Sovrin
Sovrin
បើនិយាយពីឈ្មោះសហគមន៍តាំងយូរ ប្រហែលជាមហាជនមិនសូវស្គាល់ប៉ុន្មានទេ ប៉ុន្តែបើនិយាយពីទឹកធ្លាក់ភ្នំត្បែងនៅព្រះវិហារ ប្រហែលជាមានភ្ញៀវទេសចរជិតឆ្ងាយក្នុងផ្ទៃប្រទេសស្គាល់ឈ្មោះនេះច្រើន ជាង ជាពិសេសតាមរយៈការបង្ហោះនៅលើបណ្តាញសង្គមរបស់ក្រសួងទេសចរណ៍ ក្រសួងបរិស្ថាន និង ក្រុមហ៊ុនទេសចរណ៍ក្នុងស្រុកនានានាពេលកន្លងមក រហូតដល់មានការប្រសិទ្ធនាមឲ្យតំបន់នេះថា “ភ្នំត្បែងមានជ័យដែនដីពិសិដ្ឋ” ថែមទៀតផង។ ដោយសារតែកិត្តិស័ព្ទដ៏ល្បឺរន្ទឺនៃភូមិភាគប៉ែកខាងជើងប្រទេសមួយនេះ សូវរីនបានសម្ភាសន៍តាមទូរសព្ទជាមួយ លោក ចាន់ វណ្ណូ ប្រធានសហគមន៍ទេសចរណ៍ សេដ្ឋកិច្ចរុងរឿង ឬ សហគមន៍តំបន់ការពារធម្មជាតិតាំងយូរ (Tang You Community-Based Tourism) ស្តីពីដំណើរការអភិវឌ្ឍសហគមន៍មួយនេះតាំងពីបង្កើតឡើងដំបូងរហូតមកដល់ពេលបច្ចុប្បន្ននេះ។
សហគមន៍ទេសចរណ៍ សេដ្ឋកិច្ចរុងរឿង ឬ សហគមន៍តំបន់ការពារធម្មជាតិតាំងយូរ មានទីតាំងស្ថិត នៅភូមិសេដ្ឋកិច្ច ឃុំឈានមុខ ក្រុងត្បែងមានជ័យ ខេត្តព្រះវិហារ។ ចំពោះប្រវត្តិនៃការបង្កើតសហគមន៍នេះ លោក ចាន់ វណ្ណូ បានឲ្យដឹងថាសហគមន៍នេះមានឈ្មោះដើមថា “សហគមន៍ព្រៃឈើសេដ្ឋកិច្ចរុងរឿង” ត្រូវបានបង្កើតឡើងលើកទី១តាំងពីថ្ងៃទី១៥ ខែមករា ឆ្នាំ២០១៥ មកម្ល៉េះ ប៉ុន្តែត្រូវបានរំសាយចោលម្តង ដោយ សារតែខាងអង្គការដែលមកគ្រប់គ្រងអស់អាណត្តិបេសសកកម្មរបស់ខ្លួន។ ក្រោយមក ប្រជាពលរដ្ឋក្នុងហមន៍ សហការជាមួយអង្គការព្រៃឡង់បៃតង បានមូលមតិគ្នាបង្កើតជាគណៈកម្មការសហគមន៍នេះជាលើកទី២ ដោយដាក់ឈ្មោះថា “សហគមន៍ការពារធម្មជាតិតាំងយូរ” រហូតមកដល់សព្វថ្ងៃនេះ។
លោកបានបន្តឲ្យដឹងថា កាលពីមិនទាន់រៀបចំជាសហគមន៍ទេសចរណ៍ ប្រជាពលរដ្ឋនៅទីនេះដែលមានចំនួន ១០៤ គ្រួសារ ភាគច្រើនជាកសិករធ្វើស្រែចម្ការ ធ្វើសំណង់ និង មានអ្នកធ្វើចំណាកស្រុកទៅក្រៅប្រទេសខ្លះដែរ។ ចំណែកបញ្ហាបរិស្ថាន កាលពីមុន មានករណីកាប់ព្រៃឈើនិងបរបាញ់សត្វច្រើន ប៉ុន្តែសព្វថ្ងៃក្រោយពីមានការចែកវេនយាមល្បាតជាប្រចាំរបស់មន្រ្តីសហគមន៍ (៨-១០នាក់ក្នុងមួយក្រុម) សកម្មភាពល្មើសច្បាប់ទាំងនោះត្រូវបានកាត់បន្ថយរហូតបានដល់ ៨០% បើតាមការអះអាងរបស់ប្រធានសហគមន៍ ដែលជាកត្តាធ្វើឲ្យទីនេះមាននិរន្តរភាពបរិស្ថានស្រស់បំព្រងទាក់ទាញភ្ញៀវទេសចរមកពីគ្រប់ទិសទី។ រីឯ ចំពោះផ្នែកទេសចរណ៍ សហគមន៍បានខិតខំព្យាយាមកសាងហេដ្ឋារចនាសម្ព័ន្ធទេសចរណ៍ដើម្បីសម្រួលដល់ការធ្វើដំណើររបស់ភ្ញៀវ ជាអាទិ៍រួមមាន ការកសាងជណ្តើរចំនួន១០២កន្លែង(ចន្លោះពី៤-៥កាំរហូតដល់ ១០០កាំក៏មាន អាស្រ័យលើស្ថានភាពផ្លូវដែលត្រូវឆ្លងកាត់) ពីជើងភ្នំរហូតដល់កន្លែងលេងទឹកធ្លាក់។
