SOVRIN Magazine

សម្រស់សក់ទន់ភ្លឺរលោងមានសុខភាពល្អ និងដុះឆាប់រហ័សជាមួយប្រេងធម្មជាតិសំខាន់ៗទាំង៩

FASHION & BEAUTY 4 years ago

សុខភាពសក់រឹងមាំ ភ្លឺរលោងស្អាត និងមានសុខភាពល្អ ជាក្តីប្រាថ្នាចម្បងរបស់សុភាពនារីទាំងឡាយ។ បច្ចុប្បន្នវិធីថែបំប៉នសក់បានផ្តល់នូវជម្រើសជាមួយផលិតផលដ៏សម្បូរបែបរាប់តាំងពី សាប៊ូកក់ ក្រែមបន្ទន់ ក្រែមអប់ សេរ៉ូម វីតាមីន ស្ព្រៃយ៍ រហូតដល់ថ្នាំបណ្តុះសក់ជាដើម។ ហេតុដូច្នេះទើប សូវរីន ពាំនាំនូវអាថ៌កំបាំងថែរក្សាសក់ឲ្យ រឹងមាំ ភ្លឺរលោងស្រស់ស្អាត ជាពិសេស ដុះលឿនតាមរយៈប្រេងធម្មជាតិចំនួន៩មុខ។ ការពិតណាស់ ប្រេងធម្មជាតិត្រូវបានចម្រាញ់ចេញពីរុក្ខជាតិធម្មជាតិដោយប្រើវិធីសាស្ត្រចំហុយឬក៏រំហួត។ ប្រេងធម្មជាតិមិនត្រឹមតែមានភាពល្បីល្បាញទៅលើក្លិនដែលអាចជួយព្យាបាលផ្លូវអារម្មណ៍ និងបន្ថែមថាមពលស្មារតីប៉ុណ្ណោះទេ ព្រមគ្នានេះវាបានផ្ទុកនូវសារធាតុគីមីល្អដែលមានអត្ថប្រយោជន៍ចំពោះសុខភាពផងដែរ។

ប្រេងឡាវែនឌ័រ (Lavender) : ប្រេងឡាវែនឌ័រត្រូវបានគេរកឃើញថាមានសមត្ថភាពអាចជួយជំរុញល្បឿននៃការលូតលាស់សក់ ក៏ព្រោះវាផ្ទុកទៅដោយសារធាតុធម្មជាតិសំខាន់ៗដែលបង្កើនការលូតលាស់កោសិកា និងកាត់បន្ថយស្ត្រេស។ តាមការស្រាវជ្រាវមួយទៅលើសត្វកណ្តុរប្រេងនេះអាចធ្វើឲ្យរោមរបស់វាដុះលឿនក្នុងរយៈពេលដ៏ខ្លី។ ប្រេងឡាវែនឌ័រក៏ផ្ទុកទៅដោយសារធាតុ Antimicrobial ដែលជាសារធាតុប្រឆាំងនឹងពពួកមេរោគមីក្រុបតូចៗនិងជួយឲ្យប្រព័ន្ធភាពសុំាមានភាពខ្លាំង ខណៈដែលសារធាតុប្រឆាំងបាក់តេរីជួយឲ្យស្បែកក្បាលមានសុខភាពល្អ។ ដើម្បីទទួលបានប្រសិទ្ធភាព ចូរអនុវត្តយកប្រេងឡាវែនឌ័រ៤ទៅ៥តំណក់លាយជាមួយប្រេងពីរជម្រើសអាចជាប្រេងអូលីវឬប្រេងដូងចំនួន៣ស្លាបព្រាបាយ រួចលាបលើស្បែកក្បាលទុករយៈពេល១០នាទី សឹមកក់សក់សម្អាតចេញ។ អ្នកអាចអនុវត្ត២ទៅ៣ដងក្នុងមួយសប្តាហ៍

ប្រេងរ៉ូសម៉ារី (Rosemary): ប្រសិនបើអ្នកចង់ឲ្យសក់ក្រាស់ និងលូតលាស់ឆាប់រហ័ស ប្រេង រ៉ូសម៉ារីគឺជាជម្រើសដ៏ល្អមួយដែលវាមានសមត្ថភាពអាចបង្កើនដល់ការផលិតកោសិកាថ្មី។ យោងតាមការស្រាវជ្រាវមួយ ប្រេងរ៉ូសម៉ារីមានតួនាទីដូចទៅនឹងសារធាតុគីមីបណ្តុះរោមឬសក់ Minoxidil ដែរដែលវាជួយព្យាបាលសក់ឲ្យដុះឡើងមកវិញដោយមិនបង្កឲ្យស្បែកក្បាលរមាស់ឡើយ។ ដើម្បីទទួលបានអត្ថប្រយោជន៍ពីប្រេងនេះ អនុវត្តយកប្រេងរ៉ូសម៉ារី២ទៅ៣តំណក់លាយជាមួយប្រេងដូងឬប្រេងអូលីវ៣ស្លាបព្រាបាយ បន្ទាប់មកលាបនៅលើស្បែកក្បាលទុករយៈពេល១០នាទីរួចកក់សក់ចេញ។ អនុវត្តពីរដងក្នុងមួយសប្តាហ៍ដើម្បីឃើញលទ្ធផលឆាប់រហ័ស។

