Sovrin
Sovrin
តើអ្នកឧស្សាហ៍សម្អាតជក់ផាត់មុខឬទេ? ឬក៏មិនធ្លាប់សម្អាតទាល់តែសោះ?។ ការពិតណាស់ មិនថាជក់ផាត់មុខប្រភេទណាមួយ នៅពេលប្រើលាបលើផ្ទៃមុខវានឹងជាប់មកវិញជាមួយខ្លាញ់និងកោសិកាស្បែកងាប់លាយឡំជាមួយម្សៅផាត់ដែលធ្វើឲ្យជក់ពោរពេញទៅដោយបាក់តេរីកកើត។ ជក់ដែលមិនបានអនាម័យត្រឹមត្រូវអាចបង្កបញ្ហាលើស្បែកដូចជាធ្វើឲ្យរោលមុខឡើងមុននិងរមាស់ជាដើម។ អត្ថបទនេះសូវរីននឹងរៀបរាប់អំពីផលអាក្រក់នៃការប្រើជក់កខ្វក់ វិធីសម្អាត និងការអនាម័យដ៏ត្រឹមត្រូវ។
ផលអាក្រក់នៃការប្រើជក់កខ្វក់ ប្រសិនបើអ្នកផាត់មុខហើយតែងតែមានបញ្ហាលើស្បែក ជួនកាលកុំបន្តុះទៅលើម្សៅផាត់គួរតែងាកមកមើលពីឫសគល់ដែលបង្កវិញ។ ;ជក់មិនបានសម្អាតហើយប្រើដដែលៗកម្អែលដែលប្រមូលផ្តុំបន្តិចម្តងៗនឹងបង្កបញ្ហាលើស្បែកដូចជាធ្វើឲ្យឡើងរោលកន្ទួលរមាស់និងឡើងមុន ជាពិសេសកើតរោគឆ្លងលើស្បែកផ្សេងៗដូចជាឡើងពងបែកលើស្បែក និងមាត់ជាដើម។ ហេតុដូច្នេះ វាជាហេតុផលចាំបាច់មួយដែលស្ត្រីចូលចិត្តការតុបតែងមុខគ្រប់រូបគួរសម្អាតជក់ជាប្រចាំក្រោយពេលប្រើរួច និងប្រសិនបើអាចផ្លាស់ប្តូរជក់ថ្មីនៅរៀងរាល់៣ខែម្តង។ ជៀសវាងការប្រើជក់តពីអ្នកដទៃឬឲ្យជក់ទៅអ្នកដទៃប្រើដែលនឹងបង្កមេរោគឆ្លងកាន់តែខ្លាំង។ មិនតែប៉ុណ្ណោះ ការប្រើជក់ផាត់មុខកខ្វក់អាចធ្វើឲ្យស្បែកមុខឆាប់ចាស់ជាងវ័យផងដែរ ពីព្រោះជក់កខ្វក់នេះនឹងកាត់បន្ថយខូឡេជិនលើស្បែក ធ្វើឲ្យស្បែកលែងយឺត កាត់បន្ថយអុកស៊ីតកម្មដែលប្រឆាំងនឹងរ៉ាឌីកាល់សេរី។
វិធីលាងសម្អាតជក់ បន្ទាប់ពីដឹងថាការប្រើជក់កខ្វក់អាចផ្តល់ផលអាក្រក់ចំពោះស្បែក ជឿជាក់ថាប្រិយមិត្តប្រាកដជាចង់ដឹងពីវិធីលាងសម្អាតមិនខាន។ អនុវត្តតាមវិធីងាយៗដោយដំបូងប្រមូលជក់ផាត់មុខទាំងប៉ុន្មានដាក់ត្រាំនៅក្នុងទឹកក្តៅ បន្ទាប់មកយកសាប៊ូម្សៅឬសាប៊ូកក់សក់ចាក់កូរទឹកក្នុងចានគោមមួយ ហើយចាប់ផ្តើមយកជក់ត្រាំទឹកក្តៅរួចមកលាងសម្អាតនឹងទឹកសាប៊ូដោយប្រើម្រាមដៃច្របាច់ត្រដុសថ្មមៗរហូតឡើងពពុះរយៈពេលប្រមាណពីរបីនាទី។ ធ្វើការលាងជម្រះទឹករហូតប្រាកដថារោមជក់គ្មានសេសសល់ពពុះ និងមើលទៅភ្លឺរលោងស្អាតល្អ។ ក្រោយមកពូតទឹកចេញពីរោមជក់រួចដាក់លើកន្សែងស្អាតហើយយកទៅសម្ងួតដោយដាក់ក្រោមម៉ាស៊ីនសម្ងួត ឬប្រើម៉ាស៊ីនផ្លុំ(ផ្លុំត្រជាក់កុំឲ្យបែករោមជក់) ឬដាក់បញ្ឈរហាលចោលកន្លែងមានខ្យល់ចេញចូលល្អជាការស្រេច។ ករណីសម្ងួតជក់មិនបានត្រឹមត្រូវអាចបង្កឲ្យជក់មានក្លិនមិនល្អផងដែរ។
ការអនាម័យត្រឹមត្រូវ បាក់តេរី និងផ្សិតរមែងកកើតឡើងនៅពេលមានសំណើមដែលជាហេតុស្ត្រីគ្រប់រូបចាំបាច់ធ្វើការសម្ងួតជក់ឲ្យបានស្ងួតល្អ។ ជាក់ស្តែងជក់សម្រាប់ផាត់ម្សៅទ្រនាប់(ប្រភេទទឹក) គឺជាជក់ងាយប្រមូលផ្តុំទៅដោយបាក់តេរីកកើតជាងជក់ផាត់ម្សៅហុយ ហេតុដូច្នេះវាតម្រូវសម្អាតយ៉ាងហោចណាស់ពីពីរទៅបីដងក្នុងមួយសប្តាហ៍ ចំណែកជក់ម្សៅហុយសម្អាតត្រឹមតែម្តងក្នុងមួយសប្តាហ៍។ សម្រាប់ជក់ប្រើរោមកែច្នៃមានភាពងាយស្រួលក្នុងការថែទាំ ងាយសម្អាតនិងប្រើបានរយៈពេលយូរ។ ជក់ដែលមានគុណភាពល្អបំផុតគឺអាចប្រើបានពី៥ទៅ១០ឆ្នាំឯណោះ ខណៈជក់មួយចំនួនក៏មានភ្ជាប់មកជាមួយសារធាតុការពារបាក់តេរីផងដែរ។ រីឯជក់ប្រើរោមធម្មជាតិវិញ ថ្វីដ្បិតតែទន់ប៉ុន្តែតម្រូវការថែទាំខ្ពស់ក៏ព្រោះវានឹងចាប់ផ្តើមខ្ទេចខ្ទីឬខូចសរសៃនិងឡើងប្រេងប្រសិនបើមិនបានសម្អាត ហើយក៏នឹងធ្វើឲ្យកាត់ផាត់ម្សៅមិនស្មើសាច់ល្អផងដែរ៕
Article by HEMSOKKHIM
