Sovrin
Sovrin
រយៈពេលមួយទសវត្សរ៍ចុងក្រោយ សង្កេតឃើញថាវិស័យហ្វេហ្សិននៅកម្ពុជាមានការរីកចម្រើនជាលំដាប់។ អ្នកច្នៃម៉ូដជើងចាស់កំពុងបង្កើនថ្វីដៃមិនសំចៃដៃ អ្នកច្នៃម៉ូដជាន់ថ្មីបានលេចមុខមកបន្តបន្ទាប់បង្ហាញឥទ្ធិពលលើភាពច្នៃប្រតិដ្ឋ ដែលធ្វើឲ្យហ្វេហ្សិនក្នុងស្រុកចាប់ផ្តើមមានការចាប់អារម្មណ៍ខ្លាំងឡើង រហូតមានមុខមាត់លើឆាកអន្តរជាតិជាញឹកញយ។ បើទោះបច្ចុប្បន្នហ្វេហ្សិនក្នុងស្រុកមានការអភិវឌ្ឍទៅតាមសម័យទំនើបជឿនលឿន និងចរន្តសកលភាវូបនីយកម្មយ៉ាងណាក្តី ប៉ុន្តែអ្នកច្នៃម៉ូដ ក៏ដូចជាអ្នកបង្កើតម៉ាកយីហោហ្វេហ្សិនហាក់នៅតែមិនបោះបង់អត្តសញ្ញាណជាតិរបស់ខ្លួន ដោយតែងតែលើកយកសិល្បៈវប្បធម៌មកបង្ហាញតាមរយៈខូឡិកហ្សិនមិនថា សម្លៀកបំពាក់ប្រភេទ Ready-to-Wear ឈុតសមោសរ ឈុត Haute Couture ឈុតហែលទឹក ឈុតច្នៃពីសម្ភារប្រើប្រាស់ រួមទាំងគ្រឿងលម្អដូចជាអលង្ការ និងកាបូបជាដើម។ ជាមួយការបញ្ចូលសិល្បៈខ្មែរទៅក្នុងឧស្សាហកម្មហ្វេហ្សិននេះ តើអ្នកច្នៃម៉ូដ ក៏ដូចជាអ្នកជំនួញហ្វេហ្សិនក្នុងស្រុកមានទស្សនៈយ៉ាងណា?
• អ្នកស្រី សៀង រ៉ាណែត ស្ថាបនិកសាលាហ្វេហ្សិន
អ្នកស្រី សៀង រ៉ាណែត ជាស្ថាបនិក ជានាយិកា និងជាគ្រូបង្រៀនច្នៃម៉ូដនៃសាលា MaPa Fashion។ ពីឆ្នាំ២០១៨មក អ្នកស្រីបានបណ្តុះបណ្តាលកូនខ្មែរជាច្រើននាក់ឲ្យក្លាយជាអ្នកច្នៃម៉ូដជំនាញពិតប្រាកដ និងប្រឡូកការងារហ្វេហ្សិនច្រើនផ្នែកនៅក្នុងឧស្សាហកម្មហ្វេហ្សិន។ ចំពោះការបញ្ចូលសិល្បៈខ្មែរទៅក្នុងហ្វេហ្សិនទំនើប អ្នកនាងបាននិយាយថា អ្នកច្នៃម៉ូដហ្វេហ្សិនខ្មែរពិតជាចាំបាច់ស្វែងយល់ពីសិល្បៈរបស់ខ្លួនឲ្យបានច្បាស់ និងស៊ីជម្រៅ ព្រោះវាជាឫសគល់ដើមកំណើត ជាដួងព្រលឹងរបស់យើង។ តាមរយៈការតាមដានផ្ទាល់ខ្លួន អ្នកស្រីឃើញថាការបញ្ចូលសិល្បៈខ្មែរទៅក្នុងហ្វេហ្សិនទំនើបមានការផ្សព្វផ្សាយ និងទទួលស្គាល់ទូលំទូលាយជាងមុន។ ជាក់ស្តែង កន្លងមកសិល្បៈហ្វេហ្សិនរបស់ខ្មែរបានបង្ហាញទៅដល់ប្រទេសល្បីៗដូចជា អូស្ត្រាលី ជប៉ុន និងអាស៊ីអាគ្នេយ៍ជាដើម។ អ្នកស្រីលើកទឹកចិត្តដល់អ្នកច្នៃម៉ូដហ្វេហ្សិនក្នុងស្រុកគ្រប់រូប គួរតែបញ្ចូលសិល្បៈខ្មែរទៅក្នុងការបង្ហាញហ្វេហ្សិនគ្រប់ប្រភេទតាមដែលអាចធ្វើទៅបាន