ស្ថិតនៅលើកោះដាច់ ឬ Mekong Island តាមបណ្តោយផ្លូវបេតុងនៃភូមិក្បាលកោះ សង្កាត់កោះដាច់ ខណ្ឌជ្រោយចង្វារ រាជធានីភ្នំពេញ ហួសវត្តសាមគ្គីក្បាលកោះ ហៅ វត្តយក្ស បន្តិច ផ្ទះស្នាក់ក្នុងរចនាបថវីឡាថ្មសង្គមរាស្រ្តនិយមលាបពណ៌ផ្ទៃមេឃនៅខាងមុខ និងជាផ្ទះឈើបុរាណខ្មែរផ្នែកខាងក្រោយ ដែលមានដាក់ស្លាកឈ្មោះថា «ផ្ទះស្នាក់ចំការប៊ុន្និវត្តន៍» (Homestay Bonnivoit Garden) លេចឡើងស្រស់ស្អាតដាច់គេក្នុងចំណោមគេហដ្ឋានដែលនៅជុំវិញនោះ។ ផ្ទះស្នាក់នេះហ៊ុមព័ទ្ធដោយទីធ្លាធំទូលាយវែងទៅក្រោយ អមដោយដំណាំផ្លែផ្កាចម្រុះលាយឡំចោលម្លប់បៃតងត្រជាក់ត្រឈឹងត្រឈៃ លក្ខណៈជាផ្ទះចម្ការគួរឲ្យចង់ស្នាក់នៅក្រៃលែង។
ជួបជាមួយអ្នកស្រី ធា ស៊ីយ៉ានី ម្ចាស់ផ្ទះស្នាក់ និងជាម្ចាស់ទំព័រហ្វេសប៊ុក «Homestay & Restaurant Mrs. Syani Thea Mekong Island -Koh Dach- Cambodia» យើងបានដឹងអំពីប្រវត្តិសេវាកម្មផ្ទះស្នាក់នេះថា ផ្ទះនេះចាប់ផ្តើមបើកដំណើរការទទួលភ្ញៀវតាំងពីអំឡុងឆ្នាំ២០១១-២០១២ មកម្ល៉េះ ដោយសារលោកស្រីជាមគ្គុទ្ទេសក៏ទេសចរភាសាអាឡឺម៉ង់ស្រាប់ហើយអ្នកស្រីមានបំណងទាក់ទាញភ្ញៀវបរទេសទាំងឡាយឲ្យសាកល្បងមកឈ្វេងយល់ពីសក្តានុពលទេសចរណ៍ដ៏សម្បូរបែបនៅលើទឹកដីកោះដាច់ ជាយក្រុងភ្នំពេញ បន្ថែមលើការចំណាយពេលទស្សនាក្រុងភ្នំពេញ និងប្រាសាទបុរាណនានានៅខេត្តសៀមរាប។ តាមរយៈមុខរបរអាជីពរបស់អ្នកស្រីផ្ទាល់ អ្នកស្រីមានទំនាក់ទំនងល្អជាមួយបណ្តាក្រុមហ៊ុនទេសចរណ៍នានានៅក្នុងស្រុក ទើបអ្នកស្រីមានគំនិតរៀបចំបង្កើតកញ្ចប់ទស្សនកិច្ចមកកាន់កោះនេះលក់ឲ្យក្រុមហ៊ុនទាំងនោះ ហើយបន្តរក្សាបានអតិថិជនចាស់ថ្មីជាប់រហូតមកដល់បច្ចុប្បន្ន មិនស្រកស្រុតប្រជាប្រិយភាពឡើយ។
ចំពោះសេវាកម្មនៅទីនេះ អ្នកស្រីមានប្រសាសន៍ថា មានទទួលផ្តល់សេវាកម្មរៀបចំម្ហូបអាហារដែលមានមុខម្ហូបប្រចាំហាងពិសេសចំនួនបីមុខគឺ ញាំស្វាយ ត្រីចៀនចួន (ហ្វីឡេយកតែសាច់) និង ឆាត្រប់ជាមួយផ្សិត ដែលភ្ញៀវនិយមចូលចិត្តទទួល ទានជាប្រចាំ ពោលគឺ មិនចង់ឲ្យជាន់នឹងម្ហូបអត្តសញ្ញាណខ្មែរដែលភោជនីយដ្ឋានផ្សេងៗនៅទីក្រុងដាក់ឲ្យភ្ញៀវនោះទេ។ ចំពោះ ថ្នាក់បង្រៀនធ្វើម្ហូបនៅទីនេះ ភ្ញៀវចូលចិត្តរៀនធ្វើហហ្មុកសាច់ត្រី (ច្នៃប្រតិដ្ឋពិសេសតាមរូបមន្តប្រចាំហាង) ហើយយកមកទទួល ទានជុំគ្នា។ ពួកគេតែងស្ញើចសរសើរថា ហហ្មុកផ្ទះស្នាក់នេះមានរសជាតិឆ្ងាញ់ប្លែក (មិនចំហុយ) ខុសពីហហ្មុកនៅហាងដទៃ។ ភោជនីយដ្ឋានទីនេះ អាចទទួលក្រុមភ្ញៀវម្តងបានជាង៦០នាក់ជាអតិបរមា។ រីឯសេវាកម្មស្នាក់នៅវិញ អាចទទួលភ្ញៀវបានដល់២៤នាក់ក្នុងមួយក្រុម ដោយបែងចែកជាបន្ទប់ (ធំ ២, តូច ២, លក្ខណៈគ្រួសារ ១ អាចផ្ទុកបាន ១០-១២ នាក់) អាស្រ័យតាមចំនួនភ្ញៀវនិងប្រភេទភ្ញៀវនៃក្រុមនីមួយៗ។
Image Courtesy: Homestay & Restaurant Mrs. Syani Thea Mekong Island -Koh Dach- Cambodia
ក្រៅពីវិសេសភាពស្ថាបត្យកម្មបុរាណនៃផ្ទះស្នាក់ខាងលើ គួបផ្សំនឹងគុណភាពបដិសណ្ឋារកិច្ឋរួសរាយរាក់ទាក់ ការប្រកបរបរកសិកម្មតាមរដូវកាល តួយ៉ាង ដំណាំខ្ញី ត្រាវ និងប៉ិគក់ តាមរដូវកាលនៅលើដែនកោះជុំវិញសុទ្ធសឹងចូលរួមចំណែកអន្ទងចិត្តភ្ញៀវទេសចរបរទេសឲ្យឆៀងមកសម្រាកកម្សាន្តនៅទីនេះ។ ភ្ញៀវទាំងនោះមានជាលក្ខណៈគ្រួសារ និងអ្នកធ្វើការស្ម័គ្រចិត្តក្នុងសហគមន៍ ហើយជនជាតិដែលឈរលេខរៀងលំដាប់ទី១គឺ បារាំង និងអ៊ីតាលី បើតាមការអះអាងពីម្ចាស់ផ្ទះ។ «ទេសចរគួរយកពេលមកលេងកោះដាច់ ព្រោះនៅពេលគាត់ចុះពីជើងយន្តហោះមក គាត់ឃើញតែផ្ទះថ្មទេ! ដល់ពេលគាត់ចំណាយពេល (ថែម)តែបន្តិចទេ ឆ្លងដរបន្តិចមក គាត់នឹងឃើញជីវភាពមុខរបរអ្នកកោះដាច់ វិស័យសុខាភិបាល សាសនា វត្តអារាម សាលារៀន និងចូលទៅមើលគេត្បាញតាមផ្ទះ [..] មាន guide ខ្លះក៏ខលមកសួរខ្ញុំថា នៅកោះដាច់មានអីមើលខ្លះ ខ្ញុំក៏ប្រាប់តាមហ្នឹងទៅ » គាត់បានបន្ថែម។ អ្នកស្រីយល់ថា មគ្គុទ្ទេសក៍គប្បីណែនាំភ្ញៀវឲ្យមកទស្សនាឈ្វេងពីរបៀបរបបរស់នៅរបស់ប្រជាជនតាមមូលដ្ឋានសហគមន៍ពិតៗជាជាងសម្រុកទៅតែកន្លែងដែលរៀបចំជាលក្ខណៈអាជីវកម្មពេក៕
Article by SRIN SOKMEAN