាបនិកហាងបានបង្ហាញ។
គួរបញ្ជាក់ផងដែរថា ក្រៅពីអានសៀវភៅ លោកអ្នកក៏អាចជាវសៀវភៅដែលលោកអ្នកពេញចិត្ត ជាពិសេសស្នាដៃអក្សរសិល្ប៍ថ្មីៗរបស់អ្នកនិពន្ធដែលតែងតែបង្ហាញនៅទីនេះជាហូរហែកន្លងមក តួយ៉ាង សៀវភៅប្រលោមលោក “ខែរងា” របស់អ្នកនិពន្ធ សុខ ចាន់ផល, សៀវភៅប្រលោមលោក “កំណត់ហេតុ ពណ៌ស្វាយ” និង “ស្លាបមយូរី” របស់អ្នកនិពន្ធ ម៉ៅ សំណាង (ទន្សាយ), សៀវភៅ “ជាអ្នកធ្វើការ” របស់ អ្នកនិពន្ធរតនា, សៀវភៅ “ទេវបុត្រសេះស” របស់អ្នកនិពន្ធ ហេង ដារី, សៀវភៅ “មន្តស្នេហ៍កូនកាំបិត” របស់អ្នកនិពន្ធ ឆាន់ វុត្ថា (វេហាស៍) ជាដើម។
នៅក្នុងអន្តរកាលនេះ លោកអ្នកនៅតែអាចវេចខ្ចប់កាហ្វេនិងជាវសៀវភៅតាមអនឡាញយកទៅអាន នៅផ្ទះពោរពេញដោយក្តីសុខផ្នែកអារម្មណ៍ជាក់ជាមិនខាន។ សូវរីនសូម ណែនាំជម្រើសភេសជ្ជៈប្រចាំ ត្រកូលទាំងបី មុខរបស់ស្វាង គឺ កាហ្វេស្វាង តែបៃតងស្វាង និង ផាសិនស្វាង ដែលទទួលបាននូវការ ពេញនិយម កុម្ម៉ង់ជាងគេបំផុតពីសំណាក់អតិថិជន។ លោកអ្នកអាចកុម្ម៉ង់បានរៀងរាល់ម៉ោងធ្វើការចាប់ ពីម៉ោង៧ព្រឹករហូតដល់ម៉ោង៨យប់ ចាប់ពីថ្ងៃអង្គារដល់ថ្ងៃអាទិត្យ៕
Article by SRINSOKMEAN
