នៅសល់តែប៉ុន្មានថ្ងៃទៀតប៉ុណ្ណោះ អ្នកដែលជាប់សែស្រឡាយចិនប្រាកដជានឹងរៀបចំផ្ទះសម្បែង ម្ហូបអាហារ និងផ្លែឈើមួយចំនួនដើម្បីសែនដូនតាក៏ដូចជាសាទរអបអរនូវពិធីបុណ្យចូលឆ្នាំថ្មីប្រពៃណីចិន។ ក្នុងឱកាសនេះដែរអ្នកដែលជាប់សែស្រឡាយចិនគេតែងមានជំនឿថា មានរឿងជាច្រើនដែលគេធ្វើដើម្បីទទួលលាភសំណាងសម្រាប់ឆ្នាំថ្មី ហើយក្នុងនោះសំណាងអាក្រក់ក៏អាចនឹងកើតមានប្រសិនបើគេធ្វើខុសទៅលើត្រណមមួយចំនួន។ ចុះតើត្រណមអ្វីខ្លះដែលអ្នកជាប់សែស្រឡាយចិនមិនគួរធ្វើជាដាច់ខាតនៅថ្ងៃចូលឆ្នាំ?
1. ចៀសវៀងការលេបថ្នាំ
បើតាមជំនឿរបស់ប្រជាជនចិនជាយូរលង់ណាស់មកហើយនោះ គេជឿថាការលេបថ្នាំពេទ្យក្នុងអំឡុងពេលចូលឆ្នាំចិនអាចនឹងធ្វើឲ្យខ្លួនមានជំងឺឈឺពេញមួយឆ្នាំតែម្តង ទោះបីជាព្យាយាមព្យាបាលគ្រប់វិធីសាស្ត្រក៏ដោយ។
2. ហាមបោសសម្អាតផ្ទះ
ប្រជាជនចិនជឿថា ប្រសិនបើធ្វើការបោសសម្អាតផ្ទះសម្បែងក្នុងថ្ងៃចូលឆ្នាំចិន (ថ្ងៃទី១) វានឹងធ្វើឲ្យ
បាត់បង់លាភសំណាងយ៉ាងធំជាក់ជាមិនខាន ព្រោះក្នុងថ្ងៃចូលឆ្នាំចិននេះគឺជាថ្ងៃដែលនាំលាភសំណាងមកដល់គ្រប់ក្រុមគ្រួសារ។
3. ចៀសវៀងការបរិភោគបបរ និងសាច់សម្រាប់អាហារពេលព្រឹក
ការបរិភោគបបរ និងសាច់ជាអាហារពេលព្រឹកនៅក្នុងថ្ងៃចូលឆ្នាំចិននោះមិនមែនល្អនោះទេ ដោយគេ
សំអាងថា ការបរិភោគបបរជាអាហារពេលព្រឹកនោះមានតែអ្នកក្រខ្សត់ទេដែលបរិភោគ។ ចំណែកការបរិភោគសាច់ជាអាហារពេលព្រឹក គឺជាសកម្មភាពមួយដែលធ្វើខុសពីទំនៀមទម្លាប់ប្រពៃណីចិន។ ដោយគេគិតថាការសម្លាប់សត្វវាផ្ទុយទៅនឹងក្រមសីលធម៌របស់ព្រះ ព្រោះព្រះរបស់គេចង់ឃើញការជួបជុំ និងជូនពរឆ្នាំថ្មីសប្បាយរីករាយរវាងគ្នាទៅវិញទៅមក។
4. ហាមកក់សក់ឬបោកសម្លៀកបំពាក់
ការកក់សក់ឬបោកសម្លៀកបំពាក់ក្នុងថ្ងៃចូលឆ្នាំចិនថ្ងៃទី១ និងថ្ងៃទី២ នោះ ប្រជាជន
ចិនជឿថាទាំងពីរថ្ងៃនេះ គឺជាថ្ងៃដែលគេប្រារព្ធពិធីកំណើតរបស់ស្តេច Shuishen (水神) ដែលជាម្ចាស់ទឹកនាំមកនូវលាភសំណាងដល់ក្រុមគ្រួសារ។ ហេតុដូចនេះ ប្រសិនបើប្រជាជនចិនណាម្នាក់ធ្វើខុសពីវិន័យនោះ នឹងត្រូវជួបគ្រោះជាក់ជាមិនខាន។
5. មិនត្រូវប្រើម្ជុល និងកន្ត្រៃ
ការប្រើប្រាស់ម្ជុល និងកន្ត្រៃនៅក្នុងថ្ងៃចូលឆ្នាំចិននោះ ប្រជាជនចិនជឿថានឹងមានឧបទ្ទវហេតុជាច្រើនអាចកើតមានឡើង រហូតទៅដល់មានការដកហូតទ្រព្យសម្បត្តិមួយចំនួនធំនៅឆ្នាំក្រោយ ដែលជីដូនជីតាបានរៀបចំទុកទៀតផង។
6. មិនត្រូវស្លៀកពាក់ខ្មៅឡើយ
តាមជំនឿរបស់ប្រជាជនគេជឿជាក់ថា ពណ៌ខ្មៅគឺជាពណ៌អពមង្គលនិងជាពណ៌ដែលសម្រាប់ចូលរូមក្នុងពិធីបុណ្យសព។ ដូច្នេះការស្លៀកខោឬសំពត់ ជាមួយនឹងពាក់អាវឬរ៉ូបពណ៌ខ្មៅត្រូវបានគេគិតថាជាការហ៊ុំព័ទ្ធខ្លួនដោយភាពខ្មៅងងឹតនិងអពម្គលជាទីបំផុត។
7. ត្រូវប្រយ័ត្ន មិនឲ្យបែកចានឬកែវ
ក្នុងអំឡុងថ្ងៃចូលឆ្នាំចិនគឺជាថ្ងៃដ៏វិសេសវិសាលជាទីបំផុតក្នុងការជួបជុំសប្បាយរីករាយជាមួយនឹងក្រុមគ្រួសារ និងជាពេលវេលាដែលត្រូវផ្លាស់ប្តូរនូវសម្ភារៈប្រើប្រាស់មួយចំនួនផងដែរ។ ដូច្នេះនៅពេលដែលមានការធ្លាក់បែកចានឬកែវ គេចាត់ទុកថាជាប្រផ្នូរមិនល្អនិងមានការបែកបាក់គ្នាជាដើម៕
Article by PAN SIVLY