Sovrin
Sovrin
«Paint Lab Soju Bar» ហាងកាហ្វេដែលផ្តោតទាំងរសជាតិ និងភាពច្នៃប្រតិដ្ឋជូនដល់អតិថិជន
TRAVEL & LIVING one year ago
«Paint Lab Soju Bar» ជាឈ្មោះរបស់ហាងកាហ្វេដ៏ទាក់ទាញមួយកន្លែងដែលទើបបង្កើតថ្មី និងមានលក្ខណៈច្នៃប្រតិដ្ឋប្លែកគួរឱ្យចាប់អារម្មណ៍ មានទាំងសកម្មភាពកម្សាន្តជាមួយការគូរគំនូរ ដែលជាផ្នែកមួយអាចរំសាយភាពតប់ប្រមល់រាល់អតិថិជនដែលបានអញ្ជើញមកកាន់ទីនេះ។
ខុសពីហាងកាហ្វេដទៃទៀត «Paint Lab Sou Bar» មិនមែនត្រឹមតែជាហាងកាហ្វេ តែទីនេះក៏ជាភោជនីដ្ឋានបែបកូរ៉េ ជាបារ និងជាទីកន្លែងដែលមានសកម្មភាពកម្សាន្តជាច្រើន ជាពិសេសសម្រាប់អ្នកមានចំណូលចិត្តគូររូប មកកាន់ទីនេះពិតជាមិនខកបំណងឡើយ។
ចំពោះការគូររូប «Paint Lab Soju Bar» មានជាច្រើនជម្រើសសម្រាប់អតិថិជនជ្រើសរើស តួយ៉ាងការគូររូបជាផ្ទាំងគំនូរ ការផាត់ពណ៌លើវត្ថុអនុស្សាវរីយ ការគូរគំនូរ និងបិទស្ទីកគ័រលើអាវ និងកាបូបជាដើម។ មិនតែប៉ុណ្ណោះ ភេសជ្ជនៅទីនេះត្រូវបានរៀបចំយ៉ាងសម្រិតសម្រាំងទាំងរសជាតិ និងសោភណភាព។ ជាក់ស្តែងដូចជា អែនផេនន័រឡាតេ ជាភេសជ្ជមួយប្រភេទដែលមានការពេញនិយមយ៉ាងខ្លាំងនៅប្រទេសកូរ៉េ ហើយក៏ជាភេសជ្ជដែលលក់ដាច់ប្រចាំហាងតែម្តង។ មិនតែប៉ុណ្ណោះ ទីនេះក៏មានជាប្រភេទស្រាសូជូជាច្រើនរសជាតិ ទឹកដោះគោរសជាតិផ្លែឈើ រួមទាំងភេសជ្ជជាច្រើនប្រភេទទៀតដែលអតិថិជនអាចធ្វើការកុម្មង់ដើម្បីសាកល្បងរសជាតិដ៏ឈ្ងុយឆ្ងាញ់។
បើនិយាយពីមុខម្ហូបវិញ សុទ្ធសឹងតែជាមុខម្ហូបបែបកូរ៉េ និងមានការពេញនិយមទទួលទានពីសំណាក់អតិថិជន។ ហើយអ្វីដែលយើងមិនអាចរំលងបាននោះគឺ ឈុតសាច់អាំងបែបកូរ៉េ (Hot Stone Grill) ជាពិសេសគឺ ឈុតស៊ុបមី Army Stew (Korean Hotpot) តែម្តង។
អង្គុយផាត់រូបបណ្តើរ ញ៉ាំស៊ុបមីហឹរបណ្តើរ ក្រេបភេសជ្ជត្រជាក់ៗ អមដោយតន្រ្តីប្រគំយ៉ាងពិរោះ ពិតជាធ្វើឱ្យការជួបជុំពោរពេញដោយអត្ថន័យ និងបន្សល់ទុកនូវការចងចាំដ៏ល្អ។ ដូច្នេះ ទីនេះពិតជាស័ក្តិសមសម្រាប់ការណាត់ជួបជាមួយមនុស្សជាទីស្រលាញ់ ការជួបជុំមិត្តភក្តិ ក៏ដូចជាក្រុមគ្រួសារ ដើម្បីបង្កើតអនុស្សាវរីយល្អៗដែលមិនអាចបំភ្លេចបាន។
គួរជម្រាបដែរថា «Paint Lab Soju Bar» បើកដំណើរការជារៀងរាល់ថ្ងៃ ចាប់ពីម៉ោង ៨ព្រឹក រហូតដល់ម៉ោង ១០យប់៕
Article by SOUNG SOKSAN
