Sovrin
Sovrin
តុបតែងខ្លួនក្នុងឈុតប្រពៃណីបែបសហសម័យក្នុងរដូវកាលបុណ្យភ្ជុំបិណ្ឌ
FASHION & BEAUTY 5 years ago
ការរៀបចំខ្លួនទៅតាមពិធីនីមួយៗបានត្រឹមត្រូវ និងសមសួន គឺជាកញ្ចក់មួយឆ្លុះបញ្ចាំងពីភាពថ្លៃថ្នូរ និងភាពប៉ិនប្រសប់របស់បុគ្គលម្នាក់ៗ។ តួយ៉ាង ការតុបតែងខ្លួន គឺជាភាពចាំបាច់បំផុតសម្រាប់មិត្តនារីយើងដែលផ្តោតសំខាន់ទៅលើរបៀបរបបនៃការជ្រើសរើសម៉ូដសម្លៀកបំពាក់ ទាំងការតុបតែងមុខ លម្អដោយសាច់ក្រណាត់ទៅតាមកាលៈទេសៈ។ យ៉ាងណាមិញ ខ្មែរ ជាជាតិសាសន៍ដែលប្រកាន់ខ្ជាប់នូវវប្បធម៌ ប្រពៃណី ទំនៀមទម្លាប់ ទាំងការស្លៀកពាក់ ហើយមកដល់សម័យកាលនេះ យើងឃើញថានារីខ្មែរមួយភាគធំនៅតែឱបក្រសោបនូវសម្លៀកបំពាក់បុរាណបានយ៉ាងល្អ ជាពិសេសក្នុងកម្មវិធីបុណ្យទានផ្សេងៗ។ ជាមួយគ្នានេះដែរ ស្របពេលរដូវបុណ្យភ្ជុំបិណ្ឌបានរំកិលខ្លួនចូលមកដល់ ដែលនេះជាចំណុចរសើបមួយដែលសុភាពនារីរបស់យើងរមែងម្នីម្នាស្វែងរកនូវម៉ូដសម្លៀកបំពាក់បុរាណប្រពៃណីបែបណាមួយដើម្បីទទួលបាននូវភាពស្រស់ស្អាត និងការរចនាដ៏ឥតខ្ចោះនៅលើដងខ្លួនស័ក្តិសមជានារីខ្មែរពិតៗ។ ជាក់ស្តែង ៣ ឈុតខាងក្រោមនេះ ជាគំរូម៉ូដសម្លៀកបំពាក់ដែលច្នៃចេញពីការរចនាក្រណាត់ហូលបែបលក្ខណៈសហសម័យ ដែលមើលទៅមិនរំលងវប្បធម៌ហើយថែមទាំងដើរទាន់យុគសម័យបច្ចុប្បន្នភាពរួមបញ្ចូលនឹងការរំលេចលាយជាមួយបុរាណកាលបន្តិច ទំនើបកម្មបន្តិចផងដែរ។
1. សម្រាប់ឈុតទីមួយនេះ គឺជាឈុតដែលបង្ហាញពីទំនោរនិយមទៅលើទំនៀមទម្លាប់ប្រពៃណី ដែលនេះស្ត្រីភាគច្រើនចូលចិត្តប្រើជាក្រណាត់ហូលផាមួង អាវប៉ាក់ជាដើម។ ផាមួង ពណ៌ខ្លាញ់ក្តាមចាស់ អាចប្រើជាមួយនឹងអាវពណ៌កាកអំពៅ ឬពណ៌ស ជាប្រភេទសាច់ក្រណាត់ហាប់ស្ងួត រឹង និងមានសភាពរលោងតិចៗនៅលើផ្ទៃអាវទាំងមូល។ ឈុតនេះ មានលក្ខណៈបែបសុភាពនារី ដែលអាចចុះចំណោមក្នុងពិធីបុណ្យ ប្រពៃណីបានយ៉ាងប្រពៃ។ តួយ៉ាងដូចជា នៅក្នុងពិធីបុណ្យកាន់បិណ្ឌនេះ គឺបង្ហាញពីភាពថ្លៃថ្នូរ បែបនារីខ្មែរ ដោយគ្រាន់តែមិត្តនារីៗ អាចបន្ថែមម៉ូដសក់មូររួញចុងៗបន្តិច ហើយទម្លាក់មកចំហៀងដូចក្នុងរូបក៏បាន។ ចំណែកឯការផាត់មុខវិញ គឺជ្រើសរើសជាមួយនឹងពណ៌ស្តើងៗ មិនដិតខ្លាំងពេក ស្រាលៗបែបធម្មជាតិ។ 
