Sovrin
Sovrin
យុវជន ជ័រ ម៉េងស៊ាង ម្ចាស់ជ័យលាភីលេខ១ ផ្នែកគំនូរស្តីពីគ្រឿងស្រវឹង
NEWS 2 years ago
«ការប្រកួតប្រជែងគូរឬរចនាគំនូរស្តីពីគ្រឿងស្រវឹង» គឺជាប្រធានបទមួយដែលបានរៀបចំឡើងដោយអង្គការ ចលនាដើម្បីសុខភាពកម្ពុជា ឬហៅកាត់ថា(CMH) ដែលសហការជាមួយនឹងក្រសួងអប់រំ យុវជន និងកីឡា។ កម្មវិធីនេះរៀបចំឡើងក្នុងគោលបំណងដើម្បីក្រើនរំលឹកយុវជនឲ្យដឹងពីគ្រោះថ្នាក់ដែលបង្កពីការប្រើប្រាស់គ្រឿងស្រវឹង និងគាំទ្រឲ្យមានវិធានការមានប្រសិទ្ធភាពដើម្បីកាត់បន្ថយការប្រើប្រាស់គ្រឿងស្រវឹង។
យុវជន ជ័រ ម៉េងស៊ាង បច្ចុប្បន្នជានិស្សិតកំពុងសិក្សាឆ្នាំទី២ ជំនាញផ្នែកវិស្វករសំណង់ស៊ីវិលនៅសាកលវិទ្យាល័យមួយកន្លែងនៅទីក្រុងភ្នំពេញ ដែលមានស្រុកកំណើតមកពី ស្រុកស្ទឹងហាវ ខេត្តព្រះសីហនុ។ ម្ចាស់ជ័យលាភីវ័យ១៩ឆ្នាំរូបនេះសម្រេចចិត្តចូលរួមប្រកួតក៏ព្រោះតែគោលបំណងសំខាន់២គឺ៖ ទី១ ជាការចូលរួមជាមួយនឹងអង្គការ CMH និងក្រសួងអប់រំ ដើម្បីធ្វើការផ្សព្វផ្សាយពីផលប៉ះពាល់ការប្រើប្រាស់គ្រឿងស្រវឹង និងវិធានការនានាក្នុងការកាត់បន្ថយការប្រើប្រាស់គ្រឿងស្រវឹងឲ្យកាន់តែទូលំទូលាយដល់ពលរដ្ឋខ្មែរគ្រប់វ័យ ជាពិសេស កុមារា កុមារី និងយុវជនផងដែរ។ រីឯគោលបំណងសំខាន់ទី២គឺជាការសាកល្បងបង្ហាញស្នាដៃរបស់ខ្លួនក្នុងការរចនារូបភាព ក្រោយពីយុវជនរូបនេះបានស្វ័យសិក្សាក្នុងអំឡុងពេលដែលមានការរីករាលដាលនៃជំងឺកូវីដ១៩។ ជាក់ស្តែង ការរចនាគំនូរមួយផ្ទាំងប្រកបដោយអត្ថន័យជ្រាលជ្រៅរបស់ ម៉េងស៊ាង បានចំណាយរយៈពេលត្រឹមតែមួយសប្តាហ៍តែប៉ុណ្ណោះក្នុងការបញ្ចប់ និងសម្រេចការរចនារបស់ខ្លួនមុនពេលការប្រកួតឈានមកដល់ ត្រឹមតែរយៈពេលដ៏ខ្លី ពោល ៣ថ្ងៃដំបូងយុវជនរូបនេះបានស្រាវជ្រាវឯកសារ និងធ្វើការប្រមូលគំនិតនានាជាច្រើនក្នុងការផ្គួបផ្សំចំណុចរួមដែលទាក់ទងនឹងផលប៉ះពាល់នៃការប្រើប្រាស់គ្រឿងស្រវឹង ក៏ដូចជាវិធានការផ្សេងៗទៀតដែលបានផ្សព្វផ្សាយដោយក្រសួងពាក់ព័ន្ធ ជាពិសេស ការតាមដាន និងការអានព័ត៌មានតាមរយៈគេហទំព័ររបស់អង្គការសុខភាពពិភពលោក(WHO)។ ក្រោយពីការចំណាយពេល៣ថ្ងៃក្នុងការប្រមូលផ្តុំព័ត៌មាន ម្ចាស់ជ័យលាភីរូបនេះ ប្រើប្រាស់ពេលវេលា ២ថ្ងៃក្នុងការព្រាងរូបភាពនៅលើក្រដាស និងគិតថាតើគួរបង្កប់អត្ថន័យយ៉ាងដូចម្តេចខ្លះតាមរយៈរូបភាពទាំងនោះ។ បន្ទាប់ពីបានរចនារូបភាពនោះចេញជាផ្លូវការ រួចធ្វើការត្រួតពិនិត្យលម្អិតស្វែងរកចំណុចខ្វះខាតណាមួយ ដើម្បីប្រាកដថាសមិទ្ធផលនោះគឺត្រឹមត្រូវទៅតាមលក្ខខ័ណ្ឌប្រកួត និងគម្រោងដែលខ្លួនឯងបានព្រាងទុក។