ប្រេងផ្លែស្រល់ (Cedarwood): ប្រេងផ្លែស្រល់មានសមត្ថភាពជួយបង្កើនការលូតលាស់សក់ និងកាត់បន្ថយសក់ជ្រុះដោយរក្សាតុល្យភាពក្រពេញប្រេងផលិតនៅក្នុងស្បែកក្បាល។ វាក៏ផ្ទុកនូវសារធាតុប្រឆាំងមេរោគផ្សិត និងសារធាតុប្រឆាំងបាក់តេរីដែលជួយដោះស្រាយបញ្ហាខុសៗគ្នាដែលបង្កឲ្យកើតអង្គែឬក៏ជ្រុះសក់។ តាមរយៈការពិសោធន៍មួយដោយយកប្រេងឡាវែនឌ័រ ប្រេងរ៉ូសម៉ារី និងប្រេងផ្លែស្រល់លាយបញ្ចូលគ្នាអាចមានប្រសិទ្ធភាពព្យាបាលបញ្ហាសក់លែងដុះឬទំពែក។ តែយ៉ាងណាយើងក៏អាចអនុវត្តតាមរូបមន្តដោយយកប្រេងផ្លែស្រល់២ទៅ៣តំណក់លាយជាមួយប្រេងដូងឬប្រេងអូលីវ២ស្លាបព្រាបាយលាបម៉ាស្សានៅលើស្បែកក្បាល និងទុកចោលរយៈពេល១០នាទី រួចលាងជម្រះចេញដោយទឹកធម្មតាឬកក់សក់ជាការស្រេច។ ប្រេងនេះភាគច្រើនយើងអាចរកបាននៅតាមទីផ្សារទំនើបឬហាងលក់ផលិតផលប្រេងធម្មជាតិ។

ប្រេងស្លឹកគ្រៃ: អង្គែអាចជាចំណោមមួយនៃជំងឺលើស្បែកក្បាល ហើយការដែលមានជំងឺនេះនៅលើស្បែកក្បាលអាចធ្វើឲ្យប៉ះពាល់ដល់សុខភាពសក់ផងដែរ។ ជាសំណាងល្អ ប្រេងស្លឹកគ្រៃមានប្រសិទ្ធភាពអាចព្យាបាលបញ្ហាអង្គែដោយតាមការសិក្សាជាក់ស្តែងមួយកាលពីឆ្នាំ២០១៥ បានរកឃើញថាប្រេងនេះអាចព្យាបាលបញ្ហាអង្គែក្នុងរយៈពេលត្រឹមតែមួយសប្តាហ៍ប៉ុណ្ណោះ។ ប្រេងស្លឹកគ្រៃនឹងមានប្រសិទ្ធខ្ពស់បើសិនយើងប្រើវាប្រចាំថ្ងៃ ដោយគ្រាន់តែអនុវត្តតាមវិធីងាយៗគឺយកប្រេងស្លឹកគ្រៃ៤ទៅ៥តំណក់បន្តក់ពេលកំពុងកក់សក់ ឬពេលកំពុងបន្ទន់សក់ និងធ្វើការម៉ាស្សាឲ្យសព្វស្បែកក្បាលជាការស្រេច។

ប្រេងផ្កា Clary Sage: ប្រេងផ្កា Clary Sage បានផ្ទុកនូវសារធាតុ Linalyl acetate ដូចទៅនឹងប្រេងឡាវែនឌ័រដែរដែលមានប្រសិទ្ធភាពជួយបង្កើនការលូតលាស់សក់។ វាអាចជួយពង្រឹងសរសៃសក់ឲ្យរឹងមាំ ដុះលឿន និងធ្វើឲ្យសក់ពិបាកដុះត្រឡប់មកជាដុះរលូនវិញ។ ធ្វើការលាយប្រេង Clary Sage ៣តំណក់ជាមួយក្រែមបន្ទន់សក់ ឬជាមួយជម្រើសប្រេងដូងឬប្រេងអូលីវ១ស្លាបព្រាបាយហើយលាបនៅលើស្បែកក្បាល។ ប្រសិនបើអនុវត្តជាប្រចាំចាំបាច់លាងទឹកចេញបន្ទាប់ពីលាបលើស្បែកក្បាល២នាទី ប៉ុន្តែបើធ្វើត្រឹមតែម្តងឬពីរដងក្នុងមួយសប្តាហ៍អាចទុកដល់១០នាទីទើបលាងជម្រះចេញ។

