×

ស្លឹក​ចេក​ខ្មែរ​ថែ​វប្បធម៌​ជាតិ​

TRAVEL & LIVING 12 months ago
 
 

            ស្លឹក​ចេក​មាន​អត្ថប្រយោជន៍​ជាច្រើន​ក្នុង​ជីវិត​រស់នៅ​ប្រចាំថ្ងៃ​ ​ដែល​សុទ្ធតែ​អាច​​​យកមក​ប្រើការ​ទៅតាម​តម្រូវ​ការចាំបាច់​។​ ​ពេល​មាន​ពិធីបុណ្យ​ទាន​ផ្សេងៗ​ ​ប្រជាជន​ខ្មែរយើង​មានការ​ពេញ​និយម​យកមក​ប្រើប្រាស់​តាំង​ពីបរមបុរាណ​រហូតមកដល់​ពេល​បច្ចុប្បន្ន​។​ ​តាំង​ពីក្មេង​ៗ​មក​ម្ល៉េះ​ ​យើង​តែងតែ​ចំណាំ​ឃើញ​ថា​ ​ចាស់ៗ​កាត់​យក​ស្លឹក​ចេក​យកមក​ចាត់ចែង​កែច្នៃ​ជា​ច្រើនយ៉ាង​នៅ​ក្នុង​ពិធី​បុណ្យចូលឆ្នាំ​ប្រពៃណី​ខ្មែរ​។​ ​ជាក់ស្តែង​ ​សព្វថ្ងៃនេះ​យើង​ក៏​នៅតែ​សម្គាល់​ឃើញ​ថា​ ​ប្រជាជន​ខ្មែរ​នៅតែ​ទម្លាប់​ធ្វើ​បែប​នេះ​ ​ជាពិសេស​នៅ​តាម​ទី​ជនបទ​ ​ព្រោះ​សម្បូរ​ដាំ​ដើមចេក​។​ ​ដោយឡែក​ ​នៅ​ទីក្រុង​ទោះ​មិនសូវ​មាន​គេ​ដាំ​ច្រើន​ ​តែ​ក៏​ងាយស្រួល​រក​ទិញ​ផង​ដែរ​ ​ព្រោះ​មាន​ដាក់​លក់​នៅ​តាម​ទី​ផ្សារ​នានា​។​

            ទន្ទឹម​នឹង​នេះ​ ​ដើម្បី​ជ្រើស​រើសសម្រាំង​យក​ស្លឹក​ចេក​ដែល​ល្អ​យកមក​ប្រើ​ ​គេ​តែង​យក​ស្លឹក​ដែល​នៅ​ស្រស់​ ​ពណ៌បៃតង​ ​មិន​មាន​ដាច់​រហែក​។​ ​សម្រាប់​ការ​កាត់​ស្លឹក​ចេក​ផ្ទាល់​នៅនឹង​ដើម​ភាគច្រើន​គេ​កាត់​មក​ទាំង​ធាង​តែម្តង​ ​ទើប​ចៀរ​យក​តែ​ស្លឹក​។​ ​ប៉ុន្តែ​បើ​គេ​ដាក់​លក់​តាម​ទី​ផ្សារ​វិញ​ ​មិនសូវ​ជា​មាន​ទាំង​ធាង​នោះ​ទេ​ ​ភាគច្រើន​គេ​ចៀរ​ស្លឹក​វា​យកមក​ចង​ត្រួត​គ្នា​ជាដុំ​ៗ​ ​និង​ដាក់​តម្រៀប​លក់​ ​ដើម្បីឲ្យ​មើលទៅ​មានសណ្តាប់ធ្នាប់​មិន​រប៉ាត់រប៉ាយ​ ​ឬ​ខូចខាត​ដោយ​ប្រការ​ណាមួយ​។​ ​រីឯ​ការ​ស​ម្អា​ត​ ​គេ​ស​ម្អា​តទៅ​តាមវិធី​ផ្សេងៗ​ទៅតាម​តម្រូវ​ការ​នៃ​ការប្រើប្រាស់​។​ ​ជាឧទាហរណ៍​ ​បើ​គេ​យក​ស្លឹក​ចេក​ទៅ​ខ្ចប់​ចំណី​នំនែក​ផ្សេងៗ​ ​ត្រូវ​លាង​ទឹក​ឲ្យបាន​ស្អាត​ ​ឬ​ខ្លះទៀត​គេ​និយម​យក​ធាង​ចេក​មក​ធ្វើជា​ជក់​ ​ឬ​ក្រណាត់​ស្អាត​ទៅ​ជ្រលក់​ប្រេង​ឆា​បន្តិច​ទើប​យកមក​លាប​ពីលើ​បន្ថែម​ស្លឹក​ចេក​បន្ថែម​ ​ដើម្បីឲ្យ​មើលទៅ​រលោង​ស្អាត​។​