យុវជនរូបនេះបានបន្តទៀតថា “បន្ទាប់ពីការប្រកួតនេះបានបញ្ចប់ទៅ និងទទួលបានជ័យលាភីលេខ១ ខ្ញុំបានទទួលបទពិសោធន៍ និងចំណេះដឹងជាច្រើនទាក់ទងនឹងផលប៉ះពាល់នៃការប្រើប្រាស់គ្រឿងស្រវឹង និងបានឈ្វេងយល់ពីវិធានការមានប្រសិទ្ធភាពក្នុងការកាត់បន្ថយ ក៏ដូចជាកាត់ផ្តាច់ការប្រើប្រាស់គ្រឿងស្រវឹង។ មួយវិញទៀត ខ្ញុំបានទទួលមេរៀនថ្មីមួយគឺ ធ្វើឲ្យខ្ញុំហ៊ានជម្នះ ហ៊ានផ្លាស់ប្តូរខ្លួនឯងពីមនុស្សអៀនច្រើន ពុំសូវហ៊ាននិយាយ មិនហ៊ានបង្ហាញមុខ ទៅជាមនុស្សម្នាក់ដែលហ៊ាននិយាយ និងក្លាហានហ៊ានពន្យល់បកស្រាយនៅចំពោះមុខគណៈកម្មការ លោកគ្រូអ្នកគ្រូ និងសិស្សានុសិស្សជាច្រើននាក់ដែលបានចូលរួមក្នុងពេលនោះផងដែរ។ ខ្ញុំនៅតែបន្តចូលរួមផ្សព្វផ្សាយផលប៉ះពាល់នៃការប្រើប្រាស់គ្រឿងស្រវឹងទាំងនេះជាបន្តបន្ទាប់ទៀតតាមរយៈបណ្តាញសង្គមផ្សេងៗ និងការចូលរួមការងារស្ម័គ្រចិត្តជាដើម។”
តាមរយៈសូវរីន ម៉េងស៊ាង ក៏បង្ហាញ និងលើកទឹកចិត្តដល់អ្នកគាំទ្រ ក៏ដូចជាប្រជាពលរដ្ឋខ្មែរឲ្យដឹងផងដែរថា “ខ្ញុំពិតជារីករាយ និងរំភើបជាពន់ពេកដែលបានចូលរួមប្រកួត និងទទួលបានជ័យលាភី។ ខ្ញុំសូមលើកទឹកចិត្តដល់បងៗ និងប្អូនៗដែលមានចិត្តស្រលាញ់ផ្នែកគំនូរ រួមទាំងផ្នែកផ្សេងៗទៀត កុំឲ្យមានភាពអៀនខ្មាសក្នុងការបង្ហាញពីស្នាដៃរបស់ខ្លួន និងត្រូវជម្នះចិត្តរបស់ខ្លួនឯង ជាពិសេសនោះគឺត្រូវជម្រុះចោលឲ្យអស់នូវគំនិតដែលគិតថាខ្លួនធ្វើមិនបាន ទៅមិនរួច ត្រូវគិតថាគ្មានអ្វីដែលមិនអាចទៅរួចនោះទេ ហើយត្រូវហ៊ានអនុវត្តហើយអនុវត្តទៀតកុំបោះបង់”។
គួរជម្រាបផងដែរថា ការទទួលបានជ័យលាភីលេខ១ ម៉េងស៊ាង ក៏ទទួលបានរង្វាន់លើកទឹកចិត្តជាមួយថវិកាចំនួន១លានរៀល និងកុំព្យូទ័រយួរដៃមួយគ្រឿងពីកម្មវិធីប្រកួតដែលមានអ្នកចូលរួមប្រកួតចំនួន ១៧៥នាក់ ព្រមទាំងរង្វាន់លើកទឹកមួយផ្សេងទៀតពីអភិបាលខេត្តជាថវិកាចំនួន២លានរៀល។
Article by SOUNG SOKSAN
