Sovrin
Sovrin
«កាមឹ» តៀមកាហ្វេបែបជប៉ុនកំពុងទាក់ទាញភ្ញៀវជាតិ និងអន្តរជាតិដែលមកសម្រាកលម្ហែនៅក្រុងសៀមរាប
TRAVEL & LIVING one year ago
«កាមឹ» គឺជាពាក្យមួយឃ្លាដែលមានសូរសៀងជាភាសាជប៉ុន និងត្រូវបានប្រសិទ្ធនាមឡើងជាតៀមកាហ្វេមួយដែលមានការរៀបចំតុបតែងយ៉ាងប្លែកភ្នែកដូចតៀមកាហ្វេបុរាណបែបជប៉ុន។ បើយើងធ្វើដំណើរចេញពីត្រង់បរិវេណខាងត្បូងវត្តដំណាក់ ឆ្ពោះទៅតាមដងវិថី Bamboo ទៅត្រង់ប្រហែល៥០០ម៉ែត្រ រួចបត់ឆ្វេងបន្តិច លោកអ្នកនឹងឃើញតៀមកាហ្វេបែបជប៉ុនមួយនេះ ស្ថិតនៅខាងឆ្វេងដៃ ដែលកំពុងបង្ហាញខ្លួនបង្អួតសម្រស់ទាក់ទាញអ្នកដំណើរដែលឆ្លងកាត់ទីនោះ។
គន់មើលខាងក្រៅអាចគ្រាន់តែជាតៀមកាហ្វេតូចមួយ ប៉ុន្តែបើបោះជំហានចូលដល់ខាងក្នុងបរិវេណនៃតៀមកាហ្វេ លោកអ្នកនឹងប្រទាក់ភ្នែកទៅនឹងសិល្បៈនៃការតុបតែងដេគ័រដែលពោរពេញទៅដោយការច្នៃប្រតិដ្ឋយ៉ាងស្រទន់ប្លែកភ្នែក។ គ្រប់ផ្នែកនៃតៀមកាហ្វេត្រូវបានព្យួរ ថ្ពក់ទៅដោយឧបករណ៍ឆុងកាហ្វេមានទាំងបុរាណ និងសម័យដែលមានដូចជា កែវ ពែង ប៉ាន់ ម៉ាស៊ីនកិនគ្រាប់កាហ្វេ រួមជាមួយនឹងផ្ទាំងគំនូរ រូបចម្លាក់ និងផ្ទាំងអក្សរបែបជប៉ុនគួរឲ្យចង់គយគន់។ ជាការពិត នេះគ្រាន់ជាចំណីចក្ខុដែលទទួលបានពីតៀមកាហ្វេនេះ តែនៅមិនទាន់អស់នៅឡើយទេ។ ពោល គ្រាន់តែទម្លាក់ខ្លួនអង្គុយចុះភ្លាម ក្លិនដ៏ឈ្ងុយនៃគ្រាប់កាហ្វេ បានរុញច្រានអារម្មណ៍ឲ្យចង់ក្រេបរសជាតិភ្លែត។ យើងអាចធ្វើការកម្មង់កាហ្វេដើម្បីក្រេបយករសជាតិដ៏ឈ្ងុយឆ្ងាញ់ និងអង្គុយលម្ហែនៅក្រោមម្លប់ឈើដ៏ធំត្រឈឹងត្រឈៃយ៉ាងត្រជាក់ចិត្ត ហាក់ធ្វើឲ្យអារម្មណ៍បានសម្រាកពីភាពតានតឹងទាំងឡាយ។
មិនតែប៉ុណ្ណោះ ទីនេះមានបរិយាកាសស្ងប់ស្ងាត់ល្អ ខ្យល់បកត្រជាក់ស្រួល គួបផ្សំនឹងទេសភាពទឹកហូរនៅផ្នែកខាងក្រោយនៃហាង ធ្វើអោយអារម្មណ៍កាន់តែស្រស់ស្រាយថែមមួយកម្រិត ពេលបានមកទទួលទានកាហ្វេនៅទីនេះ។ ពិសេសជាងនេះទៅទៀតនោះគឺ បរិយាកាសតៀមកាហ្វេបែបជប៉ុន កាមឹ អំណោយផលដល់ការជួបជុំនានា សំខាន់អ្នកដែលនិយមចូលចិត្តថតរូបគឺមិនខកបំណងតែម្តង ព្រោះគ្រប់ជ្រុងនៃតៀមកាហ្វេសុទ្ធតែអាចផ្តិតយករូបភាពស្អាតៗទុកជាអនុស្សាវរីយ៍។
ចំពោះទីនេះ ថ្វីបើមានបម្រើតែកាហ្វេ តែកាហ្វេមានច្រើនជម្រើស ជាមួយនឹងគ្រាប់កាហ្វេច្រើនប្រភេទ និងយកមកពីតំបន់ផ្សេងៗគ្នា ហើយរសជាតិក៏ខុសគ្នាទៅតាមនឹងដែរ។ ដូច្នេះ លោកអ្នកអាចជ្រើសរើសបានទៅតាមចំណង់ចំណូលចិត្ត ហើយវាក៏អាចជាបទពិសោធន៍ថ្មីសម្រាប់អ្នកចង់ភ្លក់រសជាតិកាហ្វេប្លែកៗមកពីច្រើនតំបន់នៅកន្លែងតែមួយ៕
Article by SOUNG SOKSAN