            តាំងពីបុរាណមក​ ​យើង​សម្គាល់​ឃើញ​ថា​ស្លឹក​ចេក​ត្រូវ​បាន​យកមក​រៀប​កាច់​ធ្វើជា​បាយសី​ ​ដើម្បី​រៀបចំ​រ​ណ្តាប់​សម្រាប់​សែន​ទទួល​ទេវតា​ឆ្នាំ​ថ្មី​ក្នុង​ពិធី​បុណ្យចូលឆ្នាំ​ប្រពៃណី​ខ្មែរ​ផង​ដែរ​។​ ​ការរៀបចំ​រ​ណ្តាប់​នេះ​សម្រាប់​ទទួល​ទេវតា​នេះ​ដែរ​ ​គឺ​ត្រូវ​មាន​បាយសី​៣​ថ្នាក់​១​គូ​ ​និង​៥​ថ្នាក់​មួយគូ​ ​រួម​ជាមួយនឹង​គ្រឿង​រ​ណ្តាប់​ជាច្រើន​ផ្សេងទៀត​។​ ​ដើម្បី​ធ្វើបាយ​សី​ ​យើង​ត្រូវ​មាន​ដើមចេក​ ​ឈើ​សម្រាប់​ដោត​ ​និង​អ្វី​ដែល​ខ្វះ​មិនបាន​នោះ​គឺ​ស្លឹក​ចេក​ ​និង​ផ្កា​ម្លិះ​។​ ​ស្លឹក​ចេក​ត្រូវ​រើស​យក​ស្លឹក​ដែល​ល្អ​ពណ៌បៃតង​ ​មិនមែន​ស្លឹក​ដែល​ចាស់​ឡើងពណ៌​លឿង​នោះ​ទេ​ ​ចំណែក​ឯ​ផ្កា​ម្លិះ​យក​ផ្កា​ណា​ដែល​នៅ​ក្រពុំ​។​ ​ដើមចេក​កាត់​ជា​កង់​ៗ​មាន​វែង​ខ្លី​ទៅតាម​ថ្នាក់​ ​ហើយ​ស្លឹក​ចេក​នេះ​ដែរ​ ​ត្រូវ​ជូត​ឲ្យ​ស្អាត​ ​និង​ហែក​យក​ប្រវែង​ប្រហែល​មួយ​ចង្អុលដៃ​។​ ​ការ​ចាប់ផ្តើម​កាច់​បាយសី​ ​ដំបូង​ត្រូវ​យក​ស្លឹក​ដែល​បាន​ហែក​រួច​មូរ​វា​ជា​រាង​ស្រួច​ៗ​ ​និង​ដាក់​ផ្កា​ម្លិះ​នៅ​ខាងចុង​ស្រួច​នោះ​ ​មូរ​ឲ្យបាន​៥​ដូចគ្នា​ទើប​ដោត​ទាំង​៥​ជាប់គ្នា​ឲ្យបាន​៥​ដុំ​។​ ​បាយសី​១​ថ្នាក់​ត្រូវ​ដាក់​ស្លឹក​ដែល​មូរ​បាន​៥​ដុំ​នោះ​ដោត​ជុំវិញ​ដើមចេក​ ​រហូត​គ្រប់​ថ្នាក់​ទាំងអស់​។​

            មិនតែប៉ុណ្ណោះ​ ​ក្នុងរយៈពេល​ចូលឆ្នាំ​ថ្មី​នេះ​ដែរ​ ​ស្លឹក​ចេក​ក៏​ត្រូវ​បាន​យកមក​វេច​នំ​សម្រាប់​ទទួលទាន​ក្នុង​គ្រួសារ​ ​យកទៅ​វត្ត​ប្រគេន​ព្រះសង្ឃ​ ​ក៏ដូចជា​ចែក​ដល់​ញាតិមិត្ត​ ​ឬ​សម្រាប់​លក់​ ​ដែល​មាន​ដូចជា​ ​នំត្នោត​ ​នំអន្សម​ខ្នុរ​ ​នំ​ចេក​ ​នំសែសយ​ ​ព្រម​ជាមួយ​នំ​ផ្សេងទៀត​ស្ទើរតែ​រាប់មិនអស់​។​ ​នៅ​ពេល​យក​ស្លឹក​ចេក​មក​វេច​នំ​ ​ភាគច្រើន​ប្រជាជន​ខ្មែរ​តែង​ជ្រើសរើស​យក​ស្លឹក​ចេកណាំវ៉ា​ ​ឬ​ចេកទឹក​ ​ព្រោះ​វា​សម្បូរ​ងាយស្រួល​រក​ ​ហើយ​ស្លឹក​ធំ​ងាយស្រួល​ខ្ចប់​។​ ​ក្រៅពី​ស្លឹក​ចេកណាំវ៉ា​ ​និង​ស្លឹក​ចេកទឹក​ ​គេ​ក៏​អាច​​​យក​ស្លឹក​ចេក​ព្រៃ​ ​និង​ស្លឹក​ចេកជ្វា​យកមក​វេច​បាន​ដែរ​ ​ប៉ុន្តែ​វា​មិនសូវ​ជា​សម្បូរ​ទេ​ ​តំបន់​ខ្លះ​មាន​តិចតួច​ ​ឯ​តំបន់​ខ្លះទៀត​គ្មាន​តែម្តង​។​ ​ផ្ទុយទៅវិញ​ប្រសិនបើ​យក​ស្លឹក​ចេកអំបូង​ ​ឬ​ចេកពងមាន់​មក​វេច​ ​វា​ស្រួយ​ឆាប់​រហែក​ ​ហើយ​ស្ងោរ​ទៅ​ប្រែជា​ពណ៌​ខ្មៅ​៕​

Article by SOUNG SOKSAN


SUGGESTIONS