ជាពិសេសតាមរយៈវិស័យភាពយន្តផងដែរ។ តែយ៉ាងណាការឌីហ្សាញនីមួយៗគួរគប្បីមាន Concept ច្បាស់លាស់ និងបែងចែកការដកស្រង់កម្រិតសិល្បៈទៅក្នុងលំដាប់ហ្វេហ្សិនណាមួយ។ ដូចជា របាំព្រះរាជទ្រព្យ គឺជាសិល្បៈស្ថិតក្នុងកម្រិតខ្ពង់ខ្ពស់សម្តែងសម្រាប់តែក្នុងសែរាជវង្ស ដូចនេះការដកស្រង់ក៏ត្រូវតែស្ថិតក្នុងហ្វេហ្សិនលំដាប់ខ្ពស់ដូចគ្នា។
• លោក Oliva Kong អ្នកច្នៃម៉ូដ
ជាអ្នកច្នៃម៉ូដ ជាគ្រូបង្ហាត់ដើរម៉ូដ និងមានម៉ាកយីហោផ្ទាល់ខ្លួន Queen Victoria លោក Oliva Kong បានសាងប្រជាប្រិយភាពមានការទទួលស្គាល់តាមរយៈស្នាដៃច្នៃម៉ូដសម្លៀកបំពាក់ប្លែកៗដែលដកស្រង់ពីធម្មជាតិ និងសិល្បៈវប្បធម៌របស់ខ្មែរ។ លោកថាមត៌កសិល្បៈខ្មែរពិតជាមានតម្លៃខ្លាំងណាស់ ពាក្យថាហ្វេហ្សិនគឺជាការច្នៃប្រតិដ្ឋរបស់អ្វីមួយទៅជារបស់ថ្មីមួយទៀត ដូច្នេះមត៌កដើមនេះហើយជារូបមន្ត ជាអ្វីគ្រប់យ៉ាងដែលអាចបំបែកទៅជារបស់ថ្មី។ លោកថាអ្នកច្នៃម៉ូដគួរតែបញ្ចូលសិល្បៈគ្រប់ទម្រង់ទៅក្នុងការងារច្នៃម៉ូដ ហើយការច្នៃមិនមែនយករបស់ដើមមកដាក់ទាំងស្រុងនោះទេ គឺត្រូវច្នៃបង្កើតជារបស់ថ្មីមួយទៅតាមការពេញនិយម និងភាពជឿនលឿន។ អាចជាការដកស្រង់តែពីក្បាច់ ពីចម្លាក់ ឬត្រង់ចំណុចណាមួយនៃសិល្បៈជាដើម។ លោកថាទោះមត៌កដើមអស្ចារ្យប៉ុនណា បើមិនមានការច្នៃប្រតិដ្ឋនោះទេ ក៏មិនមានអ្វីដែលថ្មីហើយប្លែកសម្រាប់ភាពរីកចម្រើនដែរ។
• អ៊ីដូ ចម និង អ៊ីយេន ចម ស្ថាបនិកម៉ាកគ្រឿងអលង្ការ
អ៊ីដូ ចម និងអ៊ីយេន ចម គឺជាបងប្អូនស្រីបង្កើតធំធាត់នៅតំបន់ប្រ៊ូឃ្លីននៃទីក្រុងញូវយកសហរដ្ឋអាមេរិក។ អ្នកទាំងពីរបានបង្កើតម៉ាកយីហោគ្រឿងអលង្ការ EdoEyen កាលពីឆ្នាំ ២០២០ ដោយផ្តោតលើទីផ្សារប៉ែកអឺរ៉ុប ដែលសំខាន់ម៉ូដនីមួយៗសុទ្ធសឹងដកស្រង់ពីក្បាច់ខ្មែរ និងពីអលង្ការរបាំបុរាណខ្មែរ។ ស្ថាបនិកទាំងពីរបានលើកឡើងថា “សិល្បៈខ្មែរមានភាពលេចធ្លោ នៅពេលដែលច្នៃបញ្ចូលជាមួយភាពទំនើប។ នៅពេលដែលការរចនាម៉ូដល្អស្អាតត្រូវបានបញ្ចូលទៅក្នុងគ្រឿងអលង្ការសម័យទំនើបហើយនោះ វាជួយផ្សព្វផ្សាយគ្រឿងអលង្ការបែបនេះឲ្យមានភាពទាន់សម័យ និងពេញនិយមឡើង។ យើងចង់ឲ្យអ្នកច្នៃម៉ូដ បើកចិត្តទូលាយក្នុងការដកស្រង់សិល្បៈខ្មែរប្រើសម្រាប់ការច្នៃម៉ូដដូចជាគ្រឿងអលង្ការរបស់ EdoEyen ដែលប្រើសម្រាប់តុបតែងអ្នកបង្ហាញម៉ូដ ប្រើក្នុងយុទ្ធនាការផ្សព្វផ្សាយ កម្មវិធីបង្ហាញម៉ូដ ក៏ដូចជាការបង្ហាញខ្លួនតាមទូរទស្សន៍។ល។ ការទទួលយកគំនិតថ្មីនៃការរក្សាសិល្បៈខ្មែរក្នុងរបៀបសម័យថ្មីនេះ នឹងជួយបង្កើតជីវិតថ្មីដល់វប្បធម៌ដែលរៀបនឹងរលុបបាត់។”
• អ៊ិត សុវណ្ណរាជ ស្ថាបនិក La Chhouk
“តាមបទពិសោធន៍ផ្ទាល់ខ្លួន ការបញ្ចូលសិល្បៈខ្មែរទៅក្នុង Recycled Fashion គឺមានប្រសិទ្ធភាពជាង និងឆាប់ទាក់ទាញចំណាប់អារម្មណ៍ជាងការច្នៃម៉ូដហ្វេហ្សិនទូទៅ ដោយសារអ្នកធ្វើខាង Recycled Fashion មានចំនួនតិច ពិសេសម៉ូដមើលទៅមានលក្ខណៈប្លែកភ្នែក។ ចំពោះការផ្សព្វផ្សាយក៏មានភាពទូលំទូលាយ គេអាចចង់យល់ពីអត្ថន័យ និងប្រវត្តិនៃសិល្បៈដែលដកស្រង់មកបង្ហាញ។ និយាយរួមយើងផ្តល់ចំណេះដឹងដោយប្រយោល។ មួយវិញទៀតហ្វេហ្សិនបែបនេះមានលក្ខណៈសហសម័យ វាអាចជាទំនោរនិយមថ្មីមួយសម្រាប់សិល្បៈដែលអាចឲ្យយើងឆ្ពោះទៅកាន់ឆាកអន្តរជាតិផងដែរ។ ខ្ញុំចង់សំណូមពរដល់អ្នកច្នៃម៉ូដទាំងឡាយគួរតែមានការសិក្សាស្រាវជ្រាវទៅលើទម្រង់សិល្បៈខ្មែរឲ្យបានច្រើន និងច្បាស់លាស់ ដើម្បីជៀសវាងមានការភ័ន្តច្រឡំជាមួយនឹងប្រទេសជិតខាង។”
• លោក គិត ហុកឆេ ស្ថាបនិកម៉ាកសម្លៀកបំពាក់ «យក្ស ភ្នំពេញ»
“បច្ចុប្បន្នឃើញថាម៉ាកយីហោក្នុងស្រុកជាច្រើនបានបញ្ចូលសិល្បៈខ្មែរទៅក្នុងការច្នៃម៉ូដរបស់ពួកគេ។ ជាក់ស្តែងការបញ្ចូលសិល្បៈខ្មែរទៅក្នុង Modern Streetwear គឺធ្វើឲ្យហ្វេហ្សិនមានលក្ខណៈពិសេសណាស់ ព្រោះម៉ូដនីមួយៗជាអារម្មណ៍នៃការបញ្ចេញគំនិតរបស់យើងខ្លួនឯង ហើយបានបង្ហាញពីមោទកភាពនៃវប្បធម៌ឬតម្លៃរបស់សិល្បៈប្រវត្តិសាស្រ្តយើង។ ពិសេសមួយទៀតនោះយើងអាចផ្សព្វផ្សាយស្ទីលសិល្បៈរបស់យើងតាមរយៈហ្វេហ្សិននេះទាំងក្នុង និងក្រៅប្រទេស ដែលដូចទៅនឹងការផ្សព្វផ្សាយ ដើម្បីឲ្យវប្បធម៌ និងប្រវត្តិសាស្ត្ររបស់ជាតិយើងមានការចាប់អារម្មណ៍កាន់តែខ្លាំង។ ខ្ញុំសូមឲ្យយុវជនខ្មែរទាំងអស់បន្តនូវការលើកតម្កើងតម្លៃនៃសិល្បៈខ្មែរនេះទៅមុខទៀត ដើម្បីឲ្យយុវជនក្រោយៗទៀតបានយល់ និងបានដឹង”៕
Article by HEM SOKKHIM
FLY HEART FIT
