Sovrin
Sovrin
ហាងអាហារសុខភាព៣ទីតាំងដែលស័ក្តិសមសម្រាប់លោកអ្នកជូនអ្នកមានគុណទៅសាកល្បងក្នុងទិវាអ្នកម្តាយ
TRAVEL & LIVING 3 years ago
១. ភោជនីយដ្ឋាន Vegetarian Menu
ហាងនេះជាភោជនីយដ្ឋានលក្ខណៈអាជីវកម្មគ្រួសារបម្រើម្ហូបបួសឯកទេស ម្ហូបខ្មែរ-ថៃ ដ៏មានស្តង់ដារ កណ្តាលក្រុងភ្នំពេញ មានលក្ខណៈពិសេសខុសប្លែកពីហាងអាហារបួសដទៃទៀតដែលច្រើនតែបម្រើតែម្ហូបបួសរសជាតិបែបចិន។ ហាងនេះមានអាសយដ្ឋានលេខ ១១ ផ្លូវលេខ ៣០២ ជិតកែងមហាវិថីព្រះនរោត្តម ខាងត្បូងវិមានឯករាជ្យ (ផ្លូវទី៣ ជិះពីវិមានឯករាជ្យបត់ស្តាំ) សង្កាត់បឹងកេងកងទី១ ខណ្ឌបឹងកេងកង។
ហាងនេះមានជម្រើសម្ហូបបួសយ៉ាងសម្បូរបែបលើសពីការរំពឹងទុករបស់លោកអ្នក ជាអាទិ៍រួមមាន ម្ហូបខ្មែរ-ថៃ បាយឆា-មីឆា ស៊ុបឆ្នាំងភ្លើង ព្រមទាំងអាហារសម្រន់បួសច្រើនប្រភេទទៀត។ អាហារបួសប្រចាំហាងដែលស័ក្តិសមសម្រាប់អ្នកម្តាយក្នុងឱកាសទិវាអ្នកម្តាយ មានបីមុខណែនាំដោយម្ចាស់ហាងផ្ទាល់ សុទ្ធសឹងជាប្រភេទផ្សំពីបន្លែចម្រុះនិងផុយឆ្ងាញ់ងាយរំលាយក្រោយទទួលទានរួច ក្នុងនោះរួមមាន ស៊ុបឆ្នាំងភ្លើងរសជាតិដើម ត្រូវនឹងអាកាសធាតុរដូវមូសុងនេះបំផុត, សម្លកកូរ អត្តសញ្ញាណម្ហូបខ្មែរខ្វះមិនបាន ដែលចាស់ៗភាគច្រើនចូលចិត្ត និង ត្រីបំពងហឹរផ្សំពីពពុះសណ្តែកមានរសជាតិស្ទើរតែដូចសាច់ត្រីពិតៗទន់ផុយល្អគ្មានឆ្អឹង (អាចដាក់ម្ទេសខាងក្រៅបាន សម្រាប់អ្នកមិនសូវចេះហឹរ)។
គួរបញ្ជាក់ថា អាហារនៅទីនោះភាគច្រើនមានតម្លៃចន្លោះ ៣-៦ដុល្លារប៉ុណ្ណោះ សមរម្យសម្រាប់ភ្ញៀវជាតិនិងអន្តរជាតិទូទៅ។ ហាងនេះបើកដំណើរការជារៀងរាល់ថ្ងៃ បម្រើអាហារចន្លោះថ្ងៃត្រង់ ថ្ងៃត្រង់ និង អាហារពេលល្ងាច ចាប់ពីម៉ោង៩ព្រឹក ដល់ម៉ោង៨យប់។ លើសពីនេះ ហាងនេះមានម្ចាស់ហាងនិងបុគ្គលិករួសរាយរាក់ទាក់ ចម្អិនម្ហូបអាហារតម្រូវតាមចំណង់ចំណូលចិត្តអតិថិជនបាន ងាយស្រួលសម្រាប់ណែនាំទៅកាន់អ្នកមានគុណក្នុងថ្ងៃពិសេសរបស់ពួកគាត់។ 
២. ហាង Sacred Lotus Plant-Based Café X Homestay
ហាងកាហ្វេនិងអាហារសុខភាពដ៏តូចតែស្រស់ស្អាតមួយកន្លែងស្ថិតនៅលើផ្លូវលេខ ២៤០ ម្តុំផ្សារទួលទំពូង។ ហាងនេះមានលក្ខណៈគ្រាន់តែជាផ្ទះល្វែងផ្សារបែបទ.វ.ទី៦០ ស្រឡះភ្នែកមិនសូវមានការតុបតែងអ្វីច្រើននោះទេ ។ ផ្នែកខាងលើដំបូលត្រូវបានកែច្នៃជាបានីយដ្ឋានប្រកបដោយបរិយាកាសស្រស់ស្រាយដូចដំបូលផ្ទះភ្នំពេញជំនាន់មុនដែលយើងធ្លាប់ឈរលម្ហែលេងកាលពីក្មេង គួបផ្សំនឹងការរៀបចំកន្លែងអង្គុយតាមបែបសិល្បៈសហសម័យថ្មីប្លែក។