2. ផ្សេងពីឈុតប្រពៃណីលាយសម័យខាងលើនេះទៀត សុភាពនារីរបស់យើងអាចប្តូរមកស្លៀកជាសំពត់ប៉ាក់ក្រោមជង្គង់បន្តិច ដែលស័ក្តិសមជាមួយនឹងអាវប៉ាក់ពណ៌ស សម្រុងវែង វាលក្លៀក។ ក្នុងនោះ យើងអាចបន្ថែមខ្សែក្រវាត់តូច ពាត់ចង្កេះ ដើម្បីបង្កើនសោភ័ណភាព និងភាពស្រស់ស្អាតមួយកម្រិតទៀត។ សម្រាប់ឈុតនេះ យើងអាចតុបតែងម៉ូដសក់ ដោយចងទម្លាក់មកក្រោម ឬចងត្រឹមពាក់កណ្តាលក៏បាន។ ចំពោះការជ្រើសរើស ម៉ូដស្បែកជើងវិញ គឺអាស្រ័យទៅលើកម្ពស់ជាក់ស្តែង។ ដូចជា អ្នកខ្លះ មិនសូវខ្ពស់ គឺអាចប្រើជាមួយស្បែកជើងកែវអេស្កាប៉ាំងរាងកែងចោតបន្តិច ប៉ុន្តែប្រសិនបើមិត្តនារីមានកម្ពស់ខ្ពស់ស្រាប់ មិនគួរប្រើកែងចោតពេកទេ គឺត្រូវប្រើជាប្រភេទស្បែកជើងក្រវាត់កែងទាប ទើបស៊ីនឹងឈុតសម្លៀកបំពាក់មួយនេះ។
3. មកចាប់អារម្មណ៍ទៅលើឈុតចុងក្រោយនេះវិញ គឺមានលក្ខណៈខុសប្លែកឆ្ងាយពីឈុតដែលបានបង្ហាញរួចមកហើយ ព្រោះវាជាបែបបទនៃការងាកទៅរកសម័យបច្ចុប្បន្នច្រើនជាងពីមុន។ បើតាមយើងគិតមើល ពីរូបភាពនេះតែមួយភ្លែត យើងអាចភ្ញោចអារម្មណ៍បន្តិច គិតថា ការជ្រើសរើសខោសម្រាប់ស្លៀកទៅវត្តហាក់ដូចជាមិនទំនង ឬមិនសមនឹងការក្រាបសំពះនៅមុខព្រះសង្ឃ។ ផ្ទុយមកវិញ រូបភាពបែបនេះ មិនបានផ្តល់ផលអ្វីជាឥទ្ធិពលដល់វប្បធម៌របស់យើងឡើយ ព្រោះឈុតខោដែលយើងស្លៀកនេះ មានលក្ខណៈជាសាច់ក្រណាត់ទន់ វែង មិនខើចលើ មិនខើចក្រោម និងមានពណ៌ស្រាលៗ បែបពណ៌ផ្កាឈូក ឬទឹកដោះគោ។ ចំពោះការជ្រើសរើសម៉ូដអាវវិញ គឺអាចប្រើជាលក្ខណៈអាវមានប៉ាក់តិចៗ ដៃខ្លី កជិត និងបន្ថែមជាមួយការលាយស្តាយ៍កាបូប ម៉ូដសុភាពៗ ពណ៌ធម្មជាតិ ស៊ីនឹងឈុតខោទៀតផង។ យើងក៏សូមបញ្ជាក់ផងដែរ ការរៀបចំខ្លួនតាមបែបសម័យ មិនជ្រុលនិយមនេះ គឺផ្តល់ភាពងាយស្រួលដល់សុភាពនារី ដែលមានគម្រោងទៅវត្តឆ្ងាយៗ និងថែមទាំងអាចបត់បែនទៅតាមកាលៈទេសៈបានផងដែរ។ ណាមួយ ការធ្វើដំណើររយៈពេលយូរ អាចឲ្យយើងបែកញើស បើយើងជ្រើសរើសយកប្រភេទជាហូល ផាមួង អាវប៉ាក់មកស្លៀក នោះវាអាចឲ្យយើងមានអារម្មណ៍ថា ស្អុះស្អាប់ ពិបាកនៅក្នុងខ្លួន។ 
ក្រោយពីបានពណ៌នាដ៏ក្បោះក្បាយពីបណ្តុំឈុតប្រពៃណីបែបសហសម័យមួយនេះហើយ យើងឃើញថាម៉ូដទាំងពីរត្រូវបានរចនា និងច្នៃចេញឡើងពីការវិវត្តន៍នៃឈុតសម្លៀកបំពាក់ទៅតាមសម័យកាលដែលទោះជាយ៉ាងណា ក្រណាត់ហូល និងប៉ាក់នៅតែជាម៉ូដចាំបាច់ និងសំខាន់ជាងគេក្នុងការរៀបចំខ្លួនឲ្យមានភាពស្រស់ស្អាត និងថ្លៃថ្នូរបែបប្រពៃណី។ ដូចនេះការបង្ហាញហ្វេហ្សិនឈុតរដូវកាលភ្ជុំបិណ្ឌនេះ គឺដូចជាការចែករំលែកនូវគំនិតថ្មីៗនៃការច្នៃ និងតុបតែងខ្លួនបែបណាឲ្យត្រឹមត្រូវទៅតាមវប្បធម៌ ជាតិសាសន៍ និងដើរឲ្យទាន់សម័យបច្ចេកវិទ្យាដ៏រុងរឿងនៃខ្មែរ៕
Article by HEM SOKKHIM
