ប្រធានក្រុម The Mexart បង្ហាញនូវផ្នត់គំនិតដ៏សំខាន់នៃខូឡិកហ្សិន «Hard as Rock»
FASHION & BEAUTY 5 years agoនិស្សិតមួយចំនួនដែលកំពុងសិក្សាផ្នែករចនាម៉ូដសម្លៀកបំពាក់នៃសាកលវិទ្យាល័យ លីម កុកវីង ប្រាកដជាបានដឹងនូវព័ត៌មានខ្លះៗពីព្រឹត្តិការណ៍ដ៏កក្រើកនៃការដើរបង្ហាញម៉ូដរបស់ក្រុម The Mexart ដែលបានប្រារព្ធឡើង កាលពី ប៉ុន្មានខែកន្លងទៅនេះជាមិនខាន។ តួយ៉ាង កំឡុងពេលកម្មវិធីបានប្រារព្ធគេសង្កេតឃើញថាឈុតសម្លៀកបំពាក់នីមួយៗមានភាពឆើតឆាយ ស៊ីវិល័យ និងមិនចាញ់ម៉ូដសម្លៀកបំពាក់បរទេសប៉ុន្មានឡើយ។ យ៉ាងណាមិញ ក្រោយពីបានបញ្ចប់បេសកកម្មដ៏ពិសេសនេះរួច ប្រធានក្រុមរបស់ The Mexart បានចាប់ផ្តើមរចនាម៉ូដខូឡិកហ្សិនដទៃទៀតដ៏ពិសេសដោយខ្លួនឯង ហើយថែមទាំងបង្កប់នូវអត្ថន័យដ៏មានខ្លឹមសារសម្រាប់មនុស្សគ្រប់រូបក្នុងបរិបទសង្គមទៀតផង។
កញ្ញា វង់ដារ៉ា ម៉ារ៉ា
កញ្ញា វង់ដារ៉ា ម៉ារ៉ា ជានិស្សិតឆ្នាំទី៣ ឆមាសទី៤ សិក្សាលើមុខជំនាញហ្វេហ្សិនឌីហ្សាញនៃសាកលវិទ្យាល័យលីម កុក វីង មានសោមនស្សរីករាយយ៉ាងខ្លាំងបន្ទាប់ពីបានរចនាសម្លៀកបំពាក់សម្រាប់ឆ្នាំ២០២០នារដូវត្រជាក់ខាងមុខនេះ។ «Hard as Rock» ជាឈ្មោះខូឡិកហ្សិនដែលមានចំនួន ១០ឈុត បានបង្ហាញខ្លួនជាលើកដំបូងក្នុងកម្មវិធីការប្រឡងប្រកួតប្រជែងនៃការបង្ហាញម៉ូដសម្លៀកបំពាក់ជំនាន់ទី៣រៀបចំដោយមជ្ឈមណ្ឌលបណ្តុះបណ្តាលច្នៃម៉ូដសម្លៀកបំពាក់ ឬ The Modern Ethnic Design Centre (MEDC)។ អត្ថន័យនៃខូឡិកហ្សិននេះ គឺជាការលើកទឹកចិត្តដល់មនុស្សគ្រប់រូបឲ្យមានភាពក្លាហាន រឹងមាំ ប្រៀបដូចជាថ្មដែលមានទំហំធំពិបាកនឹងបំបែកឲ្យចេញជារូបរាងផ្សេងៗ។ កញ្ញា ម៉ារ៉ា បានលើកឡើងដូច្នេះថា «មុននឹងខ្ញុំចាប់ផ្តើមធ្វើខូឡិកហ្សិននេះ ក៏ព្រោះតែខ្ញុំឃើញថាក្នុងជីវភាពរស់នៅប្រចាំថ្ងៃរបស់មនុស្សម្នាក់ៗសុទ្ធសឹងតែមានការលំបាក មនុស្សមួយចំនួនគាត់ពុំសូវមានការអត់ធ្មត់ប៉ុន្មាននោះទេ ចឹងខ្ញុំក៏ផ្តើមមានគំនិតច្នៃខូឡិកហ្សិនដែលទាក់ទងនឹងចក្ខុវិស័យរបស់ខ្ញុំទៅលើទង្វើទាំងនោះតែម្តង»។ ជាមួយគ្នានេះ ម៉ារ៉ា ក៏បានឲ្យដឹងផងដែរថា ខូឡិកហ្សិន «Hard as Rock» នេះរចនាឡើងក្នុងការប្រកាន់ភ្ជាប់នូវគោលជំហរដ៏សំខាន់នៃសម្លៀកបំពាក់ទាំងដប់ឈុតនេះ គឺបានប្រើប្រាស់សម្ភារពុំមានសារធាតុគីមី ប៉ះពាល់ដល់បរិស្ថាននោះឡើយ។ តួយ៉ាង ការយកឡេវអាវជ័រមកដេរលើសម្លៀកបំពាក់ គឺត្រូវជំនួសដោយការយកក្រណាត់មកធ្វើជាឡេវអាវដើម្បីដេរជាដើម។ កញ្ញាក៏បានបញ្ជាក់ថា «សូម្បីតែសាច់ក្រណាត់ដែលខ្ញុំយកមកប្រើប្រាស់នោះ ក៏ជាផ្នែកមួយជួយដល់ជនក្រីក្រមួយចំនួន ស្នាក់នៅជនបទដែរ ដោយខ្ញុំបានឲ្យគាត់ត្បាញក្រណាត់ឲ្យខ្ញុំ បន្ទាប់មកខ្ញុំផ្តល់ជាប្រាក់កម្រៃសម្រាប់ពួកគាត់ ហេតុនេះគាត់អាចមានពេលមើលថែកូនៗគាត់ហើយអាចរកចំណូលបានបន្ថែមទៀត។» មិនត្រឹមតែប៉ុណ្ណោះ ចំពោះការប្រើប្រាស់ល័ក្ត ដើម្បីជ្រលក់ពណ៌លើសាច់ក្រណាត់នីមួយៗ សុទ្ធតែជាល័ក្តមិនមានជាតិគីមីឡើយដោយមានការជ្រលក់តាមវិធីសាស្ត្ររក្សាទុកតាំងពីបុរាណកាល។
ទន្ទឹមនឹងនេះ កញ្ញា វង់ដារ៉ា ម៉ារ៉ា បានផ្តល់មតិយោបល់ដូច្នេះថា ថ្វីដ្បិតតែប្រទេសកម្ពុជាពុំទាន់មានទីផ្សារទូលំទូលាយ ដើម្បីផ្គត់ផ្គង់គ្រប់គ្រាន់នូវសម្ភារដែលអ្នកច្នៃម៉ូដហ្វេហ្សិនត្រូវការចាំបាច់ក៏ពិតមែន ប៉ុន្តែកញ្ញាសង្ឃឹមថា អ្នកច្នៃម៉ូដហ្វេហ្សិនផ្សេងទៀតអាចនឹងបង្កើតគំនិតច្នៃប្រតិដ្ឋថ្មីៗ ជំនួសដោយសម្ភារដែលគេត្រូវការ ឬប្រឹងប្រែងរិះរកគំនិតដោះស្រាយបញ្ហាទាំងនោះឲ្យអស់ពីសមត្ថភាពជាមុនសិន សឹមរកវិធីសាស្ត្រផ្សេងទៀត ដើម្បីបំពេញចន្លោះកង្វះខាត៕
Article by PAN SIVLY