ប្រេងតែ Tea tree: ប្រេងតែ Tea Tree ផ្ទុកទៅដោយសមាសធាតុខ្លាំងក្នុងការសម្អាត ប្រឆាំងបាក់តេរី និងប្រឆាំងពពួកមេរោគមីក្រុបតូចៗ។ នៅពេលប្រើប្រេងនេះជាប្រចាំវាអាចជួយសម្អាតរន្ធឫសសក់ដែលកកស្ទះ និងបង្កើនការលូតលាស់សក់ត្រឡប់មកវិញ។ ប្រេងតែ Tea Tree ត្រូវបានគេយកមកផលិតជាផលិតផលរក្សាសម្រស់ច្រើនបែប ខ្លះធ្វើជាប្រភេទប្រេងលាបសុទ្ធ ខ្លះពាក់កណ្តាលប្រេង និងខ្លះលាយជាមួយគ្រីម។ ការសិក្សានៅក្នុងឆ្នាំ ២០១៣ រកឃើញថាផលិតផលដែលមានផ្ទុកធាតុផ្សំលាយប្រេង Tea Tree និងសារធាតុគីមីបណ្តុះសក់ Minoxidil មានប្រសិទ្ធភាពបណ្តុះសក់ជាងផលិតផលដែលប្រើធាតុផ្សំ Minoxidil តែឯង ខណៈដែលការសិក្សាជាច្រើនទៀតតម្រូវឲ្យប្រើតែប្រេង Tea Tree មួយមុខគឺគ្រប់គ្រាន់។ មកដល់ឆ្នាំ ២០១៥ គេរកឃើញថាប្រេង Tea Tree ត្រូវបានប្រើប្រាស់ទៅក្នុងផលិតផលព្យាបាលអង្គែ។ មានវិធីពីរយ៉ាងដែលយើងអាចប្រើប្រេងតែ Tea Tree ដើម្បីបណ្តុះសក់។ ទី១ បន្តក់ប្រេងតែ Tea Tree ១០តំណក់នៅពេលកំពុងកក់សក់ ឬពេលកំពុងបន្ទន់សក់ និងអនុវត្តជាប្រចាំ។ រីឯវិធីទី២ លាយប្រេង Tea Tree ៣តំណក់ជាមួយប្រេងអូលីវឬប្រេងដូង២ស្លាបព្រាបាយលាបលើស្បែកក្បាលដោយទុកចោលរយៈពេល១៥នាទី រួចកក់សក់ឬលាងជម្រះចេញដោយទឹកធម្មតា។

បន្ទាប់ពីអានអត្ថបទខាងលើជឿជាក់ថាប្រិយមិត្តភាគច្រើនប្រាកដជាមានចម្ងល់ថា បើប្រេងធម្មជាតិមានប្រសិទ្ធភាពយ៉ាងនេះហេតុអ្វីពេលអនុវត្តចាំបាច់លាយជាមួយប្រេងដទៃដូចជាប្រេងអូលីវឬប្រេងដូង ឬលាយជាមួយសាប៊ូកក់សក់ និងក្រែមបន្ទប់សក់? ជាការពិតណាស់ ថ្វីដ្បិតប្រេងធម្មជាតិសំខាន់ៗទាំងនេះមានអត្ថប្រយោជន៍ពិតមែន តែប្រសិនបើយើងប្រើវាលាបតែឯងវាងាយប្រឈមធ្វើឲ្យស្បែកក្រហាយឬរមាស់ឬក៏ប្រតិកម្មជាដើម។ ដូច្នេះយើងគប្បីប្រើវាលាយគ្នាជាមួយប្រេងដូងឬប្រេងអូលីវដើម្បីពង្រាវជាមុនទើបប្រសើរ ម្យ៉ាងប្រេងទាំងពីរនេះក៏ជួយបំប៉នស្បែកក្បាលនិងសក់ឲ្យមានសុខភាពល្អផងដែរ។ ប្រេងធម្មជាតិស័ក្តិសមប្រើចំពោះក្មេងវ័យជំទង់ និងមនុស្សពេញវ័យ តែប្រសិនបើអ្នកចង់ប្រើប្រាស់ជាមួយកូនតូចៗគួរតែប្រឹក្សាជាមួយអ្នកជំនាញជាមុនសិន។ ដើម្បីជៀសវាងការប្រតិកម្មជាមួយប្រេងណាមួយអ្នកអាចធ្វើការតេស្តបរិមាណតិចតួចនៅលើស្បែកមុនសម្រេចទិញយកមកប្រើប្រាស់៕

Article by HEM SOKKHIM

SUGGESTIONS