Sovrin
Sovrin
«សួនបឹងក្រចាប់» រមណីយដ្ឋានកែច្នៃស្អាតជាប់មាត់បឹងត្រើយខាងកើតស្ពានគីហ្សូណា
TRAVEL & LIVING one year ago
ស្ថិតក្នុងចម្ងាយតែជាង១០០គីឡូម៉ែត្រពីរាជធានីភ្នំពេញ ឬ ប្រមាណ១០គីឡូម៉ែត្រពីក្រុងកំពង់ចាម រមណីយដ្ឋានសួនកែច្នៃមួយត្រូវបានបង្កើតឡើង ដែលទំនងជាមិនទាន់មានអ្នកភ្នំពេញច្រើនប៉ុន្មានទេដែលស្គាល់។ រមណីយដ្ឋាននេះមានឈ្មោះថា «សួនបឹងក្រចាប់» ស្ថិតនៅក្នុងភូមិបឹងត្រស់ ឃុំជីរោទ៍ទី២ ស្រុកត្បូងឃ្មុំ ខេត្តត្បូងឃ្មុំ។ សួនកម្សាន្តដ៏តូចច្រឡឹងនេះពិតជាមានលក្ខណៈអំណោយផលល្អពីធម្មជាតិសម្រាប់វិស័យទេសចរណ៍ក្នុងស្រុក ពីព្រោះវាមានទីតាំងស្ថិតនៅបង្កើយជាប់មាត់បឹងធម្មជាតិដ៏ធំល្វឹងល្វើយ និងមានបរិយាកាសស្ងប់ស្ងាត់បែបជនបទសុទ្ធសាធ។
ដើម្បីធ្វើដំណើរទៅដល់រមណីយដ្ឋានសួនបឹងក្រចាប់នេះ អ្នកដំណើរពីភ្នំពេញទាំងឡាយត្រូវធ្វើដំណើរតាមផ្លូវជាតិលេខ៦ និងលេខ៧ ដល់ទីរួមខេត្តកំពង់ចាម ទើបបន្តដំណើរឆ្លងស្ពានគីហ្សូណាទៅត្រើយខាងកើតតាមផ្លូវឆ្ពោះទៅកាន់សួង-ត្បូងឃ្មុំ ក្នុងចម្ងាយប្រមាណ៩គីឡូម៉ែត្រពីស្ពាននោះ។ នៅពេលជិះត្រង់ទៅដល់ម្តុំទួលវិហារ (ហួសស្ពានមាត់ឃ្មង់) ត្រូវបត់ឆ្វេងដៃតាមស្ថានីយ៍ប្រេងឥន្ធនៈក្បែរសាលាបឋមសិក្សាទួលវិហារ។ ប្រសិនបើលោកអ្នកមិនច្បាស់ ខ្លាចជិះហួសផ្លូវចូល ក៏អាចសួរអ្នកស្រុកដែលរស់នៅតាមដងផ្លូវ រកកន្លែង «គុយទាវឆ្ងាញ់ទួលវិហារ» ដែលនរណាៗក៏ស្គាល់ ពោលគឺ ជាប់នឹងស្ថានីយ៍ប្រេងឥន្ធនៈដែលត្រូវបត់ចូលទៅនោះឯង។
សួននេះមានទំហំផ្ទៃដីមិនសូវធំប៉ុន្មានទេ តែមានការរៀបចំតុបតែងជាសួនផ្កាស្រស់ស្អាតផ្សារភ្ជាប់នឹងបរិយាកាសធម្មជាតិជុំវិញស័ក្តិសមសម្រាប់អ្នកទេសចរមកពីទីក្រុងដែលចង់ស្វែងរកកន្លែងស្ងប់ស្ងាត់ទទួលទានអាហារជួបជុំក្រុមគ្រួសារឲ្យស្រស់ស្រាយស្រឡះមុខស្រឡះមាត់ម្តង។ ជាពិសេស នៅទីនោះ មានក្យូសធំទូលាយរចនាម៉ូដទាន់សម័យនិងមានកន្លែងអង្គុយប្រកបដោយផាសុកភាពជាងក្យូសធម្មជាតិដែលលោកអ្នកធ្លាប់ចូលនៅកន្លែងដទៃ។ ដោយឡែក មុខម្ហូបដែលណែនាំដោយម្ចាស់សួនផ្ទាល់មានដូចជា ម្ជូរទំពាំងជូរ ត្រីបឹងក្រចាប់ កូនត្រីបឹងបំពង មាន់ស្រែបំពងចេកក្រមួន មាន់ឆឹង ម្ជូរក្តាតកូនត្រី ខ្យងស្រែអប់ លៀសដុតឆ្នាំងដី និង បុកកំពឹស ។ល។
Article by SRIN SOKMEAN