Image Courtesy: Krishan Clark-Varma
ហាងនេះជាទីតាំងដែលមានគោលដៅជំរុញចលនានៃការបរិភោគម្ហូបបួសដើម្បីសុខភាពព្រមទាំងមានកម្រងព័ត៌មានងាយស្រួលយល់អំពីអត្ថប្រយោជន៍ផ្នែកសុខភាពនិងផ្នែកបរិស្ថាន ដែលបានមកពីរបបអាហារបន្លែផ្លែឈើបៃតង។ មុខម្ហូបប្រចាំហាងដែលត្រូវណែនាំមាន “ហហ្មុកបួស” ដែលមានរសជាតិមិនចាញ់ហហ្មុកត្រី ឬ ហហ្មុកសាច់មាន់ទេ និង “ប៊័រហ្គឺរផ្សិត” ដែលមានរសជាតិដូចសាច់គោ។ មិនត្រឹមតែប៉ុណ្ណោះ ក៏មានម្ហូបតាមរដូវកាលអាស្រ័យលើព្រឹត្តិការណ៍កម្មវិធីផងដែរ ដូចជា នំអន្សមបួស ជាដើម។ ចំពោះតម្លៃម្ហូបវិញគឺសមរម្យ។ ជាក់ស្តែង សម្លខ្មែរមួយចានមានតម្លៃត្រឹមតែ ៣.៥០ ដុល្លារ។
Image Courtesy: Krishan Clark-Varma
ក្រៅពីផ្តល់ជូននូវម្ហូបអាហារច្នៃពីរុក្ខជាតិបៃតងឈ្ងុយឆ្ងាញ់ងាយទទួលទាន ទីនេះមានសេវាកម្មបម្រើអតិថិជនជិតស្និទ្ធប្រៀបដូចជាគ្រួសារតែមួយក្រោមពាក្យស្លោករបស់ហាងថា “ We Cook Happiness” (យើងធ្វើម្ហូបបង្កើតសុភមង្គល) រួមជាមួយបរិយាកាសពោរពេញដោយភាពច្នៃប្រតិដ្ឋដែលមនុស្សគ្រប់គ្នាចូលចិត្តហើយអាចមកបង្កើនទំនាក់ទំនងជាមួយក្រុមគ្រួសារ។
Image Courtesy: Krishan Clark-Varma
៣. ហាង Vibe Café (Backyard Café)
ហាងនេះជាហាងកាហ្វេនិងម្ហូបបួសបែបអឺរ៉ុបដ៏ពេញនិយមពីសំណាក់ជនបរទេសតូចច្រឡឹងមួយកន្លែងប្រចាំក្រុងភ្នំពេញ។ ហាងកាហ្វេនេះមានអាសយដ្ឋានផ្ទះលេខ ២៦ ផ្លូវ៤៤៦ ប្លុកផ្សារទួលទំពូង។ វាជាហាងកាហ្វេដែលផ្តោតលើអាហារបួស ១០០% ដំបូងគេបង្អស់នៅរាជធានីភ្នំពេញ។ វាជាហាងបងប្អូនស្រីបង្កើត (ម្ចាស់តែមួយ ទីតាំងហាងតែមួយ តែមឺនុយអាហារផ្សេងគ្នា) ជាមួយនឹងហាង Backyard Café។
ចំពោះអាហារ នៅទីនោះចែកចេញជាប្រភេទអាហារពេលព្រឹក និង អាហារថ្ងៃត្រង់និងពេលល្ងាច។ ដោយឡែក មុខម្ហូបប្រចាំហាងដែលសូវរីនណែនាំសម្រាប់ទិវាអ្នកម្តាយឆាប់ៗនេះ គឺ Buddha Bowl (Gluten-free, Vegan) ដែលជាប្រភេទសាលាដពិសេសមួយមុខប្រចាំហាងមានដាក់តៅហ៊ូ Tempeh, បាយអង្ករក្រហម (Brown Rice) និង គ្រីមជូរផ្សំពីគ្រាប់ស្វាយចន្ទីដ៏មានឱជារស។ មួយមុខទៀត គឺ មីញាំបែបអាស៊ី (Asian Zucchini Noodle) ជាមួយប៊័រសណ្តែកដី ដែលសរសៃមីត្រូវបានគេមានជំនឿថាតំណាងឲ្យអាយុវែង។ ឯភេសជ្ជៈ DR Detox Water ជាភេសជ្ជៈដែលអ្នកម្តាយគប្បីសាកល្បង ព្រោះ វាផ្សំពីទឹកដូងលាយនឹងរុក្ខជាតិ Spirulina ដែលមានអត្ថប្រយោជន៍ល្អសម្រាប់សុខភាព។ ហាងនេះបើកពីម៉ោង៧ព្រឹកដល់ម៉ោង៨យប់៕
Article by SRIN SOKMEAN