ក្រៅពីនេះ សហគមន៍បានបង្កើតសេវាកម្មទេសចរណ៍ចាំបាច់ជូនភ្ញៀវ ដូចជា សេវាកម្មមគ្គុទ្ទេសក៍នាំភ្ញៀវឡើងភ្នំ សេវាកម្មជួយដឹកជញ្ជូនអីវ៉ាន់ភ្ញៀវ សេវាកម្មហូបចុក និង សេវាកម្មស្នាក់នៅ។ ចំពោះសេវាកម្មនាំភ្ញៀវ តម្លៃ១០ដុល្លារក្នុងមួយថ្ងៃ ដែលភ្ញៀវអាចជ្រើសរើសគោលដៅតិចឬច្រើនដែលខ្លួនចង់ទៅបានតាមចិត្ត ឬ តាមកម្លាំងជាក់ស្តែង។ រីឯសេវាកម្មហូបចុក សហគមន៍អាចរៀបចំជូនភ្ញៀវជាប្រភេទសាច់មាន់ សាច់ជ្រូក និង សាច់ត្រី (ប៉ុន្តែភ្ញៀវច្រើននិយមកុម្ម៉ង់សាច់មាន់របស់សហគមន៍ផ្ទាល់) តាមចំណង់ចំណូលចិត្តរបស់ភ្ញៀវ។ ដោយឡែក សម្រាប់សេវាកម្មស្នាក់នៅ មានផ្ទះស្នាក់ (Homestay) របស់សហគមន៍ចំនួន០៥កន្លែង និង មានសេវាកម្មរៀបចំទីតាំងនិងយាមល្បាតសម្រួលដល់ការបោះតង់សម្រាប់ភ្ញៀវជាក្រុមផងដែរ។ កន្លែងដែលភ្ញៀវនិយមទៅបោះតង់ជាងគេ គឺ ដំណាក់ទឹកធ្លាក់តាំងយូរ តែម្តង។ ប៉ុន្តែភ្ញៀវក៏អាចជ្រើសរើសទីតាំងដែលខ្លួនចង់បានក្រៅពីនេះក៏បាន ព្រោះភ្នំត្បែងនេះមានទីតាំងគោលដៅទេសចរណ៍តូចធំរហូត១២កន្លែង ឯណោះ តួយ៉ាង ទឹកធ្លាក់ចាក់អង្រែតូច ទឹកធ្លាក់ចាក់អង្រែក្រោម ឬ ទឹកធ្លាក់អន្លង់ស្វាយ ចាក់ក្រវិល កណ្តុរស ពើងលាក់ខ្លួន ជាដើម។
ក្នុងបរិបទកូវីដ១៩ នេះ សហគមន៍ត្រូវបានផ្អាកជាបណ្តោះអាសន្នតាមការណែនាំរបស់រដ្ឋាភិបាល ប៉ុន្តែនៅសប្តាហ៍នេះ សហគមន៍តំបន់ការពារធម្មជាតិតាំងយូរនឹងបើកទ្វារទទួលភ្ញៀវទេសចរវិញហើយ។ សហគមន៍មានគម្រោងជួសជុលស្តារកាំជណ្តើរដែលមានស្រាប់ សង់ទីស្នាក់ការថ្មី និង សង់បង្គន់អនាម័យ មួយកន្លែងទៀតបន្ថែមលើបង្គន់ចំនួន០៤ទីតាំងដែលមានសព្វថ្ងៃដើម្បីសម្រួលដល់ការស្នាក់នៅរបស់ភ្ញៀវឲ្យកាន់តែមានភាពងាយស្រួលជាងមុន។ យើងសង្ឃឹមថា ភ្ញៀវទេសចរនឹងមានកំណើននៅថ្ងៃខាងមុខ មកលេងទីនេះកាន់តែច្រើន ព្រោះហេដ្ឋរចនាសម្ព័ន្ធទាំងឡាយកំពុងអភិវឌ្ឍជាបន្តបន្ទាប់ ហើយភ្ញៀវចំណាយពេលឡើងភ្នំតិចជាងមុនពីរយៈពេល៤ម៉ោងមកត្រឹមតែកន្លះម៉ោងប៉ុណ្ណោះ។ នៅពេលមានភ្ញៀវ ប្រជាជនសហគមន៍នឹងរកចំណូលបានកាន់តែច្រើន ចូលរួមចំណែកកាត់បន្ថយភាពក្រីក្រនៅក្នុងតំបន់៕
